YILAEGYA luale Dwɔdan Bɔnza adenle ne azo. Yeva dapɛne dɔɔnwo yedia, na ɔvi Horeb Boka ne mɔɔ wɔ moa la azo ɔlɛkɔ ye sɔlɔ. Kɛkala, mɔɔ akee yezia yera ye sua zo wɔ Yizilayɛ la, ɔkola ɔnwu ngakyile mɔɔ ɛra ye sua zo la. Azɛlɛ nwo mɔɔ wele la ɛlɛkakyi. Bokile ezule ne ɛbɔ ɔ bo ɛlɛtɔ ngyikyi, na yemaa ɛyazovoma ɛlɛdua bɛ ɛya. Ɔbayɛ kɛ ngapezonli ne akunlu dwole ɔ nwo kɛ ɔnwunle kɛ azɛlɛ ne ɛlɛyɛ kpalɛ, noko menli ne a ɛnee ɔdwenle bɛ nwo kpalɛ a. Ɛnee bɛnde kpɔkɛ wɔ sunsum nu. Ɛnee Beeyale ɛzonlenlɛ nwo ngyegyelɛ ne tɛbɔ ɛkɛ, na ɛnee Yilaegya lɛ gyima dɔɔnwo yɛ. *

Yilaegya bikyele Ebɛle-Mɛhola la, ɔnwunle kɛ bɛlɛyɛ ɛya kpole bie wɔ ɛkɛ. Ɛnee nlankɛ ekpunli ekpunli 12 mɔɔ ngyela mbaka gyelegyela bɛ la ɛlɛwuduwudu azɛlɛ ne. Ahenle mɔɔ doa nlankɛ ekpunli ne mɔɔ tɔ zo bulu nee nwiɔ la a Yilaegya ɛlɛkpondɛ ye a. Yemɔ a le Yilaehya, nrenya ne mɔɔ Gyihova ɛkpa ye kɛ ɔbali Yilaegya agya la. Mekɛ bie Yilaegya dele nganeɛ kɛ ɔ ngomekye a ɔlɛdi nɔhalɛ yeamaa Nyamenle a, yemɔti ɔda ali kɛ ɛnee ɔ nye ɛbolo kɛ ɔ nee nrenya ɛhye bayia.—1 Arelemgbunli 18:22; 19:14-19.

Asoo Yilaegya noko hwehwenle ɔ bo aze kɛ ɔbava ye gyima anzɛɛ nwolɛ adenle ne bie yeamaa ye, na ɔdele nganeɛ kɛ kenlebie awie bali ɔ gyakɛ anu ɔ? Yɛnrɛhola yɛnrɛha; yɛɛ yɛnrɛha noko kɛ yeandwenle ninyɛne ɛhye mɔ anwo. Kɛ ɔde ye biala la, ɛnee ɔle “sonla kɛ yɛdayɛ ala la.” (Gyemise 5:17) Kɛzi edwɛkɛ ne de biala la, Baebolo ne ka kɛ: ‘Yilaegya hɔle ɔ nwo ɛkɛ na ɔdole ye aguzo ne ɔguale ɔ nwo zo.’ (1 Arelemgbunli 19:19) Yilaegya tɛladeɛ ne—mɔɔ bie a ɔle boane anzɛɛ abɔnkye nwoma la—ɛnee ɔwula ye kɛ aguzo na ɔkile kɛ Gyihova ɛkpa ye titile. Tɛladeɛ ne mɔɔ ɔvuandinle ɔguale Yilaehya anwo zo la kile ninyɛne dɔɔnwo. Yilaegya diele edwɛkɛ mɔɔ Gyihova hanle hilele ye kɛ ɔkpa Yilaehya kɛ ɔbali ye agya la. Yilaegya nyianle ye Nyamenle ne anu diedi na ɔdiele ye.

