Adwenle nu kpɔkɛdelɛ nwo benlerama ka kɛ menli hyia sunsum nu ninyɛne na bɛ nye alie kpalɛ. Yɛnwu ɛhye wɔ nɔhalɛ mɔɔ ɔde kɛ menli kulo kɛ bɛdwu bodane bie anwo anzɛɛ bɛsonle awie mɔɔ le kpole tɛla bɛ la. Amaa bɛali ngyianlɛ ɛhye anwo gyima la, bie mɔ fa bɛ mekɛ sukoa abɔdeɛ, adwinlililɛ, edwɛne nee mɔɔ bokɛboka nwo la. Noko akee, menli dɔɔnwo ɛnnyia anyelielɛ kpalɛ wɔ ninyɛne ɛhye mɔ mɔɔ bɛli ɔ nzi la anu.

Nɔhalɛ mɔɔ ɔde kɛ alesama kulo sunsum nu ninyɛne la ɛnyɛ menli mɔɔ kenga Baebolo ne la nwanwane. Mɔlebɛbo tile ekyi mɔɔ lumua la kile kɛ Nyamenle bɔle nrenya nee raalɛ mɔɔ lumua wiele la, ɛnee ɔ nee bɛ tendɛ dahuu, na ɔ nee bɛ nyianle agɔnwolɛvalɛ. (Mɔlebɛbo 3:8-10) Nyamenle ambɔ alesama kɛ bɛli bɛ ti anwo bɛdɛnla; ɔhyia kɛ bɛ nee bɛ Bɔvolɛ ne tendɛ. Baebolo ne ka ngyianlɛ ɛhye anwo edwɛkɛ fane dɔɔnwo.

Kɛ neazo la, Gyisɛse hanle kɛ: ‘Anyelielɛ a le bɛdabɛ mɔɔ bɛze bɛ sunsum nu ngyianlɛ la.’ (Mateyu 5:3) Zɔhane edwɛkɛ ne maa yɛnwu kɛ debie mɔɔ hyia na awie abɔ ɛbɛla mɔɔ anyelielɛ nee ahunlundwolɛ wɔ nu la a le kɛ ɔbanwu Nyamenle. Kɛ ɔkɛyɛ na yɛayɛ zɔ ɛ? Gyisɛse hilele mualɛ ne wɔ mekɛ mɔɔ ɔhanle kɛ: “Tɛ aleɛ ngome a sonla di a ɔnyia ngoane a, na Nyamenle anloa edwɛkɛ biala maa ngoane” la. (Mateyu 4:4) Ndenle boni azo a Nyamenle edwɛkɛ, mɔɔ kile, Nyamenle adwenle nee ye adehilelɛ mɔɔ wɔ Baebolo ne anu la, maa yɛbɔ ɛbɛla mɔɔ anyelielɛ nee ahunlundwolɛ wɔ nu la ɛ? Bɛmaa yɛzuzu ndenle nsa mɔɔ hyia la anwo.

Ɛnɛ, yɛlɛ benlerama dɔɔnwo mɔɔ bɛziezie bɛ nwo kɛ bɛbadu menli folɛ wɔ agɔnwolɛvalɛ, ɛlɔlɛ, abusua ɛbɛlabɔlɛ, edwɛkɛ ɛziezielɛ, anyelielɛ yɛɛ mɔɔ ɛbɛlabɔlɛ kile bɔbɔ la anwo. Noko nwane a fɛta kɛ ɔfa adehilelɛ kpalɛ mɔɔ nuhua la ɛkɛ maa wɔ ninyɛne ɛhye mɔ anwo tɛla alesama Bɔvolɛ, mɔɔ le Gyihova Nyamenle la ɛ?

Neazo ɛne: Saa ɛtɔ kamera anzɛɛ kɔmputa fofolɛ a, ɛ nye la kɛ ahenle mɔɔ yɛle la bava nwolɛ buluku  mɔɔ kile kɛzi ɛbahola wɔava deɛ mɔɔ wɔdɔ wɔali gyima kpalɛ la aboka nwolɛ. Yɛbahola yɛava Baebolo ne yɛado buluku zɛhae anwo. Ɔle alesama ɛbɛlabɔlɛ nwo buluku mɔɔ Nyamenle, mɔɔ bɔle sonla la ɛva ɛmaa yɛ kɛ yɛnlea zolɛ a. “Buluku” zɛhae kilehile mɔɔ deɛ ne bahola ayɛ la anu na ɔkile kɛzi ɔwɔ kɛ bɛfa bɛdi gyima na yeaboa bɛ kpalɛ la.

