1. Ngyegyelɛ mɔɔ ɔnla ali la boni mɔ a wɔ mbusua bie mɔ anu a?

KƐKALA a bɛkpuda kale dɛba ne na bɛmaa nwolɛ ɛyɛ kɛnlɛma a. Menli mɔɔ ɛlɛse la nwu kɛ ɔlɛta kɛ kale fofolɛ la. Noko ɔ bo nrɛlana ne ɛlɛsɛkye kale ne. Zɔhane ala a mbusua bie mɔ de a. Ɔwɔ nuhua kɛ ɛnwu bɛ a ɔzɔho kɛ debie biala le kpalɛ ɛdeɛ, noko bɛ nyunlu ɛzelekɛ ne keda ɛzulolɛ nee nyane mɔɔ bɛlɛdi la azo. Sua nu mɔɔ awie ɛnnwu bɛ la, nrɛlana ɛlɛsɛkye abusua ne anzondwolɛ. Ngyegyelɛ nwiɔ mɔɔ kola fa ɛhye ba la a le nzabolɛ nee basabasayɛlɛ.

2. (a) Kɛzi Baebolo ne bu nza mɔɔ bɛno la ɛ? (b) Nzabolɛ a le duzu?

² Baebolo ne ɛndendɛ ɛntia nza ekyi ɛnlonlɛ, emomu, ɔtendɛ ɔtia nzabolɛ. (Mrɛlɛbulɛ 23:20, 21; 1 Kɔlentema 6:9, 10; 1 Temɔte 5:23; Taetɛse 2:2, 3) Noko nzabolɛ ɛngile nzanlonlɛ ala; ɔkile nza mɔɔ gya bɛ na bɛngola bɛnyɛ ye ɛnlonlɛ ne anwo ɛhwee la. Mgbanyinli kola yɛ nzama. Ɔyɛ alɔbɔlɛ noko kɛ ngakula kola yɛ nzama.

3, 4. Ka kɛzi nzanli nyɛleɛ kola gyegye ye bokavolɛ nee ɔ mra la anwo edwɛkɛ.

³ Baebolo ne hanle ye mekɛ tendenle kɛ nza kola sɛkye abusua anyelielɛ. (Mɛla ne 21:18-21) Debie mɔɔ nzabolɛ sɛkye la ka abusua ne amuala. Bie a raalɛ ne babɔ mɔdenle kɛ ɔmaa nzanli ne agyakyi nza ne  anzɛɛ ɔbagyinla ye subane ngakyile ne anloa. * Ɔbabɔ mɔdenle kɛ ɔfa nza ne yeavea, ɔfuandi yeagua ye lɔ, ɔfa ye ezukoa yeazie yeava yeahile kɛ ɔwɔ kɛ ɔnyia ɛlɔlɛ ɔmaa abusua ne, ye ngoane yɛɛ Nyamenle​—noko akee, nzanli ne ɛngyakyi nza ne. Saa ye mɔdenlebɔlɛ ne anyɛ boɛ a, ɔ sa nu bado na yeade nganeɛ kɛ ɔnrɛhola. Ɛzulolɛ, ɛyavalɛ, fɔlɛlilɛ nee adwenledwenle babɔ ɔ bo aha ye na yeade nganeɛ kɛ ɔnfɛta ɛbulɛ.

⁴ Awovolɛ mɔɔ le nzanli la nyɛleɛ gyegye ngakula ne mɔ. Bɛbo bie mɔ. Bɛfa nla bɛgyegye bie mɔ. Bie a bɛbanyia adwenle kɛ bɛdabɛ ti a awovolɛ ne no nza a. Ɔyɛ a bɛnnyia awie mɔ anu diedi ɔluakɛ nzanli ne da subane ngakyile ali la ati. Kɛmɔ bɛngola bɛnga mɔɔ ɛlɛkɔ zo wɔ sua nu la anwo edwɛkɛ bɛngile awie mɔ la ati, bie a ngakula ne mɔ fea bɛ nganeɛdelɛ zo, ɛhye maa bɛta bɛnyia ewule. (Mrɛlɛbulɛ 17:22) Wɔannea a, ngakula ɛhye mɔ bava anwodozo nee ɛbulɛ mɔɔ bɛnlɛ bɛmmaa bɛ nwo la anyi.

