1, 2. Kɛzi bɛli Gyihova Alasevolɛ eni ɛ, na kɛzi ɛte nganeɛ wɔ nwo ɛ?

MENLI dɔɔnwo bu ye kɛ ɔle enililɛ kpole kɛ bɛbanyia ahyɛlɛdeɛ wɔ mɔɔ bɛkola bɛyɛ la anwo. Kɛ neazo la, bie mɔ ɛlie Nobel Ahyɛlɛdeɛ ne, ɔluakɛ bɛbɔle mɔdenle bɛmanle anzondwolɛ rale maanle nwiɔ avinli. Noko nea kɛzi ɔle enililɛ kpole kɛ Nyamenle bazoa awie kɛ ɔ gyakɛ anu gyinlavolɛ anzɛɛ ye ɛbɔfoɔ kɛ ɔhɔboa menli ɔmaa bɛ nee bɛ Bɔvolɛ ne ɛnyia agɔnwolɛvalɛ a!

² Kɛ Gyihova Alasevolɛ la, yɛ ngome a bɛli yɛ eni zɛhae a. Yɛlɛdi Nyamenle nee Kelaese edwɛkɛ zo yɛazɛlɛ menli kɛ bɛrayɛ ‘Nyamenle agɔnwo mɔ.’ (2 Kɔl. 5:20) Gyihova ɛlɛdua yɛ nwo zo ahwe menli abikye ye. Ɔlua ɛhye ati, menli dɔɔnwo mɔɔ bɛwɔ maanle mɔɔ bo 235 azo la ɛrayɛ Nyamenle agɔnwo mɔ na bɛlɛ anyelazo kɛ bɛbanyia dahuu ngoane. (Tae. 2:11) Yɛ nye bolo yɛyɛ yɛ ɛzonlenlɛ gyima ne na yɛto ɛsalɛ yɛfɛlɛ menli kɛ: ‘Bɛdabɛ mɔɔ bɛkulo la, bɛralie nzule mɔɔ maa ngoane la bɛnlo. Ɔle ahyɛlɛdeɛ, bɛndɔ.’ (Yek. 22:17) Kɛmɔ yɛ nye die gyimalilɛ ɛhye mɔɔ sonle bolɛ la anwo na yɛfa mɔdenlebɔlɛ yɛyɛ la ati, ɔfɛta kɛ bɛfɛlɛ yɛ kɛ menli mɔɔ ‘bɛ nye bolo bɛyɛ gyima kpalɛ.’ (Tae. 2:14) Akee bɛmaa yɛzuzu kɛzi mɔdenle mɔɔ yɛbɔ yɛyɛ gyima kpalɛ la boa maa yɛtwe menli yɛbikye Gyihova la anwo. Edwɛkɛhanlɛ gyima ne le adenle ko mɔɔ yɛdua zo yɛyɛ ɛhye a.

3. Duzu ati a ‘Gyihova mɔdenlebɔlɛ ne’ maa yɛnyia anwondozo ɛ?

³ Ayezaya 9:7 ka kɛ Nyamenle Ara ne bali Belemgbunli na ɔbayɛ ninyɛne kpalɛ yeamaa alesama. Ɛhye mɔ amuala bara nu ɔlua ‘Tumivolɛ Gyihova mɔdenlebɔlɛ ti.’ Edwɛkɛ ɛhye si ye dawua kɛ yɛ anwuma Selɛ ne anye die alesama ngoanelielɛ nwo. Gyihova mɔdenlebɔlɛ nwo neazo ne maa ɔda ali wienyi kɛ ɔfɛta kɛ yɛfi ahonle muala nu yɛfa anyelielɛ nee  mɔdenlebɔlɛ yɛbɔ Belemgbunlililɛ ne nolo. Ɛhulolɛ mɔɔ yɛlɛ kɛ yɛboa menli yɛamaa bɛanwu Nyamenle la da Gyihova mɔdenlebɔlɛ ne ali. Kɛ Nyamenle agɔnwo mɔ gyimayɛvoma la, asoo yɛbɔ kpɔkɛ kɛ yɛbayɛ edwɛkpakavolɛ gyima ne dɔɔnwo kɛmɔ yɛ tɛnlabelɛ ne bamaa yɛ adenle la ɔ?—1 Kɔl. 3:9.