Noko ɛnee kpavolɛ ne kulo kɛ ɔboa ngapezonli kpanyinli ne. Ɛnee Yilaehya ɛnrɛli Yilaegya agya ɛkɛ ne ala. Emomu, wɔ ɛvolɛ kɛyɛ nsia anu, ɔbɛlɛle ɔ nwo aze ɔ nee ngapezonli kpanyinli ne luale na ɔboale ye, nzinlii ɛnee bɛfɛlɛ ye kɛ awie mɔɔ “boa Yilaegya wɔ ye gyima ne ɛyɛlɛ nu” la. (2 Arelemgbunli 3:11) Nea kɛzi Yilaegya anwo dɔle ye kɛ ɔnyianle sonvolɛ boavolɛ mɔɔ bɔ mɔdenle zɛhae a! Ɔbayɛ kɛ mrenya nwiɔ ne vale bɛ nwo agɔnwolɛ kpalɛ. Bɛ agɔnwolɛvalɛ ne boale bɛ manle bɛgyinlanle nzisi mɔɔ bɛnwunle kɛ ɔlɛkɔ zo wɔ ɛkɛ la anloa. Ɛnee belemgbunli ne, mɔɔ le Ehabe la atisesebɛ ne ɛlɛkɔ ɔ nyunlu titile.

Bɛsisi wɔ ɛlɛ ɔ? Yɛ nuhua dɔɔnwo ɛnwu bie wɔ ewiade ɛhye mɔɔ ɛkpɔlɔ la anu. Saa ɛnyia agɔnwolɛ mɔɔ kulo Nyamenle la a ɔbaboa wɔ yeamaa wɔagyinla ɔ nloa. Ɛbahola noko wɔazukoa dɔɔnwo wɔavi Yilaegya diedi ne anu wɔ mekɛ mɔɔ ɛgyi nzisi nloa la.

Yilaegya nee Yilaehya yɛle gyima ɛsesebɛ manle menli ne nyianle anwosesebɛ wɔ sunsum nu. Ɔda ali kɛ bɛtetele ngapezoma mɔɔ ɛha la, bie a bɛhyehyɛle  bɛ kɛ sukulu bie la. Noko mekɛ ɛlɛkɔ zo la, Gyihova hanle edwɛkɛ fofolɛ hilele Yilaegya kɛ: ‘Kɔyia Ehabe mɔɔ le belemgbunli wɔ Yizilayɛ la.’ (1 Arelemgbunli 21:18) Duzu a Ehabe ɛyɛ a?

Ɛnee belemgbunli ne ɛkpɔkye dɛba, Yizilayɛ arelemgbunli ne mɔ anu mɔɔ yɛle ɛtane dɛlale biala mɔɔ lumua ɔ nyunlu la. Ɔgyale Gyɛzɛbɛle na ɔmanle Beeyale ɛzonlenlɛ hɔle zo wɔ azɛlɛ ne azo, belemgbunli mumua ne vale ɔ nwo wulale nu. (1 Arelemgbunli 16:31-33) Ɛnee ninyɛne mɔɔ bɛyɛ wɔ Beeyale ɛzonlenlɛ nu la bie a le awolɛ nwo amaamuo, tuutuuyɛlɛ nee ngakula afɔlebɔlɛ. Bieko, ɛnee ɔtɛkyɛle biala yɛɛ Ehabe andie edwɛkɛ mɔɔ Gyihova hanle kɛ ɔhu Selea Belemgbunli Bɛneheedade atisesebɛ ne a. Ehabe kpole kɛ ɔkɛyɛ zɔ ɔluakɛ ɛnee ɔ nye la kɛ ɔbanyia ezukoa yeavi ye ɛkɛ. (1 Arelemgbunli, tile 20) Noko, kɛkala, Ehabe nee Gyɛzɛbɛle anyebolo, anwonyiahulolɛ nee basabasayɛlɛ ne ɛzɛkye bɔkɔɔ.

