1. Fa Baebolo ne anu neazo kilehile kɛzi Nyamenle menli ne bie mɔ bɛlɛbɛlale bɛ nwo la anu. (Nea mɔlebɛbo nvoninli ne.)

KENLE ko bie nwonlomɔ, ɛnee Ɛsɔfo Kpanyinli Aalɔn gyi Gyihova ndanlɛ sua ne anlenkɛ ne anyunlu na ɔlɛ ɛyɛlɛkpunlɛ kyɛnze ɔ sa nu. Mrenya 250 ragyinlanle Kɔla anwo ɛkɛ na ɛnee bɛ nuhua ko biala lɛ ye ɛyɛlɛkpunlɛ kyɛnze ɔlɛbɔ afɔle yeamaa Gyihova. (Ɛdi. 16:16-18) Saa ɛnea bɛ a, ɛbaha kɛ bɛ muala bɛle Gyihova nɔhalɛ azonvolɛ. Noko, bɛnle kɛ Aalɔn la, bɛle anwomemaazoma mɔɔ ɛkpɔkye mɔɔ bɛkulo kɛ bɛdie ɛsɔfolilɛ nwo adenle ne a. (Ɛdi. 16:1-11) Bɛbɛlɛbɛlale bɛ nwo bɛdwenlenle kɛ Nyamenle bɛalie bɛ ɛzonlenlɛ ne ado nu. Noko ɛnee bɛ anyelazo ne le aholoba mɔɔ bɛlɛbɔ Gyihova mɔɔ nea ahonle nu na ɔkola ɔnwu bɛ nabalaba nyɛleɛ ne la.—Gyɛ. 17:10.

2. Duzu a ɛnee Mosisi ɛha kɛ ɔbazi a, na asoo ye edwɛkɛ ne yɛle nɔhalɛ?

² Ɛnee Mosisi ɛlumua ɛha kɛ: “Ɛhyema nwonlomɔ [Gyihova] bahile yɛ sonla holɛ ko mɔɔ le ye ɛdeɛ” la. (Ɛdi. 16:5) Gyihova manle bɛnwunle kɛ ngakyile wɔ nɔhalɛ azonvolɛ nee adalɛma avinli wɔ mekɛ mɔɔ “senle vi anwuma rayelale [Kɔla nee] menli ɛya nwiɔ abulanlu ne mɔɔ ɛva ɛyɛlɛ ne ɛra babɔ ɛyɛlɛ azu ne la.” (Ɛdi. 16:35; 26:10) Mekɛ ko ne ala, Gyihova liele Aalɔn ngoane ɔvale ɔhilele kɛ ɔdie ye ɔto nu, ɔle ɛsɔfo kpalɛ nee Nyamenle  nɔhalɛ sonvolɛ.—Bɛgenga 1 Kɔlentema 8:3.

3. (a) Duzu a zile wɔ Keleseɛne asafo ne anu wɔ Pɔɔlo mekɛ zo a? (b) Kɛzi bɛ nee atuadelɛma di la anwo kilemunli boni a ɛnee Gyihova ɛpɛ ɛdo ɛkɛ wɔ ɛvoya dɔɔnwo anu a?

³ Ɛvolɛ kɛyɛ 1,500 anzi, deɛ ko ne ala bie zile wɔ ɛzoanvolɛ Pɔɔlo mekɛ zo. Adalɛ Keleseɛnema bie mɔ hilehilele adalɛ ngilehilelɛ; noko bɛhɔle zo bɛ nee asafo ne dule. Wɔ awie mɔɔ ɛnnea ninyɛne ɛngɔ moa la afoa nu, ɛnee ngakyile biala ɛnle menli ɛhye mɔ mɔɔ bɛkpɔkye la nee menli mɔɔ wɔ asafo ne anu la avinli. Noko bɛ ɛkpɔkyelɛ ne yɛle esiane manle Keleseɛnema mɔɔ bɛdi nɔhalɛ la. Menli ɛhye mɔ mɔɔ bɛle kɛ bɛdi mɔɔ bɛwula mboane nwoma la, ɛnee ɛbɔ ɔ bo “bɛlɛsɛkye diedima ne mɔ adwenle.” (2 Tem. 2:16-18) Noko akee, wɔ ɛvoya dɔɔnwo anzi, Pɔɔlo nwunle kɛ Gyihova nea debie kɔ moa ɔlua kɛzi Ɔ nee Kɔla nee ɔ gɔnwo mɔ mɔɔ dele atua lile la azo. Mɔɔ fane ɛhye anwo la, bɛmaa yɛzuzu Ngɛlɛlera ne anu edwɛkɛ bie mɔɔ yɛ azibɛnwo la anwo na yɛnlea mɔɔ yɛbahola yɛazukoa yɛavi nu la.

