• РАЙГУЫРД: 1974 АЗ

• БӔСТӔ: ЧИЛИ

• РАЗДӔР: КОДТА ФЫДНОЗТ

МӔ РАЗДӔРЫ ЦАРД.

Ӕз райгуырдтӕн Чилийы хуссар хайы, горӕт Анголы. Мӕ фыды никуы федтон. Ӕртӕ азы мыл куы цыди, уӕд мӕ мад мӕн ӕмӕ ме ’фсымӕримӕ цӕрынмӕ алыгъд Чилийы сӕйраг горӕт Сантьягомӕ. Цардыстӕм, ӕнӕхӕдзар адӕмӕн дзы цы ӕнӕбары цӕрӕнбынӕттӕ скодтой, уым, иу гыццыл къуымы. Туалет нын уыдис уынджы, ӕмӕ иууылдӕр уырдӕм цыдысты. Дон та-иу хастам, зынгхуыссынгӕнджытӕ кӕмӕй фӕпайда кӕнынц, ахӕм кърантӕй.

Иу-дыууӕ азы фӕстӕ нын хицауад радта гыццыл хӕдзар. Фӕлӕ уыцы бынат хорз нӕ разынд. Нӕ алыварс чи цард, уыдонӕн сӕ фылдӕр уыдысты наркомантӕ ӕмӕ фыдгӕнджытӕ, фыднозт кодтой, стӕй дзы проституци дӕр уыди парахат.

Мӕ мад иу нӕлгоймагимӕ базонгӕ ӕмӕ йӕм цасдӕры фӕстӕ смой кодта. Уыцы лӕг-иу ӕдзух расыг уыди ӕмӕ-иу мӕ мады дӕр ӕмӕ мӕн дӕр фӕнадта. Арӕх-иу сусӕгӕй куыдтон ӕмӕ-иу хъуыды кодтон, чи мӕ уарза, ахӕм фыд мын цӕуылнӕ ис, зӕгъгӕ.

Кӕд мӕ мад бон изӕрмӕ кусгӕ кодта, уӕддӕр тынг мӕгуыр цардыстӕм. Хатт-иу нын бахӕрынӕн сӕкӕр ӕмӕ хус ӕхсыр йеддӕмӕ ницы уыди. Ме ’фсымӕримӕ-иу цӕмӕй нӕхи аирхӕфстаиккам, уый тыххӕй-иу нӕ сыхаджы телевизормӕ сусӕгӕй рудзынгӕй кастыстӕм. Фӕлӕ нӕ иубон нӕ сыхаг федта, ӕмӕ нын уӕдӕй фӕстӕмӕ уыцы ирхӕфсӕн дӕр нал уыд.

Мӕ мады лӕг-иу искуы иу хатт куы нӕ банызта, уӕд-иу нын ме ’фсымӕримӕ исты хӕринаг балхӕдта. Иухатт та нын балхӕдта гыццыл телевизор. Кӕд искуы амондджын уыдтӕн, уӕд уыцы бон.

Дыууадӕсаздзыдӕй кӕсын базыдтон. Фӕлӕ иу азы фӕстӕ скъола ныууагътон ӕмӕ, ӕнӕхъӕн бон кусын кӕм хъуыд, ахӕм куыстмӕ бацыдтӕн. Ме ’мкусджытӕ мӕнӕй бирӕ хистӕр уыдысты. Арӕх-иу мӕ куысты фӕстӕ семӕ искуыдӕм абадынмӕ акодтой. Уым-иу банызтам ӕмӕ-иу нӕхицӕн наркотиктӕ скодтам. Бирӕ нӕ рацыд, ӕмӕ ӕнӕ нозтӕй ӕмӕ ӕнӕ наркотиктӕй мӕ бон нал уыди.

