Baebolo ne ka kɛ: “Sonla mɔɔ anye gyi ɔ ti anwo la nwu munzule na ɔtwe ɔ nwo ɔfea, na mɔɔ ɛnlɛ adwenle la kɔtɔ nu na ɔnwu amaneɛ.” (Mrɛlɛbulɛ 22:3) Ɛhye le folɛdulɛ kpalɛ wɔ esiane mekɛ nu. Saa bɛfa boka bie ɛkpukelɛ, azuyilɛ, anzɛɛ ahumuakyima nwo kɔkɔbɔlɛ bɛmaa a, nrɛlɛbɛ wɔ nu kɛ menli mɔɔ de bikye ɛkɛ la bɛadu ahɔ ɛleka mɔɔ banebɔlɛ wɔ la. Ngoane sonle bolɛ tɛla sua anzɛɛ nwonane afoa nu ninyɛne.

Bie mɔ bahola adu avi ɛleka mɔɔ esiane ta sisi la. Maanle kpanyinli bie hanle kɛ: “Ninyɛne mɔɔ maa esiane sisi la wɔ azɛlɛ ye azo. Noko ɛleka ekyi bie yɛɛ zɛhae ninyɛne ne mɔ dɔɔnwo wɔ a, na esiane dɔɔnwo bahola asisi wɔ ɛleka zɛhae mɔ mekɛ biala.” Ɛhye bahola ayɛ nɔhalɛ wɔ ɛleka mɔɔ azɛlɛ ne wɔ aze tɛla nyevile ne nee ɛleka mɔɔ azɛlɛ ne ɛnyɛ se la. Saa ɛbahola wɔadu wɔavi ɛleka zɛhae wɔahɔ ɛleka mɔɔ banebɔlɛ wɔ la a, anrɛɛ ɛbahoati esiane dɔɔnwo.

Ɔnva nwo debie biala mɔɔ ɛbayɛ wɔanlea ɛ nwo boɛ la, esiane mɔɔ bɛ nye ɛnla la bahola ado wɔ. Saa ɛdumua ɛyɛ ngyehyɛleɛ a, ɛbahola wɔagyinla ɔ nloa. Ɛhye noko nee folɛdulɛ mɔɔ wɔ Mrɛlɛbulɛ 22:3 mɔɔ yɛlumua yɛha nwolɛ edwɛkɛ la yia. Ɛlɛ ninyɛne mɔɔ saa esiane si a ɛbava wɔabɔ ɛ nwo bane ɔ? Disaster Education mbuluku 1-2-3 kanvo ninyɛne ɛhye mɔ kile: Nyile ekyi, toba mɔɔ nzule wɔ nu, kɔpo nu aleɛ, nee ngɛlata mɔɔ anwo hyia. Eza ɛbahola ɛ nee wɔ abusua ne azuzu esiane biala mɔɔ bahola azi nee kɛzi bɛbagyinla ɔ nloa la anwo.

Ɛhye bahola aboa wɔ tɛnlabelɛ biala anu. Baebolo ne ka Nyamenle anwo edwɛkɛ kɛ “anwunvɔnezelɛ Selɛ . . . nee arɛlekyekyelɛ Nyamenle.” Eza ɔka kɛ “ɔkyekye yɛ rɛle wɔ amaneɛnwunlɛ kɔsɔɔti anu.” Ngyɛnu fofolɛ ka kɛ ɔkyekye “bɛdabɛ mɔɔ bɛ rɛle ɛbɔ la arɛle.”—2 Kɔlentema 1:3, 4; 7:6.