Kɛmɔ buluku zɛhae biala mɔɔ maa adehilelɛ mɔɔ bɛhɛlɛ ye kpalɛ de la, Baebolo ne maa kengavolɛma nwu nyɛleɛ mɔɔ bahola amaa “deɛ mɔɔ bɛyɛ”—yɛ ngoane ala esiane nu la. Folɛdulɛ anzɛɛ adenle sikalɛ mɔɔ awie mɔ bahile la bahola ayɛ kɛnlɛma, na bɔbɔ yeayɛ kɛ ɔle kpalɛ ɛdeɛ, noko asoo nrɛlɛbɛ ɛnle nu kɛ yɛbanyia adwenle kɛ saa yɛbabɔ ɛbɛla mɔɔ yɛ anyelielɛ mɔɔ ngyegyelɛ ɛnle nu a, ɔwɔ kɛ yɛdi Bɔvolɛ ne adehilelɛ zo ɔ?

Gyihova Nyamenle maa yɛ adehilelɛ ɛdeɛ, noko ɔnyɛ ye kyengye kɛ yɛlie yɛdo nu. Emomu, kɛ Dovolɛ mɔɔ kulo yɛ edwɛkɛ la, ɔka ɔkile yɛ kɛ: ‘Medame a mele Gyihova bɛ Nyamenle ne, mɔɔ kilehile bɛ maa bɛyɛ kpalɛ, na ɔdi bɛ nyunlu ɔkilehile bɛ adenle mɔɔ ɔwɔ kɛ bɛdua nu la. O anrɛɛ bɛdiele me mɛla ne mɔ! Anrɛɛ bɛ anzondwolɛ kɛyɛ kɛ azule, na bɛ tenleneyɛlɛ ayɛ kɛ nyevile azɛlɛkye.’ (Ayezaya 48:17, 18) Ye sikalɛ a le kɛ, saa yɛdi Nyamenle adehilelɛ zo a, yɛbabɔ ɛbɛla kpalɛ. Yɛka ye adenle fofolɛ zo a, amaa yɛabɔ ɛbɛla kpalɛ mɔɔ anyelielɛ wɔ nu la, yɛhyia Nyamenle.

Menli dɔɔnwo te nganeɛ kɛ bɛngyia Nyamenle ɔluakɛ ninyɛne dɔɔnwo ɛlɛkɔ zo wɔ ɛbɛlabɔlɛ nu mɔɔ nee Nyamenle mɔɔ lɛ ɛlɔlɛ la anu diedi ɛnyia a. Kɛ neazo la, bɛbiza kɛ: ‘Duzu ati a sonla kpalɛ nwu amaneɛ a?’ ‘Duzu ati a ewule wɔ mbɔdɔma bie mɔ anwo a?’ ‘Duzu ati a nzisi wɔ ɛbɛlabɔlɛ nu a?’ Nɔhalɛ nu, ɛhye mɔ le kpuyia mɔɔ hyia, na saa yɛnyia nwolɛ mualɛ mɔɔ yɛ ahunlundwolɛ la a ɔbahola yɛaha yɛ ɛbɛlabɔlɛ kpalɛ. Noko kɛ anrɛɛ yɛbava ngyegyelɛ ɛhye mɔ anwo ɛzonlelilɛ yɛado Nyamenle anwo zo ndɛndɛ la, bɛmaa yɛnlea kɛzi Nyamenle Edwɛkɛ, Baebolo ne maa yɛte edwɛkɛ ɛhye abo la.

Wɔ Mɔlebɛbo tile nsa ne anu, yɛnwu Seetan mɔɔ luale ɛwɔlɛ nwo zo dendɛle, na ɔbɔle mɔdenle kɛ ɔmaa alesama nwiɔ ne mɔɔ lumua la ayɛ Gyihova Nyamenle anwo anzosesebɛ wɔ kpalɛ nee ɛtane ɛnwunlɛ baka ne mɔɔ ɔse bɛmmadi bie anwo la. Seetan hanle hilele Yive kɛ: “Bɛnrɛwu. Nyamenle ze kɛ saa bɛdi baka ne ma ne bie a bɛ nye babuke na bɛayɛ kɛ ɔdaye Nyamenle la, na bɛanwu mɔɔ le kpalɛ, [bɛanwu] mɔɔ le ɛtane la.”—Mɔlebɛbo 2:16, 17; 3:4, 5.