Ссӕдз азы мыл куы цыди, уӕд базонгӕ дӕн ӕрыгон чызг Катиимӕ ӕмӕ иуцасдӕры фӕстӕ нӕ цард баиу кодтам. Райдианты тынг амондджын уыдыстӕм, фӕлӕ та стӕй фӕстӕмӕ мӕ раздӕры хъуыддӕгтӕ кӕнын райдыдтон. Мӕ уавӕр бонӕй-бон фыддӕр кодта. Ӕмӕ мӕм иуафон бахъардта, мӕ кӕрон кӕнӕ ахӕстонмӕ кӕй цӕуы, кӕнӕ та – ингӕнмӕ. Ме стырдӕр бӕллӕх та уый уыди, ӕмӕ мӕ фырт Викторы дӕр, мӕхӕдӕг ӕрыгонӕй цы хъуыддӕгтӕ кодтон, уыдоныл бафтыдтон.  Уый мын тынг зын уыди ӕмӕ мӕхимӕ мӕсты кодтон. Мӕхи зӕххӕй сисинагыл дӕр нӕ нымадтон.

2001 азы нӕм хӕдзармӕ Йегъовӕйы Ӕвдисӕнтӕ ӕрбацыдысты ӕмӕ Катиимӕ Библи ахуыр кӕнын райдыдтой. Цы-иу базыдта, уый тыххӕй-иу мӕнӕн дӕр радзырдта. Уый мӕ бацымыдис кодта, ӕмӕ ӕз дӕр Библи ахуыр кӕнын райдыдтон. 2003 азы Кати донаргъуыд райста ӕмӕ сси Йегъовӕйы Ӕвдисӕн.

БИБЛИЙЫ ФӔРЦЫ МӔ ЦАРД ФӔИВТА.

Иухатт Библийы бакастӕн иу стих – Руф 2:12. Уым дзырд цӕуы, Йегъовӕ кӕй арфӕ кӕны, «йӕхи йӕ базыры бын чи бакӕны», уыдонӕн. Ӕмӕ бамбӕрстон, ӕз дӕр мӕ цард фӕивыныл куы архайон, уӕд уый Хуыцауӕн ӕхсызгон кӕй уыдзӕн ӕмӕ мын кӕй арфӕ кӕндзӕн. Стӕй ма бафиппайдтон, Библийы фыднозты кой куыд арӕх цӕуы, уый. 2 Коринфӕгтӕм 7:1 стихы фыст ныхӕстӕ мын мӕ зӕрдӕ бацагайдтой. Бафӕндыд мӕ, адӕймаджы «цыдӕриддӕр чъизи кӕны, уыдӕттӕй» мӕхи ссыгъдӕг кӕнын. Ӕмӕ, цы ӕвзӕр хъуыддӕгтыл сахуыр дӕн, уыдон гыццылгай уадзын райдыдтон. Райдианты мын алцы нӕ уад, ӕмӕ-иу мӕстӕй рафыхтӕн. Фӕлӕ мыл Кати йӕ къух никуы ауыгъта, ӕххуыс-иу мын кодта.

Куысты-иу мын тамако дымын кодтой ӕмӕ-иу мын нуазын кодтой. Уый тыххӕй мӕ мӕ куыст ныууадзын бахъуыд. Нӕ цардыл ма тыххӕй ӕххӕссыдыстӕм. Фӕлӕ цасдӕр рӕстӕг кӕй нӕ куыстон, уый фӕрцы мын фылдӕр рӕстӕг фӕзынд Библи ахуыр кӕнынӕн. Ӕмӕ уӕд мӕ уырнындзинад фидар кӕнын райдыдта. Кати мӕ никуы домдта, цӕмӕй фылдӕр ӕхца куыстаин ӕмӕ никуы бахъуыр-хъуыр кодта, кӕдмӕ ма цӕрдзыстӕм афтӕ мӕгуырӕй, зӕгъгӕ.

