Akasabi la anggad Crimea so graben isusumpa na saray autoridad na Russia ed saray Tasi nen Jehova. Aglabat imbawal na gobierno ed Russia iray legal ya korporasyon na saray Tasi, noagta malinlinew ya labay da met ya ekalen so mareen ya panagdayew da. Manlapu la nen imbawal so kimey na saray Tasi nen Abril 2017, dakel lan pantitipon na saray Tasi so ni-raid na saray autoridad na Russia, kanian dakel so inaresto tan impriso. Ontan met so nagagawa ed saray Tasi nen Jehova diad Crimea.

Agawa so unonan malaknab ya impan-raid ed Crimea nen Nobyembre 15, 2018 diad Dzhankoy, nen ni-raid na manga 200 ya pulis tan special forces officers so waloran abung ya nantitiponan na angkelag ya grupo na saray Tasi pian saniiba dan basaen tan pantongtongan so Biblia. Puersaan ya nilooban na ag-onkulang ed 35 ya armadon pulis ya nansakob so lupa ra so abung nen Sergey Filatov, ya kawalaan na anemiran Tasi. Ataktakot ya maong iray Tasi ed saman ya agawa. Diad saman et intulak na saray pulis so 78 años ya laki ed padir, pinakebkeb da ed flooring, pinosasan da, tan pinepekpek da, kanian kaukolan ya ibatik ed ospital so laki kayari to man. Na-stress ya maong tan abigbigla so duara nin maedad lan lalaki kanian tinmagey so presyon na dala da tan imbatik met irad ospital. Makapaermen ta diad sakey ya abung ya ni-raid da et nakalan so sakey ya biin malukon.

Kayari na impan-raid, naakusaan si Mr. Filatov ya mangoorganisa kuno na kimey na “organisasyon ya extremist” base ed Article 282.2(1) na Russian Criminal Code. Nen Marso 5, 2020 senentensiaan na district court diad Crimea si Mr. Filatov na anemiran taon ya pakapriso ed sakey ya general regime prison colony. Kayarin asentensiaan, impriso dan tampol.

Diad saray sinmublay ya taon kayari na samay impan-raid ed Dzhankoy nen 2018, tuloytuloy nin puersaan ya lolooban na saray special forces officer iray abung na saray Tasi ya pansususpetsaan dan manggagawa na kimey na saray extremist. Say sankabaloan ya impan-raid et nen Mayo 22, 2023. Nen manga 6:30 ed kabuasan, masulok ya samploran officer so linmoob ed sakey ya abung diad Feodosia, limara ed sikara so armado. Pinatikleb da ray Tasi ed flooring legan dan iimbestigaan so abung diad masulok ya taloran oras. Inaresto da so sakey ya lakin Tasi, insan da inawit ed Sevastopol pian tepetan.

Kayari na saray impan-raid ed kaabungan tan saray impanlitis tan impansentensia ed saray lalakin Tasi, natan et walay 12 ya akapriso tan asentensiaan ira ya napriso na anggad anemira tan kapalduan taon. Amin da et naakusan ya mangidadaulo ed saray kimey na extremist ya organisasyon.

1. Oktubre 18, 2024

   Labinduan Tasi nen Jehova so akapriso natan diad Crimea.

2. Mayo 22, 2023

   Ni-raid na saray pulis so abung na sakey ya Tasi diad Feodosia. Kinompiska da ray elektronikon gadyet tan apriso so sakey ya Tasi.

3. Agosto 5, 2021

   Inimbestigaan so waloran abung na saray Tasi. Naaresto si Aleksandr Dubovenko tan Aleksandr Litvinyuk.

4. Oktubre 1, 2020

   Ni-raid so siameran abung diad Sevastopol. Inaresto si Igor Shmidt tan impriso antis nin litisen.

5. Hunyo 4, 2019

   Ni-raid na saray special forces officer so samploran abung diad Sevastopol. Kayari to et kinasoan si Mr. Stashevskiy ya mangoorganisa kuno na kimey na saray extremist.

6. Marso 20, 2019

   Ni-raid na saray special forces officer so waloran abung diad Alupka tan Yalta. Tinetepetan si Mr. Gerasimov insan kayari to et kinasoan da ya mangoorganisa kuno na kimey na saray extremist.

7. Nobyembre 15, 2018

   Ni-raid na masulok a 200 ya pulis tan saray special forces officer so waloran abung diad Dzhankoy, kaiba lay abung nen Mr. Filatov.