4. Kɛzi Gyisɛse yɛle mɔdenlebɔlɛ nwo neazo kpalɛ wɔ ɛzonlenlɛ gyima ne anu ɛ?

⁴ Maa yɛzuzu Gyisɛse mɔdenlebɔlɛ ne noko anwo. Ɔyɛle mɔdenlebɔlɛ nwo neazo kpalɛ wɔ ɛzonlenlɛ gyima ne anu. Ɔyiale dwazotia, noko ɔbɔle mɔdenle ɔhanle edwɛkɛ ne ɔhɔle ewule nu. (Dwɔn 18:36, 37) Mekɛ mɔɔ ɛnee ye afɔlebɔlɛ ewule ne ɛlɛbikye la, Gyisɛse mianle kpɔkɛ mɔɔ ɔbɔle kɛ ɔboa awie mɔ yeamaa bɛanwu Gyihova la anu kpalɛ.

5. Kɛzi Gyisɛse nyɛleɛ nee ye feege baka ne anwo ɛrɛlɛ ne yɛle ko ɛ?

⁵ Kɛ neazo la, wɔ 32 Y.M., Gyisɛse bule ɛrɛlɛ bie vanenle nrenya bie mɔɔ ɛnee lɛ feege baka wɔ ye vanye tola nu mɔɔ yeanzo ma toonwo ɛvolɛ nsa la anwo. Nrenya ne hanle kɛ bɛpɛ ye bɛdo, noko tola zo neavolɛ ne hanle kɛ ɔmaa ye mekɛ ekyi na ɔbagugua ewula ɔ bo. (Bɛgenga Luku 13:6-9.) Ɛnee menli ekyi bie a ɛrayɛ Gyisɛse ɛdoavolɛma a. Noko kɛmɔ bɛhile ye wɔ zɔhane ɛrɛlɛ ne anu la, Gyisɛse vale mekɛ ekyi ne mɔɔ ɛnee ɛha—kɛyɛ siane nsia—yɛle daselɛlilɛ gyima ne kpole wɔ Dwudiya nee Pɛlia. Ɔka ekyii Gyisɛse wu la, ɔzunle ye sua zo amra mɔɔ ɛnee “bɛduodua bɛ nzo” la.—Mat. 13:15; Luku 19:41.

6. Duzu ati a ɔwɔ kɛ yɛmia yɛ edwɛkɛhanlɛ gyima ne anu ɛ?

⁶ Ɔluakɛ yɛbikye ewiade awieleɛ ne kpalɛ la ati, asoo ɔnle kɛ yɛmia yɛ edwɛkɛhanlɛ gyima ne anu ɔ? (Bɛgenga Daneɛle 2:41-45.) Nea nwolɛ adenle kɛnlɛma mɔɔ yɛnyia kɛ yɛle Gyihova Alasevolɛ a! Ewiade amuala, yɛdayɛ ala a yɛmaa menli nyia anyelazo kɛ alesama amaneɛnwunlɛ ne abo bɛapɛ a. Kenlensa ye ala adwelie kɛlata kɛlɛvolɛ bie hanle kɛ yɛngola yɛmbua kpuyia ɛhye, “Duzu ati a esiane to kpalɛma ɛ?” Kɛ Keleseɛnema la, ɔle yɛ gyima nee nwolɛ adenle kɛ yɛbamaa menli mɔɔ kulo kɛ tie la anwu mualɛ mɔɔ Baebolo ne fa maa wɔ kpuyia ɛhye mɔ anwo la. Debie kpalɛ bie ati a yɛfa yɛ “ahonle muala” yɛsonle Nyamenle a. (Wulo. 12:11) Ɔlua Nyamenle moalɛ ti, mɔdenle mɔɔ yɛbɔ yɛka edwɛkpa ne la maa awie mɔ nwu Gyihova na bɛkulo ye.

7, 8. Kɛzi tunwomaa sunsum wula Gyihova anyunlunyia ɛ?

