NEA kɛzi zɔhane edwɛkɛ ne le nɔhalɛ la! Ewiade ɛhye anu ɛbɛlabɔlɛ ta yɛ “ngyegyelɛ nee nyane” ngome. Bie a ɛdwenle nwolɛ kɛ, ‘Asoo yɛbahola yɛanyia asetɛnla kpalɛ ɛnɛ?’

Fa Maria yɛ neazo. Ɛnee ɔbɔ ɔ nwo mɔdenle kpalɛ, noko kɛkala mɔɔ yenyia ɛvolɛ 84 la, yeha sua nu. Ye adwenle nu la ɛkɛ, noko ye sonlabaka ne ɛngola ɛnyɛ debie biala. Kɛ ɔkɛyɛ na yeade nganeɛ kɛ asetɛnla zɛhae le kpalɛ ɛ?

Na ɛdawɔ ɛ? Bie a wɔbiza ye mekɛ bie kɛ saa wɔ asetɛnla le kpalɛ a. Bie a gyima ko ne ala a dahuu ɛyɛ a, ɛvɛlɛ wɔ nu yɛɛ ɔyɛ se. Bie a menli ɛnnwu mɔdenle mɔɔ ɛbɔ anzɛɛ gyima ɛsesebɛ mɔɔ ɛyɛ la. Saa ninyɛne ɛlɛkɔ zo bɔbɔ a, ɛnze mɔɔ bazi kenlebie la. Ɔyɛ a, bie a ɛte nganeɛ kɛ ɛ nwo ɛyɛ wɔ koonwu anzɛɛ ɛ rɛle ɛbɔ. Bie a wɔ abusua asetɛnla ne anu le manzonle nee butule ngome. Bie a wɔ kulovolɛ bie ɛwu. Ɛnee nrenya bie mɔɔ bɛfɛlɛ ye André la bikye ɔ ze kpalɛ, arɛlevilɛ nu, ɔ ze anwo dole ye na ɔwule. Ye ewule ne dele André ɛbolɛ, na ɔdele nganeɛ kɛ ɔnrɛhola nyane nee alɔbɔlɛlilɛ ne anloa gyinla.

Ɔnva nwo ngyegyelɛ biala mɔɔ bado yɛ la, debie wɔ ɛkɛ mɔɔ ɔwɔ kɛ yɛnwu ye wienyi a: Asoo yɛbahola yɛanyia asetɛnla kpalɛ? Yɛbahola yɛanwu mualɛ ne wɔ nrenya bie mɔɔ rale azɛlɛ ye azo wɔ ɛvolɛ kɛyɛ 2,000 mɔɔ ɛze ɛhɔ la ɛbɛlabɔlɛ nu—Gyisɛse Kelaese. Ɔnva nwo kɛ Gyisɛse yiale ngyegyelɛ dɔɔnwo la, ɔnyianle asetɛnla kpalɛ bɔkɔɔ. Saa yɛdi ye neazo ne anzi a, yɛdayɛ noko yɛbahola yɛanyia asetɛnla kpalɛ.