ƐZUKOALƐDEƐ 20
Kɛzi Bɛhyehyɛ Asafo Ne La
Gyihova le ngyehyɛleɛ Nyamenle. (1 Kɔlentema 14:33) Ɔti yɛ nye la kɛ ye menli bava ngyehyɛleɛ ali gyima. Kɛzi bɛhyehyɛ Kilisiene asafo ne ɛ? Kɛ ɔkɛyɛ na yɛaboa yɛamaa yeahɔ zo ɛ?
1. Nwane a le asafo ne ati a?
“Kelaese le asafo ne ati.” (Ɛfɛsɛsema 5:23) Ɔnea gyima mɔɔ Gyihova menli yɛ wɔ ewiade amuala la azo wɔ anwuma lɔ. Gyisɛse ɛkpa “akɛlɛ nɔhavo nee badwema ne”—mgbanyima ekpunli ekyi bie mɔɔ bɛnyi wɔ sunsum nu, mɔɔ eza bɛfɛlɛ ye Neazo Eku ne la. (Kenga Mateyu 24:45-47.) Neazo Eku ne fa adehilelɛ maa asafo mɔɔ wɔ ewiade amuala la kɛ mɔɔ ɛzoanvolɛma nee mgbanyima mɔɔ wɔ Gyɛlusalɛm la yɛle ye wɔ ɛvoya ne mɔɔ limoa la anu la. (Gyima ne 15:2) Noko tɛ mrenyia ɛhye mɔ a kile ahyehyɛdeɛ ne adenle a. Bɛkpondɛ adehilelɛ bɛfi Gyihova nee ye Edwɛkɛ ne anu yɛɛ bɛbɛlɛ bɛ nwo aze bɛtie Gyisɛse mɔɔ le asafo ne ati la.
2. Gyima boni a mgbanyima ne mɔ yɛ a?
Mgbanyima ne mɔ le Kilisiene mrenyia mɔɔ bɛnyi wɔ sunsum nu mɔɔ bɛgyinla Ngɛlɛlera ne azo bɛkilehile Gyihova menli, bɛboa bɛ na bɛmaa bɛ anwosesebɛ a. Bɛndua bɛ kakɛ wɔ gyima mɔɔ bɛyɛ la anwo. Emomu, “[bɛfi] bɛ ɛhulolɛ nu bɛyɛ ye wɔ Nyamenle anyunlu; tɛ kɛ bɛkpondɛ ɔ nzi ahatualɛ la ati ɔ, emomu anyelielɛ nu.” (1 Pita 5:1, 2) Asafo nu azonvolɛ boa mgbanyima ne mɔ, nzinlii, bɛdabɛ noko bɛfɛta na bɛsonle kɛ mgbanyima.
Neazo Eku ne kpa mgbanyima bie mɔ kɛ maangyebakyi zo neavolɛma. Bɛkɔkpɔla asafo ngakyile na bɛmaa bɛ adehilelɛ nee anwosesebɛ. Bɛkpa mrenyia mɔɔ bɛdwu ninyɛne bie mɔɔ Ngɛlɛlera ne ka nwolɛ edwɛkɛ la anwo la kɛ mgbanyima nee asafo nu azonvolɛ.—1 Timote 3:1-10, 12; Taetɛse 1:5-9.
3. Dasevolɛ biala gyima a le boni?
Asafo ne anu amra kɔsɔɔti “[ye] Gyihova duma ne ayɛlɛ” ɔlua debiezukoalɛ mɔɔ bɛkɔ a bɛfa bɛ nwo bɛwula nu yɛɛ daselɛlilɛ mɔɔ bɛbɔ mɔdenle bɛkɔ la azo.—Kenga Edwɛne 148:12, 13.
SUKOA DƆƆNWO
Sukoa adekilevolɛ holɛ ko mɔɔ Gyisɛse de, kɛzi mgbanyima ne mɔ bɔ mɔdenle sukoa ye neazo ne yɛɛ kɛ ɔkɛyɛ na yɛadie Gyisɛse nee mgbanyima ne mɔ la.
4. Gyisɛse le adekilevolɛ mɔɔ maa yɛ nwo tɔ yɛ
Gyisɛse se yɛrayɛ debie mɔɔ bamaa yɛ nwo adɔ yɛ la. Kenga Mateyu 11:28-30, na akee bɛzuzu kpuya ɛhye anwo:
-
Kɛzi Gyisɛse kulo kɛ yɛte nganeɛ wɔ adenle mɔɔ ɔlɛkile yɛ la anwo ɛ?
Kɛzi mgbanyima ne mɔ sukoa Gyisɛse neazo ne ɛ? Ye VIDIO ne.
Baebolo ne kilehile kɛzi ɔwɔ kɛ mgbanyima ne mɔ yɛ bɛ gyima ne la anu wienyi.
