EDWƐKƐ TITILI | YƐWU A YƐBAZIA YƐADƐNLA AZE—BIEKO Ɔ?
Saa Yɛwu A Yɛkɔ Ni?
“Ɛnee medwenle kɛ ɛleka nsa wɔ ɛkɛ mɔɔ awie wu a ɔkɔ a: anwuma, hell, anzɛɛ avinli ɛleka. Ɛnee meze kɛ menfɛta anwuma anzɛɛ menle ɛtanevolɛ somaa mɔɔ mekɔ hell a. Menze debie kpɔtee mɔɔ wɔ avinli ɛleka ne a. Metɛnwunle debie zɛhae wɔ Baebolo ne anu. Noko menli ka ye zɔhane.”—Lionel.
“Bɛhilehilele me kɛ menli kɔsɔɔti wu a bɛkɔ anwuma, noko ɛnee menlie menli. Ɛnee medwenle kɛ ɛwu a ɛnee yewie na mowuamra ɛnlɛ anyelazo biala.”—Fernando.
Asoo wɔbiza ɛ nwo kɛ: ‘Saa yɛwu a yɛkɔ ni? Yɛ kulovolɛma mɔɔ bɛwu la ɛlɛnwu amaneɛ wɔ ɛleka bie ɔ? Yɛbanwu bɛ bieko ɔ? Kɛ ɔkɛyɛ na yɛalie yɛali ɛ?’ Yɛsɛlɛ wɔ suzu mɔɔ Ngɛlɛlera ne kilehile amgba la anwo. Maa yɛlimoa yɛnlea mɔɔ Baebolo ne ka fane ewule nwo la. Akee yɛbazuzu anyelazo mɔɔ wɔ Nyamenle Edwɛkɛ, Baebolo ne anu la anwo.
Gyinlabelɛ boni a mowuamra wɔ nu a?
BAEBOLO NE BUA KƐ: “Ɔluakɛ anyewɔzoamra ze kɛ bɛbawu, na mɔwuamra ɛnze ɛhwee, yɛɛ bɛnlɛ ahatualɛ bieko; awie ɛngakye bɛ bieko. Debie biala mɔɔ ɛkɛzɔ nu kɛ ɛyɛ la, fa wɔ anwosesebɛ yɛ, ɔluakɛ gyima anzɛɛ ndwenlenwo anzɛɛ adwenle anzɛɛ nrɛlɛbɛ biala ɛnle Ɛbolɔ mɔɔ ɛlɛkɔ la.” *—Nolobɔvo ne 9:5, 10.
Bɛhile Ɛbolɔ abo sikalɛ kɛ ɛleka mɔɔ alesama wu a bɛsie bɛ la; ɔle sɛkɛlɛneɛ adenle zo ɛleka anzɛɛ gyinlabelɛ mɔɔ bɛnde nganeɛ biala anzɛɛ bɛnyɛ gyima la. Kɛzi nɔhavonli Dwobu bule Ɛbolɔ ɛ? Ye agyadeɛ kɔsɔɔti nee ɔ mra vile ɔ sa kenle ko, akee nyila mɔɔ yɛ nyane la bobɔle ɔ nwo amuala. Ɔzɛlɛle Nyamenle kɛ: “Anrɛɛ wɔava me wɔavea ɛbolɔ, [“wɔ hell,” Catholic Douay Version] wɔava me wɔavea.” (Dwobu 1:13-19; 2:7; 14:13) Ɔda ali kɛ, Dwobu ande Ɛbolɔ abo kɛ ɔle hellsenle, ɛleka mɔɔ ɔbanwu amaneɛ dahuu la. Emomu, ɔnwunle kɛ ɔle ɛleka mɔɔ bɛdie bɛ menle a.
Yɛlɛ adenle fofolɛ mɔɔ yɛdua zo yɛsukoa gyinlabelɛ mɔɔ mowuamra wɔ nu la anwo debie. Yɛbahola yɛazuzu Ngɛlɛlera ne mɔɔ vi sunsum nu la anu menli mɔtwɛ mɔɔ bɛdwazole bɛ la anwo.—Nea ɛlɛka “ Menli Mɔtwɛ Mɔɔ Bɛdwazole Bɛ Wɔ Baebolo Mekɛ Zo La.”
Menli mɔtwɛ ne anu ko bɔbɔ anga kɛ ɛnee bɛwɔ anyelielɛ anzɛɛ amaneɛnwunlɛ ɛleka. Saa menli mɔɔ bɛdwazole bɛ la hɔle ɛleka ɛhye wɔ mekɛ mɔɔ bɛwule la a, asoo anrɛɛ bɛnrɛha nwolɛ edwɛkɛ bɛnrɛhile awie mɔ ɔ? Asoo anrɛɛ bɛnrɛhɛlɛ ye wɔ Baebolo ne anu bɛnrɛmaa awie biala ɛnrɛnwu ye ɔ? Ɛhye anwo kɛlɛtokɛ biala ɛnle Ngɛlɛlera ne anu. Ɔda ali kɛ menli mɔtwɛ ɛhye mɔ anga nwolɛ edwɛkɛ biala. Kɛmɔti ɛ? Ɔluakɛ ɛnee bɛnze ɛhwee, ɔle kɛ asɛɛ bɛlafe botoo la. Nɔhalɛ nu, ɔyɛ a Baebolo ne fa nafelɛ kilehile kɛzi ewule de la anu. Kɛ neazo la, mekɛ mɔɔ Lazalɛse wule la, Gyisɛse hanle kɛ: “Lazalɛse ɛlafe, na mekɔ meahɔdunwue ye.”—Dwɔn 11:11.
Anyelazo boni a wɔ ɛkɛ ne maa mowuamra a? Bɛbahola bɛavi nafelɛ nu bɛadwazo ɔ?
^ ɛden. 7 Bɛkile Hibulu edwɛkɛkpɔkɛ “Sheol” nee Giliki edwɛkɛkpɔkɛ “Hades” abo kɛ “Ɛbolɔ.” Baebolo ngilebɛbo bie mɔ vale edwɛkɛkpɔkɛ “hell” lile gyima, noko Ngɛlɛlera ne ɛngile kɛ ɔle ɛleka mɔɔ bɛkile mowuamra nyane dahuu a.
Bie A Eza Ɛ Nye Balie
ƐZINZALƐ ARANE
Baebolo Kpuyia Mɔɔ Bɛbua
Duzu a menli mɔɔ Gyisɛse dwazole bɛ la maa yɛnwu ye wɔ ye kenlebie ɛwɔkɛ ne mɔ anwo a?
