1, 2. Bobɔ menli mɔɔ Gyihova vale bɛ agɔnwolɛ kpalɛ la bie mɔ aluma.

NWANE a ɛbahulo kɛ ɛkɛva ye agɔnwolɛ a? Ɔda ali wienyi kɛ ɛbahulo kɛ ɛkɛva awie mɔɔ ɔ nee wɔ adwenle, wɔ ngyinlazo, nee ninyɛne mɔɔ ɛkulo le ko la agɔnwolɛ. Na ɛ nye balie awie mɔɔ lɛ subane kpalɛ mɔɔ le kɛ nɔhalɛlilɛ nee atiakunlukɛnlɛma la anwo.

² Tetedwɛkɛ kile kɛ, Nyamenle vale alesama bie mɔ agɔnwolɛ kpalɛ. Kɛ neazo la, Gyihova vɛlɛle Ebileham kɛ ɔ gɔnwo. (Ayezaya 41:8; Gyemise 2:23) Nyamenle hanle Devidi anwo edwɛkɛ kɛ “ɔle sonla mɔɔ sɔ me nye a,” ɔluakɛ ɛnee ɔle sonla mɔɔ Gyihova kulo ye a. (Gyima ne 13:22) Na Gyihova hanle ngapezonli Daneɛle anwo edwɛkɛ kɛ ‘mekulo ye kpole.’—Daneɛle 9:23.

3. Duzu ati a Gyihova fa menli bie mɔ agɔnwolɛ ɛ?

³ Duzu ati a Gyihova bule Ebileham, Devidi, nee Daneɛle kɛ ɔ gɔnwo mɔ ɛ? Ɔzele Ebileham kɛ: “Wɔdie me ne.” (Mɔlebɛbo 22:18) Yemɔti Gyihova twe bikye menli mɔɔ bɛlɛ bɛ nwo aze yɛ mɔɔ ɔka la. Ɔhanle ɔhilele Yizilayɛma kɛ: “Bɛdie me ne na mebayɛ bɛ Nyamenle, na bɛdabɛ bɛayɛ me menli.” (Gyɛlɛmaya 7:23) Saa ɛtie Gyihova ane a, ɛdawɔ noko ɛbahola wɔayɛ ɔ gɔnwo!

4, 5. Kɛzi Gyihova fa ye tumi ne boa ye menli ɛ?

⁴ Suzu nvasoɛ mɔɔ Nyamenle agɔnwolɛvalɛ fa ba la anwo nea. Baebolo ne ka kɛ Gyihova fa ɔ nye bɔ mgbɔlɛka, na “ɔfa tumi ɔdie bɛdabɛ mɔɔ bɛdi nɔhalɛ bɛmaa ye la.” (2 Edwɛkɛsisilɛ 16:9) Kɛzi Gyihova bava ye tumi ne aboa wɔ ɛ? Edwɛndolɛ 32:8 da ndenle ne ko ali kɛ, medame Gyihova “mebadu wɔ folɛ, mebahilehile wɔ adenle mɔɔ ɔwɔ kɛ ɛfa nu la; mebamaa me nye ara ɛ nwo zo na meadu wɔ folɛ.”

⁵ Nea kɛzi ɛhye kile kɛ Gyihova dwenle yɛ nwo ɛ! Ɔbamaa wɔ adehilelɛ mɔɔ hyia la na yeabɔ ɛ nwo bane wɔ mekɛ mɔɔ ɛlɛfa wɔali gyima la. Nyamenle kulo kɛ ɔboa wɔ ɔmaa ɛgyinla wɔ sɔnea ne mɔ anloa. (Edwɛndolɛ 55:22) Yemɔti saa ɛfa ahonle mɔɔ di munli la ɛsonle Gyihova a, ɛbahola wɔanyia anwodozo kɛ edwɛndolɛnli ne mɔɔ hanle kɛ: “Mefa [Gyihova, NW] mesie me nyunlu dahuu; ɔboalekɛ ɔgyi me sa fema zo, ɛhwee ɛngola me bo tu.” (Edwɛndolɛ 16:8; 63:8) Ɛhɛe, Gyihova bahola aboa wɔ amaa wɔabɔ ɛbɛla mɔɔ sɔ ɔ nye la. Noko, kɛmɔ ɛze la, Nyamenle kpɔvolɛ bie wɔ ɛkɛ ne mɔɔ ɔngulo kɛ ɛkɛyɛ ɛhye a.