5. Kɛ ɔkɛyɛ na bɛali nzabolɛ zo ɛ, na duzu ati a ɔyɛ se ɛ?

⁵ Ɔwɔ nuhua kɛ menli dɔɔnwo mɔɔ ze nza nwo edwɛkɛ la ka kɛ, nzabolɛ ɛnlɛ ye ayile ɛdeɛ, noko menli dɔɔnwo die to nu kɛ saa awie kola yɛ nwolɛ debie a ɔbahola yeagyakyi ye bɔkɔɔ. (Fa to Mateyu 5:29 anwo.) Noko, nzanli mɔɔ bɛfa moalɛ bɛamaa ye la ɛhanlɛ ɛnyɛ se kɛ ye ɛyɛlɛ la, ɔluakɛ ɔnda ɔnlie ɔndo nu kɛ ɔlɛ ngyegyelɛ. Noko akee, saa abusua ne anu amra bɔ mɔdenle gyinla nzanli ne ngyegyelɛ ne anloa a, ɔbamaa nzanli ne anwu kɛ ɔlɛ ngyegyelɛ. Dɔketa bie mɔɔ ze kɛzi bɛboa nzama nee bɛ mbusua la hanle kɛ: “Mesuzu kɛ mɔɔ hyia la a le kɛ abusua ne bahɔ zo  ayɛ ninyɛne mɔɔ baboa bɛ wɔ adenle kpalɛ zo la. Nzanli ne akee banwu ngakyile kpole mɔɔ wɔ ɔdaye nee abusua ne anu amra mɔɔ ɛha avinli la.”

6. Mbusua mɔɔ nzanli wɔ nu la banyia folɛdulɛ kpalɛ avi ni?

⁶ Saa nzanli wɔ wɔ abusua ne anu a, Baebolo ne anu folɛdulɛ bahola aboa wɔ yeamaa wɔabɔ wɔ ɛbɛla wɔ adenle mɔɔ fɛta la azo. (Ayezaya 48:17; 2 Temɔte 3:16, 17) Suzu ngyinlazo bie mɔ mɔɔ ɛboa mbusua ɛmaa bɛgyinla nzabolɛ nloa la anwo.

7. Saa nzanli wɔ abusua ne anu a, nwane a di nwolɛ ɛzonle a?

⁷ Mmaka kɛ ngyegyelɛ ne amuala vi wɔ. Baebolo ne ka kɛ: “Awie biala ɔdaye ɔbazoa ye adesoa” yɛɛ “yɛ nuhua ko biala babu ye mgbonda ahile Nyamenle.” (Galeehyeama 6:5; Wulomuma 14:12) Bie a nzanli ne baha kɛ abusua ne anu amra a maa ɔno nza ne a. Kɛ neazo la, ɔbahola yeaha kɛ: “Saa bɛnea me boɛ a, anrɛɛ menno nza.” Saa bie mɔ yɛ kɛ bɛ nee ye yɛ adwenle a, ɛnee bɛlɛsi ye adua kɛ ɔmmagyakyi. Noko saa debie anzɛɛ awie mɔ a ɛmaa yera ye zɔ bɔbɔ a, yɛ muala​—mɔɔ nzanli ne boka nwo la di mɔɔ yɛyɛ la anwo ɛzonle.​—Fa to Felepaema 2:12 anwo.

8. Ndenle mɔɔ bɛbahola bɛalua zo bɛaboa nzanli ne bɛamaa yeagyinla mɔɔ kɛvi ye ngyegyelɛ ne anu kɛra anloa la bie mɔ a le boni?

⁸ Mmate nganeɛ kɛ ɔwɔ kɛ dahuu ɛbɔ nzanli ne anwo bane ɛfi mɔɔ ye nzanlonlɛ ne kɛva kɛra la anwo. Baebolo nu ɛrɛlɛbulɛ bie mɔɔ fane ɛyavalɛ nwo la noko bahola aboa nzanli ne: “Saa ɛdie ye ɛfi munzule ko anu a, eza ɛbalie ye wɔavi bieko anu.” (Mrɛlɛbulɛ 19:19) Maa nzanli ne ɛnwu mɔɔ vi ye nzanlonlɛ ne anu ba la. Saa ɔyɛ ɛleka bie basabasa a maa ɔziezie ɛkɛ.

9, 10. Duzu ati a ɔwɔ kɛ mbusua mɔɔ nzama wɔ nu la kpondɛ moalɛ ɛ, na nwane mɔ titile a ɔwɔ kɛ bɛkpondɛ bɛ moalɛ a?

