1. Kɛmɔti a “Sunsum Nwuanzanwuanza ne manle fɛlɛko yile Gyisɛse ahonle nu tɛkɛɛ” ɛ? (Nea mɔlebɛbo nvoninli ne.)

YƐ Gyisɛse mɔɔ ‘sunsum nwuanzanwuanza ne ɛmaa fɛlɛko ɛyi yi ahonle nu tɛkɛɛ’ la anwo nvoninli. Ɔkɛyɛ kɛ ɛnee ɔ nyunlu le ɛzelekɛ nee anyelielɛ ngome. Duzu ati ɔ? Ɔtɛkyɛle biala yɛɛ ɔzoanle ye ɛdoavolɛma 70 ne kɛ bɛhɔbɔ Nyamenle Belemgbunlililɛ ne anwo edwɛkpa ne nolo a. Kɛmɔ ɛnee edwɛkpa ne anwo agbɔvolɛ mɔɔ bɛ nwo yɛ se la dɔɔnwo wɔ ɛkɛ la ati, ɛnee ɔ nye la kɛ ɔbade kɛzi ye ɛdoavolɛma ne gyima ne hɔle ye la. Ɛnee Falasiima nee kilehilevolɛma mɔɔ bɛzukoa nwoma mgbole na bɛ nye ɛde kpalɛ la boka agbɔvolɛma ne anwo. Ɛnee bɛkulo kɛ menli bu Gyisɛse kɛ kapentanli ala, yɛɛ ye ɛdoavolɛma ne kɛ “menli mɔɔ ɛnze nwoma.” (Gyima ne 4:13; Maake 6:3) Noko, mɔɔ ye ɛdoavolɛma ne ziale rale la, ɛnee anyelielɛ ɛyi bɛ tɛkɛɛ. Bɛbɔle edwɛkpa ne nolo ɔnva nwo dwazotia, mɔɔ bie vi sunsum ɛtane ne mɔ bɔbɔ la! Duzu a manle bɛ nye liele na bɛnyianle akɛnrasesebɛ a?—Kenga Luku 10:1, 17-21.

2. (a) Kɛzi ɛnee Gyisɛse ɛdoavolɛma ne le kɛ ngakula ɛ? (b) Duzu a boale Gyisɛse ɛdoavolɛma ne manle bɛdele Baebolo ne anu nɔhalɛ ne abo ɛ?

 ² Gyisɛse zele Gyihova kɛ: “Egya, anwuma nee aze Awulae, meyɛ wɔ mo kɛ ninyɛne mɔɔ wɔva wɔvea nrɛlɛbɛvolɛma nee nwomama la wɔye wɔhile menli mɔɔ ɛnze nwolɛ bie la. Ɛhɛe, Egya, ɛnee kɛ ɛkpondɛ kɛ ɔba ye la ɛne.” (Mateyu 11:25, 26) Duzu ati a Gyisɛse hanle kɛ ye ɛdoavolɛ ne mɔ ɛnze nwolɛ bie anzɛɛ bɛle ngakula ɛ? Ɔboalekɛ ɛnee kilehilevolɛma nee Falasiima mɔɔ bɛle nwomama na bɛsuzu kɛ bɛze nrɛlɛbɛ la ɛngulo kɛ awie kɛhilehile bɛ, noko ɛnee Gyisɛse ɛdoavolɛma ne le kɛ ngakula mɔɔ bɛkulo kɛ bɛkilehile bɛ la. Bɛzukoale kɛ bɛbabɛlɛ bɛ nwo aze na bɛnrɛmemaa bɛ nwo zo. (Mateyu 18:1-4) Kɛmɔ ɛnee bɛbɛlɛ bɛ nwo aze la ati, Gyihova vale ye sunsum nwuanzanwuanza ne boale bɛ ɔmanle bɛdele Baebolo ne anu nɔhalɛ ne mɔɔ ɔ bo ɛdelɛ yɛ se la abo. Noko Dwuu ɛzonlenlɛ nu mgbanyima manle Seetan nee bɛ anwomemaazo ne zinle bɛ nye.

