Diad dakel a taon, inaresto tan impriso na gobierno na Eritrea iray Tasi nen Jehova—kaiba la ray bibii tan mamatatken—lapud relihyoson kimey da odino lapud ag-amtan rason, ya agla ra nilitis odino kinasoan. Kinansela nen Presidente Afwerki so citizenship na saray Tasi panamegley na sakey a ganggan ya impaakseb to nen Oktubre 25, 1994 lapud agsinmuporta iray Tasi ed pamboto pian pagmaliwen ya bulos so bansan Eritrea nen 1993 tan lapud agnaako na konsiensia na saray Tasi so pansundalo. Nensaman, antis ni na satan ya puersaan ya panagsundalo, walay probisyon ya iiter na saray autoridad na Eritrea parad alternatibon serbisyo ya anggapoy koneksion to ed militar. Dakel ya Tasi so akibiang ed satan ya serbisyo legan na termino na nanduruman manuley ed gobierno. Mauksoy ya mangiiter iray autoridad na “Saray Certificate na Impakasumpal ed Serbisyo Parad Bansa” tan mabetbet ya papagalangan iray mibibiang ed satan ya kimey. Balet lapud samay ganggan ya impaakseb na presidente et biglan ipripriso, papairapen, tan mamaltratoen la na saray pulis tan militar iray Tasi nen Jehova pian puersaen iran benegan so pananisia ra.

Natan et wala nid prisoan so 64 ya Tasi nen Jehova (34 ya lalaki tan 30 ya bibii). Nen Disyembre 4, 2020 imbulos so 28 ya Tasi nen Jehova (26 lalaki tan 2 bibii) kayarin apriso so kada sakey na 5 anggad 26 ya taon lapud pananisia ra. Nen Enero 29, 2021 imbulos so sakey a lakin Tasi kayarin apriso na masulok ya 12 taon, tan imbulos met so talora nin Tasi nen Pebrero 1, 2021 (sakey a laki tan duaran bibii). Kada sakey et apriso na apatira anggad siameran taon.

Apatira la so inatey ya Tasi legan iran akapriso ed Eritrea, tan taloran maedad lan Tasi so inatey kayari iran nibulos ed prisoan lapud mair-irap ya kipapasen ya naeksperiensya ra ed prisoan.

Nen 2018 duaran Tasi so inatey kayari iran inyalis ed Mai Serwa Prison. Si Habtemichael Tesfamariam et inatey diad edad ya 76 nen Enero 3, tan si Habtemichael Mekonen et inatey diad edad ya 77 nen Marso 6. Sarayan lalaki et impriso na saray autoridad na Eritrea nen 2008 anggano anggapoy kaso ra.

Nen 2011 tan 2012, duaran Tasi so inatey lapud marukruksan impantrato ed sikara diad Meitir Prison Camp. Si Misghina Gebretinsae et inatey diad edad ya 62 nen Hulyo 2011 lapud sobran petang diad “underground,” say tawag ed pasen ya pangiyaakaran ed saray priso pian dusaen. Si Yohannes Haile et inatey diad edad ya 68 nen Agosto 16, 2012 kayari na ngalngali apat taon ya impakapriso to diad kipapasen ya miparad satan. Inatey met so taloran maedad lan Tasi, sikara di Kahsai Mekonnen, Goitom Gebrekristos, tan Tsehaye Tesfariam, kayari iran nibulos lapud saray mair-irap a kipapasen ya inanosan da legan iran walad prisoan diad Meitir Camp.

Tuloytuloy nin ibabaliwala na Eritrea so estandarte ya tutumboken ed interon mundo parad kanepegan na too. Ag-aabobonan na saray makapanyarin ahensia ya mangidedepensa ed saray kanepegan na too so pangibabaliwala ed saray manunan kanepegan, tan kekerewen da ya umanen na Eritrea so situasyon diman.

Nen 2014 inawat na Human Rights Council (HRC) so report na Special Rapporteur nipaakar ed pangibabaliwala ed kanepegan na too diad Eritrea, tan say kerew ya respetoen komon na saray autoridad so kanepegan na sakey ya toon agto labay so mansundalo lapud agnaako na konsiensia to “base ed estandarte ya uunoren ed interon mundo” tan “seguroen da ya naasikaso so bunigas na amin ya akapriso; seguroen da ya naikdan na atension so amin ya mansasakit . . . tan gawaen ya mas maabig so kipapasen na saray akapriso base ed estandarte ya tutumboken ed interon mundo.” Diad sakey a resolusyon nen 2015 kinerew na HRC ed gobierno na Eritrea ya “abuloyan da so agpansundalo na sakey no ag-itan naako na konsiensia to.”

Nen 2016 indeklara na Commission of Inquiry on Human Rights ed Eritrea ya saray autoridad na Eritrea et manggagaway “krimen ya inkaruksa ed too” diad “pamapasegsegang” da ed saray Tasi nen Jehova tan saray arum ni “lapud relihyon tan lahi da.”

Nen 2017 imbalikas na African Committee of Experts on the Rights and Welfare of the Child (ACERWC) so pampapaga da lapud anggaman wala ray legal ya proteksion, agminanabang “iray ananak na saray Tasi nen Jehova” ed saratan ya kanepegan tan maruksa so panagtrato ed sikara. Inrekomenda na ACERWC ya saray autoridad na Eritrea et nepeg dan “bidbiren tan sigpot ya iter ya anggapoy panaglabi ed saray ugugaw so Kawayangan ed Panagnonot, Konsiensia, tan Relihyon.”