⁹ Maa awie mɔ ɛboa wɔ. Mrɛlɛbulɛ 17:17 ka kɛ: “Agɔnwolɛma  lɛ ɛhulolɛ mekɛ biala, yɛɛ anwongyelelɛ ti a bɛwo adiema nrenya a.” Saa nzanli wɔ abusua ne anu a, ɛnee anwongyelelɛ wɔ ɛkɛ. Ɛhyia moalɛ. Mmatwehwenle ɛ bo aze kɛ ɛkɛmaa ‘agɔnwolɛ kpalɛ’ kɛboa wɔ. (Mrɛlɛbulɛ 18:24) Ɛ nee menli mɔɔ ze ngyegyelɛ ne anzɛɛ bie ɛdo bɛ ɛlɛ la ɛdendɛ na bie a bɛbahola bɛamaa wɔ nzuzulɛ kpalɛ wɔ mɔɔ ɔwɔ kɛ ɛyɛ nee mɔɔ ɔnle kɛ ɛyɛ la anwo. Noko gyinla kpundii. Ka nwolɛ edwɛkɛ kile menli mɔɔ ɛdie bɛ ɛdi, na bɛnrɛmaa wɔ “fealera nu edwɛkɛ” ɛnrɛvinde la.​—Mrɛlɛbulɛ 11:13.

¹⁰ Nyia anwodozo wɔ Keleseɛne mgbanyima nu. Mgbanyima mɔɔ wɔ Keleseɛne asafo ne anu la bahola aboa wɔ dɔɔnwo. Menli ɛhye mɔɔ ɛnyi wɔ sunsum nu la ɛzukoa Nyamenle Edwɛkɛ ne kpalɛ yɛɛ bɛze kɛzi bɛfa nuhua ngyinlazo ne bɛdi gyima la. Bɛbahola bɛayɛ kɛ “ɛvealeka, bodane bɔne mɔɔ bɛfea nu wɔ anwoma anzɛɛ ahumudulɛ kpole nu la. Bɛbayɛ kɛ azudenle wɔ ɛleka mɔɔ le resee, bodane kpole bie alubo wɔ azɛlɛ mɔɔ mbaka ɛnle zo la azo.” (Ayezaya 32:2) Keleseɛne mgbanyima ɛmbɔ asafo ne anwo bane ɛnvi debie ɛtane mɔɔ bazɛkye ye la anwo angomekye na eza bɛkyekye menli mɔɔ wɔ nu la arɛle, bɛmaa bɛ nye die na bɛboa bɛdabɛ mɔɔ bɛgyi ngyegyelɛ nloa la. Maa bɛboa wɔ.

11, 12. Nwane a boa mbusua mɔɔ nzama wɔ nu la kpole kpalɛ a, na kɛzi ɔboa bɛ ɛ?

¹¹ Mɔɔ tɛla biala la, nyia anwosesebɛ fi Gyihova ɛkɛ. Baebolo ne maa yɛnyia anwodozo kɛ: “[Gyihova] bikye mɔɔ nyane ɛha ye la, na ɔdie mɔɔ ye anyelazo ɛwie la.” (Edwɛndolɛ 34:18) Saa ɛte nganeɛ kɛ nyane ɛha wɔ anzɛɛ wɔ anyelazo ɛwie ɔluakɛ nzanli wɔ bɛ abusua ne anu la ati a, ɛnee nwu ye kɛ “Gyihova bikye” wɔ. Ɔte edwɛkɛ ɛsesebɛ mɔɔ wɔ abusua ne gyi ɔ nloa la abo.—1 Pita 5:6, 7.

 ¹² Ɛdie mɔɔ Gyihova ka wɔ ye Edwɛkɛ ne anu la ɛdi a ɔbamaa wɔagyinla adwenledwenle nloa. (Edwɛndolɛ 130:3, 4; Mateyu 6:25-34; 1 Dwɔn 3:19, 20) Saa ɛsukoa Nyamenle Edwɛkɛ ne na ɛfa ye ngyinlazo ne ɛbɔ wɔ ɛbɛla a ɔbamaa wɔanyia moalɛ wɔavi Nyamenle sunsum nwuanzanwuanza ne ɛkɛ, ɛhye bamaa wɔanyia “tumi bedevinli” amaa wɔahola wɔagyinla ɔ nloa alehyenlɛ biala.​—2 Kɔlentema 4:7. *

13. Ngyegyelɛ mɔɔ tɔ zo nwiɔ mɔɔ sɛkye mbusua dɔɔnwo la a le boni?

¹³ Nzabolɛ fa ngyegyelɛ bieko mɔɔ sɛkye mbusua dɔɔnwo la ba—sua nu basabasayɛlɛ.

