1, 2. Duzu ati a ɔhyia kɛ awie mɔɔ lua awozinli nu la nyia tɔɔkye a, na kɛzi yɛbava yɛado adwenle ne anwo ɛ?

FA YE kɛ awie lua nɔɔzo. Duzu a ɔhyia na yeanfofo debie zo yeandɔ aze yeamboda anzɛɛ edwɛkɛ ɛtane bie ando ye a? Ɔhyia tɔɔkye amaa yeanwu aze.

² Saa ɛnlɛ tɔɔkye a, ɔbayɛ se kɛ ɛbanwu aze, ɛbahola wɔadɔ aze anzɛɛ edwɛkɛ ɛtane bahola ado wɔ. Tɔɔkye boa maa ɛnwu aze na ɔkola ɔdie wɔ ngoane. Wɔ adenle bie azo, yɛbahola yɛava yɛado ahyɛlɛdeɛ bie mɔɔ sonle bolɛ mɔɔ Gyihova ɛva ɛmaa yɛ la anwo​—adwenle ne. (Gyemise 1:17) Saa tɛ yɛ adwenle ne a anrɛɛ yɛnlɛ adehilelɛ biala. Saa yɛfa yɛdi gyima kpalɛ a, ɔboa ɔmaa yɛnwu adenle kpalɛ mɔɔ ɔwɔ kɛ yɛfa zo yɛbɔ yɛ ɛbɛla a. Ɛhye ati, bɛmaa yɛzuzu kɛzi adwenle ɛhye de nee ye gyimalilɛ nwo. Na akee yɛazuzu edwɛkɛ ɛhye mɔ anwo: (1) Kɛzi yɛtete yɛ adwenle ne, (2) deɛmɔti ɔwɔ kɛ yɛsuzu adwenle mɔɔ yɛ gɔnwo mɔ lɛ la anwo, yɛɛ (3) kɛzi yɛnyia adwenle kpalɛ a ɔbamaa yɛanyia nyilalɛ la.

3. Duzu a Giliki edwɛkɛkpɔkɛ mɔɔ bɛhile ɔ bo “adwenle” la kile a, na tumi boni a wɔ sonla nu mɔɔ adwenle ne maa yɛnwu ye a?

³ Wɔ Baebolo ne anu, Giliki edwɛkɛkpɔkɛ mɔɔ bɛhile ɔ bo “adwenle” la kile “kɛzi awie nwu ɔ nwo, anzɛɛ ndelebɛbo mɔɔ ɔlɛ ye wɔ ɔ nwo” la. Sonla ɛnle kɛ azɛlɛ ye azo abɔdeɛ mɔɔ ɛha la, Nyamenle ɛmaa yɛ tumi bie mɔɔ  maa yɛnwu kɛzi yɛde la. Adenle bie azo, yɛkola yɛsuzu kɛzi yɛde la anwo na yɛnea saa yɛlɛbɔ ɛbɛla kpalɛ a. Yɛ adwenle ne le debie mɔɔ di daselɛ wɔ yɛ nu anzɛɛ bua yɛ ndɛne na ɔneɛnlea yɛ nyɛleɛ, yɛ subane, nee yɛ kpɔkɛzilɛ nu. Ɔkola ɔkile yɛ adenle ɔmaa yɛsi kpɔkɛ kpalɛ anzɛɛ ɔbɔ yɛ kɔkɔ wɔ kpɔkɛzilɛ mɔɔ ɛnle kpalɛ la anwo. Ɛhye anzi, ɔkyekye yɛ rɛle wɔ kpɔkɛ kpalɛ mɔɔ yɛkɛzi la anwo na ɔbua yɛ fɔlɛ wɔ mɔɔ ɛnle kpalɛ la anwo.

4, 5. (a) Duzu a maa yɛnwu kɛ ɛnee Adam nee Yive lɛ kpalɛ nee ɛtane ɛnwunlɛ nwo adwenle a, na duzu a vi Nyamenle mɛla zo mɔɔ bɛanli zo la anu rale a? (b) Neazo boni mɔ a kile kɛ mrenya mɔɔ ɛnee di nɔhalɛ kolaa na Keleseɛne mekɛ ne ara la vale bɛ adwenle ne lile gyima a?

