Selɛ bie mɔɔ wɔ Brazil la ka kɛ: “Adawubɔlɛ mɔɔ kɔ zo wɔ yɛ Abusua Ɛzonlenlɛ bo la yɛ anyelielɛ kpalɛ, yemɔti saa meammaa yɛamkpɔne a yɛkanwu ye la ɛnee aleɛ ɛdwo soo.” Selɛ ko noko mɔɔ wɔ Japan la se ɔ ra nrenya mɔɔ yenyia ɛvolɛ bulu la ɛnnwu ye kɛ mekɛ ɛhɔ na ɔkulo kɛ yɛtoa zo. Duzu ati ɔ? Selɛ ne ka kɛ, “Debiezukoalɛ ne maa ye anwosesebɛ, na ɛhye maa ɔ nye die.”

Nɔhalɛ, tɛ ngakula kɔsɔɔti a anye die abusua ɛzonlenlɛ nwo a, bie mɔ anye ɛnlie nwo fee. Duzu ati ɔ? Selɛ bie mɔɔ wɔ Togo la hilele nu kɛ, “Ɔnle kɛ Gyihova ɛzonlenlɛ fonle.” Saa ɔba ye zɔ a, ɔbahola yeara ye kɛ ɔvi kɛzi bɛyɛ abusua ɛzonlenlɛ ne la ɔ? Abusua dɔɔnwo ɛnwu kɛ abusua ɛzonlenlɛ kola maa “bɛ nye die” kɛmɔ Ayezaya hanle vanenle Ɛnwomenlelielɛ Kenle ne ɛzielɛ nwo la.—Aye. 58:13, 14.

Selɛma mɔɔ bɛle abusua tile la ze kɛ saa bɛ abusua ne anye balie abusua ɛzonlenlɛ nwo kpalɛ a, ɔnle kɛ ɔyɛ ahonlendulɛ. Ralf, mɔɔ ɔ mra mraalɛ nsa yɛɛ nrenya ko la ka kɛ, bɛ abusua ɛzonlenlɛ ne le kɛ asɛɛ bɛlɛbɔ adawu noko ɛnee bɛlɛsukoa debie; na awie biala fa ɔ nwo wula nu. Nɔhalɛ nu, ɔnla aze kɛ ɛbamaa awie biala anye alie na yeava ɔ nwo yeawula debiezukoalɛ ne anu. Ninli ko ka kɛ: “Ɔyɛ a mennyia anwosesebɛ mɔɔ mebava meamaa abusua ɛzonlenlɛ ne ayɛ anyelielɛ kɛmɔ mekpondɛ kɛ ɔyɛ la.” Ɛbahola wɔali tɛnlabelɛ ɛhye anwo gyima ɔ?

Selɛ bie mɔɔ lɛ ngakula nwiɔ wɔ Germany la ka kɛ, “ɔnle kɛ yɛyɛ ye kyengye.” Natalia, ninli bie mɔɔ lɛ ngakula nwiɔ la ka kɛ, “debie mɔɔ anwo hyia yɛ abusua ne kpalɛ la a le kɛ yɛbahakyihakyi debiezukoalɛ ne anu mekɛ biala.” Mbusua dɔɔnwo kyehyɛ bɛ abusua ɛzonlenlɛ  ne anu. Cleiton, selɛ bie mɔɔ lɛ ngakula nwiɔ wɔ Brazil la kilehile nu kɛ: “Ɛhye maa debiezukoalɛ ne yɛ anyelielɛ na abusua ne anu amra amuala fa bɛ nwo wula nuhua.” Awovolɛ ne fa bɛ adwenle sie kakula ko biala ngyianlɛ zo kɛmɔ ye ɛvolɛ ne de, ɔlua mekɛ ne mɔɔ bɛkyehyɛ nu bɛmaa debiezukoalɛ ne la azo. Awovolɛ kola di abusua ne anu amra ko biala ngyianlɛ nwo gyima ɔlua ninyɛne ngakyile mɔɔ bɛkpa nee ndenle mɔɔ bɛdua zo bɛyɛ debiezukoalɛ ne la azo.