14. Mekɛ boni a sua nu basabasayɛlɛ bɔle ɔ bo a, na boni a ɛlɛkɔ zo ɛnɛ a?

¹⁴ Sua nu basabasayɛlɛ mɔɔ lumua wɔ alesama tetedwɛkɛ nu la zile mediema nwiɔ, mɔɔ le Keen nee Ebɛle la avinli. (Mɔlebɛbo 4:8) Ɔvi zɔhane mekɛ ne, alesama ɛyia sua nu basabasayɛlɛ ngakyile dɔɔnwo. Yɛlɛ kunlima mɔɔ bo bɛ ye mɔ, yelɛma mɔɔ teta bɛ hu mɔ, awovolɛ mɔɔ bo bɛ mra atisesebɛ nu, yɛɛ ngakula mɔɔ bɛnyi mɔɔ bɛnnea bɛ awovolɛ mɔɔ bɛyɛ mgbanyinli kpalɛ la.

15. Kɛzi sua nu basabasayɛlɛ ka menli mɔɔ wɔ abusua ne anu la nganeɛdelɛ ɛ?

¹⁵ Debie mɔɔ sua nu basabasayɛlɛ sɛkye ye la kɔ moa tɛla kapenle mɔɔ awie kɛnyia la. Yelɛ ko mɔɔ ɔ hu bole ye la hanle kɛ: “Ɔwɔ kɛ ɛgyinla fɔlɛlilɛ nee anyiemgba dɔɔnwo anloa. Fane dɔɔnwo ne ala saa aleɛ kye nwonlomɔ a, ɛngulo kɛ ɛdwazo, na ɛ kunlu a anrɛɛ ɔle ɛlalɛ bie ala.” Ngakula mɔɔ nwu amaneɛ anzɛɛ bɛyɛ bɛ basabasa wɔ sua nu la, bie a bɛnyi na bɛnyia bɛ mbusua a bɛdabɛ noko bɛbayɛ basabasa.

16, 17. Ateetee a le duzu, na kɛzi ɔka abusua ne anu amra ɛ?

¹⁶ Tɛ ɛbolɛ angomekye a le sua nu basabasayɛlɛ a. Ɔta ɔyɛ aholoba. Mrɛlɛbulɛ 12:18 ka kɛ: “Sonla ne bie anloa edwɛkɛ wowɔ kɛ dadeɛ.” Edwɛkɛ ɛhye mɔ mɔɔ “wowɔ” mɔɔ boka sua nu basabasayɛlɛ nwo la a le nuhua mɔɔ bɛtea na bɛfa duma bie bɛfɛlɛ awie, yɛɛ tɛndɛtia, aholoba mɔɔ ɔnfɛta nee awie mɔɔ bɛnwulonwunla ye kɛ bɛbabo ye la. Kɛzi basabasayɛlɛ nwo nganeɛdelɛ ɛtane boda awie la ɛnla ali na awie mɔ anwu ye.

¹⁷ Mɔɔ yɛ alɔbɔlɛ titile la a le kɛzi bɛkile ngakula ateetee la—kakula mɔɔ bɛtendɛ bɛtia ye dahuu wɔ ye mɔdenlebɔlɛ, ye nrɛlɛbɛ, anzɛɛ bolɛ mɔɔ ɔsonle anwo la. Aholoba zɛhae kola sɛkye anwodozo mɔɔ kakula  lɛ la. Nɔhalɛ nu, ngakula kɔsɔɔti hyia ndeanlɛ. Noko Baebolo ne tu selɛma folɛ kɛ: “Bɛmmatu bɛ mra anwo mɔra, anrɛɛ bɛ rɛle kɛbɔ.”​—Kɔlɔsaema 3:21.