⁴ Bɛvale tumi ɛhye mɔɔ maa yɛkola yɛnwu kpalɛ nee ɛtane la bɛbɔle nrenya nee raalɛ ɔvi mɔlebɛbo ne. Adam nee Yive hilele kɛ bɛlɛ kpalɛ nee ɛtane ɛnwunlɛ nwo adwenle. Nyiane mɔɔ dɔle bɛ nye zo wɔ mekɛ mɔɔ bɛyɛle ɛtane ne la di ɛhye anwo daselɛ. (Mɔlebɛbo 3:7, 8) Ɔyɛ alɔbɔlɛ kɛ, wɔ zɔhane mekɛ ne bɛannyia nvasoɛ biala bɛanvi bɛ adwenle ne mɔɔ buale bɛ fɔlɛ la anu. Bɛ nye fuu bɛanli Nyamenle mɛla zo. Ɔlua ɛhye azo, bɛrayɛle atuadelɛma mɔɔ dwazole tiale Gyihova Nyamenle a. Kɛmɔ ɛnee bɛdi munli la ati, ɛnee bɛze mɔɔ bɛlɛyɛ la, ɛhye ati ɛnee bɛngola bɛnzia bɛngɔ Nyamenle ɛkɛ ne bieko.

⁵ Alesama mɔɔ ɛnli munli la anu dɔɔnwo ɛdie bɛ adwenle ne, bɛanyɛ kɛ Adam nee Yive la. Kɛ neazo la, Dwobu mɔɔ ɛnee di nɔhalɛ la hanle kɛ: “Melɛ me tenleneyɛlɛ ne anu kpundii, menrɛgyakyi nu ɛlɛ; me adwenle ɛmbu me fɔlɛ kenle bie maanle nu.” (Dwobu 27:6) Dwobu bɔle mɔdenle diele ye adwenle ne na ɔmanle ɔhilele ye adenle wɔ ye nyɛleɛ nee ye kpɔkɛzilɛ nu. Ɛhye ati, ɔholale ɔhanle ye wienyi kɛ ye adwenle ɛmbu ye fɔlɛ. Yɛfa mɔɔ Dwobu yɛle la yɛtoto  Devidi ɛdeɛ ne anwo a yɛnwu ngakyile bie wɔ nu. Mekɛ mɔɔ Devidi ambu Sɔɔlo mɔɔ Gyihova ɛkpokpa ye kɛ belemgbunli la “ye adwenle bɔle ɔ bo kɛ ɔgyegye ye.” (1 Samoɛle 24:5) Devidi nyianle ye adwenle ne mɔɔ gyegyele ye la azo nvasoɛ, ɔmanle ɔnwunle kɛ ɔwɔ kɛ ɔbu debie.

6. Duzu a kile kɛ adwenle ne le ahyɛlɛdeɛ maa alesama kɔsɔɔti a?

⁶ Asoo Gyihova azonvolɛ angomekye a lɛ ahyɛlɛdeɛ ɛhye mɔɔ le adwenle ne la ɔ? Suzu ɛzoanvolɛ Pɔɔlo edwɛkɛ ɛhye mɔɔ vi Nyamenle ɛkɛ ne la anwo: “Bɛdabɛ mɔɔ bɛnle Dwuuma la ɛnlɛ Mosisi mɛla ne suzuamgba ɛdeɛ, noko kenle biala mɔɔ bɛkɛyɛ mɔɔ mɛla ne se la bie la, ɛnee bɛyɛ Mosisi mɛla ne bɛmaa bɛ nwo. Bɛ nyɛleɛ ne kile kɛ mɔɔ Mosisi mɛla ne kpondɛ la, bɛhɛlɛ ye wɔ bɛ ahonle nu, yɛɛ bɛ adwenle die to nu kɛ ɔle nɔhalɛ, ɔluakɛ ɔyɛ a bɛ adwenle nu yɛ bɛ kesee kɛ bɛbali fɔlɛ anzɛɛ bɛbali benle wɔ Kenle ne anu.” (Wulomuma 2:14, 15) Ɔyɛ a, daselɛ ɛhye mɔɔ wɔ yɛ nu la ka menli mɔɔ ɛnze Gyihova mɛla ne mɔ bɔbɔ la maa bɛfa Nyamenle ngyinlazo ne mɔ bɛdi gyima.