6. Ɛzonle boni a Seetan dole alesama a?

⁶ Buluku ɛhye Tile 11 ne hilehilele kɛzi Seetan Abɔnsam dwazole tiale Gyihova tumililɛ ne la anu. Seetan dole Nyamenle ɛzonle kɛ ɔle adalɛ na ɔlua zo ɔhilele kɛ Gyihova anyɛ ye boɛ kɛ yeammaa Adam nee Yive anzi bɛ ti anwo kpɔkɛ wɔ mɔɔ le kpalɛ nee mɔɔ le ɛtane la anwo. Adam nee Yive yɛle ɛtane, na bɛ bo zo amra bɔle ɔ bo kɛ bɛso wɔ azɛlɛ ne azo la, Seetan manle adwenle mɔɔ alesama kɔsɔɔti lɛ sonle Nyamenle la anwo rale edwɛkɛ. Seetan zele Nyamenle kɛ: “Tɛ ɛlɔlɛ mɔɔ menli lɛ maa wɔ la ati a bɛsonle wɔ a. Saa ɛmaa me adenle a anrɛɛ menrɛmaa awie biala ɛnrɛzonle wɔ.” Dwobu edwɛkɛ ne kile kɛ ɛhye a ɛnee wɔ Seetan adwenle nu a.  Nwane a le Dwobu, na adenle boni azo a ɔ nwo rale Seetan ɛzonledolɛ ne anu a?

7, 8. (a) Duzu a manle Dwobu yɛle ngakyile vile ye mekɛ zo amra anwo a? (b) Kɛzi Seetan zule Dwobu adwenle ne anwo kpolera ɛ?

⁷ Dwobu dɛnlanle aze ɛvolɛ kɛyɛ 3,600 mɔɔ ɛze ɛhɔ la anu. Ɛnee ɔle sonla kpalɛ, ɔluakɛ Gyihova zele kɛ: “Awie biala mɔɔ le kɛ ɔdaye la ɛnle aleɛabo, ɛtane biala ɛnle ɔ nwo yɛɛ ɔdi nɔhalɛ. Ɔsulo Nyamenle yɛɛ ɔtwe ɔ nwo ɔfi ɛtane nwo.” (Dwobu 1:8) Ɛnee Nyamenle anye die Dwobu anwo.

⁸ Seetan zule adwenle mɔɔ ɔti Dwobu sonle Nyamenle la anwo kpolera. Abɔnsam zele Gyihova kɛ: “Wɔbɔ ɔdaye [Dwobu], ɔ mra nee debie biala mɔɔ ɔlɛ la anwo bane. Dahuu ɛsinza ye, ye abusua ne nee debie biala mɔɔ ɔlɛ la. Wɔyila ɔ sa anloa gyima zo yɛɛ dahuu ye anwonyia ne, kpole ala a ɔyɛ a. Saa ɛkulo a die debie biala mɔɔ ɔlɛ la fi ɔ sa nu na ɛkɛde mgbole mɔɔ ɔkɛheha ɔkɛtietia wɔ la.”—Dwobu 1:10, 11.

9. Boni a Gyihova yɛle wɔ Seetan ɛzonledolɛ ne anwo a, na duzu ati ɔ?

⁹ Ɛhye ati Seetan hanle kɛ Dwobu sonle Nyamenle ɔluakɛ ɔnyia zolɛ nvasoɛ la ati ɔ. Abɔnsam eza hanle kɛ saa Dwobu yia sɔnea a, ɔbakpo Nyamenle. Boni a Gyihova yɛle wɔ Seetan ɛzonledolɛ ne anwo a. Kɛmɔ ɛnee edwɛkɛ ne fane adwenle mɔɔ Dwobu lɛ la anwo la ati, Gyihova manle Seetan adenle kɛ ɔzɔ Dwobu ɔnlea. Ɔlua adenle ɛhye azo bɛbanwu ye saa Dwobu lɛ ɛlɔlɛ maa Nyamenle anzɛɛ ɔnlɛ ɛlɔlɛ ɔmmaa ye a.

