ADƆMA mɔɔ bɔ zo mɔɔ bɛwo ye la hyia moalɛ tɛla awie biala. Mɔɔ bɛwole yɛ la ɛnee yɛ banebɔlɛ gyi yɛ awovolɛ anwo zo titili. Mɔɔ yɛzukoale ɛdialɛ la, yɛyiale menli mɔɔ bɛwowale bɛtɛla yɛ la. Saa yɛ awovolɛ ɛnle ɛkɛ a, yɛ ahonle tu. Noko saa yɛ mame anzɛɛ yɛ papa sɔ yɛ sa a, yɛte nganeɛ kɛ yɛlɛ banebɔlɛ.

Yɛle ngakula la, ɛnee yɛ boɛlilɛ ne gyi ɛlɔlɛ mɔɔ yɛ awovolɛ da ye ali kile yɛ na bɛmaa yɛ anwosesebɛ la azo. Mɔɔ yɛnwunle kɛ yɛ awovolɛ kulo yɛ la, ɔmaanle yɛdele nganeɛ kɛ yɛlɛ banebɔlɛ kpalɛ. Mɔɔ bɛzele yɛ kɛ yɛlɛbɔ mɔdenle la, ɔmaanle yɛnyianle anwodozo nee anyuhɔlɛ.

Mekɛ mɔɔ yɛlɛnyi la, yɛ gɔnwo mɔ noko bɔle yɛ nwo bane. Yɛ nee bɛ lua a, yɛ ahonle tɔ yɛ azule nu, na bɛmmaa yɛ ahonle ɛndu wɔ sukulu.

Edwɛkɛ ɛhye maa yɛnwu ngakula mɔɔ bɛnleanle bɛ boɛ la. Ngakula bie mɔ nyia agɔnwolɛ ekyii na bɛ nuhua dɔɔnwo awovolɛ ɛnnea bɛ kpalɛ. Melissa ka kɛ, “Mekɛ biala mɔɔ mebanwu abusua mɔɔ bɛbɔ nu bɛlɛyɛ debie nvoninli la, meka ye me ti anu kɛ, ‘Me kunlu a anrɛɛ menyianle ɛhye bie wɔ me ngakula nu.’” * Bie a, kɛ ɛte nganeɛ la ɛne.

Bie a ɛnee ɛnlɛ anwodozo wɔ mekɛ mɔɔ ɛlɛyɛ kpanyinli la. Ɔbayɛ kɛ bɛanla ɛlɔlɛ kpalɛ ali bɛangile wɔ yɛɛ bɛammaa wɔ anwosesebɛ. Ɔbahola yeara ye kɛ ɛkakye kɛzi wɔ awovolɛ ɛnee ko na ɔmaanle bɛ agyalɛ ne zɛkyele la​—ndetenu mɔɔ bie a ɛbɔ ɛ nwo somolɛ. Anzɛɛ mɔɔ ɛnle kpalɛ fee la, bie a ɛnee wɔ awovolɛ ne mɔ anu ko tea wɔ anzɛɛ bo wɔ somaa.

Duzu a kakula mɔɔ ɛnlɛ banebɔlɛ la bayɛ a? Bie mɔ no nyiletane anzɛɛ bɛno nza wɔ mekɛ mɔɔ bɛlɛnyi la. Bie mɔ kɔboka basabasayɛlɛ eku bie anwo amaa bɛade nganeɛ kɛ bɛwɔ abusua nu. Ngakula ɛhye mɔ yɛ ahulo mrenyia nee ahulo mraalɛ. Noko zɛhae agɔnwolɛvalɛ ne ɛngyɛ, na saa bɛ avinli tete a, akee ngyegyelɛ ne yɛ kpole.