7. Duzu ati a ɔdwu mekɛ ne bie a adwenle ne kola fo ɛ?

⁷ Noko akee, ɔdwu mekɛ ne bie a yɛ adwenle ne bahola amaa yɛavo. Adenle boni azo? Suzu tɔɔkye nwo ndonwo ne anwo nea. Saa batile ne anloa ka aze a, ɔnrɛmaa yɛnrɛnwu aze kpalɛ. Zɔhane ala a, yɛ adwenle ne noko bahola ayɛ a, saa yɛanzukoa Nyamenle Edwɛkɛ ne a yɛnrɛhola yɛnrɛnwu mɔɔ le kpalɛ nee mɔɔ le ɛtane la. Saa yɛannea boɛ noko a angomedi bahola ara yɛ ahonle nu, na ɛhye bamaa yɛ adwenle ahile yɛ adenle ɛtane. Nɔhalɛ nu, yɛhyia Gyihova sunsum nwuanzanwuanza ne amaa yɛ adwenle ne ali gyima kpalɛ. Pɔɔlo hɛlɛle kɛ: “Me adwenle nu wienyi, Sunsum Nwuanzanwuanza ne ɔdaye ɔze kɛ membɔ adalɛ.” (Wulomuma 9:1) Noko akee,  kɛ ɔkɛyɛ na yɛanwu kɛ yɛ adwenle ne ɛlɛyɛ mɔɔ Gyihova sunsum nwuanzanwuanza ne kpondɛ la ɛ? Kyesɛ yɛtete ye.

8. (a) Kɛzi ahonle ne bahola ahile adwenle ne adenle ɛ, na duzu a ɔwɔ kɛ yɛmaa nwolɛ kyia yɛ titile wɔ yɛ kpɔkɛzilɛ nu a? (b) Duzu ati a ɔdwu mekɛ ne bie a Keleseɛnenli adwenle mɔɔ ɛngyegye ye wɔ debie bie anwo la ɛngile kɛ ɔle kpalɛ ɛ? (Nea ɔbodwɛkɛ.)

⁸ Kɛzi ɛbahola wɔava wɔ adwenle ne wɔazi kpɔkɛ kpalɛ ɛ? Bie mɔ nea kɛzi bɛte nganeɛ la anwo a si mɔɔ bɛbayɛ la anwo kpɔkɛ a. Na akee bie a bɛaha kɛ, “Ɔngyegye me adwenle.” Mɔɔ wɔ yɛ ahonle nu la kola kile yɛ mɔɔ ɔwɔ kɛ yɛyɛ la. Baebolo ne ka kɛ: “Ahonle le mɛlɛbɛla tɛla debie biala, . . . nwane a kɛhola kɛde ɔ bo a?” (Gyɛlɛmaya 17:9) Ɛhye ati, tɛ mɔɔ yɛ ahonle ne kulo la a ɔwɔ kɛ yɛmaa nwolɛ kyia yɛ titile a. Emomu, ɔwɔ kɛ yɛdumua yɛsuzu mɔɔ bazɔ Gyihova Nyamenle anye la anwo. *