10. Sɔnea boni a dole Dwobu a, na duzu a ɔyɛle a?

¹⁰ Yeangyɛ biala, Seetan zɔle Dwobu nleanle wɔ ndenle ngakyile zo. Bɛwuale Dwobu nane ne mɔ bie na bɛhunle bie mɔ noko. Bɛhunle ye sonvolɛma ne mɔ anu dɔɔnwo. Ɛhye manle bɛ nwo hyelele bɛ. Esiane bieko zile wɔ mekɛ mɔɔ ahumu kpole bie dule hunle Dwobu amra bulu ne la. Anwubɛnyunlu ɛhye mɔ kɔsɔɔti anu, “Dwobu anyɛ ɛtane biala yɛɛ yeanvu Nyamenle.”—Dwobu 1:22.

11. (a) Ɛzonle mɔɔ tɔ zo nwiɔ la boni a Seetan dole Dwobu a, na boni a Gyihova yɛle wɔ nwolɛ a? (b) Duzu a Dwobu yɛle wɔ ye ewule ɛtane ne mɔɔ yɛ nyane la anwo a?

 ¹¹ Seetan ammaa yeanga ɛkɛ ne ala. Ɔbayɛ kɛ ɔzuzule kɛ Dwobu bahola agyinla ye ninyɛne, ye sonvolɛma, nee ɔ mra mɔɔ bavi ɔ sa la anloa ɛdeɛ, noko saa ɔ nwo to ye a ɔbadwazo yeatia Nyamenle. Gyihova manle Seetan adenle ɔmanle ɔvale ewule ɛtane mɔɔ yɛ nyane la ɔkpondenle Dwobu anwo. Noko ɛhye bɔbɔ anzɛkye diedi mɔɔ Dwobu lɛ wɔ Nyamenle anu la. Emomu, ɔzile ye pi kɛ: “Mebagyinla kpundii kɛ menze nwolɛ bie kɔkpula kɛ menwɔwu.”—Dwobu 27:5.

12. Kɛzi Dwobu nyɛleɛ ne manle Abɔnsam ɛzonle ne yɛle adalɛ ɛ?

¹² Ɛnee Dwobu ɛnze kɛ ye ngyegyelɛ ne vi Seetan. Ɔluakɛ ɛnee Dwobu ɛnze edwɛkɛ mɔɔ Abɔnsam ɛmaa yera Gyihova tumililɛ ne anwo ɛhwee la ati, ɔdele nganeɛ kɛ Nyamenle a ɛlɛmaa yeanwu amaneɛ a. (Dwobu 6:4; 16:11-14) Noko, ɔhɔle zo ɔlile nɔhalɛ ɔmanle Gyihova. Ɔluakɛ Dwobu lile nɔhalɛ la ati, ɔmanle Seetan edwɛkɛ mɔɔ ɔhanle kɛ Dwobu lua angomedi adwenle zo a sonle Nyamenle la yɛle adalɛ!

13. Duzu a vi nɔhalɛ mɔɔ Dwobu lile manle Nyamenle la anu rale a?

¹³ Dwobu nɔhalɛlilɛ ne manle Gyihova nyianle edwɛkɛ kpalɛ buale Seetan ɛzonledolɛ ɛtane ne. Ɛnee Dwobu le Gyihova agɔnwo amgba, na Nyamenle yilale ye wɔ nɔhalɛ mɔɔ ɔlile la anwo.—Dwobu 42:12-17.

14, 15. Duzu ati a yɛkola yɛka ye kɛ ɛzonle mɔɔ Seetan dole Dwobu la ka alesama kɔsɔɔti ɛ?