Ngakula mɔɔ bɛnlɛ banebɔlɛ mɔɔ bɛkoati esiane ɛhye mɔ la nyi a bɛte nganeɛ kɛ nvasoɛ ɛnle bɛ nwo zo. Ana ka kɛ, “Menliele mendole nu kɛ me nwo ɛnlɛ nvasoɛ, ɔluakɛ ɛhye a ɛnee me mame ka kile me dahuu a. Mengakye kɛ ɔhanvole me anzɛɛ ɔlale ɛhulolɛ ali ɔhilele me.”

 Tɛ kɛzi bɛtetele yɛ la angome a fa ngyegyelɛ ɛhye ba a. Bie a yɛbade nganeɛ kɛ yɛnlɛ banebɔlɛ ɔlua ewolebɔlɛ, mgbanyinliyɛlɛ nu ngyegyelɛ anzɛɛ kɛzi yɛde la anwo adwenleadwenle ti. Kɛ ɔde ye biala la, ɔbahola yeazɛkye yɛ anyelielɛ nee agɔnwolɛvalɛ mɔɔ yɛ nee awie mɔ lɛ la. Duzu a yɛbahola yɛayɛ yɛava yɛali zolɛ konim a?

Ɔwɔ kɛ yɛnwu kɛ moalɛ wɔ ɛkɛ. Yɛ kɔsɔɔti yɛlɛ awie mɔɔ bahola aboa yɛ, awie mɔɔ ɔkulo kɛ ɔboa yɛ, yemɔ a le Nyamenle mumua ne.

Edwɛkɛ mɔɔ Nyamenle luale ye ngapezonli Ayezaya anwo zo hanle la ɛne: “Bɛmmamaa bɛ ahonle tu, medame a mele bɛ Nyamenle a. Mebamaa bɛ anwosesebɛ, mebaboa bɛ, mebava me konimlilɛ tumi ɛsalɛ ne meazɔ bɛ.” (Ayezaya 41:10, 13) Nea kɛzi ɔkyekye yɛ rɛle kɛ Nyamenle kulo kɛ ɔsɔ yɛ sa wɔ sɛkɛlɛneɛ adenle zo la! Ɔnle kɛ yɛmaa yɛ ahonle tu!

Baebolo ne ka Nyamenle azonvolɛ mɔɔ bɛdele nganeɛ kɛ bɛ rɛle ɛbɔ noko bɛzukoale kɛ bɛbazɔ Nyamenle asa la anwo edwɛkɛ. Samoɛle mame, Hana dele nganeɛ kɛ yeyɛ sonla mgbane ɔluakɛ ɛnee ɔnlɛ ralɛ la ati. Kɛmɔ ɔle mota la ati, ɛnee bɛta bɛgolo ɔ nwo. Ɔlua ɛhye ati, ɛnee Hana ɛnli aleɛ na ɔsu fane dɔɔnwo. (1 Samoɛle 1:6, 8) Noko mɔɔ ɔhanle ye ahonle nu edwɛkɛ ɔhilele Nyamenle la, yeanli nyane bieko.​—1 Samoɛle 1:18.

Edwɛndolɛnli Devidi noko dele nganeɛ mekɛ bie kɛ ɔnlɛ banebɔlɛ. Belemgbunli Sɔɔlo bɔle mɔdenle kɛ ɔku ye wɔ ɛvolɛ dɔɔnwo anu. Devidi liele ɔ nwo fane dɔɔnwo ɔnva nwo kɛ ɛnee bɛkpondɛ ye bɛahu ye la, na ɔdwu mekɛ ne bie a, ɔte nganeɛ kɛ ye ngyegyelɛ ne ɛbo ɔ nwo zo. (Edwɛndolɛ 55:3-5; 69:1) Ɛhye mɔ amuala anzi ɔhɛlɛle kɛ: “Akee mebala mealafe anzonudwolɛ nu, ɔluakɛ, wɔmɔ [Gyihova] ala, yɛɛ ɛsinza me a.”​—Edwɛndolɛ 4:8.

