Antoy Ibabaga na Biblia Nipaakar ed Saray Pandemic?

I-PLAY

Say Ebat na Biblia

Impasakbay la na Biblia ya saray salot (saray sakit ya dakel so apektado, kaiba la ray pandemic) et nagawa legan na kaunoran iran agew. (Lucas 21:11) Saray pandemic et aliwan dusa ya nanlapud Dios. Diad tua, panamegley na Panarian na Dios, asingger lan panampoten na Dios so amin ya klase na sakit, kaiba la ray pandemic.

Kasin impasakbay la na Biblia ya nagawa iray pandemic?

Anggapoy espisipikon ibabaga na Biblia nipaakar ed saray pandemic odino sakisakit, singa say COVID-19, AIDS, tuberculosis, malaria, odino Spanish flu. Balet ipapasakbay to ya nagawa iray “salot” tan “makapatey a salot.” (Lucas 21:11; Apocalipsis 6:8) Kaiba iratan ed tanda na “kaunoran iran agew,” ya ontutukoy met ed “kaunoran a parte na sistema na mundo.”—2 Timoteo 3:1; Mateo 24:3.

Kasin dudusaen na Dios iray totoo panamegley na saray sakit?

Diad Biblia, nabasa tayo ditan iray pigaran inkagawa ya angusar so Dios na sakit pian dusaen iray totoo. Singa bilang, wala ray pigaran totoo ya dinisiplina to panamegley na ketong. (Numeros 12:1-16; 2 Arari 5:20-27; 2 Awaran 26:16-21) Balet, saratan ya inkagawa et aliwan pandemic ya akaalis ed saray inosentin totoo. Imbes, espisipikon dusa iratan ed saramay totoo ya talagan nanrebelde ed Dios.

Kasin saray nagagawa natan ya pandemic et dusa na Dios?

Andi. Ibabaga na arum ya uusaren na Dios iray pandemic tan arum nin sakit pian dusaen iray totoo natan. Balet, ag-itan susuportaan na Biblia. Akin?

Say sakey a rason et lapud arum ed saray mandadayew ed Dios—balanglan nensaman tan natan—et asali da met so nansakit. Singa bilang, say matoor ya lakin si Timoteo et ‘mabetbet so pansasakit to.’ (1 Timoteo 5:23) Balet anggapoy ibabaga na Biblia ya nanlapu itan ed Dios. Ontan met natan, wala ray matoor ya lingkor na Dios ya nansakit. Maslak et nibana labat ya biktima ira na ag-iilaloan ya nagawa.—Eclesiastes 9:11.

Sakey ni, ibabangat na Biblia ya agni sinmabi so panaon na Dios pian dusaen to iray mauges. Imbes, manbibilay tayo ed “agew na kililiktar”—say panaon ya iimbitaan na Dios so amin ya totoo ya onapit ed sikato pian niliktar. (2 Corinto 6:2) Say sakey ya paraan ya iimbitaan to ray totoo et diad panamegley na panagpulong a kimey nipaakar ed balibalin mensahe—say “maong a balita na Panarian.”—Mateo 24:14.

Kasin naandi ni iray pandemic?

On. Ipapasakbay na Biblia ya asingsingger lan onsabi so panaon ya anggapo lay mansakit. Diad uley na Panarian to, paandien la na Dios so amin ya klase na sakit. (Isaias 33:24; 35:5, 6) Ekalen to so paniirap, sakit, tan patey. (Apocalipsis 21:4) Tan bilayen to iray inatey pian na-enjoy da so bilay ya anggapo lay sakit diad perpekton kipapasen na mundo.—Salmo 37:29; Gawa 24:15.

Saray bersikulo nipaakar sakit

Mateo 4:23: “Insan niliber [nen Jesus so] interon Galilea, a nambabangat ed saray sinagoga ra tan impupulong to so maong a balita na panarian tan pinapaabig to so amin a klase na sakit tan amin a klase na beblay na totoo.”

Say labay ya ibaga: Diad saray ginawa nen Jesus ya milagro, impanengneng to no antoy gawaen na Panarian na Dios parad amin ya totoo.

Lucas 21:11: “Wala ray . . . salot.”

Say labay ya ibaga: Saray onkakayat ya sakit et kaiba ed tanda na kaunoran iran agew.

Apocalipsis 6:8: “Anengneng koy sakey a pusisaw a kabayo, tan samay akakabayo ed satan et Patey so ngaran to. Tan manumtumbok ed sikato so Lubok. Tan niiter ed sikara so autoridad . . . a mamatey ed panamegley na . . . eras.”

Say labay ya ibaga: Ipapanengneng na propesiya nipaakar ed apatiran akakabayo ya abitla ed Apocalipsis ya nagawa iray pandemic ed panaon tayo.