Ɔlua zɔhane edwɛkɛ ne azo, Seetan hilele kɛ Nyamenle ɛbɔ adalɛ yɛɛ eza adenle mɔɔ Nyamenle dua zo nea bɛ nwo zo la ɛnle kpalɛ. Abɔnsam hanle kɛ saa alesama tie ye a, ninyɛne bahɔ zo boɛ amaa bɛ. Ɛnee kɛ ɔkɛyɛ na bɛaziezie zɔhane edwɛkɛ ne ɛ? Gyihova yɛle kɛ ɔbagyakyi yeamaa  ninyɛne ahɔ zo kɛmɔ ɔde la amaa menli kɔsɔɔti anwu kɛ ɛzonle ne mɔɔ bɛdonle ye la le nɔhalɛ anzɛɛ adalɛ a. Ɛnee ɔle kɛ Nyamenle ɛlɛmaa Seetan nee menli mɔɔ gyi ɔ nzi la anyia adenle ahile kɛ alesama bahola adɛnla mɔɔ bɛngyia Nyamenle a.

Duzu a ɛbava wɔabua Seetan edwɛkɛ ne a? Asoo alesama bahola adɛnla kpalɛ na bɛanlea bɛ nwo zo bɔkɔɔ mɔɔ bɛngyia Nyamenle a? Amaneɛnwunlɛ, nzisi, anwodolɛ, ewule nee ɛtanelilɛ, ɛbɛlazɛkyelɛ, konle, menli dɔɔnwo ɛhunlɛ, yɛɛ amumuyɛ ngakyile mɔɔ alesama ɛnwu ye wɔ ɛvoya dɔɔnwo anu la di daselɛ wienyi kɛ mɔdenle mɔɔ sonla ɛlɛbɔ kɛ ɔtwe ɔ nwo yeavi Nyamenle anwo na yeanlea ɔ nwo zo la anwie bɛ boɛ fee. Kɛ anrɛɛ Baebolo ne bahile kɛ Nyamenle a di alesama ngyegyelɛ ne anwo ɛzonle la, ɔka debie titile mɔɔ fa ba la anwo edwɛkɛ kɛ: “Bie mɔ lɛ tumi ɛlɛsisi bie mɔ bɛamaa bɛanwu amaneɛ.”—Nolobɔvo ne 8:9.

Kɛmɔ ɛhye kile la, asoo ɔnla ali wienyi kɛ ɔwɔ kɛ yɛkpondɛ ninyɛne mɔɔ ɛlɛgyegye alesama la anwo mualɛ yɛfi Nyamenle ɛkɛ na eza yɛkpondɛ ye sɔbelɛ ɔ? Duzu a Nyamenle bayɛ a?

Menli anye la ye mekɛ tendenle kɛ bɛ nwo bɛadɔ bɛ avi anwodolɛ, kpanyinliyɛlɛ nee ewule nwo. Bɛzɛkye mekɛ, mɔdenlebɔlɛ yɛɛ anwonyia dɔɔnwo bɛva bɛkpondɛ ye sɔbelɛ, noko yeanyɛ boɛ. Ɛnee bie mɔ anye la kɛ nyile mɔɔ ɛlie duma kɛ bɛno a bɛnwu, mɔɔ bamaa bɛayɛ mgbavolɛ la bɛamaa bɛanyia ye sɔbelɛ. Ɛhye mɔ kɔsɔɔti amboa bɛ.

Nyamenle kulo kɛ alesama bɔ ɛbɛla kpalɛ na bɛ nye die. Bodane mɔɔ mɔlebɛbo ne ɔvale ɔbɔle sonla la ɛne, yɛɛ ɔ rɛle ɛtɛfile. (Mɔlebɛbo 1:27, 28; Ayezaya 45:18) Gyihova Nyamenle ɛbɔ yɛ ɛwɔkɛ kɛ debie biala mɔɔ yeha kɛ ɔbayɛ la bayɛ zɔ. (Ayezaya 55:10, 11) Baebolo ne ka ɛwɔkɛ mɔɔ Nyamenle ɛbɔ kɛ ɔbamaa Paladaese ne mɔɔ vile alesama nwiɔ ne mɔɔ lumua asa azia ara la anwo edwɛkɛ kile yɛ. Wɔ Baebolo ne buluku mɔɔ li awieleɛ la anu, yɛnwu edwɛkɛ ɛhye kɛ: “[Gyihova Nyamenle] bakyikyi bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.” (Yekile 21:4) Kɛzi Nyamenle bamaa tɛnlabelɛ ɛhye mɔɔ yɛ nwanwane la ara ɛ, na kɛzi yɛbanyia ɛwɔkɛ ɛhye anu nvasoɛ ɛ?