3. Duzu a yɛbazuzu nwo wɔ edwɛkɛ ɛhye anu a?

³ Ɔnyɛ azibɛnwo kɛ Gyisɛse lile fɛlɛko la! Ɔ nye liele kɛ Gyihova manle menli mɔɔ bɛlɛ bɛ nwo aze la dele Baebolo nu nɔhalɛ ne abo ɔnva nwo kɛ bɛnze nwoma la. Nyamenle anye die adenle ɛhye mɔɔ bɛdua zo bɛkilehile la anwo, yɛɛ Nyamenle ɛtɛkakyile. Kɛzi yɛkola yɛnwu ye kɛ ɔ nye tɛdie adenle ɛhye mɔɔ bɛfa zo bɛkilehile la anwo ɛ? Yɛbanwu kɛzi Gyihova maa menli mɔɔ bɛlɛ bɛ nwo aze ɛnɛ la nwu Baebolo ne anu nɔhalɛ ne mɔɔ ɔ bo ɛdelɛ yɛ se la wɔ edwɛkɛ ɛhye anu.

4. Ndenle boni mɔ azo a Ɛzinzalɛ Arane ne mɔɔ ɔ bo ɛdelɛ ɛnyɛ se la le ahyɛlɛdeɛ a?

⁴ Kenlensa ye, Nyamenle ahyehyɛdeɛ ne ɛzi kɛzi ɔhyia kɛ yɛdua adenle sikalɛ zo yɛkilehile yɛmaa nuhua da ɛkɛ la azo. Bɛmaa yɛzuzu neazo nsa anwo. Mɔɔ lumua la, bɛyɛ Ɛzinzalɛ Arane ne bie mɔɔ ɔ bo ɛdelɛ ɛnyɛ se a. * Ɔle ahyɛlɛdeɛ mɔɔ yeboa menli dɔɔnwo a, mɔɔ menli mɔɔ bɛnde aneɛ bie kpalɛ anzɛɛ bɛnze ye kenga kpalɛ la boka nwo a. Mbusua dɔɔnwo ɛnwu kɛ bɛ mra te Ɛzinzalɛ Arane ne mɔɔ ɔ bo ɛdelɛ ɛnyɛ se la abo kpalɛ. Menli dɔɔnwo ɛhɛlɛ kɛlata ɛhile nwolɛ anyezɔlɛ. Adiema raalɛ ko hanle kɛ ɛnee ɔsulo kɛ ɔbamaa mualɛ wɔ Ɛzinzalɛ Arane Ɛzukoalɛ ne abo. Noko kɛkala, ɔnzulo bieko! Mekɛ mɔɔ ɔzukoale Ɛzinzalɛ Arane ne mɔɔ ɔ bo ɛdelɛ ɛnyɛ se la, ɔhɛlɛle kɛ: “Kɛkala memaa mualɛ dɔɔnwo, yɛɛ ɛzulolɛ ne ɛvi ɛkɛ! Meda Gyihova ase yɛɛ meyɛ bɛ mo.”

5. Nvasoɛ mɔɔ wɔ New World Translation of the Holy Scriptures fofolɛ ne azo la bie a le boni?

 ⁵ Mɔɔ tɔ zo nwiɔ, bɛyɛ New World Translation of the Holy Scriptures ne fofolɛ na bɛyele ye wɔ Nrelenza nu wɔ ɛvolɛ ayia ne mɔɔ bɛyɛle ye October 5, 2013 la abo. * Kɛkala ngɛlɛlera dɔɔnwo anu edwɛkɛ anzo noko ndelebɛbo ne ɛtɛkakyile yɛɛ ɔ bo ɛdelɛ ɛnyɛ se. Kɛ neazo la, edwɛkɛ agbɔkɛ 27 mɔɔ ɛnee wɔ Dwobu 10:1 la, ɛyɛ 19 yɛɛ edwɛkɛ agbɔkɛ 20 mɔɔ ɛnee wɔ Mrɛlɛbulɛ 8:6 la, ɛyɛ 13. Ngyehyɛnu ɛhye mɔ anu ɛla ɛkɛ kpalɛ wɔ fofolɛ ne anu. Adiema nrenya ko mɔɔ bɛkpokpa ye na yeva ɛvolɛ dɔɔnwo yezonle Gyihova wɔ nɔhalɛlilɛ nu la hanle kɛ: “Megenga Dwobu buluku ne wɔ fofolɛ ne anu, na ɔyɛ me kɛ asɛɛ ɛhye a le mekɛ mɔɔ lumua mɔɔ mede ɔ bo a!” Menli dɔɔnwo ɛha edwɛkɛ ko ne ala bie.