4. Duzu a ɛnee Pɔɔlo die di a, na kɛzi ɔlale ye diedi ne ali ɔhilele Temɔte ɛ?

⁴ Ɛnee Pɔɔlo ze kɛ Gyihova kola nwu nabalaba ɛzonlenlɛ, na ɛnee eza ɔze kɛ Gyihova kola nwu bɛdabɛ mɔɔ bɛyɛ tieyɛ bɛmaa ye la. Pɔɔlo lale ye diedi kpole ne ali, ɔlua edwɛkɛkpɔkɛ mɔɔ ɔvale ɔlile gyima wɔ mekɛ mɔɔ ɔkɛlɛ ye kɛlata ne yeahɔmaa Temɔte la azo. Mɔɔ Pɔɔlo hwenle adwenle hɔle sunsum nu esiane mɔɔ ɛnee bɛdabɛ mɔɔ bɛkpɔkye ɛmaa yedo mediema bie mɔ wɔ asafo ne anu azo wiele la, ɔhɛlɛle kɛ: ‘Noko adiabo ne mɔɔ Nyamenle ɛwula la gyi kpundii, na bɛhɛlɛ nwolɛ kɛ, “Gyihova ze bɛdabɛ mɔɔ bɛle ye ɛdeɛ la,” yɛɛ “Ɔwɔ kɛ awie biala mɔɔ bɔ Gyihova duma kɛ ɔle Awulae la twe ɔ nwo fi ɛtane nwo.”’—2 Tem. 2:18, 19.

5, 6. Duzu ati a edwɛkɛ “adiabo ne mɔɔ Nyamenle ɛwula la gyi kpundii” mɔɔ Pɔɔlo vale lile gyima la anwo hyia ɛ, na ɔbayɛ kɛ kɛzi edwɛkɛ ɛhye hanle Temɔte ɛ?

⁵ Kɛzi edwɛkɛ agbɔkɛ mɔɔ Pɔɔlo vale lile gyima wɔ ngɛlɛlera ɛhye anu la anwo hyia ɛ? Ɛke ala a Baebolo ne vale edwɛkɛ “adiabo ne mɔɔ Nyamenle ɛwula la gyi kpundii” lile gyima a. Baebolo ne fa edwɛkɛkpɔkɛ “adiabo” bu ɛrɛlɛ wɔ ninyɛne dɔɔnwo anu. Kɛ neazo la, ɔfa Nyamenle mɛla ne mɔɔ kile azɛlɛ ne adenle mɔɔ ɔngakyi ɛlɛ na ɔmmaa azɛlɛ ne ɛmkpusu la, ɔto adiabo nwo. (Ps. 104:5) Ɔfa gyima mɔɔ Gyisɛse di ye wɔ Gyihova bodane nu la noko ɔto adiabo nwo. (1 Kɔl. 3:11; 1 Pita 2:6) Duzu a ɛnee wɔ Pɔɔlo adwenle nu wɔ mekɛ mɔɔ ɔhɛlɛle kɛ “adiabo ne mɔɔ Nyamenle ɛwula la gyi kpundii” la ɛ?

⁶ Pɔɔlo hanle Mosisi edwɛkɛ ne mɔɔ ɔfane Kɔla nee ɔ gɔnwo mɔ anwo kɛmɔ ɔwɔ Ɛdianlɛ 16:5 la na akee yeaha kɛ, “adiabo ne mɔɔ Nyamenle ɛwula la gyi kpundii.” Wɔ adenle ɛhye azo, ɛnee Pɔɔlo ɛlɛkakye Temɔte kɛ Gyihova ze mɔɔ ɛlɛkɔ zo wɔ asafo ne anu la. Nyamenle ɛnrɛmaa kpɔkyevolɛma adenle bɛnrɛva ngyegyelɛ biala bɛnrɛra. Gyihova bodane ne angakyi ɔlua Kɔla ati, na Nyamenle bodane ne ɛnrɛhakyi ɔlua kpɔkyevolɛma mɔɔ wɔ asafo ne anu la noko ati. Pɔɔlo angilehile mɔɔ “adiabo ne mɔɔ Nyamenle ɛwula la gyi kpundii” kile la anu dɔɔnwo. Noko, mɔɔ Pɔɔlo hanle la boale Temɔte ɔmanle ɔnyianle anwodozo nee diedi wɔ Gyihova anu.