18. Sua nu basabasayɛlɛ bɔ ɔ bo wɔ ni, na adenle boni a Baebolo ne kile kɛ yɛbahola yɛalua zo yɛagyakyi a?

¹⁸ Sua nu basabasayɛlɛ bɔ ɔ bo wɔ ahonle ne nee adwenle ne anu; adenle mɔɔ yɛdua zo yɛbɔ yɛ ɛbɛla la gyi kɛzi yɛdwenle la azo. (Gyemise 1:14, 15) Amaa basabasayɛlɛ ne agyakyi la, ɔwɔ kɛ ahenle mɔɔ yɛ basabasa la kakyi ye adwenle. (Wulomuma 12:2) Asoo ɔbahola yeayɛ boɛ? Ɛhɛe. Nyamenle Edwɛkɛ ne lɛ tumi mɔɔ kola kakyi menli a. Ɔkola ɔtudu adwenle ɛtane mɔɔ “ɛsosɔ ndinli” bɔbɔ la. (2 Kɔlentema 10:4, NW; Hibuluma 4:12) Baebolo ne anu ndelebɛbo kpalɛ kola maa menli kakyi bɔkɔɔ mɔɔ bɛkola bɛka kɛ bɛva su fofolɛ ne bɛwula a.​—Ɛfɛsɛsema 4:22-24; Kɔlɔsaema 3:8-10.

19. Kɛzi ɔwɔ kɛ Keleseɛnenli bu ye agyalɛ nu bokavolɛ na ɔyɛ ye ɛ?

¹⁹ Kɛzi bɛbu agyalɛ bokavolɛ la. Nyamenle Edwɛkɛ ne ka kɛ: “Ɔwɔ kɛ kunlima kulo bɛ ye mɔ kɛ bɛ nwo la. Nrenya mɔɔ kulo ɔ ye la kulo ɔdaye mumua ne ɔ nwo.” (Ɛfɛsɛsema 5:28) Eza Baebolo ne ka kɛ ɔwɔ kɛ kunli nwu ye kɛ ɔ ye ‘ɛnlɛ anwosesebɛ, yemɔti ɔwɔ kɛ ɔdi ye eni.’ (1 Pita 3:7) Bɛdu yelɛma folɛ kɛ: ‘Bɛhulo bɛ hu mɔ’ na ‘bɛli bɛ eni’ [bɛnyia “ɛbulɛ kpole” NW] bɛmaa bɛ. (Taetɛse 2:4; Ɛfɛsɛsema 5:33) Nɔhalɛ nu, kunli biala mɔɔ sulo Nyamenle la ze ye wienyi kɛ saa ɔdi ɔ ye eni a ɔnrɛbo ye anzɛɛ ɔnrɛbɔ ye aholoba. Yɛɛ yelɛ biala mɔɔ teɛdea ɔ hu nu, ɔtendɛ ɛtane ɔtia ye, anzɛɛ dahuu twi ɔ nyunlu la ɛnrɛhola ɛnrɛha ye nɔhalɛ nu kɛ ɔkulo ye na ɔbu ye.

20. Nwane a awovolɛ di bɛ mra nwo ɛzonle wɔ ɔ nyunlu a, na duzu ati a ɔnle kɛ awovolɛ nyia bɛ mra nwo adwenle mɔɔ ɔnfɛta la ɛ?

 ²⁰ Ngakula nwo adwenle kpalɛ. Ɔfɛta yɛɛ ɔhyia kɛ awovolɛ nyia ɛlɔlɛ maa bɛ mra na bɛnea bɛ. Nyamenle Edwɛkɛ ne ka ngakula nwo edwɛkɛ kɛ bɛle “agyadeɛ mɔɔ vi [Gyihova] ɛkɛ a” yɛɛ bɛle “nyilalɛ.” (Edwɛndolɛ 127:3) Awovolɛ di ɛzonle wɔ Gyihova anyunlu kɛ bɛkɛnlea zɔhane agyadeɛ ne. Baebolo ne ka “ngakula ninyɛne” nee “ngoaseade” mɔɔ yɛ kakula biala fɛ la anwo edwɛkɛ. (1 Kɔlentema 13:11; Mrɛlɛbulɛ 22:15) Saa awovolɛ nwu kɛ bɛ mra ɛlɛyɛ ngoaseade a ɔnle kɛ ɔsi bɛ nwo. Ngakula ɛnle mgbanyinli. Ɔnle kɛ awovolɛ maa kakula yɛ debie mɔɔ ye ɛvolɛ, ndetelɛ mɔɔ ɔnyianle nee ye mɔdenlebɔlɛ ɛnrɛmaa ɔnrɛhola ye yɛ la.​—Nea Mɔlebɛbo 33:12-14.

