BƐVALE Hibulu edwɛkɛkpɔkɛ sheʼohl′ nee Giliki edwɛkɛkpɔkɛ hai′des bɛlile gyima wɔ Baebolo ne anu mɔɔ bo fane 70, wɔ aneɛ mɔɔ bɛlumua bɛvale bɛhɛlɛle la anu. Edwɛkɛ agbɔkɛ nwiɔ zɔhane fane ewule nwo. Baebolo ngilebɛbo bie mɔ kile ɔ bo kɛ ɛbolɔ anzɛɛ hell. Maa yɛnlea kɛzi bɛva sheʼohl′ nee hai′des bɛli gyima wɔ Baebolo ne ɛleka ngakyile la.

Nolobɔvo ne 9:10 ka kɛ: “Gyima anzɛɛ ndwenlenwo anzɛɛ adwenle anzɛɛ nrɛlɛbɛ biala ɛnle Ɛbolɔ [sheʼohl′] mɔɔ ɛlɛkɔ la.” Asoo ɛhye kile kɛ sheʼohl′ kile ɛleka kpɔtee bie mɔɔ yɛzie yɛ dɔvolɛ bie la ɔ? Kyɛkyɛ. Saa Baebolo ne ka ɛleka kpɔtee bie mɔɔ bɛsie awie anzɛɛ nla nwo edwɛkɛ a, ɔnva Hibulu nee Giliki edwɛkɛ agbɔkɛ sheʼohl′ nee hai′des ɔnli gyima na emomu ɔfa edwɛkɛ agbɔkɛ gyɛne a ɔdi gyima a. (Mɔlebɛbo 23:7-9; Mateyu 28:1) Bieko, Baebolo ne ɛnva edwɛkɛkpɔkɛ sheʼohl′ ɛngile kuma ko mɔɔ bɛsie menli dɔɔnwo wɔ nu la.—Mɔlebɛbo 49:30, 31.

Ɛnee akee, duzu a sheʼohl′ kile a? Nyamenle Edwɛkɛ ne kile kɛ sheʼohl′ anzɛɛ hai′des kile debie mɔɔ tɛla kuma mɔɔ bɛsie menli dɔɔnwo wɔ nu a. Kɛ neazo la, Ayezaya 5:14 kile kɛ, “ɛbolɔ [sheʼohl′] ɛbuke ɔ nloa wanaanwo.” Ɔwɔ nuhua kɛ, saa yɛbaha a, sheʼohl′ ɛme mɔwuamra dɔɔnwo ɛdeɛ, noko ɔda ali kɛ ɔ ko ɛtɛyile. (Mrɛlɛbulɛ 30:15, 16) Ɛleka mɔɔ bɛsie menli mɔɔ ɛwu la kola yi ɛdeɛ, noko ‘ɛbolɔ ako ɛnyi ɛlɛ.’ (Mrɛlɛbulɛ 27:20) Sheʼohl′ ɛnyi ɛlɛ. Ɔnlɛ ɛweɛne. Ɛhye ati sheʼohl′ anzɛɛ hai′des ɛngile ɛleka kpɔtee bie mɔɔ wɔ ɛkɛ a. Emomu, ɔkile ɛleka mɔɔ mɔwuamra amuala wɔ, mɔɔ ɔle sɛkɛlɛneɛ adenle zo ɛleka mɔɔ alesama ɛlafe wɔ ewule nu la.

Baebolo ne ewudwazo ngilehilelɛ ne eza boa yɛ maa yɛte sheʼohl′ nee hai′des abo kpalɛ. Nyamenle Edwɛkɛ ne fa sheʼohl′ nee hai′des ka mɔwuamra mɔɔ bɛbadwazo bɛ la anwo edwɛkɛ. *  (Dwobu 14:13; Gyima ne 2:31; Yekile 20:13) Nyamenle Edwɛkɛ ne eza kile kɛ, tɛ menli mɔɔ zonlenle Gyihova la angomekye a wɔ sheʼohl′ anzɛɛ hai′des a, emomu menli dɔɔnwo mɔɔ anzonle ye la noko wɔ ɛkɛ. (Mɔlebɛbo 37:35; Edwɛndolɛ 55:15) Ɛhye ati, Baebolo ne kilehile kɛ, “ɛtanevolɛma nee kpalɛyɛlɛma badwazo ara ngoane nu.”—Gyima ne 24:15.