Kabkabat iray lakin Japanese tree frog ed singa ulit-ulit tan singa nankakanat ya tanol. Pero napambiigan mo nin siansia so tanol na kada lakin Japanese tree frog anggano mainga-ingal iray kakaiba ra. Adiskobre na saray researcher na patang diad Japan ya saray lalakin patang ya saniiba ed sakey ya pasen et organisadon maong ed panaggawa day tanol pian akiten iray bibiin patang.

 Nonot mo pa: Manggagaway tanol iray lalakin Japanese tree frog pian akiten iray bibiin patang. Manlalapu iyan tanol ed vocal cord na saray patang tan onkakasil iya no ondadalan ed vocal sac. Aya may partin onlolobo ed beklew da.

 Balet panon ya nibiig so tanol na sakey ya lakin patang no wala la ray kaiba ton arum ya lalakin patang? Naamtaan na saray researcher ya aglabat basta manggagaway tanol irayan Japanese tree frog noagta walay espisipikon pansusublayan na saray manasinggeran ya patang. Manpapalugaran ira kanian naiwasan dan manbabansag so tanol da. Lapud satan et makakapanggawa ira na chorus na malinew tan maksil ya nanduruman tanol ya ag-ira nakekesawan. Sakey ni lapud organisado so panaggawa day tanol, makakapampainawa iray arum ya patang diad baetan na saray chorus.

 Manbilib iray researcher na wireless communications ed inkaorganisado na saray Japanese tree frog ed panaggawa day tanol, kanian angusar ira na hi-tech ya panagkalkula pian nakontrol da so panagpawit na data ya ag-iratan mansasabatan. Bilang resulta, mas napantiwalaan la so pangipawit na data tan agmaabak na enerhiya.

 Antoy nibagam? Kasin say abilidad na Japanese tree frog ya mamawala na chorus ya nanduruma so tanol to et linmesa lapud ebolusyon? Odino walay nandesinyo?