Уӕдмӕ Йегъовӕйы Ӕвдисӕнтимӕ фылдӕр рӕстӕг ӕрвитын райдыдтон ӕмӕ семӕ балымӕн дӕн. Уыдоны фӕрцы бамбӕрстон, кӕд мӕм ахуырдзинад нӕй, уӕддӕр мын Йегъовӕ кӕй аргъ кӕны, уымӕн ӕмӕ мӕ ӕппӕт зӕрдӕйӕ фӕнды йӕ фӕндон ӕххӕст кӕнын. Йегъовӕйы Ӕвдисӕнты ӕмбырды цы уарзондзинад ӕмӕ цы иудзинад федтам, уый нӕ бинонтыл тынг фӕзынд. Ахӕм уарзондзинад ӕндӕр никуы ис. Ӕмӕ 2004 азы декабры ӕз дӕр донаргъуыд райстон.

АБОН МӔ ЦАРДӔЙ РАЙГОНД ДӔН.

Ӕз мӕхицӕй зонын, Исайы 48:17 стихы цы ныхӕстӕ ис фыст, уыдон раст кӕй сты. Уым Йегъовӕ загъта: «Ӕз, Йегъовӕ, дӕн дӕ Хуыцау, пайда дын цы у, ууыл дӕ чи ахуыр кӕны». Куыд тынг аивтон, уый мӕ мад ӕмӕ ме ’фсымӕрыл афтӕ тынг бандӕвта, ӕмӕ ныр уыдон дӕр Библи ахуыр кӕнынц. Суанг ма мӕ сыхӕгтӕ дӕр фӕцин кӕнынц, ме ’взӕр хъуыддӕгтӕ кӕй ныууагътон ӕмӕ ныр мӕ бинонтимӕ амондджынӕй кӕй цӕрын, ууыл.

Ис мын замманай бинойнаг. Хуыцауы тынг уарзы, стӕй мӕнӕн дӕр кад кӕны ӕмӕ мӕ йӕ хуыздӕр ӕмбалыл нымайы. Кӕд мӕхӕдӕг фыды ад нӕ базыдтон, уӕддӕр Библийы фӕрцы бамбӕрстон, ме ’ртӕ фырты куыд хъуамӕ хъомыл кӕнон, уый. Мӕ ныхасӕн мын аргъ кӕнынц. Сӕйрагдӕр та уый у, ӕмӕ фидарӕй зонынц, Йегъовӕ удӕгас Хуыцау кӕй у ӕмӕ йӕ цас хуыздӕр зонынц, уыйас ӕй тынгдӕр уарзынц.

Кӕд мӕ гыццылӕй фӕстӕмӕ ӕфхӕрд йеддӕмӕ ницы федтон, уӕддӕр мын Йегъовӕ уый фадат радта, цӕмӕй амондджын адӕймаг суон. Ӕмӕ дзы уый тыххӕй тынг бузныг дӕн.

• РАЙГУЫРД: 1974 АЗ

• БӔСТӔ: БОЛГАРИ

• РАЗДӔР: НАРКОТИКТӔ УӔЙ КОДТА

МӔ РАЗДӔРЫ ЦАРД.

Ӕз райгуырдтӕн Болгарийы, горӕт Софийӕйы. Нӕдӕр хъӕздыг бинонтӕ уыдыстӕм, нӕдӕр мӕгуыр. Ӕхсӕз азы мыл куы цыди, уӕд нӕ мӕ фыд ныууагъта. Цыма ныл хур бон ӕвиппайды бӕстӕ ӕрбаталынг, уыйау фестӕм. Уыцы хабар мын мӕ зӕрдӕйы арф хъӕдгом ныууагъта. Афтӕ мӕм каст, ӕмӕ никӕй хъӕуын, никуы мӕ ничи уарздзӕн. Уыцы хъуыдытӕ мын ӕнцой нӕ лӕвӕрдтой, ӕмӕ куы фестырдӕр дӕн, уӕд тынг ӕгоммӕгӕс сдӕн. Уыдтӕн тынг фыдзонд ӕмӕ мӕ пырх иннӕтыл калдтон.

