Sumunli kɛ yɛ Bɔvolɛ ne bɔle alesama la, yelua anwumabɔvolɛma nee ngapezoma anwo zo ɔ nee yɛ ɛli adwelie. Bieko, ɔmaanle bɛhɛlɛle ye edwɛkɛ ne nee ye ɛwɔkɛ ne mɔ bɛdole ɛkɛ. Nyamenle ɛwɔkɛ ne mɔ fale wɔ kenle bie nwo. Nienwu a ɛbanwu Nyamenle ɛwɔkɛ ne mɔ ɛnɛ a?

Ɛbanwu Nyamenle edwɛkɛ ne wɔ Ngɛlɛlera Nwuanzanwuanza ne anu. (2 Timote 3:16) Kɛzi Nyamenle luale ngapezoma anwo zo hɛlɛle ye edwɛkɛ ne ɛ? (2 Pita 1:21) Nyamenle vale ye nzuzulɛ wulale kɛlɛvolɛma ne adwenle nu ɔmaanle bɛhɛlɛle. Ɛnɛ bɔbɔ, saa gyima nu kpanyinli bie maa ye kɛlɛhɛlɛvolɛ kɛlɛ ye kɛlata maa ye a, yɛnga kɛ kɛlata ne le kɛlɛhɛlɛvolɛ ne ɛdeɛ, emomu yɛnwu ye kɛ gyima nu kpanyinli ne a hɛlɛle a. Zɔhane ala a, ɔnva nwo kɛ Nyamenle maanle menli hɛlɛle ye edwɛkɛ ne la, ɔdaye a ɔle Buluku Nwuanzanwuanza ɛhye Kɛlɛvolɛ a.

Nyamenle edwɛkɛ ne hyia kpalɛ ɔti ɔkulo kɛ menli kɔsɔɔti kenga na bɛte ɔ bo. Ɛnɛ, bɛlɛbɔ ye “dahuu edwɛkpa ne” nolo wɔ “maanle nee mbusua nee aneɛ” kɔsɔɔti anu. (Yekile 14:6) Ɔlua Nyamenle moalɛ zo, yɛbahola yɛagenga Buluku Nwuanzanwuanza ne amuala anzɛɛ ye foa bie wɔ aneɛ mɔɔ bo 3,000 la anu, ɛhye tɛla buluku biala mɔɔ wɔ ewiade la.