Wangeela Maarqos 7:1-37
7 Fariisonnii fi barsiisonni seeraa Yerusaalemii dhufan tokko tokko Yesuus biratti walitti qabaman.+
2 Isaan barattoonni isaa tokko tokko harka xuraaʼaadhaan,* jechuunis utuu hin dhiqatin yommuu nyaatan isaan argan.
3 (Fariisonnii fi Yihudoonni hundi aadaa abbootii cimsanii waan hordofaniif, harka isaanii hamma ciqileetti yoo dhiqatan malee hin nyaatan turan;
4 yommuu gabaadhaa deebiʼanis utuu hin dhiqatin hin nyaatan turan. Aadaa dhaalanii fi cimsanii hordofan kan biraa hedduu kan akka xoofoo, okkotee fi miʼawwan sibiila diimaa irraa tolfaman bishaan keessa cuuphuus qabu turan.)+
5 Kanaafuu, Fariisonnii fi barsiisonni seeraa kun, “Barattoonni kee aadaa abbootii keenyaa eeguu dhiisanii harka xuraaʼaadhaan kan nyaatan maaliifi?”+ jedhanii isa gaafatan.
6 Innis akkana isaaniin jedhe: “Fakkeessitoota nana, Isaayyaas waaʼee keessan sirriitti raajii dubbateera; akkana jedhamee barreeffameera: ‘Sabni kun hidhii isaatiin ulfina anaaf kenna, garaan isaa garuu baayʼee ana irraa fagoo dha.+
7 Akka waan dubbii koo taʼetti ajaja namootaa waan barsiisaniif, isaan akkanumaan na waaqeffatu.’+
8 Isin ajaja Waaqayyoo dhiistanii aadaa namootaa cimsitanii hordoftu.”+
9 Itti dabaluudhaanis akkana isaaniin jedhe: “Aadaa keessan eeguuf jettanii ajaja Waaqayyoo malaan dhiistu.+
10 Fakkeenyaaf Museen, ‘Abbaa kee fi haadha tee kabaji’+ akkasumas, ‘Namni abbaa isaa yookiin haadha isaatti wanta hamaa dubbatu* haa ajjeefamu’+ jedheera.
11 Isin garuu akkana jettu: ‘Namni tokko abbaa isaatiin yookiin haadha isaatiin, “Wanti ani qabuu fi ittiin si gargaaruu dandaʼu hundi qurbaana dha (kennaa Waaqayyoof adda baafame dha)” yoo jedhe,’
12 sana booda, abbaa isaatiif yookiin haadha isaatiif wanta tokko illee akka godhu isaaf hin heyyamtan.+
13 Akka kanaan aadaa keessan isa dhalootaa dhalootatti dabarsitaniin dubbii Waaqayyoo gatii dhabsiistu.+ Wantoota kana fakkaatan hedduus ni raawwattu.”+
14 Kanaafuu, ammas namoota sana ofitti waamee akkana isaaniin jedhe: “Hundi keessan na dhaggeeffadhaa, hiika isaas hubadhaa.+
15 Wanti alaa nama keessa seenee nama xureessuu dandaʼu tokko illee hin jiru; kanaa mannaa, wantoota nama keessaa baʼantu nama xureessa.”+
16 * ——
17 Yeroo inni namoota sana biraa deemee gara mana tokkoo seenu, barattoonni isaa waaʼee fakkeenya sanaa isa gaafachuu jalqaban.+
18 Kanaafuu, akkana isaaniin jedhe: “Isinis akkuma isaanii hin hubannee? Wanti alaa nama keessa seenee nama xureessuu dandaʼu tokko illee akka hin jirre hin beektanii?
19 Sababiin isaas, wanti nama keessa seenu, gara yaada namaatti utuu hin taʼin, gara marʼimaanitti gala; achiis darbee gara boollaatti seena.” Kana jechuudhaan nyaanni hundi qulqulluu akka taʼe ibse.