Цыппӕрдӕс азы мыл куы цыди, уӕд фыццаг хатт хӕдзарӕй алыгъдтӕн. Арӕх-иу мӕ мадӕй, стӕй мӕ мадыфыдӕй ӕмӕ мӕ мадымадӕй ӕхца давтон. Скъолайы алкӕимӕ дӕр хыл кодтон, ӕмӕ-иу мӕм хистӕртӕй дзӕбӕх ӕрхауд. Уый тыххӕй мӕ дыууӕ азмӕ фондз скъолайы раивын бахъуыди. Аттестат райсынмӕ ма мӕ ӕртӕ азы хъуыди, афтӕ скъола ныууагътон. Ӕз кодтон ӕнӕгъдау, чъизи цард. Тамако ӕмӕ марихуанӕйыл бафтыдтӕн. Ме ’мбӕлттимӕ-иу куы кӕм бадтыстӕм, куы кӕм, ӕмӕ-иу дзӕбӕх банызтам. Афтӕмӕй, наркотиктӕ чи уӕй кодта, уыдонимӕ сбӕндӕн дӕн. Ацы дунейы адӕммӕ кӕсгӕйӕ-иу хъуыды кодтон, цард цы у, фӕхъизӕмар кӕн ӕмӕ стӕй амӕл, зӕгъгӕ. Уымӕ гӕсгӕ цардмӕ иу боны цӕстӕй кастӕн, ӕмӕ мӕ цыдӕриддӕр фӕндыд, уый кодтон.

1998 азы мӕ Бразилийы Сан-Паулойы аэропорты ӕрцахстой, наркотиктӕ уӕй кӕнынмӕ куы ластон, уӕд, ӕмӕ мын цыппар азы радтой. Уӕд мыл цыди 24 азы.

БИБЛИЙЫ ФӔРЦЫ МӔ ЦАРД ФӔИВТА.

2000 азы нӕм ахӕстонмӕ къуыри иу хатт цӕуын райдыдтой Йегъовӕйы Ӕвдисӕнтӕ. Сӕ иу, Маринес, зӕгъгӕ, ӕдзух уыцы фӕлмӕнӕй ныхас кодта мемӕ. Ӕмӕ мӕ уый фӕрцы бафӕндыд Библи хуыздӕр базонын. Уымӕй размӕ Йегъовӕйы Ӕвдисӕнты тыххӕй никуы фехъуыстон ӕмӕ, кӕимӕ бадтӕн, уыдоны бафарстон, зӕгъын сын исты зонут. Сӕ фылдӕр мын сӕ хорзӕй ницы загътой. Сӕ иу та мын загъта, цыфӕнды динмӕ дӕр, дам, бацу, ӕрмӕст уыдонмӕ нӕ. Йӕ ныхӕстӕ мӕм диссаг фӕкастысты, ӕмӕ мӕ уӕд ноджы тынгдӕр бафӕндыд, уыцы адӕмӕй се сӕфт цӕмӕн уынынц, уый базонын. Фӕстӕдӕр ӕй бамбӕрстон, раст диныл хӕст кӕй сты, уый тыххӕй сӕм кӕй кӕсынц ахӕм цӕстӕй. Библийы дӕр афтӕ фыст ис, Чырыстийы къахвӕдтыл цӕуын кӕй фӕнды, уыдонӕй алчидӕр ӕфхӕрд ӕййафдзӕн, зӕгъгӕ (2 Тимофеймӕ 3:12).

Уыцы рӕстӕг мӕ кусынмӕ арвыстой ахӕстоны хицауады агъуыстмӕ. Иубон дзы скълады ссардтон цалдӕр къоппы. Сӕ мидӕг уыди журналтӕ «Хъахъхъӕнӕн мӕсыг» ӕмӕ «Пробудитесь!»-ы * зӕронд номыртӕ. Журналтӕ мӕ камерӕмӕ ахастон ӕмӕ сӕ кӕсын райдыдтон. Адӕймаг хурсыгъд бӕстӕйы дон куыд ссары ӕмӕ дзы куыд нал фефсӕды, афтӕ ӕз дӕр журналтӕ кӕсынӕй нал ӕфсӕстӕн. Рӕстӕг мын бирӕ уыди, ӕмӕ-иу Библи алы бон дӕр цалдӕр сахаты ахуыр кодтон.