21. Adenle kpalɛ boni a bɛdua zo bɛbu awovolɛ mɔɔ bɛyɛ mgbanyinli la na bɛnea bɛ ɛ?

²¹ Kɛzi bɛbu awovolɛ mɔɔ bɛyɛ mgbanyinli la. Sɛlɛvolɛma 19:32 ka kɛ: “Bɛnwu kpanyinli a bɛli ye eni, bɛdwazo enililɛ nu bɛmaa mɔɔ ati zo ɛdu la.” Yemɔti, Nyamenle Mɛla ne zile ɛbulɛ kpole mɔɔ bɛnyia bɛmaa mgbanyinli la azo. Ɛhye bahola ayɛ ngyegyelɛ wɔ mekɛ mɔɔ awovolɛ mɔɔ ɛyɛ kpanyinli kpondɛ kɛ ɛyɛ ninyɛne dɔɔnwo anzɛɛ ɔnde kpɔkɛ na bie a ɔngola tia anzɛɛ ɔngola ɔndwenle ninyɛne nwo ndɛndɛ la. Noko akee, bɛhakye ngakula kɛ bɛzukoa “bɛ nyamenlezonlenlɛ gyima ne mɔɔ ɔwɔ kɛ bɛdi bɛmaa bɛ awovolɛ la.” (1 Temɔte 5:4) Ɛhye kile kɛ ɔwɔ kɛ bɛbu bɛ, bɛdi bɛ eni, na bɛnea bɛ wɔ ezukoa afoa nu bɔbɔ. Awovolɛ mɔɔ bɛyɛ mgbanyinli mɔɔ bɛyɛ bɛ basabasa anzɛɛ bɛyɛ bɛ amumuyɛ wɔ adenle gyɛne biala azo la nee mɔɔ Baebolo ne ka kɛ yɛyɛ la ɛnnyia.

22. Subane titile boni a bamaa yɛali sua nu basabasayɛlɛ zo a, na kɛzi yɛbahola yɛava yɛali gyima ɛ?

²² Komo ɛ nwo zo. Mrɛlɛbulɛ 29:11 ka kɛ: “Koasea  fa ɛya a, ɔye ɔkile, na nrɛlɛbɛvolɛ fa ɛya a, ɔkomo ɔ nwo zo.” Kɛ ɔkɛyɛ na wɔahomo ɛ nwo zo ɛ? Kɛ anrɛɛ ɛbamaa ninyɛne agyegye wɔ la, di ngyegyelɛ mɔɔ kɛra la anwo gyima ndɛndɛ. (Ɛfɛsɛsema 4:26, 27) Saa ɛte nganeɛ kɛ ɛ nwo zo ɛhomolɛ kpondɛ ayɛ se wɔ edwɛkɛ bie anu a, fi ɛkɛ ne kɔ. Sɛlɛ Nyamenle sunsum nwuanzanwuanza ne amaa wɔahola wɔahomo ɛ nwo zo. (Galeehyeama 5:22, 23) Saa ɛtiedia anzɛɛ ɛkpundikpundi wɔ agbɔkɛ nu a, ɔbahola yeamaa wɔahomo wɔ nganeɛdelɛ ne azo. (Mrɛlɛbulɛ 17:14, 27) Bɔ mɔdenle kɛ ɛbayɛ awie mɔɔ “ɔkyɛ na yeava ɛya” a.​—Mrɛlɛbulɛ 14:29.

23. Saa awie wɔ Keleseɛne asafo ne anu na ɔta ɔfa ɛya, bie a ɔbo ye abusua ne anu amra na yeannu ɔ nwo a, kɛzi bɛbayɛ ye ɛ?

²³ Baebolo ne kile kɛ ninyɛne mɔɔ Nyamenle tendɛ tia la bie mɔ a le, “ɛkpɔlɛ, konle, . . . ɛya” na ɔka kɛ, “bɛdabɛ mɔɔ bɛyɛ ninyɛne ɛhye mɔ la ɛnrɛnwu Nyamenle Belemgbunlililɛ ne.” (Galeehyeama 5:19-21) Yemɔti, bɛkola bɛtu awie biala mɔɔ fɛlɛ ɔ nwo Keleseɛnenli mɔɔ kɔ zo fa ɛya kpole na bie a ɔbo ɔ ye anzɛɛ ɔ mra na ɔnnu ɔ nwo la bɛfi Keleseɛne asafo ne anu. (Fa to 2 Dwɔn 9, 10 anwo.) Wɔ adenle ɛhye azo, bɛye menli mɔɔ bɛle amumuyɛ la bɛfi asafo ne anu amaa asafo ne anwo ade.​—1 Kɔlentema 5:6, 7; Galeehyeama 5:9.