20 Itti fufees akkana jedhe: “Nama kan xureessu wanta isa keessaa baʼu dha.+
21 Keessa namaatii, jechuunis garaa namaa+ keessaa yaanni hamaan ni baʼa; isaanis halalummaa,* hanna, ajjeechaa,
22 ejja, sassata, hammina, gowwoomsaa, addaggummaa,* hinaaffaa, arrabsoo, of tuulummaa fi gowwummaa dha.
23 Wantoonni hamoon kun hundi keessa namaatii baʼu; nama tokko kan xureessanis wantoota kana dha.”
24 Achii kaʼees gara naannoo Xiirosii fi Siidoon dhaqe.+ Eenyu illee inni dhufuu isaa akka beeku waan hin barbaanneef, gara mana tokkoo seene; taʼus, namoota jalaa dhokachuu hin dandeenye.
25 Yeruma sana dubartiin intalli ishii hafuura xuraaʼaadhaan qabamte tokko waaʼee isaa dhageessee dhuftee miila isaatti kufte.+
26 Dubartittiin nama Giriikii yommuu taatu, Fiinqee ishii Sooriyaatti argamtu keessa jiraatti turte; ishiinis intala ishii keessaa jinnii akka baasu irra deddeebitee isa kadhatte.
27 Inni garuu, “Jalqaba ijoolleen haa quufan; sababiin isaas, daabboo ijoollee fuudhanii buchulloota jala buusuun sirrii miti”+ ishiidhaan jedhe.
28 Ishiin garuu deebistee, “Eeyyee, yaa Gooftaa, garuu buchulloonni iyyuu, isa maaddii ijoollee jalatti harcaʼe ni nyaatu” isaan jette.
29 Innis yeroo kanatti, “Ati kana waan dubbatteef, dhaqi, jinniin sun intala tee keessaa baʼeera”+ ishiidhaan jedhe.
30 Kanaafuu, ishiin gara mana ishii dhaqxee intalli ishii utuu siree irra ciistuu argite; jinniin sunis ishii keessaa baʼee ture.+
31 Yesuus naannoo Xiirosii yommuu deebiʼu, Siidoon keessa darbee, naannoo Dikaapoolis* keessa baʼee gara Galaana Galiilaa dhaqe.+
32 Iddoo kanatti nama gurri isaa hin dhageenyee fi arrabni isaa hidhame tokko gara isaatti fidanii+ akka inni harka isaa isa irra kaaʼu isa kadhatan.
33 Innis namoota sana gidduudhaa kophaatti isa baase. Achiis quba isaa gurra namichaa keessa galche; erga tufee boodas arraba namichaa tuqe.+
34 Gara samii ilaalaa guddisee erga hafuura baafatee booda, “Efataa” isaan jedhe; hiikni isaas, “Banami” jechuu dha.
35 Yeroo kanatti gurri isaa ni baname,+ arrabni isaa inni hidhames ni hiikame; sirriitti dubbachuus ni jalqabe.
36 Achiis wanta kana eenyutti iyyuu akka hin himne isaan ajaje;+ inni cimsee isaan ajajus, isaan garuu ittuma caalchisanii dubbachuu isaanii itti fufan.+
37 Isaan baayʼee dinqisiifatanii,+ “Inni wanta hunda baʼeessa godhee hojjete. Namoonni gurri isaanii duude akka dhagaʼan, namoonni arrabni isaanii hidhames akka dubbatan illee godheera”+ jedhan.
Miiljaleewwan
^ Jechuunis, akka sirna yeroo sana turetti utuu hin dhiqatin.
^ Ykn., “tuffiidhaan dubbatu.”
^ Kutaa Dabalataa A3 ilaali.
^ Afaan Giriikiitiin poorniyaa. Ibsa Jechootaa ilaali.
^ Afaan Giriikiitiin asseelgiyaa. Ibsa Jechootaa ilaali.
^ Ykn., “Naannoo Magaalota Kurnanii.”