9. Duzu a le Nyamenle ɛzulolɛ, na kɛzi ɔwɔ kɛ yɛmaa ɔka yɛ adwenle ne ɛ?

⁹ Saa amgba yɛ kpɔkɛzilɛ ne gyi yɛ adwenle ne mɔɔ yɛva Baebolo ne yɛtete ye la azo a ɔbala yɛ Nyamenle ɛzulolɛ ali, na tɛ yɛdayɛ mumua ne yɛ atiakunluwɔzo. Suzu edwɛkɛ ɛhye anwo. Ɛnee Amɛnlado Nihɛmaya mɔɔ di nɔhalɛ la lɛ adenle maa menli mɔɔ wɔ Gyɛlusalɛm la tuodua ezukoa anzɛɛ adwule bie maa ye. Noko yeanyɛ  ye zɔ. Duzu ati ɔ? Yeangulo kɛ ɔbasisi Nyamenle menli na yeayɛ debie mɔɔ ɛnzɔ Gyihova anye la. Ɔhanle kɛ: “Mame ɔlua Nyamenle ɛzulolɛ ti meanyɛ zɔhane.” (Nihɛmaya 5:15) Nyamenle mɔɔ yɛfi yɛ ahonle nu yɛazulo ye na yɛayɛ mɔɔ sɔ yɛ anwuma Selɛ ne anye la anwo hyia. Ɛzulolɛ kpalɛ ɛhye baha yɛ yeamaa yɛakpondɛ adehilelɛ yɛavi Nyamenle Edwɛkɛ ne anu wɔ mekɛ mɔɔ yɛlɛbɔ kpɔkɛ bie la.

10, 11. Baebolo ngyinlazo mɔɔ fane nzanlonlɛ nwo la boni a wɔ ɛkɛ a, na kɛ ɔkɛyɛ na yɛanyia Nyamenle adehilelɛ yɛava ngyinlazo ɛhye mɔ yɛali gyima ɛ?

¹⁰ Kɛ neazo la, suzu nzanlonlɛ nwo nea. Saa yɛkɔ ɛkponledolɛ bo a, ɔwɔ kɛ yɛ nuhua ko biala si kpɔkɛ kɛ mebanlo nza anzɛɛ menrɛnlo? Mɔɔ lumua la, ɔwɔ kɛ yɛtete yɛ nwo. Baebolo ngyinlazo boni a fane edwɛkɛ ɛhye anwo a? Baebolo ne ɛndua nza ekyi mɔɔ awie banlo la. Ɔye Gyihova ayɛlɛ kɛ yeva nza yehyɛ yɛ la. (Edwɛndolɛ 104:14, 15) Noko, Baebolo ne tua nza dɔɔnwo ɛnlonlɛ nee anyelielɛ mgbane mgbane. (Luku 21:34; Wulomuma 13:13) Bieko, ɔkile kɛ nzabolɛ le ɛtane kpole kɛ nla nwo ɛbɛlatane la. *​—1 Kɔlentema 6:9, 10.

¹¹ Keleseɛnenli fa ngyinlazo ɛhye mɔ tete ye adwenle na ɔnwu mɔɔ le kpalɛ nee mɔɔ le ɛtane la. Yemɔti, saa yɛyia nzanlonlɛ nwo kpɔkɛzilɛ wɔ ayia bie abo a, ɔwɔ kɛ yɛbiza yɛ nwo kɛ: ‘Duzu ayia ɔ? Asoo bɛbayɛ ninyɛne bamaa yeabo zo na yeayɛ anyelielɛ mgbane mgbane ɔ? Ngyegyelɛ boni a melɛ a? Asoo mekulo nza, meno ye dɔɔnwo, na ɔkile me mɔɔ meyɛ la? Asoo mebahola meazɔ me nwo na meanno ye dɔɔnwo ɔ?’ Mekɛ mɔɔ yɛlɛsuzu Baebolo ngyinlazo ɛhye mɔ nee kpuyia zɛhae  mɔ anwo la, ɔle kpalɛ kɛ yɛsɛlɛ Gyihova ɛkɛ adehilelɛ. (Bɛgenga Edwɛndolɛ 139:23, 24.) Wɔ zɛhae adenle zo, ɛnee yɛlɛto ɛsalɛ yɛavɛlɛ Gyihova kɛ ɔva ye sunsum nwuanzanwuanza ne ɔhile yɛ adenle. Ɛnee eza yɛlɛtete yɛ adwenle ne yɛamaa yeava Nyamenle ngyinlazo ne mɔ yeali gyima. Noko akee, debie fofolɛ wɔ ɛkɛ mɔɔ ɔhyia kɛ yɛsuzu nwo wɔ yɛ kpɔkɛzilɛ nu a.

