Menli mgbe dɔɔnwo mɔɔ wɔ ewiade la die di kɛ bɛdi Bolonyia bɛkakye kenle mɔɔ bɛwole Gyisɛse Kelaese la. Noko akee, asoo wɔbiza ɛ nwo ɛlɛ kɛ asoo alimoa Kilisienema, mɔɔ ɛnee bikye Gyisɛse kpalɛ la lile Bolonyia ɔ? Ɛze mɔɔ Baebolo ne ka ye wɔ awolɛ kenle ɛlilɛ nwo la ɔ? Kpuya ɛhye mɔ mɔɔ ɛbakpondɛ nwolɛ mualɛ la bamaa wɔanwu ye saa ɔwɔ kɛ Kilisienema di Bolonyia a.

Mɔɔ limoa, Baebolo ne ɛnga kɛ bɛli Gyisɛse awolɛ kenle yɛɛ Nyamenle azonvolɛ nɔhavoma anli awolɛ kenle. Ngɛlɛlera ne ka menli nwiɔ mɔɔ lile awolɛ kenle la anwo edwɛkɛ. Ɛnee bɛ nuhua biala ɛnzonle Gyihova mɔɔ le Baebolo ne kɛlɛvolɛ la yɛɛ bɛanga bɛ awolɛ kenle ne ɛlilɛ nwo edwɛkɛ kpalɛ. (Mɔlebɛbo 40:20; Maake 6:21) Kɛ mɔɔ Encyclopædia Britannica ne ka la, alimoa Kilisienema kpole “awolɛ kenle ɛlilɛ mɔɔ gyi awozonle ɛzonlenlɛ zo la.”

Baebolo ne ɛnga kenle kpɔtee mɔɔ bɛwole Gyisɛse la. McClintock and Strong Cyclopedia ne hanle kɛ, “Kenle mɔɔ bɛwole Kelaese la anwo edwɛkɛ ɛnle Ngyekyeleɛ Fofolɛ ne anu yɛɛ ɔnle ɛleka biala.” Nɔhalɛ nu, Saa Gyisɛse kulo kɛ ye ɛdoavolɛma ne di ye awolɛ kenle a, anrɛɛ ɔbamaa bɛanwu kenle kpɔtee mɔɔ bɛvale bɛwole ye la.

Mɔɔ tɔ zo nwiɔ, Baebolo ne ɛnga ye wɔ ɛleka biala kɛ Gyisɛse ɛdoavolɛ ne mɔ lile Bolonyia. New Catholic Encyclopedia ne hanle kɛ bɛlimoale bɛhanle Bolonyia ɛlilɛ nwo edwɛkɛ wɔ Philocalus Chronograph ne anu. Ɛnee Wulomuma neɛnleanu buluku ɛhye gyi buluku bie mɔɔ bɛyɛle ye wɔ ɛvolɛ 336 Y. M. la azo.” Ɔda ali kɛ, ɛnee bɛwie Baebolo ne kɛlɛ dɛbadɛba na Gyisɛse ɛra ɛhɔ ɛmaa ɛvoya dɔɔnwo ɛgua nu. Ɔti McClintock nee Strong hɛlɛle kɛ, “Nyamenle ɛnlie Bolonyia ɛlilɛ ɛndo nu anzɛɛ ɔnlɛ ngyinlazo biala wɔ Ngyekyeleɛ Fofolɛ ne anu.” *

Gyisɛse, Kilehilevolɛ Kpole ne vale mɔɔ ɔwɔ kɛ ye ɛdoavolɛma yɛ la anwo adehilelɛ maanle, na bɛhɛlɛ ye wɔ Baebolo ne anu. Bolonyia ɛlilɛ ɛmboka nwo. Kɛ mɔɔ kilehilevolɛ bie ɛnrɛhulo kɛ ye sukoavoma bɛali bɛ ti anwo ayɛ debie mɔɔ ɔtɛkanle la, zɔhane ala a Gyisɛse ɛnrɛhulo kɛ ye ɛdoavolɛma ‘bɛayɛ debie bɛadɛla mɔɔ bɛhɛlɛ’ ye wɔ Baebolo ne anu la a.​—1 Kɔlentema 4:6.

Noko ɛvoyia bie mɔɔ anwo hyia la wɔ ɛkɛ ne mɔɔ ɛnee alimoa Kilisienema ze ye kpalɛ​—Gyisɛse ewule ngakyelɛlilɛ ne. Gyisɛse mumua ne hanle mekɛ mɔɔ ɔwɔ kɛ bɛdi zɔhane ɛvoyia ne nee kɛzi ɔwɔ kɛ bɛdi ye la. Bɛha adehilelɛ titili ɛhye mɔ nee kenle mɔɔ ɔwule la anwo edwɛkɛ wɔ Baebolo ne anu.​—Luku 22:19; 1 Kɔlentema 11:25.

Kɛ mɔɔ yɛnwu ye la, Bolonyia le awolɛ kenle ɛlilɛ na alimoa Kilisienema ne anva bɛ nwo anwula awozonle ɛzonlenlɛ amaamuo ɛhye mɔ anu. Bieko, Baebolo ne anga kɛ Gyisɛse nee awie mɔ gyɛne lile Bolonyia. Ɔlua nɔhalɛ edwɛkɛ ɛhye mɔ ati, Kilisienema mgbe dɔɔnwo mɔɔ wɔ ewiade amuala la ɛzi kpɔkɛ kɛ bɛnrɛli Bolonyia.