• Nyamenle ɛkpa ye. “Medame mumua ne mezie me belemgbunli . . . mebava maanle maanle meamaa wɔ kɛ wɔ agyapadeɛ yɛɛ azɛlɛ ne ɛleka biala kɛ wɔ agyadeɛ.”​—Edwɛne 2:6, 8.

• Ɔle Belemgbunli Devidi koliagya. ‘Bɛwo kakula bie bɛmaa yɛ, bɛmaa yɛ ralɛ nrenyia. Ye tumililɛ ne anu badɛlɛ na anzodwolɛ mɔɔ ɛnlɛ awieleɛ la bara Devidi belemgbunli ebia ne nee ye belemgbunlililɛ ne azo na yeamaa yeagyinla kpundii.’​—Ayezaya 9:6, 7.

• Bɛbawo ye wɔ Bɛtelɛhɛm. “O Bɛtelɛhɛm, wɔ nuhua a awie vi baragyinla me gyakɛ anu na yeayɛ Yizilayɛ tumivolɛ a . . . Ye kpoleyɛlɛ ne badwu azɛlɛ ne ɛleka biala.”​—Maeka 5:2, 4.

• Menli bakpo ye na bɛahu ye. “Bɛambu ye bie yɛɛ yɛbule ye kɛ ɔ nwo ɛngyia, . . . yɛ mɛladonlɛ ti a bɛbodɛbodale ye a; Yɛ ɛtane ne mɔ ati ɔnwunle amaneɛ kpole.”​—Ayezaya 53:3, 5.

• Bɛbadwazo ye bɛavi ewule nu na bɛawula ye anyunlunyia. “Ɛnrɛgyakyi me wɔ Nla ne anu. Ɛnrɛmaa wɔ nɔhavo ne ɛnrɛnwu kuma. . . . Fɛlɛkolilɛ wɔ ɛ sa fema zo dahuu.”​—Edwɛne 16:10, 11.

Wɔ alesama tetedwɛkɛ nu, sonla ko pɛ ala a edwɛkɛ mɔɔ bɛha bɛvale Tumivolɛ mɔɔ fɛta la anwo la nee ye kɔ a; yemɔ a le Gyisɛse Kelaese. Nɔhalɛ nu, anwumabɔvolɛ bie hanle hilele Gyisɛse mame Mɛle kɛ: “Nyamenle bava ɔ ze Devidi belemgbunli ebia ne amaa ye,. . . na ye Belemgbunlililɛ ɛnrɛra awieleɛ.”​—Luku 1:31-33.

Gyisɛse anli tumi wɔ azɛlɛ ye azo ɛlɛ. Emomu ɔbadɛnla anwuma yeali alesama anwo zo tumi kɛ Nyamenle Belemgbunlililɛ ne azo Belemgbunli. Duzu a maa ɔfɛta bɔkɔɔ a? Suzu mɔɔ Gyisɛse yɛle wɔ mekɛ mɔɔ ɛnee ɔwɔ azɛlɛ ye azo la anwo.

•   Ɛnee Gyisɛse dwenle menli nwo. Ɔboale mrenyia nee mraalɛ, ngakula nee mgbanyinli ɔnva nwo ɛleka mɔɔ bɛvi anzɛɛ bɛ ezukoa gyinlabelɛ. (Mateyu 9:36; Maake 10:16) Mɔɔ kokobɛvolɛ bie bodole ye kɛ: “Saa ɛkulo a, maa me nwo ɛde” la, alɔbɔlɛ hunle Gyisɛse na ɔyɛle ye ayile.​—Maake 1:40-42.

• Gyisɛse hilele yɛ kɛzi yɛbazɔ Nyamenle anye la. Ɔhanle kɛ: “Bɛnrɛhola bɛnrɛzonle Nyamenle nee Anwonyia.” Eza ɔhanle kɛ ɔwɔ kɛ yɛyɛ menli kɛ mɔɔ yɛkulo kɛ bɛyɛ bɛmaa yɛ la​—ngyinlazo ɛhye a bɛravɛlɛle ye Mɛla Kpalɛ ne la. Bieko, tɛ mɔɔ yɛyɛ la angome a Nyamenle nwu ye a, emomu ɔnwu kɛzi yɛdwenle yɛɛ kɛzi yɛte nganeɛ la noko. Ɔti amaa yɛazɔ Nyamenle anye la, ɔwɔ kɛ yɛkomo yɛ nwo zo wɔ kɛzi yɛte nganeɛ la anwo. (Mateyu 5:28; 6:24; 7:12) Gyisɛse zile zo kɛ amaa yɛanyia anyelielɛ la, ɔwɔ kɛ yɛnwu mɔɔ Nyamenle kulo la na yɛyɛ.​—Luku 11:28.

• Gyisɛse hilele kɛzi bɛda ɛlɔlɛ ali la. Tumi mɔɔ wɔ Gyisɛse edwɛkɛ nee ye nyɛleɛ nu la hanle ye tievolɛma ahonle. “Ye ngilehilelɛ ne zinle menli dɔɔnwo ne anwo, ɔluakɛ ɛnee ɔlɛkilehile bɛ kɛ awie mɔɔ lɛ tumi la.” (Mateyu 7:28, 29) Ɔhilele bɛ kɛ: “Bɛhulo bɛ kpɔvolɛma.” Ɔyɛle asɔne ɔmaanle menli bɔbɔ mɔɔ boale maanle bɛhunle ye la: “Egya, fa kyɛ bɛ ɔluakɛ bɛnze mɔɔ bɛlɛyɛ a.”​—Mateyu 5:44; Luku 23:34.

Gyisɛse a fɛta bɔkɔɔ kɛ ɔdi ewiade ye azo tumi a, ɔdaye a ɔbaboa yɛ na yeala atiakunlukɛnlɛma ali yeahile yɛ a. Noko kenlenzu a ɔbabɔ ɔ bo yeali tumi a?