⁷ Kɛmɔ ɛzoanvolɛ Pɔɔlo anwubielɛ ne kile la, yɛbahola ‘yɛazi epe’ na ‘yɛahye ɛhɔne’ wɔ yɛ ɛzonlenlɛ gyima ne anu. (2 Kɔl. 6:5) Edwɛkɛ ɛhye mɔ le bɛ nwo mɔɔ bɛtu bɛmaa la anwo neazo na ɔkola ɔkakye yɛ adekpakyelɛma mɔɔ bɛfa bɛ ɛzonlenlɛ gyima ne bɛdumua na mekɛ ko ne ala bɛyɛ gyima bɛnea bɛ nwo la. Eza suzu yɛ edwɛkpatɛlɛvolɛma mɔɔ ‘bɛfa bɛ mogya bɛye ɛdɛne’ bɛyɛ gyima ɛsesebɛ bɛboa menli wɔ maanle gyɛne zo la neazo ne anwo. (Fel. 2:17) Na yɛ mgbanyima mɔɔ yɛ gyima ɛsesebɛ, bie a bɛkye ɛhɔne anzɛɛ bɛsolo bɛ nlafelɛ bɛnea Gyihova mboane ne la noko ɛ? Eza yɛlɛ bɛdabɛ mɔɔ bɛ nye evi mɔɔ bɛnlɛ anwosesebɛ noko bɛbɔ mɔdenle bɛkɔ Keleseɛnema ayia nee daselɛlilɛ la. Saa yɛdwenle Nyamenle azonvolɛ ɛhye mɔ mɔɔ tu bɛ nwo maa la anwo a ɔmaa yɛ nye die. Mɔdenlebɔlɛ ɛhye maa awie mɔ noko nwu kɛzi yɛ ɛzonlenlɛ gyima ne hyia yɛ la.

⁸ Kengavolɛ bie mɔɔ ɔnle Dasevolɛ la hɛlɛle ye wɔ kɛlata nu hɔmanle Lincolnshire Boston Target adwelie kɛlata ne mɔɔ ɔwɔ United Kingdom la kɛ: ‘Menli ɛnlɛ diedi wɔ bɛ ɛzonlenlɛ nu bieko. Menwu debie mɔɔ bɛ ɛzonlenlɛ nu adekilevoma  ne ɛlɛyɛ a. Bɛmkpɔsa menli nwo zo kɛmɔ Kelaese yɛle la. Gyihova Alasevolɛ ala a ɔzɔho kɛ bɛdwenle menli nwo a, bɛkɔ menli ne ɛkɛ na bɛka nɔhalɛ ne bɛkile bɛ.’ Menli dɔɔnwo mɔɔ bɛwɔ ewiade ye anu la ɛngulo kɛ bɛkɛva bɛ nwo bɛkɛbɔ afɔle bɛkɛmaa awie mɔ. Noko, ɔluakɛ yɛkulo kɛ yɛfa yɛ nwo yɛbɔ afɔle yɛka edwɛkɛ ne la ati, yɛwula Gyihova Nyamenle anyunlunyia.—Wulo. 12:1.

9. Duzu a bamaa yɛ nye abolo yɛayɛ gyima kpalɛ wɔ daselɛlilɛ nu a?

⁹ Noko, saa yɛ mɔdenlebɔlɛ wɔ daselɛlilɛ nu ɛlɛka aze a, duzu a yɛbahola yɛayɛ a? Yɛdwenle mɔɔ Gyihova ɛlɛdua ɛdwɛkɛhanlɛ gyima ne azo ayɛ la anwo a, ɔbaboa. (Bɛgenga Wulomuma 10:13-15.) Saa menli bɛanyia ngoane a, ɔwɔ kɛ bɛfa diedi bɛbɔ Gyihova duma. Noko bɛnrɛhola bɛnrɛyɛ, kyesɛ yɛka edwɛkɛ ne yɛkile bɛ. Ɔwɔ kɛ ɛhye ka yɛ ɔmaa yɛ nye bolo yɛyɛ gyima kpalɛ yɛmia yɛ nwo yɛbɔ Belemgbunlililɛ edwɛkpa ne nolo.

10. Duzu ati a yɛkola yɛka kɛ yɛ subane kpalɛ maa menli twe bikye Gyihova ɛ?

¹⁰ Tɛ mɔdenle mɔɔ yɛbɔ ye daselɛlilɛ nu la angome a maa menli twe bikye Nyamenle a. Debie mɔɔ tɔ zo nwiɔ mɔɔ twe menli bikye Nyamenle la a le subane kpalɛ mɔɔ Keleseɛnema da ye ali la. Pɔɔlo zile kɛzi subane kpalɛ nwo hyia la azo wɔ mekɛ mɔɔ ɔhɛlɛle edwɛkɛ ɛhye la: “Yɛmkpondɛ kɛ yɛtenda awie agyakɛ anu na awie anyia yɛ gyima ne anwo edwɛkɛ ɛtane aha.” (2 Kɔl. 6:3) Yɛ ɛdendɛlɛ kɛnlɛma nee yɛ ɛbɛla kpalɛ maa menli anye die Gyihova Nyamenle ɛzonlenlɛ nwo. (Tae. 2:10) Nɔhalɛ nu, yɛta yɛte kɛ menli mɔɔ nwu kɛ yɛsukoa Kelaese la ba nɔhalɛ ne anu.

