“Itilak kod sikayo so kareenan ya iter ko. Say kareenan ya iter kod sikayo et duma ed samay iiter na mundo. Agyo aabuloyan a nagonigon odino ontakot so kapusoan yo.”—Juan 14:27, Balon Mundo a Patalos.

 “Itilak kod sikayoy kareenan; say kareenan kon dili so iter kod sikayo. Aliwan singa panangiter na sankamundoan so pangiter kod sikayo. Ag komun nagunigon tan ontakot so puso yo.”—Juan 14:27, Maung a Balita.

 Diad sarayan imbaga nen Jesus, pinaseguroan to ray apostol to ya agda kaukolay sobran manaburido no walay ray probleman dalanen da. Diad tulong na Dios et sarag day mansiansian kalmado ya singa sikato.

 Anton klase na kareenan so intilak nen Jesus, odino inter to ed saray apostol to? Inter nen Jesus ed sikara so kareenan to, labay ya ibaga pareho ed samay kareenan ya alikna to. No wala yan kareenan agto labay ya ibagan anggapo lay gulo o panamasegsegang. (Juan 15:20; 16:33) Anggano aliwan patas so impantrato na totoo ed si Jesus ya anggad pinatey da, mareen so isip tan puso to. (Lucas 23:27, 28, 32-34; 1 Pedro 2:23) Nansiansian kalmado ta amta ton inar-aro tan aabobonan nen Ama to, si Jehova. a—Mateo 3:16, 17.

 Inikdan nen Jesus na kareenan iray apostol to nen pinaseguroan to ra ya sikaran sanama et inar-aro tan aabobonan da ra. (Juan 14:23; 15:9, 10; Roma 5:1) Tinmulong iyan kareenan, ya akabase ed pananisia da ed si Jesus bilang Anak na Dios, pian naekal iray tatakotan tan pakakaaburidoan da. (Juan 14:1) Anggano agda la nakaiban personal si Jesus, impromisa tod sikara ya tulongan ira na masanton espiritu na Dios pian nawalaan iray talek tan kareenan. (Juan 14:25-27) Ag-antakot iray papatumbok nen Jesus ya onarap ed saray mairap ya situasyon ta amta ran walad sikara so panangabobon tan suporta nen Jehova.—Hebreo 13:6.

 Nen wadiad dalin si Jesus, apasalan na totoo ya ibagad sakey tan sakey ya ‘niwala komon so kareenan’ bilang kabiangan na panangibano ra. (Mateo 10:12, 13) Balet aglabat imbaga nen Jesus ya niwala so kareenan ed saray apostol to, noagta inikdan to ray kareenan. Sakey ni, say kareenan ya inter nen Jesus ed sikara et duma ed anggan anton kareenan ya niiter na mundo. b Nayarin makapangiter met so mundo na kareenan panamegley na saray maabig ya relasyon, kayamanan, inkasikat, odino posisyon. Balet say kareenan ya iiter nen Jesus et ag-akadepende ed saray kipapasen ed bilay. Tuloytuloy itan ya kareenan a walad dalem na puso.

 Imbaga iya nen Jesus ed saray matoor ya apostol to diad samay labi antis na impatey to. Diad saman ya labi imbaga tod sikara ya asingger to la ran taynan. (Juan 13:33, 36) Kanian maer-ermen iray apostol to. (Juan 16:6) Lapud satan pinaseguroan ira nen Jesus, impaliwawa tod sikara no akin ya ag-ira nepeg ya manaburido ed saray nagawa no anggapo la.

 Satan ya imbaga nen Jesus et makapaseseg met ed saray Kristiano natan. Nawalaan tayo met na kareenan. (2 Tesalonica 3:16) No magmaliw tayon disipulo nen Jesus naaralan tayo ya inar-aro tan aabobonan to tayo tan na Ama ton si Jehova. (Colosas 3:15; 1 Juan 4:16) Lapud satan, agtayo kaukolan so masyadon manaburido. Akin ey? Ta walad abay tayo so Dios.—Salmo 118:6; Filipos 4:6, 7; 2 Pedro 1:2.

 Bantayan iyan antikey ya video pian nawalaan kay ideya ed libro na Juan.