Asoo Asetɛnla Gyi Bodane Zo?
Asoo Asetɛnla Gyi Bodane Zo?
“ASOO asetɛnla lɛ bodane?” Menli dɔɔnwo ɛbiza kpuyia ɛhye. Mɔɔ yɛ alɔbɔlɛ la a le kɛ, ɔnva nwo kɛzi menli dɔɔnwo nwu asetɛnla ne la, bɛnyɛ mɔɔ Austrianli abɔdeɛ nwo nrɛlɛbɛvolɛ Viktor E. Frankl hanle la anwo ɛhwee, “bɛte nganeɛ kɛ bodane biala ɛnle [bɛ] asetɛnla nu na ɔle mgbane.”
Duzu ati a menli dɔɔnwo te nganeɛ zɛhae ɛ? Mɔɔ lumua, menli dɔɔnwo mɔɔ wɔ ewiade ye la asetɛnla yɛ alɔbɔlɛ yɛɛ bɛdi nyane kpalɛ. Ehyia, anwodolɛ, basabasayɛlɛ mɔɔ ɛngyi kpɔkɛ zo, nee nzisi gyegye menli dahuu. Kɛmɔ tetenli Dwobu hanle ye wɔ sonla ɛvɛlɛ nwo la, asetɛnla nu “le amaneɛ ngome.” (Dwobu 14:1) Bɛ bodane titile a le kɛ bɛbanyia mɔɔ bɛhyia nwo la.
Bie mɔ ɛnyia bɛ nwo. Bɛte nganeɛ kɛ bɛ sa ɛdɔ bɛ kunlu wɔ ɛbɛlabɔlɛ nu. Noko menli dɔɔnwo ɛnlɛ bie. Duzu ati ɔ? Ɔluakɛ fane dɔɔnwo ne ala “ɛvɛlɛ nee nyane”—anwongyelelɛ anzɛɛ esiane ngakyile mɔɔ bie a le ngakula mɔɔ bɛwu la—maa bɛ anyelazo kɔsɔɔti wie.—Edwɛndolɛ 90:10.
Debie bieko wɔ ɛkɛ mɔɔ maa menli dɔɔnwo te “nganeɛ kɛ bodane biala ɛnle bɛ asetɛnla nu na ɔle mgbane” a. Duzu debie ɔ? Kɛzi ngoane le ezinra la ɔ. Menli dɔɔnwo ɛnde ɔ bo kɛ menli mɔɔ kola yɛ ninyɛne mgbole wɔ ewiade la ɛndɛnla aze ɛngyɛ. Bɛnde amaneɛ mɔɔ yɛ muala yɛnwu ye la abo: Kɛzi ɔde ye biala la, saa esiane ando yɛ wɔ asetɛnla nu bɔbɔ a, ewule maa yɛ debie biala fi yɛ sa.—Nolobɔvo ne 3:19, 20.
Asoo Asetɛnla Bayɛ Kɛ Asɛɛ Ɔnlɛ Bodane Dahuu?
Tete Yizilayɛ Belemgbunli Sɔlɔmɔn hanle tɛnlabelɛ ne anwo edwɛkɛ sikalɛ. Ɔnwunle kɛzi ye mekɛ zo amra yɛle gyima ɛsesebɛ vale bɛ ɛlolɛ ahyɛlɛdeɛ nee bɛ anwosesebɛ yɛle egyinli, luale ninyɛne, sisile azua, na bɛnleanle bɛ mbusua kɛmɔ yɛyɛ ye ɛnɛ la. Ɔbizale kɛ, ‘Kɛzi ɛhye mɔ kɔsɔɔti awieleɛ bayɛ ɛ?’ Ɔdwulale ye edwɛkɛ ne kɛ debie biala mɔɔ sonla yɛ la “le mgbane, yɛɛ ɔle kɛ ɛlɛkye anwoma la.”—Nolobɔvo ne 2:17.
Noko asoo ɛnee Belemgbunli Sɔlɔmɔn die di kɛ debie biala mɔɔ sonla yɛ la “le mgbane, yɛɛ ɔle kɛ ɛlɛkye anwoma la” dahuu ɔ? Kyɛkyɛ. Mɔɔ kɔ zo wɔ ewiade ɛtane ɛhye anu la anwo edwɛkɛ yɛɛ ɛnee ɔlɛka a. Noko akee, Nyamenle Edwɛkɛ ne mɔɔ bɛluale ye sunsum ne azo bɛhɛlɛle la maa yɛnyia anwodozo kɛ asetɛnla ɛnrɛha ye zɛ!
Kɛ ɔkɛyɛ na wɔanyia zɔhane anwodozo ne ɛ? Yɛsɛlɛ wɔ kenga edwɛkɛ nwiɔ ne mɔɔ doa zo la. Bɛbamaa wɔade deɛmɔti asetɛnla ɛyɛ kɛ asɛɛ ɔngyi bodane zo, kɛzi bɛbaziezie tɛnlabelɛ ne, nee kɛzi ɛbahola wɔamaa bodane kpalɛ ara wɔ asetɛnla nu la abo.