11. Duzu ati a ɔwɔ kɛ yɛdua asɔneyɛlɛ zo yɛsuzu kɛzi yɛ subane kola ka awie mɔ la anwo ɛ?

¹¹ Kɛmɔ yɛ nyɛleɛ kpalɛ kola maa menli sukoa nɔhalɛ ne la, zɔhane ala a yɛ  nyɛleɛ ɛtane noko kola foa menli a. Yemɔti, saa yɛwɔ gyima nu, sua nu, anzɛɛ sukulu nu a, yɛbɔ mɔdenle kɛ yɛnrɛmaa awie ɛnrɛnyia yɛ ɛzonlenlɛ gyima ne nee yɛ subane nwo edwɛkɛ ɛtane ɛnrɛha. Saa yɛ nye fuu yɛkɔ zo yɛyɛ ɛtane a, mɔɔ bado yɛ la ɛnle kpalɛ fee. (Hib. 10:26, 27) Ɔwɔ kɛ ɛhye ka yɛ maa yɛdua asɔneyɛlɛ zo yɛsuzu kɛzi yɛ ɛbɛlabɔlɛ ka awie mɔ la anwo. Ɛbɛlabɔlɛ kpalɛ nwo ngyinlazo ɛlɛsɛkye wɔ ewiade ɛhye anu ɛdeɛ, noko ahonlekpalɛma dɔɔnwo ɛlɛnwu ngakyile mɔɔ wɔ “sonla mɔɔ sonle Nyamenle nee mɔɔ ɛnzonle Nyamenle la avinli.” (Mal. 3:18) Nɔhalɛ nu, yɛ Keleseɛne subane kpalɛ ne maa menli bikye Nyamenle.

12-14. Adenle boni azo a yɛgyinla diedi nwo sɔnea nloa a, ɔka kɛzi awie mɔ bu yɛ ɛzonlenlɛ gyima ne la ɛ? Maa neazo.

¹² Pɔɔlo hanle ngyegyelɛ, anwongyelelɛ nee abodelɛ, ɛbolɛ nee efiade mɔɔ ɔlale la anwo edwɛkɛ wɔ ye kɛlata ne mɔɔ ɔhɛlɛle Kɔlentema la anu. (Bɛgenga 2 Kɔlentema 6:4, 5.) Saa yɛyia diedi nwo sɔnea a, yɛ kpundiigyinlanlɛ kola maa awie mɔ die nɔhalɛ ne. Neazo bie ɛne: Mekɛ bie mɔɔ ɛze ɛhɔ la, bɛbɔle mɔdenle kɛ bɛku Gyihova Alasevolɛ mɔɔ bɛde Angola ɛleka bie la amuala. Bɛbɔle Gyihova Alasevolɛ 2 mɔɔ bɛzɔne bɛ nee anyelielɛma 30 mɔɔ ɛnee bɛlɛkɔ debiezukoalɛ la anwo mgbɔlɔka bɛyiale. Dwazotiama ne bole menli ɛhye mɔ mɔɔ edwɛkɛ biala ɛnle bɛ nwo la bɛmanle mogya guale bɛ noko ɛnee sua ne azo amra ɛlɛnea bɛ. Mraalɛ bɔbɔ mɔɔ wɔ nu la bɛanva bɛ nwo bɛangyɛ bɛ. Bɛ adwenle a le kɛ, bɛnwunlonwunla bɛ amaa awie biala andie Gyihova Alasevolɛ ne mɔ. Noko mɔɔ bɛbole bɛ la anzi, menli mɔɔ wɔ ɛkɛ ne la anu dɔɔnwo hanle kɛ Alasevolɛ ne mɔ nee bɛ ɛrazukoa Baebolo ne! Yɛangyɛ, Belemgbunlililɛ ne anwo nolobɔlɛ ne nyianle anyuhɔlɛ, bɛnyianle menli dɔɔnwo.