Ɛnee Ehabe lɛ sua wɔ Samɛlea—sua bedevinli kpalɛ! Ɛnee eza ɔlɛ aako wɔ Gyɛzɛlii, mɔɔ nee ye avinli kɛyɛ mayɛlɛ 23 la. Ɛnee vanye ɛya bie bikye aako ɛhye mɔɔ tɔ zo nwiɔ la. Ehabe anye bolole zɔhane azɛlɛ ne mɔɔ le Neebɔto ɛdeɛ la. Ehabe vɛlɛle ye na ɔhanle kɛ ɔbamaa ye ezukoa anzɛɛ ɔbamaa ye vanye ɛya fofolɛ. Noko, Neebɔto hanle kɛ: “Menlile me mgbanyinli agya a menvale ɛya ne a; ɔle me mgbanyinli debie, yemɔti saa meminli ɔ bo zo a ɔnrɛyɛ boɛ. Nyamenle ɛkpa ɛhye ɛgua.” (1 Arelemgbunli 21:3) Asoo Neebɔto yɛle anzosesebɛ anzɛɛ anyetele? Menli dɔɔnwo dwenle zɔ. Nɔhalɛ nu, ɛnee ɔlɛdi Gyihova Mɛla, mɔɔ ɔmmaa Yizilayɛma adenle kɛ bɛdɔne abusua azɛlɛ bie bɔkɔɔ la azo. (Sɛlɛvolɛma 25:23-28) Ɛnee Neebɔto te nganeɛ kɛ ɔnle kpalɛ kɛ ɔbabu Nyamenle Mɛla zo. Ɛnee ɔle sonla mɔɔ lɛ diedi nee akɛnrasesebɛ, ɔluakɛ ɛnee ɔze kɛ esiane wɔ nu kɛ ɔbadwazo yeatia Ehabe.

Ehabe andwenle Gyihova Mɛla ne anwo. Ɔhɔle sua nu, “ɛya nee nyane” hunle ye kɛ yeannyia mɔɔ ɔkpondɛ la. Yɛkenga kɛ: “Ɔhɔlale ye mgba ne azo, ɔhakyile ɔ nye bane nwo na ɔkpole aleɛ.” (1 Arelemgbunli 21:4) Mekɛ mɔɔ Gyɛzɛbɛle nwunle kɛ ɔ hu ɛlɛyɛ ɔ nwo kɛ kakula la, ɔnyianle adwenle ndɛndɛ kɛ ɔbamaa ɔ sa aha mɔɔ ɔkpondɛ la—na yealua zo yeazɛkye abusua mɔɔ le tenlene la.

Saa yɛkenga adwenle mɔɔ ɔbɔle la a ɔbayɛ se kɛ ye atisesebɛ ne ɛnrɛzi yɛ nwo la. Ɔbahyema Gyɛzɛbɛle ze kɛ Nyamenle Mɛla ne kile kɛ menli nwiɔ di daselɛ tia awie a ɛzonle ne di munli. (Mɛla ne 19:15) Yemɔti ɔhɛlɛle ngɛlata wɔ Ehabe duma nu, na ɔhanle ɔhilele menli titile mɔɔ wɔ Gyɛzɛlii la kɛ bɛkpondɛ menli nwiɔ bɛmaa bɛdo Neebɔto ɛzonle—kɛ yebɔ munzule mɔ ɔfɛta kɛ bɛku ye a. Ɔyɛ nyane kɛ ye adwenle ɛtane ne hɔle zo pɛpɛɛpɛ. “Agbamgbanvolɛ” nwiɔ donle Neebɔto ɛzonle, na bɛzile ye awolɛ bɛhunle ye. Tɛ yemɔ ala ɛne—bɛhunle Neebɔto amra ne mɔ noko! * (1 Arelemgbunli 21:5-14; Sɛlɛvolɛma 24:16; 2 Arelemgbunli 9:26) Ɔda ali kɛ Ehabe gyakyile ye tileyɛlɛ ne wulale ɔ ye asa nu  kɛ ɔyɛ mɔɔ ɔkulo la na ɔhunle menli mɔɔ bɛtɛyɛle ɛhwee la.

Suzu kɛzi Yilaegya dele nganeɛ wɔ mekɛ mɔɔ Gyihova manle ɔnwunle mɔɔ belemgbunli ne nee ɔbahyema ne yɛle la. Saa ɔzɔho kɛ ɛtanevolɛma ɛlɛdi konim wɔ anzenwolɛbiema anwo zo a ɔbu abɛ nu kpalɛ. (Edwɛndolɛ 73:3-5, 12, 13) Ɛnɛ, yɛta yɛnwu nzisi mɔɔ ɛnle kpalɛ la—ɔyɛ bɔbɔ a menli mɔɔ lɛ tumi mɔɔ bɛka kɛ bɛgyi Nyamenle agyakɛ anu la yɛ zɔ. Noko, edwɛkɛ ɛhye bahola akyekye yɛ rɛle. Baebolo ne kakye yɛ wɔ ɛke kɛ debie biala ɛnvea wɔ Gyihova anyunlu. Ɔnwu debie biala. (Hibuluma 4:13) Na duzu a ɔyɛ wɔ atisesebɛ nyɛleɛ mɔɔ ɔnwu ye la anwo a?