12, 13. Duzu ati a Keleseɛnema lɛ adwenle ngakyile wɔ ninyɛne bie mɔ anwo ɛ, na kɛzi ɔwɔ kɛ yɛyɛ yɛ nyɛleɛ wɔ adwenle ngakyile zɛhae mɔ anwo a?

¹² Ɔdwu mekɛ ne bie a, ɔbazi ɛ nwo kɛ ɛbanwu kɛ asolo kɛzi Keleseɛnema adwenle maa bɛyɛ ninyɛne bie mɔ la. Sonla ko nwu nyɛleɛ anzɛɛ amaamuo bie kɛ ɔnle kpalɛ; noko, awie gyɛne anye die nwo na ɔnnwu deɛmɔti bɛse ɔnle kpalɛ la. Kɛ neazo la, mɔɔ fane nza mɔɔ menli yia nu no la anwo la, sonla ne bie wɔ ɛkɛ ne a ɔ nye die kɛ ɔ nee ɔ gɔnwo mɔ babɔ nu anlo nza nɔsolɛ nu wɔ mekɛ mɔɔ bɛlɛdie bɛ menle la; noko, nyɛleɛ ɛhye bahola agyegye awie gyɛne. Duzu ati a adwenle ngakyile zɛhae wɔ ɛkɛ a, na kɛzi ɔwɔ kɛ ɔka yɛ kpɔkɛzilɛ ɛ?

¹³ Deɛmɔti menli lɛ adwenle ngakyile la zonle. Asolo ɛleka mɔɔ bɛtetele yɛ nuhua ko biala la. Kɛ neazo la, bie mɔ ze kɛ subane bie gyegye bɛ mɔɔ bɛlɛbɔ mɔdenle kɛ bɛbahakyi a, bie a ɛnee bɛtɛkolale nwolɛ gyima di. (1 Arelemgbunli 8:38, 39) Saa ɔfane nza nwo a, bie a menli ɛhye mɔ banlea boɛ wɔ nwolɛ. Saa sonla zɛhae bakpɔla wɔ a, bie a ɔnrɛhulo kɛ ɔkɛnlo nza mɔɔ ɛbava wɔamaa ye la. Asoo ɛbava ɛya? Asoo ɛbayɛ ye kyengye kɛ ɔnlo? Kyɛkyɛ. Bie a ɔngulo kɛ ɔka kpɔkɛ mɔɔ yezi la ɔkile wɔ. Saa ɛze deɛmɔti ɔngulo kɛ ɔno anzɛɛ ɛnze bɔbɔ a, mediemalɔlɛ ti ɔnle kɛ ɛyɛ ye kyengye.

14, 15. Edwɛkɛ boni a ɛnee ɛvoya mɔɔ lumua la asafo ne anu amra lɛ adwenle ngakyile wɔ nwo a, na duzu a Pɔɔlo hanle kɛ bɛyɛ a?