¹³ Neazo ɛhye maa yɛnwu kɛ, saa yɛfa Baebolo ngyinlazo yɛdi gyima a ɔkola ɔnyia awie mɔ anwo zo tumi. Ɔlua akɛnrasesebɛ mɔɔ Pita nee ɛzoanvolɛma gyɛne nyiale la ati, bie a menli dodo mɔɔ bikyele Nyamenle la bazi yɛ nwo. (Gyi. 5:17-29) Yɛdayɛ noko, saa yɛgyinla kpundii yɛyɛ mɔɔ ɔtenrɛ la a, bie a yɛ gɔnwo mɔ sukuluma, gyimayɛvoma, anzɛɛ yɛ mbusuafoɔ bahola adie edwɛkɛ ne.

¹⁴ Dahuu bɛyɛ yɛ mediema kpɔdekpɔde. Kɛ neazo la, bɛgua mediema kɛyɛ 40 efiade wɔ Armenia, ɔlua foa biala mɔɔ bɛnle la ati, ɔbahola yeara ye kɛ bɛbagua dɔɔnwo efiade kenlebie. Bɛgua Gyihova azonvolɛ 55 efiade wɔ Eritrea, bɛ nuhua bie mɔ ɛbo ɛvolɛ 60. Bɛgua Alasevolɛ mɔɔ bo 700 la efiade wɔ South Korea, ɔlua bɛ diedi ti. Tɛnlabelɛ ɛhye ɛhɔ zolɛ ɛvolɛ 60. Yɛ nzɛlɛlɛ a le kɛ yɛ mediema mɔɔ bɛyɛ bɛ kpɔdekpɔde wɔ maanle ngakyile zo la, bɛawula Nyamenle anyunlunyia na yeaboa bɛdabɛ mɔɔ bɛkulo tenleneyɛlɛ la yeamaa bɛagyinla kpundii wɔ nɔhalɛ ɛzonlenlɛ nu.—Edw. 76:8-10.

15. Yɛ ndonwo fa kile kɛzi nɔhalɛlilɛ kola twe menli ba nɔhalɛ ne anu la anu.

¹⁵ Ɔle nɔhalɛ wienyi kɛ, yɛ nɔhalɛ mɔɔ yɛdi la noko bahola ahwe menli ara nɔhalɛ ne anu. (Bɛgenga 2 Kɔlentema 6:4, 7.) Kɛ neazo la, suzu anwubielɛ ɛhye anwo: Mekɛ mɔɔ adiema raalɛ bie ɛlɛpɛ bɔɔso mɔɔ yevo la tikiti la, manivolɛ bie hanle hilele ye kɛ nwolɛ ɛngyia kɛ ɔpɛ tikiti ne ɔluakɛ adenle ne anwoa. Adiema raalɛ ne hanle hilele ye kɛ, saa adenle ne anwoa bɔbɔ a, ɔwɔ kɛ ɔtua. Yeangyɛ ɔ gɔnwo ne dwule aze. Akee, bɔɔso dɛlava ne bizale adiema raalɛ ne kɛ, “Ɛle Gyihova Alasevolɛ ne mɔ anu ko ɔ?” Ɔbuale kɛ “ɛhɛe.” “Duzu ati a ɛlɛbiza a?” “Mendele adwelie ne mɔɔ ɛnee bɛlɛdi ye wɔ bɔɔso tikiti ne ɛdualɛ nwo la, na meze kɛ Gyihova Alasevolɛ boka menli ekyi ne mɔɔ yɛ zɔ la anwo yɛɛ bɛdi nɔhalɛ wɔ ninyɛne kɔsɔɔti anu.” Siane ekyi pɛle nu la, nrenya bie  bikyele adiema raalɛ ne wɔ debiezukoalɛ bo na ɔbizale ye kɛ, “Ɛze me ɔ? Medame a mele bɔɔso dɛlava ne mɔɔ ɔ nee wɔ hanle tikiti ɛdualɛ ne anwo edwɛkɛ la. Mekɛ mɔɔ menwunle mɔɔ ɛyɛle la menzile kpɔkɛ kɛ me nee Gyihova Alasevolɛ bazukoa Baebolo ne.” Saa menli nwu kɛ yɛdi nɔhalɛ a, ɔmaa bɛdie edwɛkpa ne mɔɔ yɛbɔ ye nolo la bɛdi.