Gyihova zoanle Yilaegya wɔ Ehabe ɛkɛ. Nyamenle hanle ye wienyi hilele ye kɛ: ‘Ɔwɔ Neebɔto vanye ɛya ne anu.’ (1 Arelemgbunli 21:18) Mekɛ mɔɔ Gyɛzɛbɛle hanle hilele Ehabe kɛ kɛkala vanye ɛya ne le ye ɛdeɛ la, ɔdwazole na ɔhɔle kɛ ɔkava ye ɛya fofolɛ ne. Yeanzuzu nwolɛ ɛlɛ kɛ Gyihova ɛlɛnea mɔɔ ɔlɛyɛ la. Suzu kɛzi ɔdele nganeɛ wɔ mekɛ mɔɔ ɔluolua vanye ɛya ne anu, na ɔlɛsuzu ninyɛne dɔɔnwo mɔɔ ɔbava tola ne yeayɛ la anwo nea. Noko, arɛlevilɛ nu ala, Yilaegya vindele ɛkɛ! Ehabe anyunlu ɛzelekɛ ne hakyile, na ɔvale ɛya nee ɛkpɔlɛ ɔhanle kɛ: “Hue e! Me kpɔvolɛ ɛvinde me.”—1 Arelemgbunli 21:20.

Ehabe edwɛkɛ ne maa ngoasea adwenle nwiɔ da ali. Mɔɔ lumua la, edwɛkɛ mɔɔ ɔhanle ɔhilele Yilaegya kɛ ‘wɔvinde me’ la kile kɛ ɛnee Ehabe anye ɛzi wɔ sunsum nu. Ɛnee Gyihova “ɛvinde” ye dɛbadɛba. Ɔnwunle kɛ Ehabe anva ye ɛhulolɛ fanwodi ahyɛlɛdeɛ ne anli gyima kpalɛ yɛɛ ɔlɛnyia Gyɛzɛbɛle adwenle ɛtane ne mɔɔ ɔbɔle la azo nvasoɛ. Nyamenle nwunle ye wɔ Ehabe ahonle nu, ɛleka mɔɔ anwonyia ala a ɔdwenle nwolɛ la kɛ anwunvɔnezelɛ nee pɛlepɛlelilɛ biala ɛnle ɛkɛ. Mɔɔ tɔ zo nwiɔ, ɔhanle ɔhilele Yilaegya kɛ, “Hue e! Me kpɔvolɛ.” Ehabe lale ye ali kɛ ɔkpɔ awie mɔɔ ɔ gɔnwo a le Gyihova Nyamenle na ɔbahola yeaboa Ehabe yeamaa yeavi ye adenle ɛtane ne azo la.

Yɛbahola yɛazukoa ninyɛne dɔɔnwo yɛavi Ehabe ngoaseade ne anu. Ɔwɔ kɛ yɛkakye ye dahuu kɛ Gyihova Nyamenle nwu debie biala. Kɛmɔ ɔle Selɛ mɔɔ lɛ ɛlɔlɛ la ati, ɔze mekɛ mɔɔ yɛbahwe yɛ nwo yɛavi adenle kpalɛ ne azo la, na ɔ nye la kɛ yɛbahakyi yɛ ndenle. Amaa yeaboa yɛ la, ɔta ɔdua ɔ gɔnwo mɔ—alesama mɔɔ di nɔhalɛ, mɔɔ le kɛ Yilaegya la anwo zo ɔmaa bɛka Nyamenle edwɛkɛ ne bɛkile bɛ gɔnwo mɔ menli. Nea kɛzi ɔbayɛ nvonleɛ kɛ  yɛbabu Nyamenle agɔnwo mɔ kɛ yɛ kpɔvolɛma ɛ!—Edwɛndolɛ 141:5.