6. Kɛzi ɛte nganeɛ wɔ Mateyu 24:45-47 anwo ndelebɛbo fofolɛ ne mɔɔ yɛnyia la anwo ɛ?

⁶ Mɔɔ tɔ zo nsa, suzu anyuhɔlɛ mɔɔ yɛnyia ye kenlensa ye wɔ kɛzi yɛte ngɛlɛlera bie mɔ abo la anwo nea. Kɛ neazo la, ‘akɛlɛ nɔhavo nee nrɛlɛbɛvolɛ ne’ anwo ndelebɛbo fofolɛ mɔɔ yɛnyia la, wɔ July 15, 2013, Ɛzinzalɛ Arane ne anu. (Mateyu 24:45-47) Edwɛkɛ zɔhane hilehilele nu kɛ akɛlɛ nɔhavo ne a le Neazo Eku ne. Yɛɛ “sonvolɛma mɔɔ ɛha la” a le menli mɔɔ bɛkpokpa bɛ nee ‘mboane gyɛne’ ne mɔɔ akɛlɛ nɔhavo ne maa bɛ aleɛ la. (Dwɔn 10:16) Yɛ nye die nɔhalɛ ɛhye mɔ mɔɔ yɛzukoa la anwo na yɛfa anyelielɛ yɛkilehile awie mɔ! Ndenle boni mɔ a eza Gyihova ɛlua zo ɛhile kɛ ɔ nye die ngilehilelɛ mɔɔ ɔ bo ɛdelɛ ɛnye se na nuhua la ɛkɛ la anwo a?

7, 8. Baebolo edwɛkɛ mɔɔ ɛnee gyi ɛkɛ maa debie kpole mɔɔ bara kenlebie la anwo neazo boni a wɔ ɛkɛ a?

⁷ Saa wɔzonle Gyihova ɛvolɛ dɔɔnwo a, ɔda ali kɛ wɔyɛ kɛzi yɛyɛ nzenzaleɛ wɔ adenle mɔɔ yɛdua zo yɛkilehile Baebolo edwɛkɛ bie mɔ anu la nzonlɛ. Dɛba ne, ɛnee yɛta yɛka kɛ edwɛkɛ bie mɔ gyi ɛkɛ maa debie kpole mɔɔ bara kenlebie la. Asoo ndelebɛbo kpalɛ bie ati a yɛyɛle zɔ a? Ɛhɛe. Kɛ neazo la, Gyisɛse hanle ‘Nyamenle kpɔmanvolɛ Dwona sɛkɛlɛneɛ ne’ anwo edwɛkɛ. (Kenga Mateyu 12:39, 40.) Gyisɛse hilehilele nu kɛ mekɛ ne mɔɔ Dwona lile ye wɔ fɛlɛ ne akunlu la gyi ɛkɛ maa mekɛ mɔɔ Gyisɛse bali ye wɔ nla ne anu la.

⁸ Baebolo edwɛkɛ dɔɔnwo wɔ ɛkɛ mɔɔ gyi ɛkɛ maa debie kpole mɔɔ bara kenlebie a. Ɛzoanvolɛ Pɔɔlo hanle bie mɔ anwo edwɛkɛ. Kɛ neazo la, abusuabɔlɛ mɔɔ ɛnee wɔ Ebileham nee Heega yɛɛ Sɛla avinli la gyi ɛkɛ maa abusuabɔlɛ mɔɔ ɛnee wɔ Gyihova nee Yizilayɛ maanle ne yɛɛ Nyamenle ahyehyɛdeɛ ne foa mɔɔ wɔ anwuma la.  (Galeehyeama 4:22-26) Zɔhane ala a, ɛnee ndanlɛsua ne, ɛzonlenlɛ sua ne, Mgbɔdalɛ Kenle ne, ɛsɔfo kpanyinli ne, nee Mɛla ne anu ninyɛne dɔɔnwo le “ninyɛne kpalɛ mɔɔ bara la sɔhovolɛ” a. (Hibuluma 9:23-25; 10:1) Saa yɛsukoa Baebolo ne anu edwɛkɛ ɛhye mɔ nee mɔɔ bɛgyi ɛkɛ bɛmaa la a bɛmaa yɛ diedi nu mia. Noko asoo ɛhye kile kɛ awie, edwɛkɛ, nee debie biala mɔɔ bɛha nwolɛ edwɛkɛ wɔ Baebolo ne anu la gyi ɛkɛ maa awie anzɛɛ debie ɔ?

