Bɛyele sini kɛnlɛma bie mɔɔ nuhua menli ɛndendɛ na bɛdo ye duma A Trip Down Market Street la wɔ San Francisco, U.S.A., wɔ ɛvoya 20 ne awieleɛ. Ɛnee ɔfane mɔɔ menli yɛ ye wɔ bɛ ɛbɛlabɔlɛ nu la anwo. Menli mɔɔ yɛle sini ne la vale milahyinli mɔɔ pɛ nvoninli la ziele kale bie azo na bɛhakyile ɔ nye wɔ ademgbole ne azo. Ninyɛne mɔɔ ɛnee wɔ sini ne anu la bie a le ehwili mɔɔ mgbɔnwɔ ɛlɛtwe, kale mɔɔ bɛlumuale bɛyɛle la, menli mɔɔ ɛlɛdi gua nee adwelie kɛlɛvolɛma.

Debie mɔɔ manle sini ne yɛle alɔbɔlɛ kpalɛ la a le kɛ ɔbayɛ kɛ bɛyɛle ye April 1906, yeangyɛ yɛɛ azɛlɛkpusulɛ ne nee senle ne mɔɔ hunle menli dɔɔnwo wɔ suakpole ne ɛleka ɛhye wɔ April 18 ne anu la zile a. Ɛnee menli mɔɔ wɔ sini ne anu la bie mɔ ngoane ɛlɛba ye awieleɛ. Scott Miles mɔɔ ɔle menli mɔɔ yɛle sini ne la ko alɔnra la hanle kɛ: “Menwu kɛ menli ne luolua ɛkɛ mɔɔ bɛnze mɔɔ ɔbado bɛ a. Ɛngola nwolɛ ɛhwee yɛ yɛɛ nyane ala a ɛdi ɛmaa bɛ a.”

Yɛbahola yɛanyia ɛzukoalɛdeɛ mɔɔ maa bɛdwenle edwɛkɛ nwo kpalɛ la yɛavi nu. Yɛdayɛ noko yɛngola yɛnyɛ mɔɔ ɔbado yɛ kpalɛzoamra la anwo ɛhwee noko yɛdi bɛ nwo nyane. Bɛyɛ bɛ gyima alehyenlɛ biala yɛɛ bɛbɔ bɛ ɛbɛla kɛmɔ bɛkulo la, bɛnze kɛ bɛbazɛkye ninyɛne ɛhye mɔ. Ɔnle kɛ azɛlɛkpusulɛ mɔɔ ɔbazi a bɛnnwu ye la, noko akee, mekɛ ekyi bie ala a yɛlɛ yɛbɔ yɛ kpalɛzoamra kɔkɔ wɔ Gyihova ndɛnebualɛ kenle ne anwo a. Ɔda ali kɛ wɔyɛ ngyehyɛleɛ mɔɔ dapɛne biala ɛkɔ daselɛlilɛ a, noko ɛbayɛ dɔɔnwo wɔabɔ menli kɔkɔ ɔ?

Ɔwɔ kɛ yɛfa Gyisɛse agyakɛ ɔluakɛ yeangyakyi daselɛlilɛ ɛlɛ. Ɔlile menli mɔɔ ɔyiale bɛ la kɔsɔɔti, adwuledievolɛ ne mɔɔ ɔhɔdole ye adenle nu nee raalɛ ne mɔɔ ɔradole ye bula ne azo wɔ sɛnzɛngyinla ɛnwomenlelielɛ mekɛ ne la daselɛ. (Luku 19:1-5; Dwɔn 4:5-10, 21-24) Saa Gyisɛse ɛlɛdie ɔ menle bɔbɔ a, ɔkola ɔpɛ zo na ɔfi ye ahonle nu ɔkilehile. Ahunluyelɛyelalɛ manle ɔlile daselɛ dɔɔnwo. (Maake 6:30-34) Kɛzi bie mɔ ɛzukoa Gyisɛse ɛlɛka edwɛkɛ ne ndɛndɛ ɛ?

