ਹਾਲ ਹੀ ਵਿਚ ਦੁਨੀਆਂ ਦੇ ਵੱਖੋ-ਵੱਖਰੇ ਹਿੱਸਿਆਂ ਵਿਚ ਕੀਤੇ ਗਏ ਇਕ ਸਰਵੇ a ਮੁਤਾਬਕ ਚਾਰਾਂ ਵਿਚੋਂ ਇਕ ਜਣਾ ਇਕੱਲੇਪਣ ਦਾ ਸ਼ਿਕਾਰ ਹੁੰਦਾ ਹੈ।

•   “ਚਾਹੇ ਕਿਸੇ ਵਿਅਕਤੀ ਦੀ ਉਮਰ ਜਿੰਨੀ ਮਰਜ਼ੀ ਹੋਵੇ ਅਤੇ ਉਹ ਜਿੱਥੇ ਮਰਜ਼ੀ ਰਹਿੰਦਾ ਹੋਵੇ, ਉਹ ਇਕੱਲੇਪਣ ਦਾ ਸ਼ਿਕਾਰ ਹੋ ਸਕਦਾ ਹੈ।”​—ਚੀਡੋ ਪੈਮਬਾ, ਸਮਾਜਕ ਰਿਸ਼ਤਿਆਂ ਬਾਰੇ ਵਿਸ਼ਵ ਸਿਹਤ ਸੰਗਠਨ ਦੀ ਕਮਿਸ਼ਨ ਦਾ ਸਹਿ-ਚੇਅਰਮੈਨ।

 ਬਹੁਤ ਸਾਰੇ ਲੋਕਾਂ ਨੂੰ ਸ਼ਾਇਦ ਲੱਗੇ ਕਿ ਇਕੱਲੇਪਣ ਦੇ ਸ਼ਿਕਾਰ ਸਿਰਫ਼ ਸਿਆਣੇ ਜਾਂ ਉਹ ਲੋਕ ਹੀ ਹੁੰਦੇ ਹਨ ਜੋ ਦੂਜਿਆਂ ਤੋਂ ਦੂਰ-ਦੂਰ ਰਹਿੰਦੇ ਹਨ। ਪਰ ਸੱਚ ਤਾਂ ਇਹ ਹੈ ਕਿ ਇਸ ਦੇ ਸ਼ਿਕਾਰ ਨੌਜਵਾਨ, ਸਿਹਤਮੰਦ, ਕਾਮਯਾਬ ਅਤੇ ਵਿਆਹੇ ਲੋਕ ਵੀ ਹੁੰਦੇ ਹਨ। ਦੂਜਿਆਂ ਨਾਲ ਮੇਲ-ਜੋਲ ਨਾ ਰੱਖਣ ਦਾ ਅਤੇ ਇਕੱਲੇਪਣ ਦਾ ਇਕ ਵਿਅਕਤੀ ਦੀ ਸਿਹਤ ਅਤੇ ਭਾਵਨਾਵਾਂ ʼਤੇ ਬਹੁਤ ਮਾੜਾ ਅਸਰ ਪੈ ਸਕਦਾ ਹੈ।

•   ਅਮਰੀਕਾ ਤੋਂ ਸਰਜਨ ਜਨਰਲ ਡਾਕਟਰ ਵਿਵੇਕ ਮੁਰਥੀ ਕਹਿੰਦਾ ਹੈ: “ਇਕੱਲਾਪਣ ਸਿਰਫ਼ ਇਕ ਬੁਰੀ ਭਾਵਨਾ ਹੀ ਨਹੀਂ ਹੈ, ਸਗੋਂ ਇਹ ਇਸ ਤੋਂ ਕਿਤੇ ਵਧ ਕੇ ਹੈ। ਦੂਜਿਆਂ ਨਾਲ ਮੇਲ-ਜੋਲ ਨਾ ਰੱਖਣ ਵਾਲੇ ਨੂੰ ਮੌਤ ਦਾ ਉੱਨਾ ਹੀ ਖ਼ਤਰਾ ਹੈ ਜਿੰਨਾ ਇਕ ਦਿਨ ਵਿਚ 15 ਸਿਗਰਟਾਂ ਪੀਣ ਵਾਲੇ ਨੂੰ।”