9. Dɛba ne, kɛzi yɛhilehilele Neebɔto edwɛkɛ ne mɔɔ wɔ Baebolo ne anu la anu ɛ?

⁹ Dɛba ne, yɛ mbuluku ne mɔ hilehilele nu kɛ awie, edwɛkɛ, anzɛɛ debie mɔɔ bɛha nwolɛ edwɛkɛ la gyi ɛkɛ maa awie anzɛɛ debie fofolɛ. Kɛ neazo la, Belemgbunli raalɛ Gyɛzɛbɛle manle bɛhunle Neebɔto amaa ɔ hu Ehabe ava Neebɔto vanye ɛya ne. (1 Arelemgbunli 21:1-16) Wɔ 1932 ne anu, The Watchtower ne ko hilehilele nu kɛ ɛnee Ehabe nee Gyɛzɛbɛle gyi ɛkɛ maa Seetan nee ye ahyehyɛdeɛ ne, Neebɔto gyi ɛkɛ maa Gyisɛse, yɛɛ Neebɔto ewule ne gyi ɛkɛ maa Gyisɛse ɛhunlɛ ne. Noko akee, wɔ 1961, “Let Your Name Be Sanctified” buluku ne hanle kɛ, ɛnee Neebɔto gyi ɛkɛ maa Keleseɛnema mɔɔ bɛkpokpa bɛ la yɛɛ Gyɛzɛbɛle gyi ɛkɛ maa Keleseɛnemaanle ne. Bieko, Neebɔto mɔɔ Gyɛzɛbɛle  kpɔle ye la gyi ɛkɛ maa menli mɔɔ bɛkpokpa bɛ mɔɔ bɛkpɔle bɛ wɔ awieleɛ mekɛ ɛhye anu la. Ngilehilenu ɛhye mɔ ɛmaa Nyamenle menli diedi nu ɛmia wɔ ɛvolɛ dɔɔnwo anu. Ɛnee akee duzu ati a yɛlɛkilehile nuhua ngakyile ɛnɛ ɛ?

10. (a) Kɛzi akɛlɛ nɔhavo ne nea boɛ wɔ mekɛ mɔɔ ɔlɛkilehile Baebolo edwɛkɛ bie anu la ɛ? (b) Duzu a yɛ mbuluku ne mɔ ka nwolɛ edwɛkɛ dɔɔnwo ɛnɛ a?

¹⁰ Gyihova ɛboa ‘akɛlɛ nɔhavo nee nrɛlɛbɛvolɛ’ ne wɔ ɛvolɛ dɔɔnwo anu yemaa bɛyɛ badwema kpalɛ anzɛɛ bɛnlea boɛ. Wɔ adenle boni azo? Ɛnɛ, akɛlɛ nɔhavo ne ɛnga kɛ Baebolo edwɛkɛ bie gyi ɛkɛ maa debie kpole kyesɛ Ngɛlɛlera ne ka ye zɔ. Kɛzi bɛhilehilele edwɛkɛ bie mɔ anu la abo ɛdelɛ ɛnla aze yɛɛ ɔyɛ se kɛ bɛbahakye na bɛava bɛali gyima. Mɔɔ hyia kpalɛ la, saa yɛfa yɛ adwenle yɛkɔ debie mɔɔ Baebolo edwɛkɛ bie gyi ɛkɛ maa la azo titile a, yɛnnwu ɛzukoalɛdeɛ mɔɔ wɔ nu la. Ɛhye ati, ɛnɛ yɛ mbuluku ne mɔ ka diedi, abotane, Nyamenle ɛzonlenlɛ kpalɛ, nee subane kpalɛ mɔɔ ɛha mɔɔ yɛbahola yɛazukoa yɛavi Baebolo edwɛkɛ bie mɔ anu la anwo edwɛkɛ dɔɔnwo. *

11. (a) Ɛnɛ, kɛzi yɛte Neebɔto edwɛkɛ ne abo ɛ, na kɛzi ye neazo ne boa yɛ ɛ? (b) Kenlensa ye, duzu ati a yɛ mbuluku ne ɛnda ɛnga kɛ Baebolo nu edwɛkɛ bie mɔ gyi ɛkɛ maa debie kpole mɔɔ bara kenlebie la ɛ? (Nea “Kpuyia Mɔɔ Vi Kengavoma Ɛkɛ” mɔɔ wɔ magazine ɛhye anu la.)