Иубон мӕм ахӕстоны хицау фӕдзырдта. Ӕнхъӕлдтон, ахӕстонӕй мӕ уадзгӕ кӕнынц, ӕмӕ мӕм уый тыххӕй дзуры. Тагъд-тагъд мӕ дзаумӕттӕ амбырд кодтон, камерӕйы кӕимӕ бадтӕн, уыдонӕн хӕрзбон загътон ӕмӕ хицауы кабинетмӕ алыгъдтӕн. Фӕлӕ йӕм куы бацыдтӕн, уӕд базыдтон, кӕй нӕ сарӕзтон, ахӕм  фыдракӕнды мӕ кӕй аххосджын кӕнынц. Ӕмӕ ма мын ноджыдӕр дыууӕ азы радтой.

Уый куы базыдтон, уӕд ме ’уӕнгтӕ ӕрызгъӕлдысты. Фӕлӕ йӕ цалдӕр боны фӕстӕ ӕмбарын райдыдтон, афтӕ кӕй рауад, уый хуыздӕр кӕй у. Ахӕстонӕй уӕд куы рацыдаин, уӕд та фӕстӕмӕ ӕвзӕр хъуыддӕгтыл бафтыдаин. Мӕ зӕрдӕ нырма уыдӕттӕм ӕхсайдта, кӕд уӕдмӕ Библийӕ бирӕ цыдӕртӕ базыдтон, уӕддӕр. Уымӕ гӕсгӕ мӕ фылдӕр рӕстӕг хъуыди, цӕмӕй мӕ зонд ӕмӕ мӕ зӕрдӕ ссыгъдӕг кодтаин.

Хатт-иу мӕм афтӕ каст, ӕмӕ уый гӕнӕн нӕй, цӕмӕй Хуыцау мӕн хуызӕн адӕймаджы йӕ лӕггадгӕнӕгыл банымайа. Фӕлӕ-иу уӕд хъуыды кодтон, 1 Коринфӕгтӕм 6:9–11 стихты цы фыст ис, ууыл. Уым дзырд цӕуы, нӕ эрӕйы фыццаг ӕнусы чырыстӕттӕй дӕр чидӕртӕ, цалынмӕ Йегъовӕйӕн лӕггад кӕнын нӕ райдыдтой, уӕдмӕ кӕй уыдысты давджытӕ, расыггӕнджытӕ ӕмӕ адӕмы стигъджытӕ. Фӕлӕ Йегъовӕйы фӕрцы аивтой. Уыцы стихтӕ-иу мӕ зӕрдыл куы ’рлӕууын кодтон, уӕд та-иу мӕ стыр ныфс бацыд.

Цы ӕвзӕр хъуыддӕгтӕ кодтон, уыдонӕй мын кӕцыдӕртӕ ныууадзын зын нӕ уыд. Зӕгъӕм, наркотиктыл мӕ къух ӕнцонтӕй систон. Фӕлӕ цӕмӕй тамако ныууагътаин, уый тыххӕй мӕ афӕдзӕй фылдӕр бахъуыд мӕхиимӕ тох кӕнын. Бирӕ цыдӕртӕ бакастӕн, тамако адӕймаджы ӕнӕниздзинадӕн куыд тӕссаг у, уый тыххӕй. Фӕлӕ йӕ цӕмӕй ныууагътаин, уымӕн мын ӕппӕты тынгдӕр баххуыс кодта, ӕдзух Йегъовӕйӕ хъарутӕ кӕй куырдтон, уый.

