SEERA BUʼUURAA MACAAFA QULQULLUU: “Namni gowwaan, yaada aarii garaa isaatii hundumaa in dubbata, namni ogeessi garuu in obsa, of qabaas in dubbata.”—Fakkeenya 29:11.

FAAYIDAA ISAA: Faayidaa of toʼachuun qabu hunda tarreessuu yoo barbaaddee, waraqaa hedduutu si barbaachisa! Faayidaan inni tokko, fayyaa keenya nuu eeguu isaa ti. Macaafni Qulqulluun, “Yaadni nagaa qabu namummaa namaatiif jireenya [ykn fayyaa] in kenna,” akkasumas “Garaan gammadu fayyina namaaf kenna” jedha. (Fakkeenya 14:30; 17:22) Faallaa kanaatiin, namoonni dafanii aaranii fi jibba qaban dhibee fayyaatiif, keessumaa dhukkuba onneetiif akka of saaxilan qorannoowwan ni argisiisu. Of toʼachuun fayyaa qaamaa argamsiisuudhaan alattis faayidaa kan biraa qaba.

Kaasiyus inni umurii waggoota 30mmanii keessatti argamu amala isaa duraanii yaadachuudhaan akkas jedheera: “Namootaa wajjin walii hin galu, akkasumas dafeen aaran ture; yeroo baayʼee anatu lola kaasa ture. Ofii kootiif kabaja hin qabun ture. Seerawwan Buʼuuraa Macaafa Qulqulluu hojii irra oolchuu yeroon jalqabu garuu wanti kun hundi ni jijjiirame. Aarii koo toʼachuun baradhe; akkasumas amala gad of deebisuu fi dhiifama gochuu horachuu nan baradhe. Utuu kun taʼuu baatee garuu, mana hidhaa galuun koo hin oolu ture. Dhugaa dubbachuuf, akkan duʼaa kaafametti natti dhagaʼama!”