Ebileham​—Sonla Mɔɔ Bɛlɛ Ɔ Nwo Aze

Ebileham de ye ndanlɛ sua nu alubo ne abo wɔ wuluwulu mekɛ nu. Ɔnwunle mrenya nsa wɔ moamoa lɔ kɛ bɛlɛba ɛleka mɔɔ ɔwɔ la. * Ɔnriandinli ndɛndɛ ɔhɔyiale bɛ na ɔzele bɛ kɛ bɛralie bɛ menle ekyii na ɔzonle bɛ ɛyɛvolɛ. Ɔzele kɛ: “Mekava kpanwo ekyi . . . mearɛlɛ bɛ,” noko ɔmanle bɛmanle bɛ aleɛ kpalɛ mɔɔ kpanwo wuluwulu, bɛta, meleke nee nane kpalɛ a bɛfa bɛyɛ la. Ebileham luale aleɛ ɛhye mɔɔ ɔvale ɔmanle ye nyɛvolɛ ne mɔ la azo ɔlale ye ɛyɛvolɛ ɛlielɛ subane nee nɔhalɛ mɛlɛbɛnwoaze ali. Maa yɛnlea.—Mɔlebɛbo 18:1-8.

MƐLƐBƐNWOAZE A LE DUZU? Awie mɔɔ bɛlɛ ɔ nwo aze la ɛnle mgbanyizonle anzɛɛ anwomemaazo. Eza ɔbu ɔ nwo kɛ ɔ gɔnwo mɔ tɛla ye wɔ debie biala anu. (Felepaema 2:3) Ɔtie awie mɔ nzuzulɛ na ɔyɛ gyima mɔɔ bɛmbu ye bie la.

KƐZI EBILEHAM BƐLƐLE Ɔ NWO AZE Ɛ? Ebileham vale anyelielɛ zonlenle awie mɔ. Kɛmɔ yɛlumua yɛha la, mekɛ mɔɔ Ebileham nwunle nyɛvolɛ nsa ne la, ɔlile bɛ ngyianlɛ nwo gyima ɛkɛ ne ala. Ɔ ye Sɛla yɛle ye ndɛ donle aleɛ manle bɛ. Noko yɛ ahenle mɔɔ ɛnee ɔlɛyɛ gyima ne dɔɔnwo la nzonlɛ: Ebileham nriandile hɔyiale nyɛvolɛ ne mɔ, ɔvɛlɛle bɛ kɛ bɛrali debie, ɔnriandile ɔhɔle nlankɛ tunli ne anu ɔhɔhyele ko ɔhunle ye, na ɔzieziele nyɛvolɛ ne mɔ aleɛ ne. Kɛ anrɛɛ ɔbagyakyi gyima ne amuala yeagua ye azonvolɛ ne mɔ asa azo la, nrenya ɛhye mɔɔ bɛlɛ ɔ nwo aze la yɛle gyima mɔɔ bɛmbu ye la. Yeande nganeɛ kɛ yebo gyima ɛhye azo.

Ebileham diele bɛdabɛ mɔɔ bɛwɔ ɔ bo la nzuzulɛ. Baebolo ne ka adwelie mɔɔ Ebileham nee Sɛla lile la anu ekyi bie ala anwo edwɛkɛ. Noko, yɛkenga ye fane nwiɔ kɛ Ebileham  diele Sɛla nzuzulɛ na ɔvale ɔlile gyima. (Mɔlebɛbo 16:2; 21:8-14) Wɔ mekɛ ɛhye mɔ ko anu Ebileham “anye anlie [Sɛla nzuzulɛ ne] anwo fee.” Noko mekɛ mɔɔ Gyihova manle Ebileham nwunle kɛ Sɛla nzuzulɛ ne le kpalɛ la, Ebileham bɛlɛle ɔ nwo aze ɔvale ɔlile gyima.

DUZU A YƐSUKOA YƐFI NU A? Saa yɛbɛlɛ yɛ nwo aze amgba a, yɛbava anyelielɛ yɛazonle awie mɔ. Yɛ nye balie yɛayɛ debie biala mɔɔ bamaa awie mɔ asetɛnla ayɛ kpalɛ la yɛamaa bɛ.

Yɛbahola yɛalua mɔɔ yɛyɛ ye wɔ awie mɔ nzuzulɛ nwo la azo yɛahile kɛ yɛbɛlɛ yɛ nwo aze. Kɛ anrɛɛ yɛbabɔ awie mɔ nzuzulɛ yɛagua ɔluakɛ yɛdayɛ mumua ne yɛtɛdwenlenle nwo la ati la, nrɛlɛbɛ wɔ nu kɛ yɛbalie yɛado nu. (Mrɛlɛbulɛ 15:22) Menli kɔsɔɔti anwo adwenle kpalɛ mɔɔ yɛbanyia la boa, titile bɛdabɛ mɔɔ tumi wɔ bɛ sa nu la. John mɔɔ nea gyima zo na ɔlɛ anwubielɛ la ka kɛ: “Menwu kɛ neavolɛ kpalɛ bamaa menli ahola avi bɛ ɛhulolɛ nu ahile bɛ adwenle.” Eza ɔhanle kɛ: “Mɛlɛbɛnwoaze nwo hyia na awie ahola alie ado nu kɛ awie mɔɔ wɔ ɔ bo la bahola ayɛ debie kpalɛ adɛla ye. Eza awie biala ɛnle ɛkɛ mɔɔ ɔ ngome a ɔkola ɔnyia adwenle kpalɛ a.”

Saa yɛsukoa Ebileham yɛtie awie mɔ nzuzulɛ na yɛyɛ gyima mɔɔ menli ɛmbu ye bie la a, yɛbanyia Gyihova anyunlu ɛlolɛ. Yeanyɛ boɛ fee la, “Nyamenle kyi mɔɔ memaa ɔ nwo zo la, na ɔyila mɔɔ bɛlɛ ɔ nwo aze la.”—1 Pita 5:5.

[Ɔ bo ɛkɛ ne edwɛkɛ]