7. Duzu ati a yɛbahola yɛalie yɛali kɛ Gyihova bayɛ mɔɔ tenrɛ la na yeali nɔhalɛ ɛ?

⁷ Gyihova ngyinlazo ne mɔ kpogya na bɛwɔ ɛkɛ dahuu. Edwɛndolɛ 33:11 ka kɛ: “[Gyihova] ngyehyɛlɛ ne wɔ ɛkɛ ne dahuu, ɔbɔ kpɔkɛ a ɔka awolɛndoazo kɔsɔɔti.” Ngɛlɛlera gyɛne ka kɛ Gyihova belemgbunlililɛ, ye nɔhalɛ ɛlɔlɛ, ye tenleneyɛlɛ,  nee ye nɔhalɛlilɛ wɔ ɛkɛ dahuu. (Ade. 15:18; Edw. 106:1; 111:3; 117:2) Malakae 3:6 ka kɛ: “Medame [Gyihova], mengakyi ɛlɛ.” Gyemise 1:17 noko ka kɛ, “Nyamenle ɛnli ngakyile, anzɛɛ ɔmboa ɔngakyi wienyi awozinli.”

8, 9. Duzu a yɛsukoa yɛfi “adiabo” ne mɔɔ Pɔɔlo vale yɛle ndonwo la anu a?

⁸ Wɔ tete ne, ɛnee bɛta bɛkɛlɛ edwɛkɛ bɛgua sua adiabo zo. Bɛyɛ ɛhye bɛfa bɛkile ahenle mɔɔ zile anzɛɛ mɔɔ sua ne le ye ɛdeɛ la. Pɔɔlo a le Baebolo kɛlɛvo mɔɔ ɔlumuale ɔhwenle adwenle ɔhɔle deɛ ɛhye azo ɔvale ɔyɛle ndonwo a. * Ɛnee bɛhɛlɛ edwɛkɛ nwiɔ wɔ “adiabo ne mɔɔ Nyamenle ɛwula” mɔɔ Pɔɔlo hanle nwolɛ edwɛkɛ wɔ 2 Temɔte 2:19 la azo. Mɔɔ lumua, ‘Gyihova ze bɛdabɛ mɔɔ bɛle ye ɛdeɛ la’ yɛɛ mɔɔ tɔ zo nwiɔ, ‘Ɔwɔ kɛ awie biala mɔɔ bɔ Gyihova duma kɛ ɔle Awulae la twe ɔ nwo fi ɛtane nwo.’ Ɛhye maa yɛkakye edwɛkɛ ne mɔɔ yɛgengale ye wɔ Ɛdianlɛ 16:5 la.—Bɛgenga.

⁹ Duzu a yɛsukoa yɛfi “adiabo” ne mɔɔ Pɔɔlo vale yɛle ndonwo la anu a? Yɛkola yɛbɔ Gyihova mɛla nee ye ngyinlazo ne mɔ agbɔkɛ nwiɔ yɛmaa bɛdabɛ mɔɔ bɛle Nyamenle ɛdeɛ la: (1) Gyihova kulo bɛdabɛ mɔɔ bɛdi nɔhalɛ bɛmaa ye la, yɛɛ (2) Gyihova kyi ɛtane. Kɛzi ɛzukoalɛdeɛ mɔɔ wɔ ɛhye anu la fane kpɔkyevolɛma mɔɔ bɛwɔ asafo ne anu la anwo ɛ?

10. Kɛzi kpɔkyevolɛma nyɛleɛ gyegyele nɔhavoma wɔ Pɔɔlo mekɛ zo ɛ?

¹⁰ Ɔbayɛ kɛ kpɔkyevolɛma mɔɔ ɛnee wɔ asafo ne anu la nyɛleɛ ne gyegyele Temɔte nee nɔhavoma bie mɔ. Bie a Keleseɛnema bie mɔ bizale deɛmɔti bɛmanle menli ɛhye mɔ adenle kɛ bɛdɛnla asafo ne anu la anwo edwɛkɛ. Ɔbahola yeara ye kɛ bie a ɛnee nɔhavoma ne bie mɔ ɛngola ɛnnwu ye saa Gyihova amgba nwu bɛdabɛ mɔɔ bɛsonle ye nɔhalɛ nu nee kpɔkyevolɛma mɔɔ ɛnzonle ye nɔhalɛ nu la a.—Gyi. 20:29, 30.