Nzenzaleɛ boni a abusua bie mɔ ɛyɛ ye wɔ bɛ abusua ɛzonlenlɛ ne anu a? Bie mɔ to edwɛne maa Gyihova fa bɔ bɛ abusua ɛzonlenlɛ ne abo. Juan mɔɔ ɔvi Mexico la ka kɛ: “Ɛhye maa yɛnyia adenle yɛsiezie yɛ adwenle yɛmaa debiezukoalɛ ne.” Ye abusua ne kpa edwɛne mɔɔ fane edwɛkɛtile mɔɔ bɛkpa kɛ bɛfa bɛayɛ debiezukoalɛ ne wɔ nɔsolɛ ne anu la.

Mbusua bie mɔ bɔ nu kenga Baebolo ne foa bie. Amaa bɛahakyihakyi nu la, abusua bie mɔ kyɛ menli mɔɔ bɛha bɛ nwo edwɛkɛ wɔ Baebolo ne foa ne anu la maa bɛ nwo. Selɛ bie mɔɔ wɔ Japan la ka kɛ, “mɔlebɛbo ne ɛnee ɔnyɛ ye fɛ kɛ ɔbagenga ye zɔhane adenle ne azo.” Noko, ɔ mra mrenya nwiɔ ne anye liele kɛ ɛnee bɛ awovolɛ ne bɛ bɔ nu yɛ la. Abusua bie mɔ bɔbɔ fa Baebolo ne anu edwɛkɛ ne yɛ yɛkile. Roger, selɛ bie mɔɔ lɛ ngakula nwiɔ mɔɔ ɔwɔ South Africa la ka kɛ, fane dɔɔnwo ne ala, ngakula “ta nwu Baebolo ne anu edwɛkɛ bie mɔɔ yɛdayɛ awovolɛ ne mɔ yɛannwu ye la.”

Adenle bieko mɔɔ yɛdua zo yɛkakyihakyi nu la a le kɛ yɛbabɔ nu yɛava yɛ sa yɛayɛ debie, mɔɔ bie a le kɛ yɛbayɛ debie mɔɔ zɔho Nowa ɛlɛne ne anzɛɛ Sɔlɔmɔn ɛzonlenlɛ sua ne la. Ɔwɔ kɛ yɛyɛ neɛnleanu dɔɔnwo amaa deɛ ne mɔɔ yɛbayɛ la ayɛ anyelielɛ. Yɛva kakula ko mɔɔ ɛnyia ɛvolɛ nnu mɔɔ nee ye awovolɛ nee ye nana a de Asia la kɛ neazo. Ɛnee bɛlɛyɛ ɛleka ngakyile mɔɔ ɛzoanvolɛ Pɔɔlo hɔyɛle ye edwɛkpatɛlɛvolɛ gyima ne la anwo debie mɔɔ bɛbava bɛazukoa debie la. Mbusua bie mɔ noko ɛyɛ debie bie mɔɔ bɛfa bɛdi nwɔhoa mɔɔ ka Adendulɛ buluku ne anwo edwɛkɛ la. Donald mɔɔ ɛnyia ɛvolɛ 19 mɔɔ wɔ Togo la ka kɛ, ninyɛne ngakyile mɔɔ ɛnee yɛfa yɛyɛ gyima la “manle anyelielɛ rale yɛ abusua ɛzonlenlɛ ne nee abusua ne anu.” Asoo ɛbahola wɔazuzu debie bie mɔɔ saa ɛyɛ a ɔbamaa wɔ abusua ɛzonlenlɛ ne ayɛ anyelielɛ kpalɛ la anwo ɔ?