Ɛhɛe, Nyamenle ze mɔɔ ɔto bɛdabɛ mɔɔ bɛdie ye bɛdi la kpalɛ. Ɔle ɛlɔlɛ Nyamenle na ɔdua ndenle ngakyile zo ɔboa yɛ. (1 Dwɔn 4:8) Saa yɛyɛ asɔne yɛkpondɛ Nyamenle sunsum ne moalɛ a, ɔkola ɔmaa yɛgyinla tɛnlabelɛ biala anloa. Sunsum ne bahakye yɛ Baebolo  nu edwɛkɛ mɔɔ bakyekye yɛ rɛle la. Nɔhalɛ nu, Nyamenle nɔhalɛ azonvolɛ bahola ade nganeɛ kɛ tete Yizilayɛ belemgbunli Devidi mɔɔ hanle ɛhye la: “Saa melua ewule bɔnza nu bɔbɔ a, menzulo munzule biala, ɔluakɛ ɛ nee me lua, wɔ mboaneneavolɛ baka ne nee wɔ kpɔma ne maa me rɛle kyekye.”—Edwɛndolɛ 23:4.

Wɔ ɛvoya ne mɔɔ lumua la anu, Keleseɛnenli ngapezonli bie mɔɔ bɛfɛlɛ ye Agabɛse la hanle kɛ “ɛhɔne kpole bie bara ewiade amuala. (Ɛhye yɛle zɔhane wɔ Maanle Maanle Belemgbunli Kolɔdeɛse mekɛ zo.)” Ɛhɔne ne hanle Gyisɛse ɛdoavolɛma mɔɔ ɛnee wɔ Dwudiya la kpalɛ. Mekɛ mɔɔ ɛdoavolɛma mɔɔ wɔ ɛleka gyɛne dele bɛ mediema Keleseɛnema ngyegyelɛ ne la duzu a bɛyɛle a? Kɛlɛtokɛ ne se: “Diedima ne bɔle kpɔkɛ kɛ bɛkeha bɛ sa aze na mɔɔ bɛkɛnyia ye la bɛava bɛahɔboa mediema mɔɔ wɔ Dwudiya la.” (Gyima ne 11:28, 29) Bɛvile ɛlɔlɛ nu bɛvale ninyɛne bɛhɔboale bɛ.

Ɛnɛ, saa esiane kpole bie si a, Nyamenle azonvolɛ yɛ deɛ ko ne ala bie. Bɛze Gyihova Alasevolɛ kɛ bɛboa bɛ mediema diedima wɔ maanle dɔɔnwo anu. Kɛ neazo la, mekɛ mɔɔ azɛlɛkpusulɛ kpole ne zile Chile wɔ February 27, 2010 la, Gyihova Alasevolɛ vale ninyɛne hɔboale bɛ ndɛndɛ. Karla mɔɔ nyevile bo azɛlɛkpusulɛ ne bubule ye sua la hanle kɛ: “Ɔle arɛlekyekyelɛ nee anwosesebɛmanlɛ kɛ aleɛ hyenle ala la yɛɛ yɛnwunle kɛ [yɛ mediema Alasevolɛ] vi ɛleka gyɛne ɛra kɛ bɛbaboa yɛ a. Nɔhalɛ, Gyihova luale menli mɔɔ dule bɛ nwo manle la boɛ mɔɔ bɛyɛle yɛ la azo kyekyele yɛ rɛle. Bɛlale ɛlɔlɛ ali bɛhilele me na bɛbɔle me nwo bane.” Ɔ nlenya mɔɔ ɛnle Dasevolɛ la nwunle moalɛ mɔɔ bɛvale bɛmanle ye la. Ɔhanle kɛ: “Ɛhye le ngakyile fi mɔɔ menwu ye ɛvolɛ dɔɔnwo anu wɔ me asɔne ne anu la anwo kolaa.” Mɔɔ ɔnwunle ye la manle ɔzɛlɛle Gyihova Alasevolɛ kɛ bɛ nee ye ɛrazukoa Baebolo ne.

Saa ɛ nee menli mɔɔ kulo Nyamenle na bɛtie ye edwɛkɛ la tu a, ɔboa kpalɛ wɔ amaneɛnwunlɛ mekɛ nu.