¹⁴ Edwɛkɛ ne mɔɔ Seetan manle ɔdwazole wɔ nɔhalɛ mɔɔ yɛdi yɛamaa Nyamenle anwo la ɛnvane Dwobu angomekye anwo. Ɔfane ɛdawɔ noko ɛ nwo. Ɛhye da ali wɔ Mrɛlɛbulɛ 27:11 ne anu, ɛleka mɔɔ Gyihova Edwɛkɛ ne ka ye kɛ: “Me ra nrenya, nwu nrɛlɛbɛ na maa me nye ɛlie, amaa saa awie ka me nwo edwɛkɛ a meahola ye bua.” Edwɛkɛ ɛhye mɔɔ bɛhɛlɛle la ɛnee Dwobu ɛwu dɛbadɛba la kile kɛ Seetan a le awie  titile mɔɔ ka Nyamenle anwo edwɛkɛ ɛtane na ɔto Ye azonvolɛ ɛzonle a. Saa yɛbɔ ɛbɛla mɔɔ sɔ Gyihova anye a, yɛmaa ɔnyia edwɛkɛ ɔbua Seetan na ɔlua ɛhye ɛyɛlɛ zo yɛmaa Nyamenle anye die. Kɛzi ɛhye maa ɛte nganeɛ ɛ? Saa bɔbɔ ɔhyia kɛ ɛyɛ nzenzaleɛ wɔ wɔ asetɛnla nu a, asoo ɔnrɛyɛ anyelielɛ kɛ ɛbaboa wɔamaa babua Abɔnsam ɛzonle ne ɔ?

¹⁵ Yɛ mɔɔ Seetan hanle la nzonlɛ: ‘Sonla kɛhulo kɛ ɔkɛdɛnla ngoane nu tɛla kɛ ɔkɛminli anwonyia biala mɔɔ ɔlɛ la.’ (Dwobu 2:4) Kɛmɔ Seetan hanle kɛ “sonla” la ati ɔda ali wienyi kɛ ye ɛzonle ne ɛnga Dwobu angomekye na emomu alesama kɔsɔɔti. Ɛhye le edwɛkɛ mɔɔ anwo hyia kpalɛ a. Seetan ɛmaa edwɛkɛ ɛra nɔhalɛ mɔɔ ɛdi ɛmaa Nyamenle la anwo. Abɔnsam kulo kɛ ɔkɛnwu kɛ saa ɛyia ngyegyelɛ a, ɛkɛyɛ Nyamenle anwo anzosesebɛ na ɛkɛgyakyi tenlene adenle mɔɔ ɛlua zo la. Kɛzi Seetan bayɛ ɛhye ɛ?

16. (a) Ndenle boni a Seetan dua zo twe menli fi Nyamenle anwo a? (b) Kɛzi Abɔnsam bahola ape ndenle ɛhye mɔ azo anyia wɔ ɛ?

¹⁶ Kɛmɔ yɛzuzule nwolɛ wɔ Tile 10 ne la Seetan dua ndenle ngakyile zo twe menli fi Nyamenle anwo. Wɔ adenle bie azo, ɔba menli nwo zo kɛ ‘awenade mɔɔ lua nu ɛlɛkpo, ɔlɛkpondɛ awie yeahye ye yeali.’ (1 Pita 5:8) Ɛhye ati yɛnwu ye gyimalilɛ ne wɔ mekɛ mɔɔ agɔnwolɛma, yɛ nwo amra anzɛɛ menli gyɛne dwazo tia mɔdenle mɔɔ ɛbɔ kɛ ɛsukoa Baebolo ne na wɔava wɔali gyima la anu. * (Dwɔn 15:19, 20) Wɔ adenle fofolɛ zo, “Seetan bɔbɔ kola kakyi ɔ nwo yɛ kɛ ɔle wienyi nu [bɔvolɛ, NW].” (2 Kɔlentema 11:14) Abɔnsam bahola ava mɛlɛbɛla adenle zo abɛlɛbɛla wɔ ahwe wɔ avi ɛbɛlabɔlɛ mɔɔ sɔ Nyamenle anye la anwo. Eza ɔkola ɔmaa ɛ sa nu to na ɛte nganeɛ kɛ ɛnrɛhola ɛnrɛyɛ mɔɔ sɔ Nyamenle anye la. (Mrɛlɛbulɛ  24:10) Saa Seetan yɛ ɔ nwo kɛ ‘awenade mɔɔ lua nu ɛlɛkpo’ anzɛɛ “wienyi nu bɔvolɛ” bɔbɔ a, ye ɛzonledolɛ ne ɛtɛkakyile: Ɔse saa ɛyia sɔnea a ɛbagyakyi Nyamenle ɛzonlenlɛ. Kɛzi ɛbahola wɔabua ye ɛzonledolɛ ne na wɔali nɔhalɛ wɔamaa Nyamenle, kɛmɔ Dwobu yɛle la ɛ?

