Waaqayyo, namoonni lafa kanarra gammachuudhaan akka jiraatan barbaada. Lafa kanaafi wantoota isheerratti argaman kan uume ilmaan namootaa waan jaallatuufidha. Lafti kun namoota bakka hundaatti argamaniif mijooftuu akka taatu gochuufis yeroo dhihootti tarkaanfii fudhata. Wantoota dhiphinaaf sababii taʼan balleessuudhaan ilmaan namootaatiif boqonnaa argamsiisa.​—Ermiyaas 29:11 dubbisi.

Mootummaan ilmaan namootaa kamiyyuu, yakka, dhukkuba ykn duʼa hambisuu hin dandeenye. Haataʼu malee, misiraachoon nama gammachiisu jira. Waaqayyo yeroo dhihootti bulchiinsi ilmaan namootaa bulchiinsasaatiin akka bakka buufamu godha. Namoonni bulchiinsa Waaqayyoo jalatti bulanis nagaafi fayyaa guutuu argatu.​—Isaayaas 25:8; 33:24; Daaniʼel 2:44 dubbisi.

Dhiphinni kan hafu yommuu Waaqayyo namoota hamoo lafarraa balleessutti qofadha. (Sefaaniyaa 2:3) Haataʼu malee kun yoom taʼa? Dubbiin Waaqayyoo, wantoota yeroo ammaatti ilmaan namootaa dhiphisan dursee raajiidhaan dubbateera. Wantoonni gadheen yeroo ammaatti raawwatamaa jiran, yeroon Waaqayyo tarkaanfii itti fudhatu dhihaachuusaa argisiisu.​—2 Ximotewos 3:1-5 dubbisi.

Macaafa Qulqulluurraa waaʼee Waaqayyoo barachuu qabna. Macaafni Qulqulluun xalayaa abbaan jaalala qabeessa taʼe tokko nuu ergee wajjin wal fakkaata. Yeroo ammaatti jireenya gaarii jiraachuu, gara fuulduraattimmoo jireenya barabaraa argachuu kan dandeenyu akkamitti akka taʼe nutti hima. Namoonni tokko tokko Macaafa Qulqulluu akka hubattuuf gargaarsa sii godhamaa jirutti akka hin gammanne beekamaadha. Haataʼu malee Waaqayyo jireenya gammachiisaa akka argannu abdii waan nuu kenneef, namoonni kaan waaʼee Macaafa Qulqulluu barachuu akka nu dhowwan heyyamuu hin qabnu.​—Fakkeenya 29:25; Mulʼata 14:6, 7 dubbisi.