 ¹⁴ Ɛzoanvolɛ Pɔɔlo nwunle ye kɛ ɛnee Keleseɛnema mɔɔ wɔ ɛvoya mɔɔ lumua la anu la lɛ adwenle ngakyile. Wɔ zɔhane mekɛ ne, ɛnee ɔgyegye Keleseɛnema bie mɔ kɛ bɛkɛli aleɛ bie mɔ mɔɔ bɛva bɛbɔ afɔle bɛmaa awozonle la. (1 Kɔlentema 10:25) Noko, ɛnee Pɔɔlo adwenle ɛngyegye ye wɔ aleɛ zɛhae mɔ mɔɔ nzinlii bɛtɔne ye wɔ gua nu la anwo. Ɔnwunle ye kɛ awozonle ɛnle ɛhwee; tɛ awozonle ne mɔ ɛkɛ a aleɛ ne vi a, emomu Gyihova a bɔle a na Ɔdaye yɛɛ yeva yemaa a. Noko akee, Pɔɔlo dele ɔ bo kɛ tɛ menli ne amuala a lɛ ye adwenle ne bie a. Ɔbahola yeara ye kɛ ɛnee bie mɔ sonle awozonle kolaa na bɛarayɛ Keleseɛnema. Yemɔti, ɛnee debie biala mɔɔ fane awozonle nwo la ɛnle kpalɛ fee ɛmmaa bɛ. Duzu a Pɔɔlo yɛle a?

¹⁵ Pɔɔlo hanle kɛ: “Ɔwɔ kɛ yɛdayɛ mɔɔ yɛ diedi nu yɛ se la yɛboa bɛdabɛ mɔɔ bɛ diedi nu ɛnyɛ se la wɔ bɛ debie biala anu. Ɔnle kɛ yɛmaa yɛ nye die yɛ ngome yɛ nwo ala. Ɔluakɛ Kelaese andwenle ɔdaye mumua ne ɔ nwo.” (Wulomuma 15:1, 3) Pɔɔlo hilele kɛ ɔwɔ kɛ yɛfa yɛ mediema ngyianlɛ yɛdumua yɛ ɛdeɛ nyunlu, kɛmɔ Kelaese yɛle la. Wɔ edwɛkɛ bie mɔɔ fane ɛhye anwo la anu, Pɔɔlo hanle kɛ saa ɔdi nane na ɔbagyegye Kelaese mboane ne mɔ mɔɔ sonle bolɛ mɔɔ yeva ye ngoane yedo aze yemaa bɛ la bie a, ɛnee ɔnrɛli.​—Bɛgenga 1 Kɔlentema 8:13; 10:23, 24, 31-33.

16. Duzu ati a ɔnle kɛ bɛdabɛ mɔɔ bɛ adwenle gyegye bɛ wɔ ninyɛne bie mɔ anwo la bua bɛ gɔnwo mɔ ndɛne ɛ?

¹⁶ Noko akee, ɔnle kɛ bɛdabɛ mɔɔ bɛ adwenle ɛmmaa bɛ adenle wɔ ninyɛne bie mɔ anwo la yɛ ye kyengye kɛ ɔwɔ kɛ awie mɔ nyia bɛ adwenle ne bie. (Bɛgenga Wulomuma 14:10.) Nɔhalɛ nu, ɔwɔ kɛ yɛfa yɛ adwenle ne yɛbua yɛ nwo ndɛne na tɛ kɛ yɛfa yɛabua awie mɔ ndɛne a.  Kakye Gyisɛse edwɛkɛ ɛhye: “Bɛmmabua awie mɔ ndɛne na Nyamenle ambua bɛ ndɛne.” (Mateyu 7:1) Ɔwɔ kɛ asafo ne anu amra kɔsɔɔti bɔ mɔdenle kɛ bɛnrɛzu ninyɛne mɔɔ awie lɛ adenle si ɔ ti anwo kpɔkɛ wɔ nwo la anwo kpolera. Ɔnle kɛ yɛyɛ debie mɔɔ bamaa yɛ mediema akpo aze a, emomu ɔwɔ kɛ yɛkpondɛ ndenle yɛdua zo yɛda ɛlɔlɛ nee koyɛlɛ ali, na yɛmaa yɛ nwo anwosesebɛ ngoko ngoko.​—Wulomuma 14:19.

