Kɛmɔ alesama ɛngola ɛnnwu zɔhane gaase anwoma ɛtane ne la, bɛngola bɛnnwu Seetan, yɛɛ ɔ nwo yɛ ɛzulolɛ kpalɛ. Noko Nyamenle angyakyi yɛ zɔ. Saa ɛfa Nyamenle ahyɛlɛdeɛ ɛhye mɔ ɛdi gyima a ɔnle kɛ ɛsulo Seetan.

Yɛkola yɛsi kpɔkɛ. Gyemise 4:7 ka kɛ: “Bɛmmamaa Abɔnsam adenle, na ɔvi bɛ nwo ɔbanriandi.” Seetan lɛ tumi ɛdeɛ, noko ɔnrɛhola ɔnrɛmaa ɛnrɛyɛ ninyɛne mɔɔ ɛngulo kɛ ɛyɛ la. Ɛkola ɛsi kpɔkɛ. Bɛhɛlɛ ye wɔ 1 Pita 5:9 kɛ: ‘Bɛzɔ bɛ diedi ne anu kpundii, na bɛho bɛtia Abɔnsam.’ Kakye kɛ, Gyisɛse gyinlanle kpundii na ɔkpole sɔnea nsa ne la, Seetan vile ɛkɛ. (Mateyu 4:11) Ɛdawɔ noko ɛbahola wɔaho wɔatia Seetan.

Nyamenle agɔnwolɛvalɛ. Gyemise 4:8 maa yɛ anwosesebɛ kɛ ‘yɛbikye Nyamenle.’ Gyihova ɛlɛfɛlɛ wɔ kɛ ɛ nee ye ɛyɛ agɔnwolɛ kpalɛ. Ɛbahola wɔayɛ zɔ ɔ? Adenle kpalɛ mɔɔ ɛbahola wɔalua zo wɔayɛ zɔ la a le kɛ ɛbazukoa ɔ nwo ninyɛne dɔɔnwo wɔ Baebolo ne anu. (Dwɔn 17:3) Gyihova anwo debie mɔɔ ɛbazukoa la bamaa wɔahulo ye, na zɔhane ɛlɔlɛ ne noko baha wɔ yeamaa wɔayɛ ye ɛhulolɛdeɛ. (1 Dwɔn 5:3) Mekɛ mɔɔ ɛlɛbikye wɔ anwuma Selɛ ne kpalɛ la, kɛ ɔbayɛ wɔ ɛ? Gyemise toa zo kɛ: ‘Nyamenle babikye wɔ.’

Banebɔlɛ nwo ɛwɔkɛ. Mrɛlɛbulɛ 18:10 kenga kɛ: ‘Gyihova duma le aranemgbole. Sonla mɔɔ le tenlene la nriandi kɔfea nu a, ɔ nwo kɔlɔnwo.’ Nɔhalɛ nu, ɛhye ɛngile kɛ Nyamenle duma ne le ngonyia debie mɔɔ maa yɛnyia ninyɛne kpalɛ a. Emomu, ɔkile kɛ menli mɔɔ di Nyamenle duma ne eni kpalɛ la kola fɛlɛ ye kɛ ɔbɔ bɛ nwo bane wɔ mekɛ biala anu.

Neazo kɛnlɛma bie. Gyima ne 19:19 ka debie kɛnlɛma bie mɔɔ menli fofolɛ mɔɔ hakyile rayɛle Keleseɛnema wɔ Ɛfɛsɛse yɛle la anwo edwɛkɛ kɛ: “Ngonyiama dɔɔnwo ne ala vale bɛ mbuluku mɔɔ bɛfa bɛyɛ bɛ gyima la rale manle bɛyelale bɛ wɔ bagua  nu. Bɛsesenle mbuluku ne mɔ awolɛ la, bɛ muala bɛ nloa dole dwɛtɛ fufule apenle ngoko abulanlu.” * Zɔhane Keleseɛnema ne zɛkyele debie biala mɔɔ sunsum ɛtane nyɛleɛ wɔ nu la, ɔnva nwo kɛzi ye bolɛ de la. Zɔhane neazo ne bahola aboa yɛ kpalɛ ɛnɛ. Ewiade ɛhye ati ɛmi sunsum ɛtane nyɛleɛ nu. Sunsum ɛtane ninyɛne nee nyɛleɛ mɔɔ ɔzɔho kɛ edwɛkɛ ɛnle nwolɛ la bahola amaa sunsum ɛtane agyegye awie. Ɔhyia kɛ ɛye ninyɛne ɛhye mɔ ɛfi wɔ ɛbɛlabɔlɛ nu wɔ adenle biala azo.​—Mɛla ne 18:10-12.

Rogelio, mɔɔ yɛbɔle ye duma wɔ edwɛkɛ ɛhye mɔlebɛbo la, anlie Abɔnsam anli wɔ ɛvolɛ 50 anu. Noko ɔziale ɔzuzule nwolɛ bieko. Kɛmɔti ɛ? Rogelio se: “Ɛhye a le mekɛ mɔɔ lumua wɔ me ɛbɛlabɔlɛ nu mɔɔ menyianle Baebolo a. Ngɛlɛlera ne anu ndelebɛbo manle menwunle kɛ Abɔnsam wɔ ɛkɛ. Kɛkala, ndelebɛbo ko ne ala bɔ me nwo bane fi ye tumi nwo.”

Ɛkulo kɛ ɛnwu kenle mɔɔ Seetan bavi ɛkɛ ne la ɔ? Ɛbahola. Ngɛlɛlera ne kile kɛ kenlebie bɛbavuandi Abɔnsam, mɔɔ bɛlɛbɛla menli dɔɔnwo la bɛado “sendɔlɔra nee sɔlefa tandane ne” anu. (Yekile 20:10) Nɔhalɛ nu, senle nee sɔlefa ɛnrɛhola ɛnrɛzɛkye sunsum nu abɔdeɛ mɔɔ bɛngola bɛnnwu ye la. Yemɔti, senle tandane ne bayɛ dahuu ɛzɛkyelɛ nwo sɛkɛlɛneɛ. Seetan bavi ɛkɛ ne bɔkɔɔ. Nea kɛzi ɔbamaa menli mɔɔ kulo Nyamenle anye alie la!

Kɔkpula zɔhane mekɛ ne, kɔ zo sukoa Gyihova nee ye ndenle ne mɔ anwo debie biala mɔɔ ɛkɛhola la. * Suzu mekɛ mɔɔ ɛbadɛnla aze, mɔɔ bɛbahola bɛaha ye nɔhalɛ nu kɛ, “Seetan ɛnle ɛkɛ bieko” la anwo nea!