Yɛ Yilaegya mɔɔ ɛlɛbua Ehabe la anwo nvoninli nea: “Mevinde wɔ.” Ɔnwunle Ehabe kɛzi ɔde la kɛ—ɔle awule, kɔdiawu, yɛɛ yede Gyihova Nyamenle anwo atua. Nea kɛzi ɛnee ɔhyia akɛnrasesebɛ na yeahola yeadwazo yeatia zɔhane atisesebɛ sonla ne la! Yilaegya hɔle zo hanle Nyamenle ndɛnebualɛ ne tiale Ehabe. Gyihova nwunle mɔɔ ɛlɛkɔ zo la—ɛtaneyɛlɛ vi Ehabe abusua ne anu ɛlɛka menli ne. Yemɔti Yilaegya hanle hilele Ehabe kɛ Nyamenle bamaa “munzule ara ɛ nwo zo,” ɔbabɔ wɔ ebialilɛ ne bɔkɔɔ. Bɛbahwe Gyɛzɛbɛle noko anzo.—1 Arelemgbunli 21:20-26.

Yilaegya ambu ye kɛ menli yɛ ɛtane na bɛfa bɛ nwo bɛdi. Ɔnyɛ se kɛ yɛbanyia adwenle zɔhane wɔ ɛnɛ ewiade ye anu. Edwɛkɛ ɛhye mɔɔ wɔ Baebolo ne anu la kakye yɛ kɛ Gyihova Nyamenle ɛnnwu mɔɔ ɛlɛkɔ zo ala na eza ɔfa pɛlepɛlelilɛ ɔba wɔ ye mekɛ nloa. Ye Edwɛkɛ ne si zolɛ kɛ mekɛ ɛlɛba mɔɔ ɔbamaa nzisi kɔsɔɔti abo apɛ a! (Edwɛndolɛ 37:10, 11) Noko, bie a ɛbabiza kɛ: ‘Asoo Nyamenle ndɛnebualɛ kile anzohwenlɛ ala? Anwunvɔnezelɛ noko wɔ nu ɔ?’

Bie a mɔɔ Ehabe yɛle wɔ Nyamenle ndɛnebualɛ ne anwo la zinle Yilaegya anwo. Edwɛkɛ ne kenga kɛ: “Yilaegya anloa dɔle ala la, Ehabe suosuanle ye adɛladeɛ mɔɔ ɔwula la anu na ɔvale ɛrele ɔhedale, ɔhyele ɛhɔne, ɔvale ɛrele ɔlale na ɔluale ye alɔbɔlɛ alɔbɔlɛ nu.” (1 Arelemgbunli 21:27) Ɛnee Ehabe ɛlɛnu ɔ nwo wɔ ye ndenle ne anwo ɔ?

Yɛbahola yɛaha kɛ ɛnee ɔlɛbɔ ɔ nwo mɔdenle. Ɛnee Ehabe ɛlɛbɛlɛ ɔ nwo aze—ɛnee ɛhye le debie mɔɔ yɛ se maa adubɛnwo nee anwomemaazo sonla kɛ ɔkɛyɛ. Noko ɔle anlubɛnwo kpalɛ ɔ? Fa toto belemgbunli bie mɔɔ nzinlii yɛle ɛtane kpole dɛlale Ehabe la ɛdeɛ ne anwo na suzu nwo—Manasɛ. Mekɛ mɔɔ Gyihova hwenle Manasɛ anzo la, ɔbɛlɛle ɔ nwo aze, na ɔkpondɛle Gyihova moalɛ. Noko ɔyɛle debie ɔbokale nwolɛ. Akee ɔhakyile ye ɛbɛlabɔlɛ na ɔyele awozonlezonlenlɛ ninyɛne mɔɔ ɔlɛ la kɔsɔɔti ɔvile ɛkɛ, na ɔbɔle mɔdenle ɔzonlenle Gyihova, na bɔbɔ ɔzile ye menli ne adua kɛ bɛyɛ zɔ. (2 Edwɛkɛsisilɛ 33:1-17) Ehabe yɛle nyɛleɛ ɛhye bie ɔ? Yeanyɛ zɔ fee.

