“Say pananisia et say mabiskeg a panagmatalek a seguradon nagawa imay iilaloan.”—Hebreo 11:1, Balon Mundo a Patalos.

 “Say pananisia sikato so agpanduaruwa ed saray bengatla ya iilaloan.”—Hebreo 11:1, Say Biblia.

 Nabasa ed sayan bersikulo so sankasimplian ya kabaliksan na pananisia base ed Kasulatan, tan nanengneng ed sayan bersikulo ya say pananisia et mas ni nen say basta labat panisia.

 “Say pananisia et say mabiskeg a panagmatalek a seguradon nagawa imay iilaloan.” Diad samay orihinal ya lenguahen inusar nen insulat so Hebreo 11:1, say Griegon salita ya impatalos bilang “pananisia” et nayarin ipasabi toy ideya na talek, tiwala, odino kombinsido ya nagawa so sakey ya bengatla. Say ontan ya pananisia et aliwan basta kugkugip labat; noagta “seguradon nagawa imay iilaloan.” Say Griegon salita ya impatalos bilang “seguradon nagawa imay iilaloan” a et nayari met ya ipatalos bilang “titulo,” ya ontutukoy ed garantiya ya mangiiter na kaseguradoan, odino talek, diad samay akanggawa ed satan.

 “Say pananisia et . . . say malinew ya ebidensya [odino, “makakombinsin ebidensya,” paimanod leksab] na saray bengatlan tua anggano agnanengneng.” Say pananisia et resulta na matibay ya ebidensya. Mabisbiskeg itan ya ebidensya kanian nakombinsi so sakey ya too ya panisiaan so sakey a bengatla anggan agto itan nanenengneng.

 Say libro na Biblia ya Hebreo et insulat nen apostol Pablo parad saray unonan siglo ya Kristiano ya nambilay balanglan diad loob odino diad paliber na Jerusalem. Diad sayan sulat, impaliwawa nen Pablo so kaimportantian na pananisia. Singa bilang, oniay insulat to: “No anggapoy pananisia et imposiblin napaliket so Dios, ta siopaman ya onaasingger ed Dios et nepeg a manisia a sikatoy wala tan tumangan to iramay masimoon a manaanap ed sikato.” (Hebreo 11:6) Kayarin imbaga nen Pablo so labay ya ibaga na pananisia diad Hebreo 11:1, angiter na saray alimbawa na lalaki tan bibii diad Biblia ya angipanengneng na sayan kualidad. Imbaga to no panon ya impanengneng na sarayan lalaki tan bibii so pananisia ra diad panguunor dad panlabayan na Dios.—Hebreo 11:4-38.