24. (a) Kɛzi bokavolɛ mɔɔ bɛyɛ ye amumuyɛ la bahola ayɛ ye nyɛleɛ ɛ? (b) Kɛzi agɔnwolɛma nee mgbanyima bahola aboa bokavolɛ mɔɔ bɛyɛ ye amumuyɛ la ɛ, noko duzu a ɔnle kɛ bɛyɛ a?

²⁴ Na Keleseɛnema mɔɔ bɛ hu mɔ bo bɛ na bɛngile debie biala kɛ bɛnlu bɛ nwo la noko ɛ? Bie mɔ ɛkpa kɛ bɛ nee bɛ bokavolɛ mɔɔ ɛyɛ basabasa la badɛnla ɔlua ninyɛne bie mɔ ati. Bie mɔ noko ɛzi kpɔkɛ kɛ bɛbahɔ ɔluakɛ bɛte nganeɛ kɛ bɛ nwonane nee sunsum nu kpɔkɛdelɛ​—bɔbɔ bɛ ngoane la esiane nu. Debie  mɔɔ awie mɔɔ bɛyɛ ye basabasa wɔ sua nu kulo kɛ ɔyɛ wɔ tɛnlabelɛ ɛhye mɔ anwo la le ɔ ti anwo kpɔkɛzilɛ wɔ Gyihova anyunlu. (1 Kɔlentema 7:10, 11) Bie a agɔnwolɛma mɔɔ lɛ adwenle kpalɛ, mbusua anzɛɛ Keleseɛne mgbanyima bahulo kɛ bɛkɛboa, noko ɔnle kɛ bɛkile awie debie mɔɔ ɔwɔ kɛ ɔyɛ la. Ɔle ɔ ti anwo kpɔkɛzilɛ.​—Wulomuma 14:4; Galeehyeama 6:5.

25. Bodane boni a Gyihova lɛ maa abusua ne a?

²⁵ Mekɛ mɔɔ Gyihova hanle Adam nee Yive bɔle nu wɔ agyalɛ nu la, ɛnee tɛ ye bodane a le kɛ nzabolɛ nee  basabasayɛlɛ bazɛkye abusua. (Ɛfɛsɛsema 3:14, 15) Ɛnee ɔwɔ kɛ abusua ne yɛ ɛleka mɔɔ ɛlɔlɛ nee anzondwolɛ wɔ na bɛdi abusua ne anu sonla ko biala adwenle, ye nganeɛdelɛ, nee ye sunsum nu ngyianlɛ nwo gyima la. Noko akee, mekɛ mɔɔ ɛtane bɔle ɔ bo la, abusua asetɛnla ne zɛkyele ndɛndɛ.​—Fa to Nolobɔvo ne 8:9 anwo.

26. Kenlebie boni a wɔ ɛkɛ maa menli mɔɔ bɔ mɔdenle bɔ bɛ ɛbɛla kɛmɔ Gyihova kpondɛ la ɛ?

²⁶ Mɔɔ yɛ anyelielɛ la, Gyihova ɛtɛkakyile bodane mɔɔ ɔlɛ ɔmaa abusua ne la. Yebɔ ɛwɔkɛ kɛ ɔbamaa bɛadɛnla anzondwolɛ nu wɔ ewiade fofolɛ ne mɔɔ “bɛ nwo badɔ bɛ, yɛɛ awie biala ɛnrɛhola ɛnrɛmaa bɛ ahonle ɛnrɛdu” la anu. (Yizikeɛle 34:28) Zɔhane mekɛ ne anu, nzabolɛ, sua nu basabasayɛlɛ, nee ngyegyelɛ gyɛne biala mɔɔ sɛkye mbusua ɛnɛ la bapɛ nu. Menli bazele, tɛ kɛ bɛfa bɛaheda ɛzulolɛ nee nyanelilɛ zo a, emomu, ɔluakɛ ‘bɛ nye balie bɛ ɛkpazilɛ nwo’ la ati ɔ.​—Edwɛndolɛ 37:11.