Baebolo Kpuyia Mɔɔ Bɛbua
Asoo Gyisɛse dwazole menli amgba?
Gyisɛse dwazole Lazalɛse mɔɔ ɛwu kenle nna la
Baebolo ne ka ye wienyi kɛ Gyisɛse dwazole menli mɔɔ bɛwu la. Zɔhane edwɛkɛ ne ɛnle nwɔra; bɛzile wɔ ɛleka nee mekɛ fɔɔnwo bie mɔ anu. Kɛ neazo la, wɔ ɛvolɛ 31 Y.M. anu, menli dɔɔnwo nee Gyisɛse vi Kapɛnayɛm hɔle Neeyen. Bɛdwule ɛkɛ ne la, bɛ nee menli dɔɔnwo yiale. Ɛbahola wɔalie ewudwazo nwo edwɛkɛ mɔɔ zile ɔ nzi la wɔali, ɔluakɛ bɛhɛlɛ ye wɔ Nyamenle Edwɛkɛ, Baebolo ne anu, yɛɛ eza menli dɔɔnwo lile nwolɛ daselɛ.—Kenga Luku 7:11-15.
Gyisɛse eza dwazole ɔ gɔnwo Lazalɛse mɔɔ ɛnee yewu kenle nna la. Ɛbahola wɔalie mɔɔ Gyisɛse yɛle wɔ kenle zɔhane la anwo edwɛkɛ wɔali ɔluakɛ menli dɔɔnwo noko lile nwolɛ daselɛ.—Kenga Dwɔn 11:39-45.
Kɛmɔti a Gyisɛse dwazole menli ɛ?
Gyisɛse dwazole menli ɔluakɛ ɛnee ɔse bɛ anwunvɔne. Ɔyɛle zɔ noko ɔvale ɔhilele kɛ ye Papa, ngoane Bɔvolɛ ne, ɛmaa ye tumi wɔ ewule nwo zo.—Kenga Dwɔn 5:21, 28, 29.
Menli mɔɔ Gyisɛse dwazole bɛ la maa yɛnyia anwodozo wɔ ye kenlebie ɛwɔkɛ ne mɔ anu. Ɔbadwazo menli dɔɔnwo mɔɔ bie mɔ a le ɛtanevolɛma mɔɔ ɛnee bɛnze nɔhalɛ Nyamenle ne anwo ɛhwee la. Bɛbamaa bɛanyia adenle bɛanwu Gyihova Nyamenle na bɛahulo ye.—Kenga Gyima ne 24:15.
Bie A Eza Ɛ Nye Balie
ƐZINZALƐ ARANE
Anyelazo Maa Mowuamra—Kɛ Ɔkɛyɛ Na Wɔalie Wɔali Ɛ?
Baebolo ne ka ninyɛne nwiɔ mɔɔ ɔti yɛbahola yɛalie ewudwazo ne yɛali a.
