ASOO ɛsulo kɛ nzisi bo ɛnrɛpɛ ɛlɛ kɛmɔ menli dɔɔnwo adwenle yɛ bɛ la ɔ? Saa ɔle zɔ bɔbɔ a, ndelebɛbo wɔ nu kɛ ɛsulo la. Tetedwɛkɛ kile kɛ, alesama ɛzɔ arane ngakyile biala ɛnlea. Noko akee, bɛtɛkolale bɛtɛyele nzisi bɛtɛfile ɛkɛ. Asoo anyelazo wɔ ɛkɛ ne kɛ mekɛ bie bara mɔɔ menli kɔsɔɔti bali nɔhalɛ ɔ?

Ɔyɛ anyelielɛ kɛ, Baebolo ne bua kɛ ɛhɛe la! Ɔka kɛ, ɔnrɛhyɛ Nyamenle baye nzisi kɔsɔɔti avi yɛ azɛlɛ ye azo. Kɛzi ɔbayɛ ɛhye ɛ? Ɔbalua ye Belemgbunlililɛ ne mɔɔ ɔle arane ɔwɔ anwuma la azo yeahakyi azɛlɛ ne bɔkɔɔ. Ɛhye a le Belemgbunlililɛ ne mɔɔ Gyisɛse hilehilele ye ɛdoavolɛma ne kɛ bɛyɛ nwolɛ asɔne la. Yemɔ a bɛta bɛfɛlɛ ye Awulae Nzɛlɛlɛ anzɛɛ Yɛ Ze mɔɔ wɔ Anwuma la. Gyisɛse hanle kɛ: “Wɔ belemgbunlililɛ ɛrɛla; Bɛyɛ Wɔ ɛhulolɛdeɛ wɔ azɛlɛ ye azo.”—Mateyu 6:10.

Mɔɔ fane Tumililɛ ne azo Belemgbunli Gyisɛse Kelaese anwo la, Baebolo ne hanle dole ɛkɛ ne kɛ: “Mɔɔ ɛnlɛ bie la fɛlɛ a ɔdie ye zo, ɔdie ehyianli nee mɔɔ ɛnlɛ boavolɛ la zo. Ɔnwu mɔɔ ɛnlɛ anwosesebɛ nee mɔɔ ɛnlɛ bie la anwunvɔne, na ɔdie mɔɔ ɛnlɛ bie la ngoane. Ɔdie bɛ ɔfi nzisi nee konle nu; bɛ mogya sonle bolɛ wɔ ɔ nye zo.” (Edwɛndolɛ 72:12-14) Yɛ ye nzonlɛ kɛ Gyisɛse se bɛdabɛ mɔɔ bɛlɛsisi bɛ la anwunvɔne na ɔbayɛ nwolɛ debie! Ɛhye kyekye yɛ rɛle, ɔnle zɔ ɔ?

Nyamenle Belemgbunlililɛ ne balua Tumivolɛ ɛhye mɔɔ se anwunvɔne la anwo zo yeaye nzisi kɔsɔɔti yeavi azɛlɛ ye azo. Kɛzi ɔbayɛ ɛhye ɛ? Ɔlua ninyɛne nsa ne mɔɔ fa nzisi ba mɔɔ ɔbaye yeavi ɛkɛ la azo.

Kɛkala, ɔwɔ kɛ yɛ muala yɛko yɛtia subane ɛtane ne mɔ mɔɔ bɛmaa yɛyɛ angomedi la. (Wulomuma 7:21-23) Noko akee, tenlenema mɔɔ bɛkulo kɛ bɛyɛ mɔɔ ɔtenrɛ la wɔ ɛkɛ. Bɛlɛ diedi wɔ bolɛ mɔɔ Gyisɛse mogya ne sonle la anu, na bɛkola bɛfa bɛ ɛtane bɛkyɛ bɛ. * (1 Dwɔn 1:7, 9) Menli ɛhye mɔ ɛnyia Nyamenle ɛhulolɛ kpole ne azo nvasoɛ, kɛmɔ yɛkenga ye wɔ Dwɔn 3:16 la: “Nyamenle hulole ewiade amra kpole kpalɛ la ati yɛɛ ɔvale Ɔ Ra kokye ne ɔmanle a, amaa awie biala mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ.”