17. Adwenle titile boni ati a ɔwɔ kɛ yɛdi Gyihova mɛla zo a?

¹⁷ Ɛbahola wɔalua ɛbɛla mɔɔ sɔ Nyamenle anye la azo wɔabua Seetan ɛzonledolɛ ne. Duzu a ɛhye kile a? Baebolo ne ye ɔ nloa kɛ: ‘Fa wɔ ahonle muala, wɔ ɛkɛla muala, nee wɔ anwosesebɛ muala kulo Gyihova wɔ Nyamenle ne.’ (Mɛla ne 6:5) Mekɛ mɔɔ ɛlɔlɛ mɔɔ ɛlɛ ɛmaa Nyamenle la ɛlɛyɛ kpole la ɛbanyia ɛhulolɛ kɛ ɛkɛyɛ mɔɔ ɔkpondɛ kɛ ɛyɛ la. Ɛzoanvolɛ Dwɔn hɛlɛle kɛ: “Saa yɛdi Nyamenle mɛla ne mɔ azo a ɛnee yɛkulo Nyamenle.” Saa ɛfa wɔ ahonle muala ɛkulo Nyamenle a ɛbanwu ye kɛ “ye mɛla ne mɔ noko ɛnyɛ ɛnlomboɛ.”—1 Dwɔn 5:3.

18, 19. (a) Gyihova mɛla ne mɔ bie a le boni? (Nea ɛlɛka ne mɔɔ wɔ mukelɛ 122 la.) (b) Duzu ati a yɛkola yɛka kɛ Nyamenle ɛmmaa yɛnyɛ mɔɔ bo yɛ nwo zo la ɛ?

¹⁸ Gyihova mɛla ne mɔ a le boni? Nyɛleɛ bie mɔ mɔɔ ɔwɔ kɛ yɛkoati la boka nwo. Kɛ neazo la, yɛ  ɛlɛka ne mɔɔ wɔ mukelɛ 122 mɔɔ ati se “Koati Mɔɔ Gyihova Kyi La” nzonlɛ. Ɛkɛ ne ɛbanwu nyɛleɛ bie mɔ mɔɔ Baebolo ne tendɛ tia bɛ wienyi la. Wɔannea a ɛbaha kɛ ɛtane biala ɛnle nyɛleɛ ɛhye mɔ bie mɔ anwo. Noko saa ɛdwenledwenle ngɛlɛlera mɔɔ wɔ nu la anwo a, ɛbanwu nrɛlɛbɛ mɔɔ wɔ Gyihova mɛla ne mɔ anu la. Nzenzanleɛ mɔɔ ɔwɔ kɛ ɛyɛ la bahola ayɛ se kpalɛ. Noko akee, ɛbɛla mɔɔ sɔ Nyamenle anye mɔɔ ɛbabɔ la bamaa wɔanyia ahunludwolɛ nee anyelielɛ kpole. (Ayezaya 48:17, 18) Ɛhye le debie mɔɔ ɛbahola wɔayɛ a. Duzu ati a yɛka ye zɔ a?

¹⁹ Gyihova ɛmmaa yɛnyɛ mɔɔ yɛnrɛhola ye yɛ la. (Mɛla ne 30:11-14) Ɔluakɛ ɔze yɛ mɔdenlebɔlɛ nee yɛ sinlidɔlɛ ɔtɛla yɛ.  (Edwɛndolɛ 103:14) Bieko, Gyihova kola maa yɛnyia anwosesebɛ yɛtie ye. Ɛzoanvolɛ Pɔɔlo hɛlɛle kɛ: “Nyamenle le nɔhalɛ, . . . ɔnrɛmaa sɔnea mɔɔ bɛnrɛhola ɔ nloa gyinla la ɛnrɛdo bɛ ɛlɛ. Bɛ sɔnea mekɛ nu bɔbɔ ɔbamaa bɛ anwosesebɛ bagyinla ɔ nloa, na yeahile bɛ adenle yeamaa bɛavi nu.” (1 Kɔlentema 10:13) Gyihova bahola amaa wɔ “tumi bedevinli ne” bɔbɔ amaa wɔahola wɔagyinla. (2 Kɔlentema 4:7) Mekɛ mɔɔ ɛnee Pɔɔlo ɛgyinla sɔnea dɔɔnwo anloa la ɔholale ɔhanle kɛ: ‘Ɔlua anwosesebɛ ne mɔɔ ɔfa ɔmaa me la ati mekola megyinla ninyɛne muala anloa.’—Felepaema 4:13.