Кӕд мӕ мӕ фыд ныууагъта, уӕд мӕ Йегъовӕ та йӕхимӕ ӕрбаввахс кодта. Ӕмӕ мӕ зӕрдӕйы хъӕдгӕмттӕ гыццылгай ӕгас кӕнын байдыдтой – афтӕ мӕм нал каст, ӕмӕ никӕй хъӕуын. Мӕ зӕрдӕ мын тынг батавтой Псалом 27:10 стихы фыст ныхӕстӕ: «Мӕ фыд ӕмӕ мӕ мӕ мад куы ныууагътаиккой, уӕддӕр мӕ Йегъовӕ райстаид». Ацы ныхӕстыл хъуыды кӕнгӕйӕ бамбӕрстон, ныр мын кӕй ис ӕппӕты хуыздӕр Фыд – уый мӕ никуы ныууадздзӕн! Стӕй ма бамбӕрстон, дзӕгъӕлы кӕй нӕ цӕрын, уый дӕр. Ӕмӕ 2004 азы апрелы, ахӕстонӕй куы рацыдтӕн, уымӕй ӕхсӕз мӕйы фӕстӕ, донаргъуыд райстон.

АБОН МӔ ЦАРДӔЙ РАЙГОНД ДӔН.

Ӕз дӕн тынг амондджын адӕймаг. Ӕвзӕр хъуыддӕгты цагъар нал дӕн, ӕмӕ ныр ме ’нӕниздзинад у хуыздӕр, стӕй мӕ зӕрдӕйы дӕр ис фарн. Ис мын цардӕмбал ӕмӕ иумӕ амондджынӕй цӕрӕм. Мӕ уӕларвон Фыд Йегъовӕимӕ дӕн тынг ӕввахс, дыууӕ ӕмбалы куыд ӕввахс вӕййынц, афтӕ. Стӕй йӕ зӕххон лӕггадгӕнджыты ’хсӕн мӕхицӕн ссардтон бирӕ фыдӕлтӕ, мадӕлтӕ, ӕфсымӕртӕ ӕмӕ хотӕ (Марчы 10:29, 30). Кӕд-иу мӕм афтӕ каст, ӕмӕ мӕ ницы рауайдзӕн, уӕддӕр мӕ уыдон ныфс уагътой. Уыцы хорздзинад ӕз никуы ферох кӕндзынӕн.

Ныр дӕр ма мӕ раздӕры хъуыддӕгтӕ куы ’рхъуыды кӕнын, уӕд мӕхи фӕсмонӕй фӕхӕрын. Фӕлӕ Библийы фыст ис, Хуыцау цы ног дуне скӕндзӕн, уым ӕвзӕр хабӕрттӕ «хъуыды дӕр ничиуал ӕркӕндзӕн», зӕгъгӕ, ӕмӕ мын уый стыр удӕнцой хӕссы (Исай 65:17). Цалынмӕ уыцы рӕстӕг не ’рцыд, уӕдмӕ та уал ӕххуыс кӕнын, кӕддӕр мӕхӕдӕг цы уавӕры уыдтӕн, ахӕм уавӕры чи ис, уыдонӕн. Зӕгъӕн ис, ӕмӕ мӕ раздӕры хъуыддӕгтӕ цыдӕр пайда дӕр фесты. Хъусын кӕнгӕйӕ, наркоманыл, фыдгӕнӕгыл кӕнӕ фыднозт чи кӕны, ахӕм адӕймагыл куы сӕмбӕлын, уӕд сӕм ӕнӕрвӕссон цӕстӕй нӕ фӕкӕсын ӕмӕ, иннӕ хъусынгӕнджытӕй уӕлдай, мӕнӕн семӕ ӕнцондӕр вӕййы ныхас кӕнын. Мӕ бон фидарӕй зӕгъын у: кӕд мӕнӕн мӕ бон баци мӕ цард фӕивын ӕмӕ Йегъовӕйы хорзӕх ссарын, уӕд уый кӕмӕнфӕнды дӕр бауыдзӕн!