Nyamenle Ara ne mɔɔ le Gyisɛse Kelaese la, hilele ye ɛdoavolɛma kɛ bɛzɛlɛ kɛ Nyamenle ɛhulolɛdeɛ ɛyɛ ɛkɛ. Menli dɔɔnwo ze zɔhane asɔneyɛlɛ ne anzɛɛ bɛta bɛyɛ zɔhane asɔne ne, mɔɔ bie mɔ fɛlɛ ye Awulae Nzɛlɛlɛ ne la. Ɔbɔ ɔ bo zɛhae: “Yɛ Ze mɔɔ wɔ anwuma: Wɔ duma nwo ɛde; Wɔ belemgbunlililɛ ɛrɛla; Bɛyɛ Wɔ ɛhulolɛdeɛ wɔ azɛlɛ ye azo, Kɛmɔ bɛyɛ ye wɔ anwuma lɔ la.” (Mateyu 6:9, 10) Ɔle zɔ kɛ, Nyamenle Belemgbunlililɛ ne a Gyihova Nyamenle balua zo aye munzule mɔɔ alesama tumililɛ ɛva ɛra la avi ɛkɛ na yeamaa tenlene ewiade fofolɛ mɔɔ yeva yebɔ ɛwɔkɛ la ara a. * (Daneɛle 2:44;  2 Pita 3:13) Duzu a ɔwɔ kɛ yɛyɛ na yɛanyia Nyamenle ɛwɔkɛ ne anu nvasoɛ a?

Gyisɛse Kelaese ɛhile yɛ adenle sikalɛ mɔɔ ɔwɔ kɛ yɛdua zo la: “Ngoane mɔɔ ɛnlɛ awieleɛ la a le kɛ bɛkɛnwu kɛ wɔmɔ a ɛle nɔhalɛ Nyamenle kokye ne a, na bɛkɛnwu Gyisɛse Kelaese, mɔɔ wɔzoa ye la.” (Dwɔn 17:3) Ɛhɛe, ɔlua Nyamenle moalɛ zo yɛbahola yɛanyia dahuu ngoane wɔ ewiade fofolɛ ne mɔɔ bɛbɔ nwolɛ ɛwɔkɛ la anu. Saa bɛbiza kɛ, Yɛhyia Nyamenle Ɔ? ɔwɔ kɛ zɔhane anyelazo ne maa ɛka kɛ ɛhɛe.

Ɛvolɛ 2,000 mɔɔ ɛze ɛhɔ la, wɔ Alɛyɔpagɛse, anzɛɛ Mars Hill azo wɔ Atɛnse, ɛzoanvolɛ Pɔɔlo hanle Nyamenle anwo edwɛkɛ ɛhye hilele Atɛnsema mɔɔ dwenle kɔ moa la kɛ: “Ɔdaye a ɔmaa sonla biala ngoane nee ɛnwomenle nee debie biala a. Ɔluakɛ, ‘Ye nuhua yɛɛ yɛde na yɛkɔ, yɛba, na yɛnyia ngoane a.’ Ɔle kɛ mɔɔ bɛdabɛ bɛ edwɛkɛdwɛndolɛma bie mɔ hanle la, ‘Yɛdayɛ noko yɛle ɔ mra.’”—Gyima ne 17:25, 28.

Mɔɔ Pɔɔlo hanle hilele Atɛnsema ne la tɛde nɔhalɛ. Yɛ Bɔvolɛ ne maa yɛnyia anwoma yɛdie ɛnwomenle, yɛnyia aleɛ yɛdi, na yɛnyia nzule yɛno. Saa ninyɛne kpalɛ mɔɔ Gyihova ɛyɛ mɔɔ bɔ yɛ nwo bane la ɛnle nu a anrɛɛ yɛnde aze. Noko duzu ati a Nyamenle ɛhɔ zo ɛyɛ ninyɛne ɛhye mɔ ɛmaa menli kɔsɔɔti, ɔnva nwo kɛ bɛdwenle ɔ nwo anzɛɛ bɛndwenle ɔ nwo ɛ? Pɔɔlo hanle kɛ “amaa bɛakpondɛ ye kɛ bɛ sa kɛha ye na bɛanwu ye. Noko Nyamenle nee yɛ nuhua biala avinli ande biala.”—Gyima ne 17:27.

Asoo ɛkulo kɛ ɛnwu Nyamenle kpalɛ, kile kɛ, ɛsukoa ye bodane nee ye folɛdulɛ mɔɔ bamaa wɔabɔ ɛbɛla kpalɛ ɛnɛ nee kenlebie la ɔ? Saa ye zɔhane a, ɛnee ka nwolɛ edwɛkɛ kile ahenle mɔɔ vale magazine ɛhye manle wɔ la anzɛɛ nwu menli mɔɔ yɛle la. Bɛ nye balie kɛ bɛbaboa wɔ.