Nyamenle Belemgbunlililɛ ne le anwuma arane. Gyisɛse hanle hilele ye ɛdoavolɛma kɛ bɛzɛlɛ kɛ ɔrɛla ɔluakɛ ɔbamaa tenleneyɛlɛ nee anzondwolɛ ara azɛlɛ ye azo. Sonla arane ɛnrɛhola ɛnrɛye basabasayɛlɛ, nzisi, anzɛɛ anwodolɛ ɛnrɛvi ɛkɛ, noko Nyamenle Belemgbunlililɛ ne bayɛ zɔ. Nyamenle ɛye ɔ Ra, Gyisɛse, kɛ Belemgbunlililɛ ne azo Belemgbunli. Gyihova eza ɛye Gyisɛse ɛdoavolɛma ekpunli bie kɛ bɛ nee Gyisɛse ɛli tumi wɔ Belemgbunlililɛ ne anu.—Bɛgenga Luku 11:2; 22:28-30.

Ɔnrɛhyɛ, Nyamenle Belemgbunlililɛ ne baye menli mɔɔ dwazo tia Nyamenle tumililɛ ne la avi ɛkɛ. Yemɔti yɛyɛ asɔne kɛ Nyamenle Belemgbunlililɛ ɛrɛla a, ɛnee yɛlɛsɛlɛ kɛ Nyamenle arane ne ɛragyinla sonla arane kɔsɔɔti agyakɛ anu.—Bɛgenga Daneɛle 7:13, 14; Yekile 11:15, 18.

Gyisɛse le Belemgbunli kpalɛ ɔluakɛ ɔse anwunvɔne. Kɛmɔ ɔle Nyamenle Ra la ati, eza ɔlɛ tumi mɔɔ ɔbava yeaboa menli kɔsɔɔti mɔɔ sɛlɛ Nyamenle moalɛ la.—Bɛgenga Edwɛndolɛ 72:8, 12-14.

Nyamenle Belemgbunlililɛ ne baboa menli kɔsɔɔti mɔɔ sɛlɛ kɛ ɔrɛla na bɛfa Nyamenle ɛhulolɛdeɛ bɛbɔ bɛ ɛbɛla la. Ɛsukoa mɔɔ Baebolo ne ka ye wɔ Nyamenle Belemgbunlililɛ ne anwo la a ɛnrɛnlu ɛ nwo ɛlɛ.—Bɛgenga Luku 18:16, 17; Dwɔn 4:23.