Ɛkakye wɔ ngakula nu mɔɔ ɛdɔle aze la ɔ? Bie a ɛ sa pɛle anzɛɛ ɛ gyakɛ abonyi zo kpolole. Ɛkakye kɛzi wɔ mame kyekyele ɛ rɛle la ɔ? Bie a ɔkyikyile hanlɛ ne anyunlu na ɔvale fuazinli ɔkyekyele zo. Ɛzunle, noko ye ɛdendɛlɛ bɛtɛɛ ne nee kɛzi ɔvale wɔ ɔbɔle ye ɛbolɛ la maanle ɛnyianle ahomeka. Mekɛ zɔhane, ɛnee ɛta ɛnyia arɛlekyekyelɛ.

Noko yɛlɛyɛ mgbanyinli a, ninyɛne nu yɛ se. Ngyegyelɛ ne kɔ zo yɛ kpole, noko ɛnnyia awie ɛnkyekye ɛ rɛle. Ɔyɛ alɔbɔlɛ kɛ, tɛ fuazinli mɔɔ bɛfa bɛakyekye hanlɛ zo nee ninli atuuyɛlɛ a bɛfa bɛdi kpanyinli bie ngyegyelɛ nwo gyima a. Suzu neazo ekyii anwo.

• Asoo wɔ gyima ɛvi ɛ sa ɛmaa wɔli nyane ɛlɛ ɔ? Julian se mekɛ mɔɔ bɛyele ye gyima nu la, ɔlile nyane kpole. Ɔbizale ɔ nwo kɛ, ‘Kɛ ɔkɛyɛ na meanlea me abusua ne ɛ? Ɛvolɛ tendenle mɔɔ meva meyɛ gyima ɛsesebɛ la, nzɔne ati a me kɔmpɛlɛ ne bu me kɛ nvasoɛ ɛnle me nwo zo a?’

• Bie a wɔ agyalɛ mɔɔ ɛzɛkye la ɛgyegye wɔ kpalɛ. Raquel se, “Mɔɔ me hu gyakyile me arɛlevilɛ nu wɔ siane 18 mɔɔ ɛpɛ nu la, menlile nyane. Ɔmaanle me ɛbolɛ dele. Mendele nyane wɔ nwonane nu yɛɛ nganeɛdelɛ nu. Ɛzulolɛ hanle me.”

• Bie a wɔnyia ewule bie mɔɔ ɔ nyunlu ala a ɔkɔ a. Ɔdwu mekɛ ne bie a ɛte nganeɛ kɛ tete selɛ Dwobu mɔɔ lile nyane kɛ: “Mekpo me ngoane; menrɛhakyi bolɛ” la. (Dwobu 7:16) Bie a ɛbade nganeɛ kɛ Luis, nrenyia bie mɔɔ ɔwɔ ye ɛvolɛ 80 anu mɔɔ hanle kɛ, “Ɔyɛ a mete nganeɛ kɛ melɛkendɛ me ewule mekɛ.”

• Anzɛɛ bie a wɔ dɔvolɛ bie ewule ti ɛhyia arɛlekyekyelɛ nwo. Robert ka kɛ, “Mɔɔ me ra nrenyia ne wule wɔ anwumalɛne esiane nu la, alimoa ne, meanlie meanli. Akee nyane ne mɔɔ Baebolo ne vale totole dadeɛ mɔɔ yɛ nla mɔɔ bɛlɛfa bɛawɔ awie ahonle nu la bie hanle me.”​—Luku 2:35.

Robert, Luis, Raquel nee Julian nyianle arɛlekyekyelɛ wɔ tɛnlabelɛ ɛhye mɔ mɔɔ yɛ nyane la bɔbɔ anu. Bɛnyianle Sonla kpalɛ mɔɔ kyekyele bɛ rɛle a​—tɛ awie gyɛne biala kɛ Nyamenle Tumivolɛ Bedevinli ne ala. Kɛzi ɔkyekye yɛ rɛle ɛ? Asoo ɔbakyekye ɛdawɔ noko ɛ rɛle ɔ?