Hana nee Devidi vale bɛ ngyegyelɛ ne dole Gyihova anwo zo na bɛnwunle kɛ ɔboale bɛ. (Edwɛndolɛ 55:22) Kɛ ɔkɛyɛ na yɛayɛ zɔ ɛnɛ ɛ?

1. Fa ɛ rɛle wula Gyihova anu kɛ Selɛ.

Gyisɛse dule yɛ folɛ kɛ yɛnwu ɔ Ze ne, mɔɔ le “nɔhalɛ Nyamenle kokye ne” la. (Dwɔn 17:3) Ɛzoanvolɛ Pɔɔlo ka kɛ, “Nyamenle nee yɛ nuhua biala avinli ande biala.” (Gyima ne 17:27) Gyemise hɛlɛle kɛ, “Bɛhwe bɛbikye Nyamenle, na ɔdaye noko ɔkɛbikye bɛ.”​—Gyemise 4:8.

Saa yɛnwu kɛ yɛlɛ anwuma Selɛ mɔɔ kulo yɛ na ɔdwenle yɛ nwo a, ɔbaboa yɛ yɛamaa yɛali adwenleadwenle zo konim. Nɔhalɛ, bie a ɔbalie mekɛ na yɛanyia anwodozo noko menli dɔɔnwo ɛnwu ye kɛ yɛyɛ ɛhye a ɔboa. Caroline ka kɛ, “Mɔɔ Gyihova rayɛle me Ze la, ɔmaanle menyianle awie mɔɔ mekola meka me ahonle nu edwɛkɛ mekile ye a. Ɛhye maanle me nwo dɔle me!”

Rachel ka kɛ, “Gyihova a le awie mɔɔ boale me maanle mendele nganeɛ kɛ melɛ banebɔlɛ wɔ mekɛ mɔɔ me awovolɛ gyakyile me ɛkɛ ne hɔle la. Mekola meka me edwɛkɛ mekile ye na mesɛlɛ ye kɛ ɔli me ngyegyelɛ ne anwo gyima ɔmaa me. Na ɔyɛ ye zɔ noko.” *

2. Kpondɛ abusua mɔɔ bɛkulo Nyamenle.

Gyisɛse hilele ye ɛdoavolɛma ne kɛ bɛnwu ye kɛ bɛle mediema. Ɔzele bɛ kɛ, “Bɛ muala bɛle mediema.” (Mateyu 23:8) Ɛnee ɔkulo kɛ ye nɔhalɛ ɛdoavolɛma kulo bɛ nwo ngoko ngoko na bɛyɛ abusua kpole ko mɔɔ bɛkulo Nyamenle a.​—Mateyu 12:48-50; Dwɔn 13:35.

Gyihova Alasevolɛ asafo ne mɔ a le abusua mɔɔ ɛlɔlɛ wɔ nu na bɛkyekye awie mɔ arɛle a. (Hibuluma 10:24, 25) Menli dɔɔnwo ɛnwu ye kɛ asafo debiezukoalɛ le kɛ ayile bie mɔɔ di bɛ ngyegyelɛ nwo gyima la.

Eva ka kɛ, “Menyianle agɔnwolɛ kpalɛ bie wɔ me asafo ne anu mɔɔ te me nyane bo a. Ɔdiele me, ɔgengale debie ɔhilele me na ɔ nee me yɛle asɔne. Yeammaa me nwo anyɛ me koonwu ɛlɛ. Ɔboale me ɔmaanle menganle mɔɔ gyegye me la amuala mengilele ye na me adesoa ne azo dele. Ɔlua ye moalɛ zo, akee mendele nganeɛ kɛ me nwo ɛdɔ me.” Rachel toa zo kɛ, “Menyianle ‘mame nee papa’ wɔ asafo ne anu. Bɛmaanle mendele nganeɛ kɛ bɛkulo me na melɛ banebɔlɛ.”

