Birhen Maria—Anto so Ibabaga na Biblia ed Sikato?
Say ebat na Biblia
Ibabaga na Biblia ya si Maria, say ina nen Jesus, so awalaan na espisyal a pribilehyo ya ilukon si Jesus, anggano sakey a birhen. Sayan milagro et impropesiya na Biblia diad libro na Isaias, tan nabasa diad Ebanghelyo nen Mateo tan Lucas ya agawa itan.
Diad propesiya nipaakar ed kiyanak na Mesias, onia so imbaga nen Isaias: “Manlukon so kalangweran a bii, tan mangiyanak na sakey a laki.” (Isaias 7:14) Diad panangigiya na Dios, inkonekta na sakey ya managsulat na Ebanghelyo, si Mateo, so propesiya nen Isaias ed pangilukon nen Maria ed si Jesus. Kayarin tinukoy nen Mateo ya si Maria et mamilagron nanlukon, intuloy to: “Agawa irayan amin pian nasumpal so imbaga nen Jehova diad panamegley na propeta to, ya inkuan to: ‘Manlukon so birhen a tan mangiyanak na sakey a laki, tan say ingaran dad sikato et Emmanuel,’ a say kabaliksan to no ipatalos et, ‘Walad Sikami so Dios.’”—Mateo 1:22, 23.
Inrekord met na managsulat na Ebanghelyo ya si Lucas so mamilagron panlukon nen Maria. Insulat to ya imbaki na Dios so anghel ya si Gabriel “pian onlad sakey a birhen ya akisipanan lan miasawa ed lakin manngaray Jose a nanlapud pamilya nen David, tan say ngaran na sayan birhen et Maria.” (Lucas 1:26, 27) Kinompirma nen Maria ya sikatoy birhen. Kayari ton arengel ya sikatoy magmaliw ya ina nen Jesus, say Mesias, intepet to: “Panon iyan nagawa, anta agak nin balot akiakdol ed laki?”—Lucas 1:34.
Panon ya manlukon so sakey a birhen?
Nanlukon si Maria panamegley na masanton espiritu, say aktibon pakayari na Dios. (Mateo 1:18) Imbaga na anghel ed si Maria: “Niwalad sika so masanton espiritu, tan tarongan kay pakayari na Sankatagyan. Tan lapud satan, samay niyanak et natawag a masanto, Anak na Dios.” b (Lucas 1:35) Mamilagron inyalis na Dios so bilay na Anak to ed eges nen Maria, kanian nanlukon.
Anto so gagala na pangiyanak na sakey a birhen?
Inusar na Dios so sakey a birhen pian ilukon si Jesus tan nawalaan na perpekton laman, pian niliktar to iray totoo ed kasalanan tan patey. (Juan 3:16; Hebreo 10:5) Inyalis na Dios so bilay nen Jesus ed eges nen Maria. Insan inusar na Dios so masanton espiritu to pian protektaan si Jesus ed antokaman ya ag-inkaperpekto legan ya sikatoy innginew.—Lucas 1:35.
Kanian inyanak si Jesus bilang perpekton too, ya singa si Adan nen agni nankasalanan. Ibabaga na Biblia nipaakar ed si Jesus: “Anggapoy ginawa ton kasalanan.” (1 Pedro 2:22) Bilang perpekton too, sarag ya bayaran nen Jesus so bili na dondon pian makaliktar so totoo ed kasalanan tan patey.—1 Corinto 15:21, 22; 1 Timoteo 2:5, 6.
Kasin nansiansia ya birhen si Maria?
Ag-ibabangat na Biblia ya si Maria et nansiansia ya birhen, ta nabasa tayo ya sikatoy awalaan ni na ananak.—Mateo 12:46; Marcos 6:3; Lucas 2:7; Juan 7:5.
Ibabangat na Biblia ya wala ray agagi nen Jesus
Kasin say impanlukon na birhen so “Immaculada Concepcion”?