16. Saa yɛda subane le kɛ abotane, ɛhulolɛ, nee atiakunlukɛnlɛma ali a, duzu a bahola avi nu ara a? Maa neazo.

¹⁶ Saa yɛda subane le kɛ abotane, ɛhulolɛ, nee atiakunlukɛnlɛma ali a, ɔmaa menli bikye Gyihova. Bɛdabɛ mɔɔ bɛnwu yɛ la bɛahulo kɛ bɛkɛzukoa Gyihova, ye bodane ne mɔ nee ye menli ne anwo debie. Nɔhalɛ Keleseɛnema subane nee bɛ nyɛleɛ wula Nyamenle anyunlunyia. Ɛzonlenlɛ nu adekilevoma bie mɔ yɛ bɛ nwo kɛ bɛlɛ subane kpalɛ. Noko bɛbɔ adalɛ bɛkile bɛ ɛdoavolɛma na bɛdie ezukoa bɛfi bɛ ɛkɛ. Bie mɔ bɔbɔ ɛva ezukoa ne ɛdɔ azua nee ahale mɔɔ bɛ awolɛ yɛ se la. Ko bɔbɔ ɛzi sua mɔɔ air condition wɔ nu la ɛmaa ye twea! Bɛnli Kelaese edwɛkɛ ne mɔɔ ɔse bɛva “bɛmaa mgbane mɔɔ bɛnlie ɛhwee” la azo. (Mat. 10:8) Emomu, bɛle kɛ tete Yizilayɛ adalɛ ɛsɔfoma ne la, bɛbɔ bɛ “ɛkpa” na bɛahilehile yɛɛ bɛkilehile Nyamenle anwo edwɛkɛ mɔɔ ɔnle nɔhalɛ. (Mae. 3:11) Nabalaba nyɛleɛ ɛhye ɛngola ɛmmaa menli ɛmbikye Nyamenle.

17, 18. (a) Kɛzi yɛda Gyihova subane ne mɔ ali a ɔwula ye anyunlunyia ɛ? (b) Duzu a ka wɔ maa ɛ nye bolo gyima kpalɛ ɛyɛlɛ nwo a?

¹⁷ Noko nɔhalɛ Keleseɛnema ngilehilelɛ nee bɛ subane kpalɛ ne maa menli bayɛ Nyamenle agɔnwo mɔ. Kɛ neazo la, mekɛ bie mɔɔ ɛnee adekpakyelɛnli bie ɛlɛyɛ azua nu gyima ne la, kunlavolɛ raalɛ kpanyinli bie andie ye. Raalɛ ne hanle kɛ mekɛ mɔɔ adiema ne bɔle alenkɛ ne anu la, ɛnee ɔgyi kpolike zo wɔ ye egyaade ne ɔlɛkakyi ye bɔlobo. Adiema ne hanle kɛ: “Ɔnle kpalɛ kɛ ɛ ngome ɛkɛyɛ zɔ.” Adekpakyelɛnli ne hakyile bɔlobo ne manle ye na ɔhɔle ye ɛleka bie. Mekɛ mɔɔ raalɛ ne ara nrenya ne dele mɔɔ ɛzi la, ɔ nye liele na ɔbɔle mɔdenle kɛ ɔkpondɛ adiema ne yeayɛ ye mo. Awieleɛ kolaa ne, kakula nrenya ne liele dole nu kɛ ɔbazukoa Baebolo ne.

¹⁸ Duzu ati a wɔbɔ kpɔkɛ kɛ ɛbamaa ɛ nye abolo wɔayɛ gyima kpalɛ ɛ? Saa yɛbɔ mɔdenle wɔ ɛzonlenlɛ gyima ne anu, na yɛyɛ ninyɛne mɔɔ nee Nyamenle ɛhulolɛdeɛ le ko la a, yɛwula Gyihova anyunlunyia na bie a ɔbaboa awie mɔ yeamaa bɛanyia ngoane. (Bɛgenga 1 Kɔlentema 10:31-33.) Mɔdenle mɔɔ yɛfa yɛbɔ edwɛkpa ne nolo na yɛda subane kpalɛ ali la kile kɛ yɛfi ahonle muala nu yɛkulo Nyamenle nee menli. (Mat. 22:37-39) Saa yɛ nye bolo yɛyɛ gyima kpalɛ a, yɛ nye balie na yɛ kunlu adwo yɛ nwo. Bieko, yɛ nye la kɛ kenlebie alesama amuala bɛava anyelielɛ azonle na bɛawula yɛ Bɔvolɛ, Gyihova anyunlunyia.