Melika de sua kpole bie mɔɔ bɛmmaa menli ɛngɔ ɛkɛ basabasa la anu. Menli mɔɔ de bikye ye la dɔɔnwo le sukuluma mɔɔ bɛvi maanle gyɛne zo  na ɛnee bɛ telefuu nɔma nee bɛ aluma ɛnle mbuluku mɔɔ menli aluma nee bɛ telefuu nɔma wɔ nu la anu. Ɔ nye liele adenle mɔɔ ɔnyianle kɛ ɔ nee menli mɔɔ haye sua wɔ ɛkɛ kola tendɛ wɔ ɛleka mɔɔ bɛdie nyɛvolɛ nee milahyinli ne mɔɔ bɛfa bɛfo ɛbolɔnsam ne anu la anwo kpalɛ. Ɔka kɛ, “Wɔ adenle bie azo, ɛnee ɛkɛ ne le me azɛlɛsinli.” Melika vale mbuluku nee telate yɛɛ magazine mɔɔ wɔ aneɛ ngakyile nu la manle. Eza noko ɔhanle yɛ Web site, jw.org. ne anwo edwɛkɛ ɔhilele bɛ. Ɔ nee menli dɔɔnwo sukoa Baebolo ne.

Sonia noko maa ɔ nye da ɛkɛ ɔdi awie biala mɔɔ ɔkɛnyia ye la daselɛ. Ɔyɛ gyima wɔ dɔketa bie ayileyɛlɛ ɛleka, na ɔvale ɔziele ɔ nye zo kɛ ɔbali menli mɔɔ ɔ nee bɛ yɛ gyima la kɔsɔɔti daselɛ. Mɔɔ ɔlumua la, ɔbɔle mɔdenle ɔnwunle mɔɔ awie ko biala hyia nwo nee mɔɔ ɔ nye die nwo la. Akee ɔvale ye ewiazo ɛnwomenlelielɛ mekɛ ne ɔ nee bɛ nuhua ko biala lile adwelie. Yemɔti, Sonia bɔle Baebolo ɛzukoalɛ nwiɔ ɛyɛlɛ bo. Eza ɔlɛyɛ ngyehyɛleɛ kɛ ɔbava ye ɛnwomenlelielɛ mekɛ ne bie ɔ nee bɛdabɛ mɔɔ bɛlɛkendɛ dɔketa ne la ali adwelie.

Menli mɔɔ nyianle bɛ ti wɔ 1906 azɛlɛkpusulɛ ne anu la anu ko vɛlɛle ye “esiane mɔɔ yɛ ɛzulolɛ kpalɛ mɔɔ yezi maanle anzɛɛ sua bie azo a.” Noko akee, nzenralɛlilɛ kenle ne mɔɔ ɔnrɛhyɛ ɔbara “bɛdabɛ mɔɔ bɛnze Nyamenle” anwo zo la, badɛla biala. (2 Tɛs. 1:8) Gyihova kpondɛ kɛ awie biala nu ɔ nwo tie kɔkɔ ne mɔɔ ye Alasevolɛ ne mɔ ɛlɛbɔ la.—2 Pita 3:9; Yek. 14:6, 7.

Yɛlɛ nwolɛ adenle yɛbuke menli nye wɔ yɛ mekɛ ɛhye mɔɔ nuhua yɛ se la anu yɛmaa bɛgyakyi angomedi nyɛleɛ na bɛkpondɛ Gyihova. (Zɛf. 2:2, 3) Asoo ɛbava nwolɛ adenle biala mɔɔ ɛbanyia la wɔali menli mɔɔ ɛ nee bɛ yɛ gyima, wɔ kpalɛzoamra, anzɛɛ ɛ nee bɛ bɛayia la daselɛ? Asoo ɛbayɛ dɔɔnwo wɔabɔ menli kɔkɔ?