CAQASOOTA KITAABA QULQULLUU IBSI IRRATTI KENNAME

Roomaa 10:13—‘Maqaa Gooftaa Waammachuu’

BANI

“Namni maqaa Yihowaa waammatu hundi ni fayya.”—Roomaa 10:13, Hiika Addunyaa Haaraa.

“Namni maqaa Gooftaa waammatu hundinuu in oola.”—Roomaa 10:13, hiika bara 1997.

Hiika Roomaa 10:13

Waaqayyo waan hin loogneef, sanyiin isaanii, qomoon isaanii ykn iddoon hawaasa keessatti qaban maal iyyuu yoo ta’e, namoonni hundi akka fayyanii fi jireenya bara baraa akka argatan carraa isaaniif kenneera. Ta’us, faayidaa argachuuf, maqaa Yihowaa, jechuunis maqaa dhuunfaa Waaqayyo Hundumaa Dandaʼuu waammachuu qabna. a—Faarfannaa 83:18.

Kitaaba Qulqulluu keessatti gaaleen ‘maqaa Yihowaa waamuu’ jedhu, maqaa Waaqayyoo beekuu fi waaqeffannaa keessatti itti fayyadamuu caalaa wanta dabalatu qaba. (Faarfannaa 116:12-14) Waaqayyoon amanachuu fi gargaarsa isaa barbaaduu dabalata.—Faarfannaa 20:7; 99:6.

Maqaan Waaqayyoo Yesuus Kiristoosiif barbaachisaa ture. Kadhannaa isaa isa fakkeenya taʼu keessatti yaadni inni jalqaba caqase, “Yaa Abbaa keenya isa samii irra jiraattuu, maqaan kee haa qulqullaaʼu” kan jedhu ture. (Maatewos 6:9) Kana malees, Yesuus jireenya bara baraa argachuu yoo barbaanne, Qaama maqaa kanaan waamamu beekuu, isaaf ajajamuu fi isa jaallachuu akka qabnu ibseera.—Yohaannis 17:3, 6, 26.

Roomaa 10:13 irratti “Gooftaa” kan jedhame Yihowaa argisiisa kan jennu maaliifi? Sababiin isaas caqasichi kan fudhatame, Yoʼel 2:32 irraa yoo taʼu, bakka kanatti immoo, maqaan Waaqayyoo maqaa ulfinaa “Gooftaa” jedhuun utuu hin taʼin, Afaan Ibrootaa isa jalqabaatiin argama. b

Yaada naannoo Roomaa 10:13⁠tti argamu

Roomaa boqonnaa 10 irratti Kitaabni Qulqulluun, namni tokko Waaqayyo biratti ejjennoo gaarii qabaachuun isaa Yesuus Kiristoositti amanuu isaa irratti akka hundaa’e ibsa. (Roomaa 10:9) Yaadawwan hedduun Kakuu Moofaa keessaa fudhataman yaada kana deggeru. Namni tokko amantii akka qabu kan argisiisu ‘ifatti lallabuudhaan’ yoo taʼu, kun immoo misiraachoo fayyinaa namoota hin amanneef labsuu dabalata. Akka kanaan, warri kaanis amantii jireenya isaaniif argamsiisu guddifachuuf carraa argatu.—Roomaa 10:10, 14, 15, 17.

Roomaa boqonnaa 10 ibsa miiljalee irra jiru wajjin dubbisi.

a Maqaan Waaqayyoo Kitaabota Qulqulluu durii harkaan barreeffaman irratti gara siʼa 7,000 argama. Afaan Ibrootaatiin maqaan Waaqayyoo qubeewwan arfan Teetiraagiraamaatan jedhamaniin argama. Maqaan kun Afaan Ingiliffaatiin “Jihoovaa” kan jedhamuun beekama; hayyoonni tokko tokko garuu hiika “Yaahwee” jedhu filatu.

b Kiristiyaanonni jalqaba Kitaaba Qulqulluu barreessan yaada maqaa Waaqayyoo qabu tokko “Kakuu Moofaa” irraa yeroo fudhatan maqicha fayyadamaa kan turan fakkaata. The Anchor Bible Dictionary akkas jedheera: ‘Caqasoota yeroo Kakuu Haaraan jalqaba barreeffametti Kakuu Moofaa irraa fudhataman tokko tokko ykn hunda isaanii keessa, Maqaan Waaqayyoo inni Yaahwee jedhamu akka jiru ragaawwan argisiisan jiru.’ (Jildii 6, fuula 392) Odeeffannoo dabalataa argachuuf, buukleetii, Barreeffama Dubbii Waaqayyoo Qayyabachuuf Gargaaru jedhamu irraa, mata duree lammaffaa, “Maqaa Waaqayyoo Caaffata Qulqullaaʼoo Afaan Giriikii Keessatti” jedhu ilaali. Kutaa Dabalataa Kitaaba Qulqulluu Hiika Addunyaa Haaraa Ingiliffaa C2 irratti, hiikawwan Kitaabota Qulqulluu Roomaa 10:13 irratti maqaa Waaqayyoo fayyadaman tarreeffamaniiru.