“Say Dios a mangiiter na ilalo et panoen to kayo komon na liket tan deen lapud panmamatalek yod sikato, pian mas lalon ombiskeg so ilalo yo diad panamegley na pakayari na masanton espiritu.”—Roma 15:13, Balon Mundo a Patalos.

 “Say Dios na ilalo panoen to kayo komon ed amin a gayaga tan kareenan dia ed panisia yo, pian nalimbos kayo na lalo, dia ed pakayari na Espiritu Santo.”—Roma 15:13, Say Biblia.

 Diad sarayan imbaga nen Pablo, labay ton panoen komon na Dios na “liket tan deen” iray kapara ton mananisia. Sarayan balibalin kualidad et mikonektaan ed ilalo ya iiter na Dios tan ed pakayari na masanton espiritu.

 Naamtaan tayoy nipaakar ed ilalo ya iiter na Dios dia ed akasulat ya Salita to, say Biblia. Base ed Roma 15:4: “Amin ya insulat nensaman [diad Biblia] et insulat pian nibangat itayo, pian diad panagsungdo tayo tan diad ligliwa a manlalapud Kasulatan et nawalaan itayo na ilalo.” Ipapaamta na Biblia so imbaga na Dios ya solusyonan to ray problema ya mangeekal na ilalo ed saray totoo natan, singa say irap na bilay, aliwan patas ya panagtrato, sakit tan patey. (Apocalipsis 21:4) Usaren na Dios si Jesu-Kristo pian nagawa irayan imbaga to kanian walay ilalo tayo ya balibali so nagawa ed arapen.—Roma 15:12.

 Mas lalon ombiskeg so ilalo tayo ya manlalapud Dios no mantitiwala tayo ed sikato. No mas dakel so amta tayo nipaakar ed Dios, mas segurado tayo ya talagan napantiwalaan tayo. (Isaias 46:10; Tito 1:2) Maong labat ta napantiwalaan so ilalo ya iiter na Dios. Kanian manliket ya maong so sakey ya too tan nalikna toy deen anggano wala ray mairap ya situasyon ya dadalanen to.—Roma 12:12.

 Mikonektaan met so kareenan, liket, tan ilalo ed “masanton espiritu,” say aktibon pakayari na Dios. a Uusaren na Dios so masanton espiritu to pian tooren iray imbaga to tan mangiiter itan na ilalo ed sikatayo. Makatulong met iyan espiritu pian niwala ed saray totoo iray balibalin kualidad ya singa say liket tan kareenan.—Galacia 5:22.

 Diad tua say libro ya Roma et sakey ya sulat parad saray Kristiano ya manaayam ed syudad na Roma. Say arum ed saraman ya Kristiano et nanlapud Judion pamilya, say arum balet et andi. Pinaseseg iran amin nen Pablo ya pansagpotan day mankasakey ed panagnonot tan kagagawa anggano nandurumay lahi tan kultura da.—Roma 15:6.

 Impanonot nen Pablo ed saray Kristiano ed Roma ya nensaman ni et impasakbay la na Dios ya onsabi panaon ya mankakasakey ya mandayew ed sikato iray totoo ed amin ya nasyon. Pian pruebaan itan, amipat ya imbase nen Pablo ed Hebreon Kasulatan b so imbaga to. (Roma 15:9-12) Niay labay ton idanet: Aliwan saray Judio labat noagta pati saray totoo ed amin ya nasyon so nayarin minabang ed ministeryo na Kristo. Parepareho ira ya walaan na ilalo ya inter na Dios. Kanian nepeg ya awaten na amin ya walad kongregasyon na Roma so sakey tan sakey antokaman so lahi ra. Labay ton ibaga et nepeg ya ipanengneng day “kaabigan tan inkamaparawes ed sakey tan sakey.”—Roma 15:7.