Asoo Gyihova nwunle kɛ Ehabe ɛlɛdi nyane wɔ bagua nu ɔ? Gyihova hanle hilele Yilaegya kɛ: “Wɔnwu kɛ Ehabe ɛzi ɛdo ɔ nwo aze bɛtɛɛ ɛmaa me la ɔ? Kɛmɔ yevu ɔ nwo la, me nee ye ɛnrɛli kɛkala wɔ ye mekɛ zo; kenle bie, wɔ ɔ ra ne mekɛ zo yɛɛ mebabɔ ye awuke ne a.” (1 Arelemgbunli 21:29) Ɛnee Gyihova ɛlɛfa Ehabe ɛtane ahyɛ ye ɔ? Kyɛkyɛ, nɔhalɛ anlubɛnwo ala a bamaa Nyamenle aze ye anwunvɔne zɛhae a. (Yizikeɛle 33:14-16) Noko kɛmɔ Ehabe nlunle ɔ nwo la ati, Gyihova noko zele ye anwunvɔne ekyi. Ehabe ɛnrɛnwu nyane mɔɔ ɔyɛ kɛ bɛbazɛkye ye abusua ne amuala la.

Noko ndɛne mɔɔ Gyihova buale ye la angakyi. Nzinlii, Gyihova nee ye anwumabɔvolɛma kpondɛle adenle kpalɛ mɔɔ bɛdua zo a bɛbayɛ Ehabe koasea bɛamaa yeava ɔ nwo yeawula konle mɔɔ bapɛ ye ngoane zo la anu. Ɔ nzi mekɛ ekyi bie anu, ndɛne mɔɔ Gyihova buale Ehabe la rale nu. Ehabe bodale wɔ konle nu na ye mogya hwinle guale ye konle ehwili ne anu toonwo ɔwule. Edwɛkɛ ne toa zo ka ye alɔbɔlɛ nu kɛ: Mekɛ mɔɔ bɛnrinzinle ye konle ehwili ne anu la, ahwea ratafele belemgbunli ne mogya. Ɔlua bagua nu deɛ ɛhye azo, Gyihova edwɛkɛ mɔɔ Yilaegya hanle hilele Ehabe la rale nu kɛ: “Ɛleka mɔɔ ahwea tafele Neebɔto mogya ne la ɛkɛ ne ala yɛɛ bɛbatafe ɛdawɔ noko wɔ mogya ɛdeɛ ne a.”—1 Arelemgbunli 21:19; 22:19-22, 34-38.

Wɔ Yilaegya, Yilaehya nee Nyamenle menli kɔsɔɔti mɔɔ di nɔhalɛ la afoa nu, mɔɔ dole Ehabe la kakye yɛ kɛ Gyihova arɛle anvi Neebɔto akɛnrasesebɛ nee ye diedi ne. Pɛlepɛlelilɛ Nyamenle ne ɛmkpo kɛ ɔbadua ɛtaneyɛlɛ zo kakɛ ɛlɛ, kanzɛɛ ɔyɛ ye ɛkɛ ne ala anzɛɛ ɔkyɛ bɔbɔ a; yɛɛ saa ɔlɛ debie ɔgyinla zo a ɔmkpo kɛ ɔbava anwunvɔnezelɛ yeaboka ye ndɛnebualɛ nwo. (Ɛdianlɛ 14:18) Ɛzukoalɛdeɛ mɔɔ tumi wɔ nu la boni a Yilaegya, mɔɔ vale ɛvolɛ dɔɔnwo yɛle gyima wɔ zɔhane atisesebɛ belemgbunli ne ebialilɛ bo la nyianle a! Bɛsisi wɔ ɛlɛ ɔ? Ɛ nwo ɛlɛdɔ kɛ Nyamenle bamaa ninyɛne ayɛ boɛ ɔ? Ɔle kpalɛ kɛ ɛbazukoa Yilaegya diedi ne. Ɔlua ɔ gɔnwo Yilaehya mɔɔ di nɔhalɛ la moalɛ zo, ɔhɔle zo ɔbɔle Nyamenle nrɛlaleɛ ne nolo, na ɔgyinlanle nzisi nloa!