17. Duzu a ɛdo menli dɔɔnwo adwenle ɛnɛ a?

¹⁷ Ɛzoanvolɛ Pɔɔlo hɛlɛle kɛ: “Nyia . . . adwenle kpalɛ mɔɔ anu te la.” (1 Temɔte 1:19) Adwenle kpalɛ mɔɔ anu te wɔ Gyihova Nyamenle anyunlu la le nyilalɛ kpole. Ɔnle kɛ adwenle mɔɔ menli dɔɔnwo lɛ ye ɛnɛ la. Pɔɔlo  hilele kɛ menli bie mɔ “adwenle ɛwu kɛ asɛɛ bɛva bulalɛ mɔɔ ɛdɔlɔ woonwu la bɛwula nu.” (1 Temɔte 4:2) Bulalɛ mɔɔ ɛdɔlɔ woonwu la yela nwonane ku ye, ɔmaa ɔyɛ kapenle mɔɔ ɛnde nganeɛ a. Yemɔti, menli dɔɔnwo adwenle ɛwu, yeyɛ kapenle, yetili, ɔmbɔ kɔkɔ, ɔngyi debie, ɔnze nyiane yɛɛ ɔmbua fɔlɛ wɔ ɛtaneyɛlɛ nwo. “Ɛnɛ, ɔyɛ menli dɔɔnwo fɛ kɛ bɛ adwenle ɛmbua bɛ fɔlɛ a.”

18, 19. (a) Saa yɛ adwenle ne bua yɛ fɔlɛ a, duzu nvasoɛ a yɛbahola yɛanyia a? (b) Saa yɛyɛ ɛtane bie na yɛnlu yɛ nwo, na yɛ adwenle kɔ zo bua yɛ fɔlɛ wɔ nwo a, duzu a yɛbahola yɛayɛ a?

¹⁸ Nɔhalɛ nu, fɔlɛbualɛ le adenle ko mɔɔ adwenle ne dua zo ka kile yɛ kɛ yɛvo a. Saa nganeɛdelɛ ɛhye ka ɛtanevolɛ maa ɔnu ɔ nwo a, bɛbava ɛtane kpole mɔɔ yeyɛ la bɔbɔ bɛahyɛ ye. Kɛ neazo la, Belemgbunli Devidi yɛle ɛtane kpole noko ɔluakɛ ɔvile ahonle nu ɔnlunle ɔ nwo  la ati, bɛvale bɛhyɛle ye. Ye ɛtane ne mɔɔ ɔhyile, na ɔbɔle mɔdenle kɛ ɔbali Gyihova mɛla zo ɔvi zɔhane mekɛ ne la manle ɔnwunle kɛ “kpalɛ yɛɛ fakyɛ” wɔ Gyihova afoa. (Edwɛndolɛ 51:1-19; 86:5) Noko akee, saa yɛ adwenle ne kɔ zo bua yɛ fɔlɛ wɔ mekɛ mɔɔ yɛnlu yɛ nwo na bɛva yɛ ɛtane bɛhyɛ yɛ la anzi a, duzu a ɔwɔ kɛ yɛyɛ a?

¹⁹ Ɔyɛ a, adwenle ne kola bua yɛ fɔlɛ maa ɔbo zo, na ɔgyegye ɛtanevolɛ bie wɔ mekɛ bɔbɔ mɔɔ zɔhane ɛtane ne ɛpɛ nu dɛbadɛba la. Saa ɔba ye zɛhae a, ɔhyia kɛ yɛmaa yɛ adwenle ne nwu ye kɛ Gyihova le kpole tɛla dasanli biala nganeɛdelɛ. Ɔwɔ kɛ yɛdie yɛdi na yɛnwu kɛ Gyihova kulo yɛ na ɔfa ɛtane ɔkyɛ kɛmɔ yɛmaa awie mɔ anwosesebɛ kɛ bɛyɛ la. (Bɛgenga 1 Dwɔn 3:19, 20.) Noko akee, adwenle kpalɛ mɔɔ anu te la bamaa yɛ nzo nu adwo yɛ, yɛanyia anyelielɛ kpole mɔɔ ɛlɛminli ewiade ye la bie. Menli dɔɔnwo mɔɔ mekɛ bie yɛle ɛtane kpole la ɛnyia anwodɔlɛ ɛhye na ɛnɛ bɛkola bɛfa adwenle kpalɛ mɔɔ anu te la bɛsonle Gyihova Nyamenle.​—1 Kɔlentema 6:11.