Nen 2018 inrekomenda na African Commission on Human and Peoples’ Rights a kaukolan ya say Eritrea et “manggawan tampol na paraan pian nasolusyonan so impangekal ed saray manunan kanepegan na amin ya akapriso, pati . . . diad saray membro na relihyon ya Tasi nen Jehova” tan ingganggan na satan so pan-imbestiga ed saray inreport ya impatey na saray Tasi ya walad prisoan. Indanet na satan ya ahensia ya nepeg a seguroen na Eritrea ya saray Tasi nen Jehova et “napansiansia day kanepegan da bilang citizen.”

Nen Mayo 2019 binilin na UN Human Rights Committee (CCPR) so Eritrea ya nepeg a seguroen dan ipaakseb so pangiter na kawayangan ed relihyon tan papanisiaan tan “pangibulos ed amin ya toon inaresto odino impriso lapud uusaren day kawayangan ed relihyon da, kaiba ed saya iray Tasi nen Jehova.” Kinerew met na CCPR ed Eritrea ya “bidbiren dan legal so agpansundalo na sakey no ag-itan naako na konsiensia to, tan mangitarya so gobierno na alternatibon serbisyo ya anggapoy koneksion to ed militar parad saramay agda labay so mansundalo lapud agnaako na konsiensia ra.”

Diad sakey ya report nen Mayo 12, 2021 inabisoan na UN Special Rapporteur so gobierno na Eritrea ya nepeg dan “ibulos lan tampol tan anggapo lay kekerewen o aanapen da ed amin ya wala nid prisoan ya anggapoy kaso tan ag-alitis lapud pananisia odino papanisiaan da, kaiba la ray 20 ya Tasi nen Jehova,” tan “usisaen da lamet so desisyon dan ekalan na citizenship iray Tasi nen Jehova lapu labat ed relihyon da, igalang day rekomendasyon na African Commission on Human and Peoples’ Rights pian naseguro dan napansiansia na saray Tasi nen Jehova iray karapatan da bilang citizen, tan imbestigaan da ray nireport ya Tasi nen Jehova ya inatey ed prisoan.”

Kaslakan ed saray Tasin lalaki et apriso ya anggapoy malinew ya sentensia ra, tan anggapoy ilalo ran nibulos anggad ipatey da, odino anggad no asingger la ran ompatey. Lapud anggapoy bibidbiren ya legal a paraan ed bansa ra odino antokaman a remedyo ya nagawaan da, ompapaway ya say impakapriso ra et legay bilay a sentensia lanlamang.

1. Oktubre 17, 2024

   Ami-amin et 64 ya Tasi so akapriso.

2. Pebrero 1, 2021

   Imbulos ed prisoan so taloran Tasi.

3. Enero 29, 2021

   Imbulos ed prisoan so sakey a Tasi.

4. Disyembre 4, 2020

   Imbulos ed prisoan so 28 ya Tasi.

5. Marso 6, 2018

   Inatey si Habtemichael Mekonen diad edad ya 77 kayarin inyalis ed Mai Serwa Prison.

6. Enero 3, 2018

   Inatey si Habtemichael Tesfamariam diad edad ya 76 kayarin inyalis ed Mai Serwa Prison.

7. Hulyo 2017

   Amin ya Tasi ya akapriso ed Meitir Camp et inyalis ed Mai Serwa Prison diad paway na Asmara.

8. Hulyo 25, 2014

   Kaslakan ed saramay naaresto nen Abril 14 et nibulos, balet 20 ed saramay naaresto nen Abril 27 so wala nid prisoan.

9. Abril 27, 2014

   Naaresto so 31 ya Tasi legan na panag-aral da na Biblia.

10. Abril 14, 2014

    Masulok ya 90 a Tasi so naaresto legan na tinaon ya selebrasyon na Memoryal na impatey na Kristo.

11. Agosto 16, 2012

    Inatey si Yohannes Haile diad edad ya 68 legan ya akapriso ed sobran mair-irap ya kipapasen.

12. Hulyo 2011

    Inatey si Misghina Gebretinsae diad edad ya 62 legan ya akapriso ed sobran mair-irap ya kipapasen.

13. Hunyo 28, 2009

    Ni-raid na saray autoridad so abung na sakey a Tasi legan na pantitipon da tan naaresto so amin ya 23 a Tasi ya wadman, ya manedad na 2 anggad 80.

14. Abril 28, 2009

    Inyalis ed Meitir Prison Camp so amin ya Tasi nen Jehova ya akapriso ed saray istasyon na pulis, puera labat so sakey.

15. Hulyo 8, 2008

    Ni-raid na saray autoridad iray abung tan pantratrabahoan na 24 ya Tasi, maslak ed sikara so manbibilay ed pamilya ra.

16. Mayo 2002

    Impaisara na gobierno so amin ya grupo na relihyon ya agkabiangan na apatiran relihyon ya inaprobaan na gobierno.

17. Oktubre 25, 1994

    Impaakseb na presidente so sakey a ganggan ya angekal ed citizenship tan saray kawayangan tan kanepegan na Saray Tasi nen Jehova.

18. Setyembre 17, 1994

    Apriso si Paulos Eyasu, Isaac Mogos, tan Negede Teklemariam anggano anggapoy kaso ra tan ag-ira alitis.

19. 1950’s

    Aporma iray unonan grupo na Saray Tasi nen Jehova diad Eritrea.