 ਸਾਡਾ ਸਿਰਜਣਹਾਰ ਨਹੀਂ ਚਾਹੁੰਦਾ ਕਿ ਅਸੀਂ ਇਕੱਲੇ-ਇਕੱਲੇ ਰਹੀਏ। ਰੱਬ ਦਾ ਸ਼ੁਰੂ ਤੋਂ ਇਹੀ ਮਕਸਦ ਹੈ ਕਿ ਸਾਰੇ ਇਨਸਾਨ ਮਿਲ-ਜੁਲ ਕੇ ਅਤੇ ਖ਼ੁਸ਼ ਰਹਿਣ।

•   ਬਾਈਬਲ ਦਾ ਅਸੂਲ: “ਪਰਮੇਸ਼ੁਰ ਨੇ ਕਿਹਾ: ‘ਇਹ ਚੰਗਾ ਨਹੀਂ ਕਿ ਆਦਮੀ ਇਕੱਲਾ ਰਹੇ।’”​—ਉਤਪਤ 2:18.

 ਰੱਬ ਚਾਹੁੰਦਾ ਹੈ ਕਿ ਅਸੀਂ ਉਸ ਨਾਲ ਰਿਸ਼ਤਾ ਜੋੜੀਏ। ਉਹ ਵਾਅਦਾ ਕਰਦਾ ਹੈ ਕਿ ਜੇ ਅਸੀਂ ਉਸ ਦੇ ਨੇੜੇ ਜਾਣ ਦੀ ਕੋਸ਼ਿਸ਼ ਕਰਦੇ ਹਾਂ, ਤਾਂ ਉਹ ਸਾਡੇ ਨੇੜੇ ਆਵੇਗਾ।​—ਯਾਕੂਬ 4:8.

•   ਬਾਈਬਲ ਦਾ ਅਸੂਲ: “ਖ਼ੁਸ਼ ਹਨ ਜਿਹੜੇ ਪਰਮੇਸ਼ੁਰ ਦੀ ਅਗਵਾਈ ਲਈ ਤਰਸਦੇ ਹਨ ਕਿਉਂਕਿ ਸਵਰਗ ਦਾ ਰਾਜ ਉਨ੍ਹਾਂ ਦਾ ਹੈ।”​—ਮੱਤੀ 5:3.

 ਰੱਬ ਚਾਹੁੰਦਾ ਹੈ ਕਿ ਅਸੀਂ ਦੂਜਿਆਂ ਨਾਲ ਮਿਲ ਕੇ ਉਸ ਦੀ ਭਗਤੀ ਕਰੀਏ। ਜਦੋਂ ਅਸੀਂ ਇੱਦਾਂ ਕਰਾਂਗੇ, ਤਾਂ ਅਸੀਂ ਖ਼ੁਸ਼ ਰਹਿ ਸਕਾਂਗੇ।

•   ਬਾਈਬਲ ਦਾ ਅਸੂਲ: “ਆਓ ਆਪਾਂ ਇਕ-ਦੂਜੇ ਦਾ ਧਿਆਨ ਰੱਖੀਏ ਤਾਂਕਿ ਅਸੀਂ ਇਕ-ਦੂਜੇ ਨੂੰ ਪਿਆਰ ਅਤੇ ਚੰਗੇ ਕੰਮ ਕਰਨ ਦੀ ਹੱਲਾਸ਼ੇਰੀ ਦੇ ਸਕੀਏ ਅਤੇ ਇਕ-ਦੂਜੇ ਨਾਲ ਇਕੱਠੇ ਹੋਣਾ ਨਾ ਛੱਡੀਏ, . . . ਸਗੋਂ ਇਕ-ਦੂਜੇ ਨੂੰ ਹੌਸਲਾ ਦਿੰਦੇ ਰਹੀਏ।”​—ਇਬਰਾਨੀਆਂ 10:24, 25.

 ਇਕੱਲੇਪਣ ਨਾਲ ਲੜਨਾ ਕਿਉਂ ਜ਼ਰੂਰੀ ਹੈ, ਇਸ ਬਾਰੇ ਹੋਰ ਜਾਣਨ ਲਈ “ਇਕੱਲਾਪਣ, ਇਕ ਸਮੱਸਿਆ​—ਤੁਸੀਂ ਇਸ ਦਾ ਸਾਮ੍ਹਣਾ ਕਿਵੇਂ ਕਰ ਸਕਦੇ ਹੋ?” ਨਾਂ ਦਾ ਲੇਖ ਪੜ੍ਹੋ।