¹¹ Kɛkala, ndelebɛbo mɔɔ yɛnyia ye wɔ Neebɔto edwɛkɛ ne anu la anu la ɛkɛ kpalɛ yɛɛ ɔ bo ɛdelɛ ɛnyɛ se. Tɛ kɛ Neebɔto gyi ɛkɛ maa Gyisɛse anzɛɛ menli mɔɔ bɛkpokpa bɛ la ati a ɔwule a. Emomu, kɛmɔ ɛnee ɔkpondɛ kɛ ɔdi nɔhalɛ ɔmaa Nyamenle la ati ɔ. Ɔhɔle zo ɔlile Gyihova Mɛla zo ɔnva nwo ɛkpɔlɛ mɔɔ tumivolɛ bie vale rale ɔ nwo zo la. (Ɛdianlɛ 36:7; 1 Arelemgbunli 21:3) Ɛhye le neazo kpalɛ maa Nyamenle azonvolɛ mɔɔ wɔ ɛkɛ ɛnɛ mɔɔ ɔwɔ kɛ bɛgyinla ɛkpɔlɛ nloa la kɔsɔɔti. (Kenga 2 Temɔte 3:12.) Keleseɛnema kɔsɔɔti bahola ade ɛzukoalɛdeɛ mɔɔ wɔ nu la abo, bɛbahakye, na bɛava bɛali gyima amaa bɛ diedi nu amia.

12. (a) Adwenle boni a ɔnle kɛ yɛnyia ye wɔ Baebolo nu edwɛkɛ nwo a? (b) Duzu ati a yɛkola yɛkilehile ninyɛne mɔɔ bɛ bo ɛdelɛ ɛnla aze la anu ɛ? (Nea ɔ bo ɛkɛ edwɛkɛ ne.)

¹² Asoo ɔwɔ kɛ yɛka kɛ ɛzukoalɛdeɛ ala a wɔ Baebolo edwɛkɛ nu mɔɔ bɛnlɛ ngilenu gyɛne biala ɔ? Kyɛkyɛ. Emomu, kɛkala yɛ mbuluku ne mɔ twe adwenle kɔ kɛzi Baebolo edwɛkɛ ko fane fofolɛ nwo la azo dɔɔnwo. Kɛ neazo la, Neebɔto munli nu ɛgyinlanlɛ ne nee ye ewule ne kakye yɛ Kelaese nee bɛdabɛ mɔɔ bɛkpokpa bɛ la munli nu ɛgyinlanlɛ ne. Eza ɔkakye yɛ ‘mboane gyɛne’ ne anu amra dɔɔnwo mɔɔ  bɛgyinlanle bɛ munlililɛ nu la. Yɛkola yɛnwu kɛzi Gyihova ɛlɛdua adenle mɔɔ ɔnyɛ se azo ahilehile yɛ la. *

13. Neazo boni mɔ a kile kɛ kɛkala bɛhilehile Gyisɛse ndonwo ne mɔ anu wienyi mɔɔ ɔ bo ɛdelɛ ɛnyɛ se a?

¹³ Gyisɛse Kelaese a le Kilehilevolɛ mɔɔ tɛla biala wɔ azɛlɛ ye azo a. Ɛnee ɔbu mrɛlɛ, anzɛɛ ɔfa ndonwo ɔkilehile. (Mateyu 13:34) Mrɛlɛ boa ɔluakɛ bɛmaa yɛte edwɛkɛ mɔɔ ye ndelebɛbo yɛ se la abo ndɛndɛ yɛɛ bɛmaa yɛdwenle na ɔka yɛ ahonle. Wɔ ɛvolɛ dɔɔnwo anu, yɛ mbuluku ne mɔ ɛhilehile Gyisɛse mrɛlɛ ne mɔ anu wɔ adenle mɔɔ anu la ɛkɛ la azo. Kɛ neazo la, July 15, 2008, Watchtower ne maa yɛte Gyisɛse mrɛlɛ ne mɔɔ fane mgbɔvonle ne, mɛsetade ma ne, nee avonle ne anwo la abo kpalɛ. Kɛkala, yɛnwu kɛ mrɛlɛ ɛhye mɔ fane Nyamenle Belemgbunlililɛ ne mɔɔ yeboa menli dɔɔnwo yemaa bɛkpo ɛtane ewiade ɛhye na bɛrayɛ Kelaese ɛdoavolɛma la anwo.

