Asoo yera ye ɛlɛ kɛ ɛnee ɔyɛ se kɛ ɛbahakye debie mɔɔ ɛzukoale la ɔ? Ɔyɛ a debie zɛhae to yɛ muala. Noko duzu a baboa yɛ a? Ti edwɛkɛ titili mɔɔ wɔ debie mɔɔ wɔzukoa la anu la anu.

Saa ɛlɛsukoa debie a, ɔyɛ a gyinla ekyii na dwenle edwɛkɛ titili mɔɔ wɔ nu la anwo. Nea kɛzi ɛnee ɛzoanvolɛ Pɔɔlo kulo kɛ ɔboa bɛdabɛ mɔɔ bɛ sa hanle ye kɛlata ne la ɔmaa bɛyɛ la. Ɔhɛlɛle kɛ: “Na ɛhye a le edwɛkɛ titili wɔ mɔɔ yɛlɛka la anu a.” (Hib. 8:1) Edwɛkɛ zɔhane mɔɔ ɔhanle la boale ye tievolɛma maanle bɛvale bɛ adwenle bɛlile mɔɔ ɔlɛkilehile nu la anzi na bɛdele kɛzi edwɛkɛ biala mɔɔ ɔhanle la fale ye edwɛkɛ titili ne anwo la.

Ɛbahola wɔagyakyi mekɛ, bie a mitini bulu wɔ wɔ debiezukoalɛ ne awieleɛ, amaa wɔava wɔadwenledwenle edwɛkɛ titili mɔɔ wɔ debie mɔɔ ɛzukoale la anu la anwo. Saa ɛngakye edwɛkɛ titili ne mɔ kpalɛ a, nea edwɛkɛ adile ne mɔ anzɛɛ kenga ɛdendɛkpunli ko biala ɛdendɛmunli mɔɔ limoa la amaa wɔahakye mɔɔ wɔzukoa la. Saa ɛsukoa debie fofolɛ a, bɔ mɔdenle kɛ ɛbava ɛdawɔ mumua ne wɔ edwɛkɛ wɔahilehile nuhua. Saa ɛti edwɛkɛ titili ne mɔ anu a, ɔbaboa wɔ yeamaa wɔahakye yɛɛ eza ɔbamaa wɔanwu kɛzi ɛbava mɔɔ wɔzukoa la wɔali gyima wɔ wɔ ɛbɛlabɔlɛ nu la.