 3. Da ɛlɔlɛ nee nyele ali kile awie mɔ.

Saa yɛda ɛlɔlɛ nee nyele ali yɛkile awie mɔ a, ɔmaa yɛnyia agɔnwolɛ kpalɛ. Gyisɛse hanle kɛ: “Nyilalɛ dɔɔnwo wɔ ɛmanlɛ nu tɛla ɛlielɛ.” (Gyima ne 20:35) Na yɛbanwu kɛ saa yɛkulo awie mɔ a, bɛbahulo yɛdayɛ noko. Gyisɛse zele ye ɛdoavolɛma ne kɛ, ‘Bɛmaa bɛ sa ɛdwu awie mɔ anwo zo, na menli noko asa badwu bɛ nwo zo.’​—Luku 6:38.

Saa yɛkulo awie mɔ na bɛdabɛ noko bɛkulo yɛ a, ɔmaa yɛte nganeɛ kɛ yɛlɛ banebɔlɛ. Kɛ mɔɔ Baebolo ne ka la, “ɛhulolɛ ɛmbɔ aze ɛlɛ.” (1 Kɔlentema 13:8) María ka kɛ, “Meze kɛ adwenle mɔɔ ɛndenrɛ mɔɔ menyianle wɔ me nwo la ɛnle nɔhalɛ. Menlile adwenle ɛhye azo konim ɔlua awie mɔ mɔɔ memboale bɛ na menyele me adwenle menvile me ɛdeɛ ne azo la azo. Saa meboa awie mɔ a, ɔmaa me kunlu dwo.”

Ndenle ne mɔ mɔɔ yɛzuzu nwo la ɛnle debie mɔɔ bamaa ɛ nwo adɔ wɔ bɔkɔɔ ɛkɛ ne ala a. Noko bɛkola bɛboa wɔ kpalɛ. Caroline ka kɛ, “Ɔyɛ a mete nganeɛ kɛ menlɛ banebɔlɛ. Noko kɛkala me nwo lɛ nvasoɛ. Meze kɛ Nyamenle dwenle me nwo na melɛ agɔnwolɛma dɔɔnwo mɔɔ bɛmaa mete nganeɛ kɛ melɛ banebɔlɛ a.” Kɛ Rachel noko te nganeɛ la ɛne. Ɔka kɛ, “Ɔyɛ a, alɔbɔlɛ ku me. Noko melɛ mediema mrenyia nee mraalɛ mɔɔ bɛtu me folɛ, na bɛboa me bɛmaa menyia ninyɛne nwo adwenle kpalɛ. Mɔɔ tɛla biala la, melɛ anwuma Selɛ mɔɔ meka me edwɛkɛ mekile ye dahuu a. Ɛhye a boa me a.”

Ye sɔbelɛ kpalɛ wɔ ɛkɛ. Baebolo ne ka ewiade fofolɛ bie mɔɔ ɛlɛba, mɔɔ yɛ nuhua ko biala banyia banebɔlɛ kpalɛ la anwo edwɛkɛ. Nyamenle Edwɛkɛ ne bɔ ɛwɔkɛ kɛ: “Awie biala badɛnla ye vanye egyinli nu, yɛɛ ye feege mbaka bo anzonudwolɛ nu; awie ɛnrɛha bɛ ɛzulolɛ.” (Maeka 4:4) Mekɛ zɔhane, awie biala ɛnrɛde nganeɛ kɛ ɔnlɛ banebɔlɛ yɛɛ awie biala ɛnrɛgyegye yɛ. ‘Yɛnrɛhakye’ ninyɛne mɔɔ maanle yɛlile nyane mekɛ bie mɔɔ ɛze la bieko. (Ayezaya 65:17, 25) Nyamenle nee ɔ Ra, Kelaese Gyisɛse bamaa “tenleneyɛlɛ” adɛnla ɛkɛ. Mɔɔ bavi nu ara la a le kɛ ‘anzodwolɛ nee anwondɔlɛ bara dahuu.’​—Ayezaya 32:17.