11, 12. Adenle boni azo a Pɔɔlo kɛlata ne manle Temɔte diedi nu mianle a?

¹¹ Nɔhalɛ nu, Pɔɔlo kɛlata ne manle Temɔte diedi nu mianle wɔ mekɛ mɔɔ Pɔɔlo hakyele ye mɔɔ ɔzile wɔ mekɛ mɔɔ bɛbuale nɔhavo Aalɔn benle na bɛkpale Kɔla nabalaba nee ɔ gɔnwo mɔ anwo ɛdanlɛ, bɛkpole bɛ, na bɛzɛkyele bɛ la. Mɔɔ ɛnee Pɔɔlo ɛlɛka la a le kɛ, ɔwɔ nuhua kɛ adalɛ  Keleseɛnema wɔ bɛ avinli ɛdeɛ, noko Gyihova banwu bɛdabɛ mɔɔ bɛle ye ɛdeɛ la, kɛmɔ ɔyɛle ye wɔ Mosisi mekɛ zo la.

¹² Gyihova ɛngakyi ɛlɛ; bɛkola bɛfa bɛ nwo bɛto ɔ nwo zo. Ɔkyi ɛtane, yɛɛ ɔbua ɛtanevolɛma ndɛne wɔ ye mekɛ nloa. Ɛnee Temɔte le ‘awie mɔɔ ɔbɔ Gyihova duma’ noko eza bɛhakyele ye kɛ ɔle ye ɛzonlelilɛ kɛ ɔbakpo adalɛ Keleseɛnema nyɛleɛ ɛtane ne. *

13. Anwodozo boni a yɛbahola yɛanyia a?

¹³ Pɔɔlo edwɛkɛ ne mɔɔ ɔhɛlɛle Temɔte la kola maa yɛdayɛ noko anwosesebɛ wɔ sunsum nu. Adenle boni azo? Gyihova ze ye bɔkɔɔ kɛ yɛdi nɔhalɛ yɛmaa ye. Noko tɛ kɛ ɔze bɛdabɛ mɔɔ bɛdi nɔhalɛ bɛmaa ye la ala. Gyihova kile bɛ nwo anyelielɛ kpole kpalɛ. Baebolo ne ka kɛ: “[Gyihova] fa ɔ nye bɔ ewiade ye anwo mgbɔlɔka, na ɔfa tumi ɔdie bɛdabɛ mɔɔ bɛdi nɔhalɛ bɛmaa ye la.” (2 Edk. 16:9) Ɛhye ati, yɛkola yɛnyia anwodozo kɛ mɔɔ yɛfi yɛ “ahonle mɔɔ ɛtane ɛnle nu” la anu yɛyɛ yɛmaa Gyihova la, ɛnrɛyɛ mgbane ɛlɛ.—1 Tem. 1:5; 1 Kɔl. 15:58.

14. Ɛzonlenlɛ boni a Gyihova ɛnlie ɛndo nu a?

¹⁴ Eza ɔyɛ yɛ fɛ kɛ Gyihova kyi nabalaba ɛzonlenlɛ la. Ɔkola ɔnwu menli kɔsɔɔti ahonle nu na ɔnwu “bɛdabɛ mɔɔ bɛdi nɔhalɛ bɛmaa ye la.” Gyihova kyi bɛdabɛ mɔɔ bɛyɛ bɛ nwo kɛ bɛtie ye noko bɛkɔ zo bɛyɛ ɛtane bɛfea la. (Mrɛ. 3:32) Sonla zɛhae bahola abɛlɛbɛla menli na tɛ Gyihova ɔ. Baebolo ne ka kɛ: “Sonla mɔɔ fea ye mɛladonlɛ zo la ɛnrɛkpazi.” Ɛhye le zɔ, ɔluakɛ Gyihova lɛ tumi yɛɛ ɔkulo tenleneyɛlɛ.—Mrɛ. 28:13; bɛgenga 1 Temɔte 5:24; Hibuluma 4:13.

