Gyihova Alasevolɛ ɛva Baebolo ngakyile ɛli gyima, bɛpelente bie na bɛva bɛmaa wɔ ɛvolɛ dɔɔnwo anu. Noko yɛnwunle kɛ ɔhyia kɛ yɛyɛ ngilebɛbo fofolɛ mɔɔ baboa menli kpalɛ yeamaa bɛazukoa “nɔhalɛ ne anwo nɔhalɛ ndelebɛbo,” mɔɔ Nyamenle kpondɛ kɛ menli kɔsɔɔti nwu ye la. (1 Timote 2:3, 4) Ɔti, wɔ 1950 ne anu, yɛbɔle ɔ bo kɛ yɛye yɛ adwuleso aneɛ nu Baebolo, Ewiade Fofolɛ Ngilebɛbo ne foa bie mɔ. Bɛhile Baebolo ɛhye abo nɔhalɛ nu bɛmaa yeli munli wɔ aneɛ mɔɔ bo 170 la anu.

Ɛnee bɛhyia Baebolo mɔɔ ɔ bo ɛdelɛ ɛnyɛ se la. Mekɛ ɛlɛkɔ la ɛnee aneɛ ɛlɛkakyi, yɛɛ edwɛkɛ agbɔkɛ mɔɔ nuhua ɛnla ɛkɛ anzɛɛ bɛkpa nwo mɔɔ ɔ bo ɛdelɛ yɛ se la wɔ Baebolo dɔɔnwo anu. Bieko, bɛnwu tete bɛsanloangɛlɛlera mɔɔ le nɔhalɛ na ɔbikye mɔlebɛbo ɛdeɛ ne la dɔɔnwo, na ɛhye ɛmaa bɛde tete Hibulu, Elam nee Giliki aneɛ ne mɔ abo kpalɛ.

Ɛnee bɛhyia ngilebɛbo mɔɔ ka Nyamenle edwɛkɛ ne nɔhalɛ nu la. Ɔwɔ kɛ menli mɔɔ kile Baebolo ne abo la fa nɔhalɛlilɛ kile edwɛkɛ ne abo kɛ mɔɔ ɔde ye wɔ mɔlebɛbo ɛdeɛ ne anu la, tɛla kɛ bɛkɛhakyi Nyamenle edwɛkɛ ne mɔɔ vi sunsum nu la. Noko wɔ Baebolo dɔɔnwo anu, Nyamenle duma, Gyihova ne ɛnle nu.

Ɛnee bɛhyia Baebolo mɔɔ di ye Kɛlɛvolɛ ne eni la. (2 Samoɛle 23:2) Wɔ bɛsanloangɛlɛlera Baebolo dɛba ne anu, ɛnee duma Gyihova ne finde kɛyɛ 7,000, ɔti Ewiade Fofolɛ Ngilebɛbo ne ɛva ɛwula ɔ bo zo ne bieko kɛ mɔɔ bɛhile ye wɔ ɔ bo ɛkɛ ne la. (Edwɛne 83:18) Neɛnleanu kpalɛ mɔɔ bɛva ɛvolɛ dɔɔnwo bɛyɛ la ɛmaa yɛnyia Baebolo ɛhye mɔɔ maa yɛnwu Nyamenle adwenle wienyi la, na ɔwɔ kɛ yɛfa anyelielɛ yɛkenga. Saa ɛlɛ Ewiade Fofolɛ Ngilebɛbo ne wɔ wɔ aneɛ nu anzɛɛ ɛnlɛ bie a, yɛmaa wɔ anwosesebɛ kɛ ɛmaa ɔyɛ wɔ subane kɛ ɛbagenga Gyihova Edwɛkɛ ne alehyenlɛ biala.​—Dwɔhyua 1:8; Edwɛne 1:2, 3.

• Duzu ati a yɛbɔle kpɔkɛ kɛ Baebolo ngilebɛbo fofolɛ nwo hyia ɛ?

• Duzu a ɔwɔ kɛ awie mɔɔ kulo kɛ ɔsukoa Nyamenle ɛhulolɛdeɛ ne anwo debie la yɛ ye alehyenlɛ biala a?