Kenga Ayezaya 32:2 yɛɛ 1 Pita 5:1-3, na akee bɛzuzu kpuya ɛhye mɔ anwo:
-
Saa ɛnwu kɛ mgbanyima ne mɔ bɔ mɔdenle kɛ bɛmaa awie mɔ anwo adɔ bɛ kɛ mɔɔ Gyisɛse yɛle la a, kɛzi ɔmaa ɛte nganeɛ ɛ?
-
Ndenle boni mɔ a eza mgbanyima ne mɔ dua zo sukoa Gyisɛse a?
5. Mgbanyima ne mɔ yɛ mɔɔ bɛkilehile la anwo neazo
Kɛzi Gyisɛse kpondɛ kɛ mgbanyima ne mɔ bu bɛ gyima ne ɛ? Ye VIDIO ne.
Gyisɛse hilele mɔɔ ɔwɔ kɛ menli mɔɔ li yɛ nyunlu wɔ asafo ne anu yɛ la. Kenga Mateyu 23:8-12, na akee bɛzuzu kpuya ɛhye anwo:
-
Duzu a wɔyɛ ye nzonlɛ wɔ mɔɔ Baebolo ne ka kɛ ɔwɔ kɛ mgbanyima ne mɔ yɛ nee mɔɔ wɔnwu ye kɛ ɛzonlenlɛ nu mgbanyima yɛ la anwo a?
-
A. Mgbanyima nea kɛ bɛ nee bɛ mbusua bɛanyia sunsum nu anwosesebɛ
-
B. Mgbanyima ne mɔ dwenle mediema kɔsɔɔti anwo
-
D. Mgbanyima ne mɔ ta kɔ daselɛlilɛ
-
Ɛ. Mgbanyima ne mɔ le kilehilevolɛma. Eza bɛboa bɛyɛ gyima ngakyile
6. Ɔwɔ kɛ yɛtie mgbanyima ne mɔ
Baebolo ne maa yɛnwu deɛmɔti ɔhyia kɛ yɛtie mgbanyima ne mɔ la. Kenga Hibuluma 13:17, na akee bɛzuzu kpuya ɛhye mɔ anwo:
-
Ɛnea a ndelebɛbo wɔ nu kɛ Baebolo ne se yɛdie menli mɔɔ li yɛ nyunlu na yɛbɛlɛ yɛ nwo aze yɛmaa bɛ la ɔ? Duzu ati ɔ?
Kenga Luku 16:10, na akee bɛzuzu kpuya ɛhye anwo:
-
Duzu ati a ɔhyia kɛ yɛtie mgbanyima ne mɔ wɔ ninyɛne ngyikyi bɔbɔ anu a?
BIE MƆ KA KƐ: “Ɔngyia kɛ yɛ nee awie mɔ bɔ nu sonle.”
-
Saa awie nee asafo ne bɔ nu sonle Nyamenle a ɛnea a nvasoɛ boni a ɔbanyia a?
EDWƐKƐ TITILI
Gyisɛse a le asafo ne ati a. Yɛfi anyelielɛ nu yɛtie mgbanyima ne mɔ mɔɔ ɛlɛsonle wɔ ye adehilelɛ bo la ɔluakɛ bɛmaa yɛ nwo tɔ yɛ yɛɛ bɛyɛ mɔɔ bɛkilehile yɛ la anwo neazo.
Ndinu
-
Nwane a le asafo ne ati a?
-
Kɛzi mgbanyima ne mɔ boa asafo ne ɛ?
-
Gyima boni a awie ko biala mɔɔ sonle Gyihova la yɛ a?
KPONDƐ DƆƆNWO
Nea daselɛ mɔɔ kile kɛ Neazo Eku ne nee mgbanyima ne mɔ dwenle yɛ mediema Kilisienema anwo kpalɛ ɛnɛ la.
Bɛmaanle Mediema Mɔɔ Bɛva Bɛ Sa Bɛdo Bɛ Gyima Ne Azo La Anwosesebɛ (4:22)
Sukoa gyima mɔɔ maangyebakyi zo neavolɛma yɛ la anwo debie.
Maangyebakyi Zo Neavolɛma Mɔɔ Kɔ Namunamu Zo La Ɛbɛlabɔlɛ (4:51)
Kenga mɔɔ mraalɛ yɛ wɔ asafo ne anu la anwo debie.
“Asoo Gyihova Alasevolɛ Lɛ Mraalɛ Mɔɔ Bɛkilehile Ɔ?” (Ɛzinzalɛ Arane nu edwɛkɛ)
Nea kɛzi mgbanyima ne mɔ yɛ gyima ɛsesebɛ maa bɛ gɔnwo mɔ diedima anwosesebɛ la.
“Asafo Nu Mgbanyima ‘Boa Maa Yɛ Nye Die’” (Ɛzinzalɛ Arane, January 15, 2013)
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