20, 21. (a) Duzu a buluku ɛhye baboa wɔ yeamaa wɔayɛ a? (b) Fanwodi boni a Keleseɛnema lɛ a, na kɛzi ɔwɔ kɛ yɛfa yɛdi gyima ɛ?

²⁰ Bɛyɛ buluku ɛhye kɛ bɛfa baboa wɔ bɛamaa wɔanyia anyelielɛ nee adwenle kpalɛ mɔɔ anu te la wɔ mekɛ mɔɔ ɛha wɔ Seetan ewiade ɛtane ɛhye mɔɔ wɔ ye awieleɛ mekɛ nu na ngyegyelɛ ɛbu zo wɔ nu la anu. Yɛze ye wienyi kɛ, buluku ɛhye ɛnrɛhola ɛnrɛha Baebolo nu mɛla nee ngyinlazo mɔɔ ɔwɔ kɛ ɛdwenle nwo na ɛfa ɛdi gyinlabelɛ mɔɔ ɛbayia ye alehyenlɛ biala anwo gyima la kɔsɔɔti anwo edwɛkɛ. Bieko, ɔnle kɛ ɛnea kɛ ɛbanyia ninyɛne mɔɔ ɔwɔ kɛ ɛfa wɔ adwenle ɛsi nwolɛ kpɔkɛ la amuala anwo mɛla. Emomu, bɛyɛ buluku ɛhye kɛ bɛfa bɛaboa wɔ bɛamaa wɔatete wɔ adwenle ne na wɔava wɔali gyima ɔlua Nyamenle Edwɛkɛ ne mɔɔ ɛbazukoa wɔanwu  kɛzi ɔwɔ kɛ ɛfa ɛdi gyima wɔ wɔ ɛbɛlabɔlɛ nu la azo. “Kelaese mɛla ne” ɛnle kɛ Mosisi Mɛla ne mɔɔ bɛhɛlɛle la, emomu, menli mɔɔ di zolɛ la fa ngyinlazo mɔɔ wɔ nu nee bɛ adwenle a di gyima a. (Galeehyeama 6:2) Ɛhye ati, Gyihova ɛmaa Keleseɛnema fanwodi kpole. Noko akee, ye Edwɛkɛ ne kakye yɛ kɛ ɔnle kɛ yɛfa yɛ fanwodi ne ‘yɛkedɛheda ɛtane zo’ anzɛɛ yɛyɛ ɛtane. (1 Pita 2:16) Emomu, fanwodi zɛhae maa yɛnyia adenle kpole yɛkile kɛ yɛkulo Gyihova.

²¹ Saa ɛfa asɔneyɛlɛ ɛsuzu kɛzi ɛbava Baebolo ngyinlazo wɔali gyima na ɛyɛ mɔɔ wɔzi nwolɛ kpɔkɛ la a, ɛnee ɛlɛtoa debie mɔɔ ɛbɔle ye ɛyɛlɛ bo wɔ mekɛ mɔɔ lumua mɔɔ ɛnwunle Gyihova la azo. Ɛbatete wɔ adwenle tumi ne wɔ mekɛ mɔɔ ɛlɛfa wɔali gyima la. (Hibuluma 5:14) Wɔ adwenle ne mɔɔ wɔva Baebolo ne wɔtete ye la bayɛ nyilalɛ amaa wɔ alehyenlɛ biala wɔ wɔ ɛbɛlabɔlɛ nu. Kɛmɔ tɔɔkye kola maa ɛnwu aze la, zɔhane ala a wɔ adwenle ne bahola aboa wɔ yeamaa wɔazi kpɔkɛ mɔɔ sɔ wɔ anwuma Selɛ ne anye a. Ɛhye a le adenle kpalɛ mɔɔ ɛbalua zo wɔazie ɛ nwo wɔ Nyamenle ɛhulolɛ nu a.