Saa yɛanyɛ kyengye na yɛkakyihakyi nu a, abusua ɛzonlenlɛ ne yɛ anyelielɛ, noko ɔwɔ kɛ awie biala siezie ɔ nwo amaa bɛanyia ɛzukoalɛdeɛ bɛavi nu. Ɔdwu mekɛ ne bie a, ɛnee ngakula ne mɔ ɛvɛ, yemɔti ɔwɔ kɛ selɛma dumua suzu mɔɔ bɛbazukoa la anwo na bɛnyia mekɛ bɛsiezie bɛ nwo. Selɛ bie ka kɛ, “Saa mesiezie me nwo kpalɛ a, awie biala kola nyia debiezukoalɛ ne azo nvasoɛ.” Selɛ bie mɔɔ wɔ Germany la dumua ka mɔɔ ye abusua ne bɛazukoa ye wɔ dapɛne ne mɔɔ la bɛ nyunlu la anwo edwɛkɛ kile bɛ. Selɛ bie mɔɔ lɛ ngakula nsia wɔ Benin la, maa bɛnwu kpuyia mɔɔ ɔbabizebiza wɔ mekɛ mɔɔ bɛbazuzu DVD mɔɔ gyi Baebolo ne azo anwo wɔ bɛ abusua ɛzonlenlɛ ne abo la. Nɔhalɛ nu, anwoziezielɛ mɔɔ yɛyɛ la maa abusua ɛzonlenlɛ ne yɛ anyelielɛ kpalɛ.

Saa abusua ne dumua nwu mɔɔ bɛbazuzu nwo la a, bɛkola bɛfa bɛbɔ adawu wɔ dapɛne ne anu na ɔmaa bɛ nye die. Na saa bɛ nuhua bie lɛ gyimalilɛ a, ɔmaa ɔte nganeɛ kɛ ɔle ye abusua ɛzonlenlɛ.

Ɔyɛ se ɔmaa mbusua dɔɔnwo kɛ bɛbayɛ bɛ abusua ɛzonlenlɛ ne dahuu.

Selɛma dɔɔnwo fa mekɛ tendenle yɛ gyima amaa bɛanyia mɔɔ bɛhyia nwo la. Kɛ neazo la, selɛ bie mɔɔ wɔ Mexico la fi sua nu nwonlomɔ dɔne nsia na ɔbadwu sua nu nɔsolɛ dɔne mɔtwɛ. Bieko, ɔlua sunsum nu gyimalilɛ bie ati, ɔdwu mekɛ ne bie a ɔwɔ kɛ bɛkakyi mekɛ mɔɔ bɛfa bɛyɛ Abusua Ɛzonlenlɛ ne la.

Noko, ɔhyia kɛ yɛsika yɛ bo kɛ yɛbayɛ yɛ abusua ɛzonlenlɛ ne dahuu. Loïs mɔɔ de Togo na yenyia ɛvolɛ 11 la ka kpɔkɛ mɔɔ ye abusua ne ɛbɔ la anwo edwɛkɛ kɛ: “Ɔwɔ nuhua kɛ ɔdwu mekɛ ne bie a yɛmbɔ abusua ɛzonlenlɛ ne abo ndɛ ɔlua edwɛkɛ bie mɔɔ ɔkɛzi alehyenlɛ ne anu la ɛdeɛ, noko dahuu yɛyɛ yɛ abusua ɛzonlenlɛ ne.” Ɛbahola wɔanwu deɛmɔti abusua bie mɔ yɛ bɛ abusua ɛzonlenlɛ wɔ dapɛne ne mɔlebɛbo la. Saa edwɛkɛ bie mɔɔ bɛ nye ɛnla la si a, bɛkola bɛtu bɛ abusua ɛzonlenlɛ bɛsie dapɛne awieleɛ.

Kɛmɔ duma “abusua ɛzonlenlɛ” kile la, ɔboka ɛzonlenlɛ mɔɔ yɛfa yɛmaa Gyihova la anwo. Maa wɔ abusua ne anu amra kɔsɔɔti ɛva bɛ nloa ɛye Gyihova “ayɛlɛ” dapɛne biala. (Hozia 14:2) Na maa ɔyɛ anyelielɛ mekɛ ɔmaa abusua ne anu amra kɔsɔɔti, “ɔluakɛ fɛlɛkolilɛ ne mɔɔ [Gyihova] fa maa la le bɛ anwosesebɛ.”—Nih. 8:9, 10.