15. Duzu a ɔwɔ kɛ yɛkoati a, na duzu ati ɔ?

¹⁵ Menli mɔɔ sonle Gyihova la anu dɔɔnwo di nɔhalɛ. Ɔbayɛ azibɛnwo kpole kpalɛ kɛ adiema bie anye fuu bayɛ nabalaba wɔ asafo ne anu. Noko, saa ɔzile wɔ Mosisi mekɛ zo nee alumua Keleseɛnema asafo ne anu a, ɛnee ɔkola ɔsi ɛnɛ mekɛ ye noko. (2 Tem. 3:1, 5) Noko akee, asoo ɔwɔ kɛ yɛdumua yɛnyia yɛ mediema Keleseɛnema bie mɔ anwo adwenle kɛ bɛnli nɔhalɛ ɔ? Kyɛkyɛ! Ɔnle kpalɛ kɛ yɛbazuzu adwenle ɛtane mɔɔ ɔngyi kpɔkɛ biala azo la yɛamaa yɛ mediema. (Bɛgenga Wulomuma 14:10-12; 1 Kɔlentema 13:7.) Bieko, saa yɛnlie yɛ mediema mɔɔ bɛwɔ asafo ne anu la yɛnli a, ɔbayɛ esiane yeamaa yɛ wɔ sunsum nu.

16. (a) Duzu a yɛ nuhua ko biala bahola ayɛ na nabalaba nyɛleɛ anzɔ ndinli wɔ yɛ ahonle nu a? (b) Ɛzukoalɛdeɛ boni a yɛkola yɛnyia yɛfi ɛlɛka “Bɛnleɛnlea Bɛ Ahonle Nu . . . Bɛzɔ Bɛ Nwo Bɛnlea . . . ” anu a?

¹⁶ Keleseɛnenli ko biala “ɔdaye ɔwɔ kɛ ɔbua ye nyɛleɛ nwo ndɛne.” (Gal. 6:4) Ɔlua munli mɔɔ yɛnli la ati, yɛkola yɛda subane mɔɔ ɛngile nɔhalɛlilɛ la ali mekɛ biala mɔɔ yɛnrɛnwu ye a. (Hib. 3:12, 13) Yemɔti, ɔvi mekɛ mɔɔ kɔ mekɛ la, yɛbahola yɛanleɛnlea adwenle mɔɔ yɛlɛfa yɛazonle Gyihova la anu. Yɛbahola yɛabiza yɛ nwo kɛ: ‘Asoo ɛhulolɛ mɔɔ melɛ memaa Gyihova nee ye tumililɛ ne la ati a melɛsonle ye a? Anzɛɛ asoo nyilalɛ ne mɔɔ mebanyia ye wɔ Paladaese ne anu la a nwolɛ hyia me kpalɛ a?’ (Yek. 4:11) Nɔhalɛ, yɛ kɔsɔɔti yɛbahola yɛanleɛnlea yɛ nwo nu yɛaye nabalaba nyɛleɛ biala yɛavi yɛ ahonle nu.

17, 18. Duzu ati a ɔwɔ kɛ yɛsonle Gyihova nɔhalɛ nu ɛ?

¹⁷ Mekɛ mɔɔ yɛlɛbɔ mɔdenle yɛavi yɛ ahonle nu yɛazonle nɔhalɛ nu la, yɛnyia zolɛ nvasoɛ dɔɔnwo. Edwɛndolɛnli ne hanle kɛ, “Nyilalɛ ɛha sonla ne mɔɔ [Gyihova] ɛmbu ye ɛtane nwo mgbonda la na ɔmbɛlɛbɛla awie mɔ.” (Edw. 32:2) Nɔhalɛ,  bɛdabɛ mɔɔ bɛye nabalaba nyɛleɛ bɛfi bɛ ahonle nu la di fɛlɛko, na bɛ nye bɛalie kpalɛ kenlebie.

¹⁸ Wɔ mekɛ mɔɔ fɛta la anu, Gyihova bɛakpa amumuyɛma anzɛɛ adalɛma anwo ɛdanlɛ, na “bɛbanwu ngakyile mɔɔ wɔ sonla mɔɔ di pɛlepɛle nee mɔɔ yɛ amumuyɛ la avinli la, nee ngakyile mɔɔ wɔ sonla mɔɔ sonle Nyamenle nee mɔɔ ɛnzonle Nyamenle la avinli la.” (Mal. 3:18) Ɔle arɛlekyekyelɛ kɛ yɛbanwu kɛ “Nyamenle anye wɔ pɛlepɛlelilɛma anwo zo, na ɔbuke ɔ nzo ɔtie bɛ nzɛlɛlɛ dahuu.” —1Pita 3:12.