Faarfannaa 68:1-35
Geggeessaa muuziqaatiif. Faarfannaa Daawit. Faarfannaa.
68 Waaqayyo haa kaʼu, diinonni isaa haa bittinnaaʼan,Warri isa jibbanis isa duraa haa baqatan.+
2 Akkuma aarri badutti, ariʼii isaan balleessi;Akkuma gagaan ibidda duratti baqutti,Hamoonnis Waaqayyo duraa haa badan.+
3 Qajeelonni garuu haa gammadan;+Isaan Waaqayyo duratti baayʼee haa gammadan;Gammachuudhaanis haa ililchan.
4 Waaqayyoon faarfadhaa; maqaa isaatiif faarfannaa galataa faarfadhaa.*+
Isa gammoojjii duwwaa keessa* gulufuuf faarfadhaa.
Maqaan isaa Yaah* jedhama!+ Isa duratti gammadaa!
5 Waaqni inni iddoo jireenyaa isaa isa qulqulluu keessa jiru,+Ijoollee abbaa hin qabneef abbaa dha, dubartoota abbaan manaa irraa duʼeefis eegumsa godha.*+
6 Waaqayyo warra koʼeeyyii taʼaniif mana jireenyaa ni kenna;+Hidhamtoota bilisa baasee gara badhaadhinaatti geessa.+
Warri didaa* taʼan garuu biyya waxalame keessa jiraatu.+
7 Yaa Waaqayyo, yommuu saba kee geggeessitetti,*+Yommuu lafa onaa keessa darbitetti, (Seelaa)
8 Lafti ni kirkirte;+Waaqayyoon kan kaʼe samiin bokkaa roobse;*Siinaan kunis Waaqayyo isa Waaqa Israaʼel taʼeen kan kaʼe ni kirkire.+
9 Yaa Waaqayyo, ati bokkaan baayʼinaan akka roobu ni goote;Saba* kee isa dadhabes ni cimsite.
10 Isaan dunkaanota kee keessa jiraataniiru;+Yaa Waaqayyo, gaarummaa keetiin isa hiyyeessaaf wanta barbaachisu qopheessiteetta.
11 Yihowaan ajaja kenne;Dubartoonni misiraachicha labsan raayyaa guddaa dha.+
12 Mootonni raayyaawwan waraanaa isaanii wajjin ni baqatan,+ eeyyee, ni baqatan!
Ishiin manatti hafte wanta boojiʼame irraa ni hirmaatti.+
13 Isin dhiironni ibidda bobaʼu* bira kan ciistan taʼus,Achitti isin gugee qoochoon ishii meetiidhaan,Baalleen ishiis warqii baʼeessa* taʼeen uwwifame ni qabaattu.
14 Inni Hundumaa Danda’u mootota ishii yommuu bittinneessu,+Zaalmon keessatti cabbiin ni buʼe.*
15 Gaarri Baashaan+ gaara Waaqayyoo ti;*Gaarri Baashaan fiixeewwan gaaraa ti.
16 Isin fiixeewwan gaarotaa hinaaffaadhaanGara gaara Waaqni bakka jireenyaa isaa akka taʼu filatetti* maaliif ilaaltu?+
Dhugumaan, Yihowaan bara baraaf achi ni jiraata.+
17 Gaariiwwan fardaa Waaqayyoo, kumaatama kudhan, eeyyee, kumaatama hammana hin jedhamne dha.+
Yihowaan Siinaa irraa gara iddoo qulqulluu dhufeera.+
18 Ati gara iddoo ol kaʼaatti ol ni baate;+Boojiʼamtootas ni fudhatte;Yaa Waaqa keenya Yaah, ati isaan gidduu jiraachuuf,Namoota, eeyyee, namoota didaa taʼan+ illee akka kennaatti ni fudhatte.+
19 Yihowaan inni guyyaa guyyaadhaan baʼaa keenya nuuf baatu,+Waaqni dhugaan inni fayyisaa keenya taʼe haa jajamu. (Seelaa)
20 Waaqni dhugaan Waaqa nu oolchu dha;+Yihowaan Gooftaa Ol Aanaan duʼa irraa nama oolcha.+
21 Eeyyee, Waaqayyo mataawwan diinota isaa,Gubbee mataa nama yakka isaatti itti fufu* isa rifeensaan guutame hundumaa ni caccabsa.+
22 Yihowaan akkana jedheera: “Ani Baashaan+ keessaa deebisee isaan nan fida,Galaana gad fagoo keessaa deebisee isaan nan fida;