20. Subane kpalɛ boni mɔ a ɔwɔ kɛ ɛnyia a, na duzu ati a ɛhye mɔ anwo hyia a?

²⁰ Nɔhalɛ nu, saa ɛbazɔ Gyihova anye a tɛ ninyɛne mɔɔ ɔkyi la angomekye a ɔwɔ kɛ ɛkoati a. Eza ɔwɔ kɛ ɛkulo mɔɔ ɔkulo la. (Wulomuma 12:9) Asoo ɛngulo menli mɔɔ ɛnee bɛ adwenle, bɛ ngyinlazo nee mɔɔ bɛ nye die nwo le ko la agɔnwolɛvalɛ? Kɛ Gyihova noko de la ɛne. Yemɔti kulo ninyɛne mɔɔ Gyihova anye die nwolɛ la. Bɛha ninyɛne ɛhye mɔ bie anwo edwɛkɛ wɔ Edwɛndolɛ 15:1-5, ɛleka mɔɔ bɛha menli  mɔɔ Nyamenle fa bɛ agɔnwolɛ la anwo edwɛkɛ la. Gyihova agɔnwo mɔ da mɔɔ Baebolo ne fɛlɛ ye “sunsum ne ma” la ali. Subane ɛhye mɔ a le “ɛhulolɛ, anyelielɛ, anzonudwolɛ, abotane, atiakunlukɛnlɛmayɛlɛ, kpalɛyɛlɛ, nɔhalɛlilɛ, mɛlɛbɛnwoaze, yɛɛ bɛ nwo zo ɛhomolɛ.”—Galeehyeama 5:22, 23.

21. Duzu a baboa amaa wɔanyia subane kpalɛ a?

²¹ Baebolo ne mɔɔ ɛbagenga na wɔazukoa ye dahuu la baboa amaa wɔanyia subane mgbalɛ ɛhye mɔ. Na mɔɔ Nyamenle kulo mɔɔ ɛbayɛ la baboa amaa wɔ nzuzulɛ nee Nyamenle adwenle ayɛ ko. (Ayezaya 30:20, 21) Saa ɛmaa ɛlɔlɛ mɔɔ ɛlɛ ɛmaa Gyihova la anu yɛ se a yɛɛ ɛhulolɛ mɔɔ ɛlɛ kɛ ɛbayɛ mɔɔ sɔ Nyamenle anye la bayɛ kpole a.

22. Saa ɛbɔ ɛbɛla mɔɔ sɔ Nyamenle anye a duzu a vi nu bara a?

²² Saa wɔ ɛbɛlabɔlɛ bazɔ Gyihova anye a ɔhyia mɔdenlebɔlɛ. Baebolo ne fa wɔ ɛbɛla mɔɔ ɛkakyi ye la toto wɔ subane dɛba ne mɔɔ ɛye na wɔava fofolɛ wɔawula la anwo. (Kɔlɔsaema 3:9, 10) Noko akee edwɛndolɛnli ne hɛlɛle vale Gyihova mɛla ne mɔ anwo kɛ: “Zolɛlilɛ le nyilalɛ kpole.” (Edwɛndolɛ 19:11) Ɛdawɔ noko ɛbanwu ye kɛ ɛbɛlabɔlɛ mɔɔ sɔ Nyamenle anye la le nyilalɛ kpole. Ɔlua zɔhane ɛyɛlɛ zo, ɛbabua Seetan ɛzonledolɛ ne na wɔamaa Gyihova anye alie kpole!