14. (a) Kɛzi ɛnee yɛkilehile Samɛleanli atiakunlukɛnlɛma ne ɛrɛlɛ ne anu ɛ? (b) Kɛzi yɛte Gyisɛse ɛrɛlɛ ne abo ɛnɛ ɛ?

¹⁴ Kɛ ɔkɛyɛ na yɛade edwɛkɛ mɔɔ Gyisɛse hanle anzɛɛ mrɛlɛ mɔɔ ɔbule la abo ɛ? Edwɛkɛ ɛhye mɔ bie gyi ɛkɛ maa debie anzɛɛ bɛle ngapezo. Ɛzukoalɛdeɛ kpalɛ wɔ bie mɔ anu. Noko kɛ ɔkɛyɛ na yɛanwu kɛ edwɛkɛ bie gyi ɛkɛ maa debie anzɛɛ ɔnle zɔ ɛ? Ɛvolɛ dɔɔnwo mɔɔ ɛpɛ nu la ɛmaa yɛnwu mualɛ ne. Kɛ neazo la, maa yɛnlea kɛzi ɛnee yɛkilehile Samɛleanli atiakunlukɛnlɛma ne ɛrɛlɛ ne anu la. (Luku 10:30-37) Wɔ 1924, The Watch Tower ne ko hanle kɛ Samɛleanli ne gyi ɛkɛ maa Gyisɛse yɛɛ adenle ne mɔɔ vi Gyɛlusalɛm kɔ Gyɛleko la gyi ɛkɛ maa tɛnlabelɛ ɛtane ne mɔɔ alesama wɔ nu ɔvi Yidɛn atuadelɛ ne azo la. Bieko, nwulema ne mɔɔ wɔ adenle ne anu la gyi ɛkɛ maa gyima mgbole nee gualilɛma mɔɔ bɛle anyebolo la, yɛɛ ɛsɔfo ne nee Livaenli ne gyi ɛkɛ maa Keleseɛnemaanle ne. Noko ɛnɛ, yɛ mbuluku ne mɔ ka zɔhane edwɛkɛ ne fa kakye Keleseɛnema kɔsɔɔti kɛ ɔnle kɛ bɛnyia menli nwo adwenletane. Ɔwɔ kɛ yɛboa menli mɔɔ hyia moalɛ la kɔsɔɔti, titile, yɛmaa bɛsukoa Nyamenle anwo nɔhalɛ ne. Saa yɛnwu kɛzi Gyihova maa nɔhalɛ ne anu da ɛkɛ la a, yɛ nye die.

15. Duzu a yɛbazukoa ye wɔ edwɛkɛ mɔɔ doa zo la anu a?

¹⁵ Yɛbazuzu Gyisɛse mbɛlɛra bulu ne anwo ɛrɛlɛ ne anwo wɔ edwɛkɛ mɔɔ doa zo la anu. (Mateyu 25:1-13) Kɛzi Gyisɛse kpondɛ kɛ ye ɛdoavolɛma mɔɔ bɛwɔ awieleɛ mekɛ ye anu la te zɔhane ɛrɛlɛ kɛnlɛma ne abo ɛ? Asoo awie, edwɛkɛ, anzɛɛ debie biala mɔɔ ɔhanle nwolɛ edwɛkɛ wɔ ɛrɛlɛ ne anu la gyi ɛkɛ maa awie anzɛɛ debie kpole mɔɔ bara kenlebie la ɔ? Anzɛɛ asoo ɔkulo kɛ yɛsukoa ninyɛne mɔɔ baboa yɛ wɔ awieleɛ mekɛ ɛhye anu la yɛfi nu ɔ? Bɛmaa yɛnlea.