23 Kunis, miilli kee dhiigaan akka dhiqamuuf,+Arrabni saroota keetiis dhiiga diinota keetii akka arraabuufi.”
24 Yaa Waaqayyo, isaan hiriira saba keetii,Yaa Mootii koo, yommuu sabni kee hiriiraan gara iddoo qulqulluu deemus ni argu.+
25 Faarfattoonni fuuldura deemu, warri meeshaawwan muuziqaa ribuu qabaniin taphatan isaan booda deemu;+Shamarran dibbee rukutan immoo isaan gidduu turan.+
26 Gumii guddaa* keessatti Waaqayyoon jajadhaa;Isin warri Madda Israaʼel irraa dhuftan, Yihowaa jajadhaa.+
27 Achitti Biiniyaam+ inni quxisuun isaan bulcha,Kana malees, bulchitoonni Yihudaa saba isaanii isa wacuu wajjin,Bulchitoonni Zaabiloon, bulchitoonni Niftaalemis isaan bulchu.
28 Waaqni kee ati cimaa akka taatu labseera.
Yaa Waaqayyo, ati inni nuuf jettee tarkaanfii fudhatte,+ cimina kee argisiisi.
29 Mana qulqullummaa kee isa Yerusaalemitti argamuuf,+Mootonni kennaa siif ni fidu.+
30 Hamma namoonni sagadanittii fi meetii fidanitti,*Bineensota bosonaa shomboqqoo keessa jiran,Yaaʼii qotiyyoowwanii+ fi jabbilee isaanii ifadhu.
Inni garuu namoota waraanatti gammadan ni bittinneessa.
31 Miʼawwan nahaasii Gibxii keessaa ni baafamu;*+Kuush Waaqayyoof kennaa kennuuf ni ariifatti.
32 Yaa mootummoota lafaa, Waaqayyoon faarfadhaa,+Yihowaadhaaf faarfannaa galataa faarfadhaa,* (Seelaa)
33 Isa samii samiiwwanii bara durii gulufuuf faarfadhaa.+
Kunoo, inni sagalee isaatiin, sagalee isaa isa jabaadhaan ni kakawweessaʼa.
34 Jabina Waaqayyoo amanaa fudhadhaa.+
Ulfinni isaa Israaʼel irra jira,Jabinni isaas samiiwwan* keessa jira.
35 Waaqayyo iddoo qulqulluu isaa* isa guddaa keessaa ni sodaachisa.+
Inni Waaqa IsraaʼelIsa namootaaf jabinaa fi humna kennu dha.+
Waaqayyo haa jajamu.
Miiljaleewwan
^ Ykn., “muuziqaa qopheessaa.”
^ Ykn tarii, “duumessoota irra.”
^ Jechi, “Yaah” jedhu maqaan Yihowaa yommuu gabaabaatti barreeffamu dha.
^ Kal., “abbaa murtii dha.”
^ Ykn., “finciltoota.”
^ Kal., “dura baatetti.”
^ Kal., “ni cobe.”
^ Kal., “Dhaala.”
^ Ykn tarii, “gola hoolotaa.”
^ Ykn., “magariisa gara keelloo.”
^ Ykn., “Akka waan Zaalmon keessatti cabbiin buʼee ni taʼe.”
^ Ykn., “gaara ulfina qabeessa dha.”
^ Ykn., “hawwetti.”
^ Ykn., “yakka isaa keessa asii fi achi deemu.”
^ Kal., “Yaaʼiiwwan.”
^ Ykn tarii, “irra ejjetanitti.”
^ Ykn tarii, “Ambaasaaddaroonni Gibxii keessaa ni dhufu.”
^ Ykn., “muuziqaa qopheessaa.”
^ Kal., “duumessoota.”
^ Kal., “kee.”
