Ɛbalie Ɛzonlenlɛ Wɔali Wɔ Konle Nwo Ɔ?
Alberto yɛle sogya gyima kɛyɛ ɛvolɛ bulu. Ɔka kɛ: “Yɛ ɛsɔfo ne yilale yɛ na ɔhanle kɛ, ‘Nyamenle nee bɛ de.’ Noko ɛnee ɔsi me nwo kɛ, ‘Melɛkɔ meahɔhu sonla, noko akee Baebolo ne ka kɛ, “Bɛmmaku sonla.”’”
Ɛnee Ray boka sogyama mɔɔ ko nyevile zo la anwo wɔ Ewiade Konle II la anu. Mekɛ bie, ɔbizale ɛsɔfo ne kɛ: “Ɛba meli ye anu na ɛsɛlɛ ɛmaa ɛlɔnema ne kɛ bɛli konim. Asoo kpɔvolɛ ne ɛnlɛ ngyehyɛleɛ ko ne ala bie?” Ɛsɔfo ne buale kɛ, Awulae yɛ ye gyima wɔ nwanwane ndenle zo.
Saa ɛ kunlu ɛndwo mualɛ ne anwo a, ɛnee tɛ ɛ ngomekye ɔ.
DUZU A BAEBOLO NE KILEHILE A?
Gyisɛse hanle kɛ Nyamenle mɛla ne anu titile ko a le kɛ, “kulo ɛ gɔnwo sonla kɛ ɛdawɔ ɛ nwo la.” (Maake 12:31) Asoo Gyisɛse hilele kɛ yɛhulo yɛ gɔnwo ɔlua ɛleka mɔɔ ɔde anzɛɛ maanle mɔɔ ɔvi nu la ɔ? Kyɛkyɛ. Ɔhanle ɔhilele ye ɛdoavolɛma kɛ: “Saa bɛkulo bɛ nwo ngoko ngoko a yɛɛ awie biala kɛnwu kɛ bɛle me ɛdoavolɛma a.” (Dwɔn 13:34, 35) Ɛhulolɛ mɔɔ bɛlɛ bɛmaa bɛ nwo la bayɛ ngakyile kpalɛ la ati, ɔbayɛ bɛ nzonlɛyɛlɛ. Bɛbawu bɛamaa bɛ nwo tɛla kɛ bɛbahu awie mɔ la.
Alumua Keleseɛnema vale Gyisɛse edwɛkɛ ne bɔle bɛ ɛbɛla. The Encyclopedia of Religion ka kɛ: “Alumua asɔne ne selɛma mɔɔ Tertullian nee Origen boka nwo la hanle kɛ ɔnle kɛ Keleseɛnema ku sonla, ngyinlazo ɛhye ammaa bɛanva bɛ nwo bɛanwula Wulomuma sogya gyima ne anu.”
KƐZI GYIHOVA ALASEVOLƐ YƐ BƐ ƐDEƐ NE Ɛ?
Kɛmɔ asɛɛ Gyihova Alasevolɛ wɔ maanle biala anu la ati, saa maanle nwiɔ nyia edwɛkɛ a bɛbu ye kɛ bɛwɔ maanle ɛhye mɔ anu. Noko, bɛbɔ mɔdenle bɛmaa bɛ ɛlɔlɛ nzonlɛyɛlɛ ne tɛnla ɛkɛ.
Asoo asɔne mgbanyima ɛmaa bɛnwu nɔhalɛ Keleseɛne ɛlɔlɛ ne?
Kɛ neazo la, mekɛ mɔɔ aneɛ ekpunli nwo konle zile wɔ Hutuma nee Tutsima avinli wɔ Rwanda wɔ 1994 la, Gyihova Alasevolɛ angɔ afoa biala. Alasevolɛ mɔɔ wɔ aneɛ ko anu la vale Alasevolɛ mɔɔ wɔ aneɛ gyɛne nu la veale, ɛnee ɛhye ta maa bɛ ngoane da esiane nu. Mekɛ mɔɔ bɛhyele Hutu Alasevolɛ mɔɔ vale bɛ mediema Tutsima veale la, Hutu Interahamwe sogyama hanle kɛ, “Ɔwɔ kɛ bɛwu ɔluakɛ bɛboale Tutsima bɛmanle bɛnriandile.” Ɔyɛ alɔbɔlɛ kɛ, akee bɛhunle Hutu Alasevolɛ ne mɔ la.—Dwɔn 15:13.
Kɛzi ɛdwenle nwo ɛ: Asoo Gyihova Alasevolɛ ne mɔ nyɛleɛ nee Gyisɛse edwɛkɛ mɔɔ fane anwofamaa ɛlɔlɛ nwo la yia?
