Bɛwole me wɔ sua ekyi bie mɔɔ bɛfɛlɛ ye Texcoco la azo. Zɔhane mekɛ ne, ɛnee bɛtɛguale adenle dɔɔnwo mɔɔ wɔ ɛkɛ la azo, yemɔti ɛnee zolɛ le munlutu. Ɛnee menli mɔɔ wɔ namunamu mɔɔ bikye ɛkɛ la ta fa bɛ ninyɛne gua asoaso zo batɔne ye wɔ ɛkɛ. Ɛnee ehyia wɔ abusua ne anu yɛɛ yɛle ngakula ngɔnla, na medame a ɛnee metɔ zo nsuu a. Ɛnee me papa kpomgba ɛbɔ nu mgbɔlaboa fa nea abusua ne. Noko menyianle ɛvolɛ nsuu la yɛɛ ɔwule a. Ɔvi zɔhane mekɛ ne ɛnee me mame pele na yeanyia aleɛ yeamaa abusua ne.

Ɛnee me nenya bɔ sanwule na ɔnea edwɛndolɛma mɔɔ tete asɔne edwɛne a bɛto ye titile la anwo zo. Asɛɛ awie biala mɔɔ wɔ abusua ne anu la ze edwɛne to. Ɛnee me mame boka menli mɔɔ to asɔne edwɛne ne la anwo, na ɛnee me ankle to edwɛne yɛɛ ɔbɔ sanwunle. Ɛnee yɛ nye bolo asɔne gyima nwo yɛɛ mesonle wɔ afɔlemokyea ne anwo, na ɛnee mekulo kɛ meyɛ Katɔlek edwɛkpatɛlɛvolɛ. Mekɛ ko ne ala, ɛnee me nye die karate sini nwo. Sini ne mɔɔ meta menea la ati, ɔngyɛ na meado kɛlɛ.

Wɔ sua bie mɔɔ bɛfɛlɛ ye Puebla la azo, mengɔle asɔne sukulu mɔɔ le kɛ ɛleka mɔɔ bɛtete ɛsɔfoma la. Ɛnee me bodane a le kɛ mebayɛ Katɔlek ɛsɔfo. Noko wɔ me sukulu ɛvolɛ mɔɔ li awieleɛ la anu, me nye anlie Katɔlek Asɔne ne anwo. Bɛlɛra mɔɔ bɛlɛtete ye wɔ sukulu ɛkɛ la yɛle kɛ ɔkulo me. Meamkponle zolɛ, noko mɔɔ ɔyɛle la manle me nye liele agyalɛ nwo. Yeanga ye zɔ, menwunle kɛ ɛsɔfoma dɔɔnwo ɛnli nɔhalɛ. Awieleɛ ne, mengyakyile ɛsɔfo ne mɔɔ ɛnee mekulo kɛ meyɛ la.

 Membɔle kpɔkɛ kɛ mebazukoa edwɛne wɔ Maanle Ne Ɛleka Mɔɔ Bɛnea Edwɛne zo la wɔ Mexico City. Mekɛ mɔɔ menwiele la, mengyale, na yeangyɛ me nee me ye wole ngakula nna. Ɛnee mebɔ Mass edwɛne wɔ Katɔlek Asɔne ne anu mefa menea abusua ne.

Mɔlebɛbo ne amuala, ɛnee ngyegyelɛ wɔ yɛ agyalɛ ne anu. Ɛnee me nee me ye ko ɔluakɛ ɛnee yɛnlie yɛ nwo yɛnli. Mɔlebɛbo ne ɛnee yɛbɔ yɛ nwo aholoba na akee yeahakyi konle. Ɛvolɛ 13 anzi, yɛzile kpɔkɛ kɛ yɛbatete agyalɛ ne anu na nzinlii yɛabɔ ewole.

Me nee Gyihova Alasevolɛ lumuale dendɛle kolaa na me nee me ye atete nu. Alasevolɛ nwiɔ bɔle yɛ anlenkɛ ne anu na bɛhanle kɛ bɛ nee yɛ suzu Baebolo ne anwo. Ɛnee mesuzu kɛ meze asɔne nwo edwɛkɛ dɔɔnwo, yemɔti ɛnee mekulo kɛ bɛnwu kɛ mebe medɛla bɛ. Membizale bɛ kpuyia mɔɔ ɛnee mesuzu kɛ bɛnrɛhola ye bua la. Noko dahuu bɛgyinlanle Baebolo ne azo bɛbuale ye kɛnlɛma bɛmanle ɔzinle me nwo. Menwunle ye kɛ amuanrɛɛ menze ɛhwee. Noko akee, ɛnee me ye ɛmbu Alasevolɛ ne mɔ yɛɛ ɛnee menlɛ alagye, yemɔti bɛgyakyile ɛkɛ ne ɛralɛ.

Ye ɛvolɛ nnu anzi, ɛnee me nee raalɛ fofolɛ mɔɔ bɛfɛlɛ ye Elvira la a de a, na me nee Gyihova Alasevolɛ dendɛle bieko. Elvira andwazo antia Alasevolɛ ne mɔ, yemɔti yɛanyɛ se kɛ mebazukoa Baebolo ne dahuu. Yemɔ bɔbɔ anzi, ɔlile ɛvolɛ dɔɔnwo na meahola meagyakyi me ɛbɛla dɛba ne.

Menwunle ye kɛ saa mebahola meavi ahonle muala nu meazonle Gyihova a ɔwɔ kɛ meyɛ nzenzaleɛ kpole. Mɔɔ lumua la, ɔwɔ kɛ megyakyi Mass edwɛne mɔɔ meto wɔ Katɔlek Asɔne ne anu la, ɛnee ɛhye kile kɛ ɔwɔ kɛ mekpondɛ debie fofolɛ meyɛ mefa menea me nwo. (Yekile 18:4) Ɛnee eza ɔwɔ kɛ me nee Elvira fa yɛ agyalɛ ne wula mɛla bo.

Noko debie ko mɔɔ ɛnee yɛ se kpalɛ la a le kɛzi mebahomo me ɛyavalɛ ne azo la. Ngyehyɛnu nwiɔ mɔɔ wɔ Baebolo ne anu la boale me titile: Edwɛndolɛ 11:5, mɔɔ kile kɛ Gyihova kyi konle konle nee 1 Pita 3:7, mɔɔ manle menwunle ye kɛ saa mekulo kɛ Gyihova tie me asɔneyɛlɛ a, ɔwɔ kɛ medi me ye eni la. Mekɛ mɔɔ menzuzule zɔhane ngyehyɛnu ne mɔ anwo na menzɛlɛle Gyihova moalɛ la, mengolale menganle me ɛyavalɛ ne aze.

Kɛkala menyia abusua asetɛnla mɔɔ anyelielɛ wɔ nu la. Melɛbɔ mɔdenle kɛ me nee me mra mrenya mɔɔ menwole bɛ wɔ me agyalɛ ne mɔɔ lumua la avinli bayɛ kpalɛ na meaboa abusua ne mɔɔ mewɔ nu kɛkala la meamaa bɛagyinla kpundii wɔ diedi ne anu.

Mekɛ mɔɔ mele kakula la, ɛnee mekulo kɛ meyɛ ɛsɔfo na meboa menli. Kɛkala mete nganeɛ kɛ me ɛbɛlabɔlɛ gyi bodane zo. Mekile edwɛne mefa meboa me abusua ne. Meda Gyihova ase somaa kɛ ɔnyianle me nwo abotane, ɔmanle menyianle adenle menyɛle nzenzaleɛ na meyɛ sonla fofolɛ la!