Andi. Base ed New Catholic Encyclopedia, say doktrina ya Immaculada Concepcion et “say pananisia ya si Birhen Maria et agnaapektoan na ORIHINAL A KASALANAN manlapu lad gapo na impanbilay to, manlapu la nen sikatoy innginew. Amin a totoo et akatawir na kasalanan . . . Balet si Maria, diad panamegley na espisyal ya GRASYA, et aprotektaan tan ag-akatawir na orihinal a kasalanan.” c
Diad kabaliktaran, ag-ibabangat na Biblia ya si Maria et ag-akatawir na orihinal a kasalanan. (Salmo 51:5; Roma 5:12) Diad tua, impanengneng nen Maria ya sikatoy makasalanan lapud angiter na apay parad kaperdona na kasalanan to, ya singa ipapagawa na Mosaikon Ganggan nensaman ed saray ina. (Levitico 12:2-8; Lucas 2:21-24) Ibabaga na New Catholic Encyclopedia: “Say Immaculada Concepcion et agmalinew ya ibabangat ed Kasulatan . . . bangat iya na Simbaan.”
Panon tayon ipasen si Maria?
Impanengneng nen Maria so maabig ya alimbawa na pananisia, inkamaunor, inkamapaabeba, tan aralem ya panangaro ed Dios. Sikatoy sakey ed saray matoor ya balibalin aligen.—Hebreo 6:12.
Anggano espisyal ya pribilehyo so impagmaliw ton ina nen Jesus, ag-ibabangat na Biblia ya si Maria et nepeg ya dayewen o pampikasian. Ag-inikdan nen Jesus si Maria na nikadkaduman panangigalang tan agto met imbangat ed saray papatumbok to ya dayewen day Maria. Diad tua, likud ed saray libro na Ebanghelyo tan aminsan ya impamitla ed sikato diad libro na Gawa, aglan balot abitla si Maria diad nakekeran 22 ya libro na samay tatawagen dan Balon Sipan.—Gawa 1:14.
Anggapoy ebidensya ed Kasulatan ya si Maria et akaawat na espisyal ya atension—odino panangidayew ni ingen—na saray Kristiano nen inmunan siglo. Noagta, ibabangat na Biblia ya say Dios labat so nepeg ya dayewen na saray Kristiano.—Mateo 4:10.
a Diad samay propesiya nen Isaias, say Hebreo ya salita ya impatalos a “kalangweran a bii” et almah, ya nayarin ontutukoy ed bii ya birhen odino aliwa lan birhen. Balet, diad panangigiya na Dios, inusar nen Mateo so mas espesipikon Griegon salita ya parthenos, ya say labay ton ibaga et “birhen.”
b Kokontraen na arum so impangusar ed termino ya “Anak na Dios,” ya ibabaga ran singano akisekso so Dios ed sakey a bii. Balet, sayan ideya et ag-ibabangat na Biblia. Imbes, tinawag na Biblia si Jesus ya “Anak na Dios” tan “panguloan na amin a pinalsa” lapud sikato so unona tan alenleneg ya direktan pinalsa na Dios. (Colosas 1:13-15) Tinukoy met na Biblia so inmunan too, si Adan, ya “anak na Dios.” (Lucas 3:38) Si Adan et anak na Dios lapud sikatoy pinalsa na Dios.
c Komaduan Edisyon, Volume 7, pahina 331.
Ompan Nagustoan Mo Met
EBAT ED SARAY TEPET ED BIBLIA
Kasin Ina na Dios si Maria?
Walay malinew ya ebat na Biblia tan diad history na Inkakristiano tungkol ed saya.
ALIGEN SO PANANISIA RA
Maria—“Nia! Siak so Biin Aripen nen Jehova!”
Anto so ipapatnag na reaksion nen Maria ed si Gabriel diad pananisia to? Anto ni ran kualidad so impanengneng to?
BANGAT NA BIBLIA
Salien so Panag-aral na Biblia
Salien so libre ya interactive ya panag-aral na Biblia ya walay personal ya manbangat ed sika.