Diad United States, manlapud 1990 ya anggad 2015, adoble so bilang na saray mandidiborsyo ya manedad na 50 ya patagey tan atriple ed saramay manedad na masulok ya 65. Akin et wala ray maedad la ya mandidiborsyo? Antoy gawaen yo pian ag-itan nagawa ed sikayon sanasawa?

Diad sayan artikulo

•  Akin et wala ray maedad la ya mandidiborsyo?

•  No antoy nagawaan yo

•  Giya parad pantongtong

•    Say kaslakan ya rason no akin ya mandidiborsyo iray maedad lan sanasawa et lapud binmetel lay aroan da. Diad panakar na panaon, wala ray sanasawan nagmaliw lan mandumaan iray labay dan gawaen tan ngalngali anggapo lay pamparehoan da. Odino no angkabaleg la ray ananak da tan anggapo la rad pudir da, ompan diman na-realize na sanasawa ya abaybayag ya say nampokusan da labat et saray responsabilidad da bilang sakey ya ama odino ina, kanian alingwanan dan aralen no panon so magmaliw ya maong ya asawa.

•    Diad agano ni ran dekada, ibabaga na saramay ipapasen ya eksperto ed panangasawa ya dapat manpokus iray walaay asawa ed sarilin pankaukolan da. Kaukolan da kunon itepet iraya ed sarili da: ‘Kasin maliket ak ed sayan relasyon?’ ‘Kasin makakatulong itan pian magmaliw ak ya mas maong a too?’ ‘Kasin nipapalikna ed siak na asawak so panangaro tan panamabli ya kanepegan ko?’ Ta no andi so ebat mo, dapat gawam no antoy sankaabigan parad sika—midiborsyo ka la tan enjoy moy bilay mo!

•   Normal la natan so panagdiborsyo. Oniay insulat na sociologist ya si Eric Klinenberg: “Nensaman, no walay agla maliket ed asawa to tan labay toy midiborsyo, kaukolan to nin paneknekan no akin ya nepeg ya midiborsyo. Balet baliktad la natan: No agka la maliket ed relasyon yon sanasawa, kaukolan mon paneknekan iray rason no akin ya aanosan mo ni relasyon yo, ta parad dakel ya totoo natan, say importante et no antoy mamaliket ed sika.” a

 Diad tua, no midiborsyo so sakey ya too, singa to labat isasalat iray problema to ed duman klase na problema. Singa bilang, naamtaan ed sakey ya impanaral ya “kaslakan ed saramay nandiborsyo ya maedad la et naproproblema irad kuarta, lalo la iray bibii.”

 Wala ni kaukolan ya ikonsidera. “Sarag moy mangigapo na balon kabibilay, pero sika nin siansia itan,” so kuan na libron Don’t Divorce. “Anto la ray ginawam ya pananguman ed paraan na pitotongtong mo ya ag-agustoan na asawam? Anto la ray ginawam ya pananguman ed reaksion mo no walay agmo nagugustoan?” b

•   Awat yoy pananguman. Anggapo tay relasyon ya agmanguman. Nayarin anguman so ulopan yon sanasawa manlapu la nen anggapo lad pudir yo iray ananak yo odino lapud mandumaan la ray labay yon gawaen. Imbes ya isipen mo ya agla komon anguman may datin situasyon yo, manggawa kay paraan no panon mon naparakep so situasyon yo natan.

   Prinsipyo na Biblia: “Agmo ibabaga, ‘Akin et mas maabig iray agew nensaman nen say natan?’ ta aliwa kan marunong no itepet mo ’ya.”​—Eclesiastes 7:10.

•   Pansiansia yon malet so ulopan yon sanasawa. Sarag mo kasin aralen so balon hilig na asawam, odino sarag mo kasin tulongan so asawam pian nagustoan to met so hilig mo? Sarag yo kasin salien so balon bengatla ya parehon labay yo? Say gagala yo et pian saniba yon gawaen itan, pian nalikna yo ya talagan sanasawa kayo, aliwa labat ya basta saniba kayod abung.

   Prinsipyo na Biblia: “Mantultuloy komon ya anapen na kada sakey so pankaabigan na arum a too, aliwan say dilin pankaabigan to.”​—1 Corinto 10:24.

•   Pansiansia yon maong so panagtrato yo ed sakey tan sakey. Agyo itutunday maong ya panagtrato yo ed sakey tan sakey lapu labat ta abayag kayo lan sanasawa. Marespeton mitongtong ed asawa yo tan ipanengneng yo nin siansiay maabig ya ugali ya singa nen saninaro kayo ni labat. Ibaga yoy “ipangasim pa” tan “salamat.” Lanang yon ibalikas so panangaro yo tan pisalamatan yo iray gagawaen na asawa yo parad sikayo.

   Prinsipyo na Biblia: “Ipanengneng yoy kaabigan ed sakey tan sakey, magmaliw kayon maabagey.”​—Efeso 4:32.

•   Pawil yo ray balibalin agawa ed sikayo diad apalabas. Saniba yon nengnengen iray litrato yo nen nankasal kayo, odino saray litrato yo ed arum ya okasyon ya saniba kayo. No gawaen yo itan, napansiansia yo odino nipawil yo so aro tan respeto ed relasyon yon sanasawa.

   Prinsipyo na Biblia: “Kada asawan laki ed sikayo et nepeg ton aroen so asawa to a singa ed dilin laman to; ontan met, say asawan bii et nepeg a walaan na aralem a respeto ed asawa to.”​—Efeso 5:33.