 Nyamenle bayɛ debie mɔɔ yɛ nwanwane la yeamaa bɛdabɛ mɔɔ bɛdi nɔhalɛ la. Wɔ ewiade fofolɛ ne mɔɔ ɛlɛba la anu, ɔbaye ɛtane kɔsɔɔti yeavi ɛkɛ, ngyikyi ngyikyi ɔbamaa alesama mɔɔ di nɔhalɛ la ali munli na yeamaa bɛanyia gyinlabelɛ kpalɛ wɔ ɔ nyunlu. (Ayezaya 26:9; 2 Pita 3:13) Ɔnrɛra ye ɛlɛ kɛ ɛtane tumi ne bamaa yɛ nuhua bie ali nzisi. Wɔ Nyamenle Belemgbunlililɛ ne abo, bɛbaye alesama mɔɔ di nɔhalɛ la bɛavi “ɛkpɔlɔlɛ akɛlɛzonlenlɛ nu.”—Wulomuma 8:20-22.

Mɔɔ ɔyɛ alɔbɔlɛ la a le kɛ, ɛnɛ, menli dɔɔnwo anye fuu maa awie mɔ anwo kyele bɛ. Bɛsisi ehyiavolɛma nee bɛdabɛ mɔɔ bɛnlɛ bie la na bɛsi awie mɔ adua kɛ bɛyɛ bie. Baebolo ne tu menli ɛhye mɔ folɛ kɛ: “Bɛmaa amumuyɛnli ne ɛgyakyi ɛtaneyɛlɛ, na mɔɔ ɛndwenle kpalɛ nwo la ɛgyakyi.” Saa nzisima ɛhye mɔɔ kakyi a, Baebolo ne bɔ ɛwɔkɛ kɛ Nyamenle bava bɛ “ɛtane ahyɛ” bɛ.—Ayezaya 55:7.

Noko akee, mɔɔ Nyamenle bahola ayɛ la a le kɛ ɔbazɛkye bɛdabɛ mɔɔ bɛngulo kɛ bɛkɛhakyi la. Ɔlua Nyamenle Belemgbunlililɛ ne azo, Baebolo nu ɛwɔkɛ ɛhye bayɛ nɔhalɛ: “Fa ɛ rɛle wula [Gyihova] anu na dua ye adenle ne anu, na . . . ɛbanwu amumuyɛma ɛzɛkyelɛ.” * (Edwɛndolɛ 37:34) Saa bɛye ɛtanevolɛma mɔɔ angakyi la ɛkɛ a, bɛnrɛsisi Nyamenle nɔhalɛ azonvolɛ bieko.

Ɛtanevolɛma mɔɔ bɛsolo na bɛyɛ se kpalɛ la kpanyinli a le Seetan Abɔnsam. Nea kɛzi ɔyɛ yɛ fɛ kɛ ɔnrɛhyɛ Gyihova bahye Seetan na ɔnrɛhola alesama bɛlɛbɛla bieko a. Awieleɛ kolaa ne, Nyamenle bazɛkye Seetan bɔkɔɔ. Ɔnrɛra ye ɛlɛ kɛ atisesebɛ sonla ɛhye bahola abɛlɛbɛla menli yeamaa bɛasisi awie mɔ.

Nɔhalɛ nu, bie mɔ lɛ adwenle kɛ Nyamenle ɛnrɛhola ɛnrɛye ninyɛne mɔɔ fa nzisi ba la ɛkɛ. Asoo wɔbiza ye ɛlɛ kɛ, ‘Asoo Nyamenle bahola ava nzenzanleɛ ɛhye mɔ ara? Saa ɔbahola a, ɛnee kɛmɔti a yehyɛ nwolɛ zɛhae ɛ?’ Kpuyia ɛhye mɔ anwo hyia, yɛɛ Baebolo ne fa nwolɛ mualɛ mɔɔ anu la ɛkɛ la maa. * Yɛkulo kɛ ɛdawɔ mumua ne ɛnwu mɔɔ Baebolo ne ka kɛ ɔbara kenlensa ye wɔ mekɛ mɔɔ nzisi kɔsɔɔti ɛvi ɛkɛ bɔkɔɔ la.