EDWƐKƐ TITILI | GYIHOVA ALASEVOLƐ A LE NWANE MƆ?
Duzu A Gyihova Alasevolɛ Die Di A?
Gyihova Alasevolɛ die di kɛ “bɛfa Nyamenle Sunsum a bɛkɛlɛ Nyamenle Edwɛkɛ ne a.” (2 Temɔte 3:16) Yɛdua Baebolo ne azo yɛsukoa Bɔvolɛ ne anwo debie na yɛbɔ ɛbɛla kpalɛ.
Baebolo ne ka kɛ: “Maa bɛnwu kɛ ɛdawɔ ɛ ngomekye, mɔɔ wɔ duma a le [Gyihova] la a ɛle Anwuma Anwumanli ne mɔɔ sie azɛlɛ ye a.” (Edwɛndolɛ 83:18) Ɛhye ati, yɛsonle Gyihova Nyamenle angomekye na yɛbɔ mɔdenle yɛda ye duma ne ali kɛ ye Alasevolɛ la.—Ayezaya 43:10-12.
Kɛ Kilisienema la, yɛdie yɛdi kɛ Gyisɛse, “Nyamenle Ara ne” * rale azɛlɛ ye azo kɛ Mɛzaya. (Dwɔn 1:34, 41; 4:25, 26) Gyisɛse wule la, bɛdwazole ye bɛhɔle anwuma. (1 Kɔlentema 15:3, 4) Nzinlii, ɔrayɛle Nyamenle Belemgbunlililɛ ne azo Belemgbunli. (Yekile 11:15) Belemgbunlililɛ ɛhye le arane kpalɛ mɔɔ ɔbamaa azɛlɛ ye ayɛ Paladaese a. (Daneɛle 2:44) Baebolo ne se, “Na bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo.”—Edwɛndolɛ 37:11, 29.
“Saa bɛkenga Baebolo ne a, bɛdie bɛdi kɛ Nyamenle ɛlɛtendɛ ahile bɛ. Mekɛ biala mɔɔ bɛkɛhɔ ngyegyelɛ nu la bɛneɛnlea Nyamenle Edwɛkɛ ne anu bɛkpondɛ ye sɔbelɛ. . . . Wɔ bɛ afoa nu, ngoane wɔ Nyamenle Edwɛkɛ ne anu.”—Kateleke ɛsɔfo Benjamin Cherayath, Münsterländische Volkszeitung adwelie kɛlata, Germany
Gyihova Alasevolɛ die di kɛ ɛnɛ bɔbɔ Baebolo ngyinlazo kola boa menli. (Ayezaya 48:17, 18) Ɛhye ati, yɛdi ngyinlazo ɛhye mɔ azo. Kɛ neazo la, kɛmɔ Baebolo ne bɔ yɛ kɔkɔ kɛ yɛhwe yɛ nwo yɛvi nyɛleɛ mɔɔ gua yɛ adwenle nee yɛ sonlabaka ne anwo evinli la ati, yɛnno sigalɛte anzɛɛ nyiletane. (2 Kɔlentema 7:1) Yɛtwe yɛ nwo noko yɛfi nyɛleɛ bie mɔ mɔɔ Baebolo ne tua mɔɔ le kɛ nzabolɛ, adwɔmanebɔlɛ nee awuleyɛlɛ la anwo.—1 Kɔlentema 6:9-11.
^ ɛden. 5 Baebolo ne noko ka kɛ Gyisɛse le “Nyamenle Ara kokye” ɔluakɛ ɔ ngomekye a Gyihova limoale bɔle ye a.—Dwɔn 3:18; Kɔlɔsaema 1:13-15.
Bie A Eza Ɛ Nye Balie
KPUYA MƆƆ MENLI TA BIZA
Duzu A Gyihova Alasevolɛ Die Di A?
Kpondɛ ninyɛne titili 15 mɔɔ yɛdie yɛdi la anwo edwɛkɛ sikalɛ.
KPUYA MƆƆ MENLI TA BIZA
Asoo Gyihova Alasevolɛ Die Di Kɛ Bɛ Ɛzonlenlɛ Ne A Le Nɔhalɛ A?
Asoo Gyisɛse hanle kɛ ndenle dɔɔnwo wɔ ɛkɛ mɔɔ kɔ ngoane nu ɔ?
