Bɛwole me wɔ 1948 wɔ namule ekyi bie mɔɔ wɔ Nigeria nyiakɛ adɔleɛ la azo. Mekɛ zɔhane a bɛzɔnenle me papa adiema nrenyia kakula Moustapha yɛɛ me diema nrenyia kpanyinli kpalɛ ne, Wahabi kɛ Gyihova Alasevolɛ a. Mɔɔ menlile ɛvolɛ ngɔnla la, me papa wule na ɔyɛle me nyane kpalɛ. Wahabi hanle hilele me kɛ yɛbanwu me Papa bieko wɔ ewudwazo ne anu. Arɛlekyekyelɛ edwɛkɛ zɔhane hanle me maanle menzukoale Baebolo ne. Bɛzɔnenle me 1963. Nzinlii, bɛzɔnenle me mediema mrenyia nsa noko.

Wɔ 1965, mengɔndɛnlanle me diema kpanyinli Wilson anwo lɔ wɔ Lagos na me nye liele kɛ menvale dahuu adekpakyelɛma gyɛne mɔɔ wɔ Igbobi Asafo ne anu agɔnwolɛ la. Kɛzi ɛnee bɛ nye die nee bɛ mɔdenlebɔlɛ ne hanle me na wɔ January 1968, medame noko membayɛle adekpakyelɛnli.

Adiema Albert Olugbebi mɔɔ ɛnee sonle wɔ Bɛtɛle la nee yɛdayɛ mgbavolɛ ne mɔ yɛle ayia titili bie, na ɔhanle kɛzi bɛhyia adekpakyelɛ titilima anwo wɔ Nigeria sɔlɔ la anwo edwɛkɛ. Metɛkakye anyelielɛ edwɛkɛ mɔɔ Adiema Olugbebi hanle la: “Bɛle mgbavolɛ, na bɛbahola bɛava bɛ mekɛ nee bɛ anwosesebɛ bɛamaa Gyihova. Gyima dɔɔnwo wɔ nehane mɔɔ bɛbahola bɛayɛ a!” Kɛmɔ ɛnee mekulo  kɛ mesukoa ngapezonli Ayezaya tunwomaa subane ne la ati, menhyehyɛle kɛlata kɛ mekulo kɛ meyɛ adekpakyelɛ titili gyima ne bie.—Aye. 6:8.

Wɔ May 1968, bɛmaanle mengɔnyɛle adekpakyelɛ titili wɔ suakpole Kano, mɔɔ wɔ Nigeria sɔlɔ la. Mekɛ ɛhye a ɛnee bɛlɛko Biafran Konle ne mɔɔ ɔbɔle ɔ bo wɔ 1967 ɔhɔdwule 1970 la a. Ɛnee konle ne ɛlimoa ɛmaa menli dɔɔnwo ɛlɛnwu amaneɛ na bie mɔ ɛwuwu wɔ Nigeria sɔlɔ kolaa na yeadende yeahɔdwu Nigeria aduduleɛ. Adiema nrenyia bie mɔɔ dwenle me nwo la bɔle mɔdenle kɛ ɔdi me adwenle amaa meangɔ. Noko menganle mengilele ye kɛ: “Meda wɔ ase kɛ ɛdwenle me nwo la. Noko saa Gyihova kulo kɛ mekɔyɛ gyima ɛhye a, medie medi bɔkɔɔ kɛ ɔ nee me balua.”

Ɛnee tɛnlabelɛ mɔɔ wɔ Kano la ɛnle kpalɛ fee. Ɛnee konle ne ɛzɛkye suakpole ɛhye bɔkɔɔ. Saa yɛlua daselɛlilɛ nu a, ɔyɛ a yɛnwu menli mɔɔ bɛhunle bɛ wɔ konle ne anu la avunli. Ɛnee asafo dɔɔnwo wɔ Kano ɛdeɛ, noko mediema ne mɔ dɔɔnwo nriandile vile ɛkɛ. Nolobɔlɛma mɔɔ hale ɛkɛ ne la le kɛyɛ 15, noko ɛnee bɛ ahonle ɛdu yɛɛ bɛ sa nu ɛdo. Mɔɔ yɛdayɛ adekpakyelɛ titilima nsia ne hɔdwule ɛkɛ ne la, mediema ne mɔ anye liele bole zo. Yɛ anwosesebɛmaanlɛ ne boale nolobɔlɛma ne kpalɛ. Yɛboale bɛ yɛmaanle bɛyɛle sunsum nu ninyɛne bieko na bɛbɔle ɔ bo kɛ bɛfa bɛ daselɛlilɛ mgbondabulɛ bɛanwa Bɛtɛle na bɛahɛla mbuluku bieko.

Yɛdayɛ adekpakyelɛma ne bɔle ɔ bo kɛ yɛsukoa Hausa aneɛ ne. Mɔɔ bɛ nuhua dɔɔnwo dele kɛ yɛlɛka Belemgbunlililɛ edwɛkɛ ne wɔ bɛ aneɛ nu la, bɛdiele yɛ. Noko bɛdabɛ mɔɔ bɛwɔ ɛzonlenlɛ mɔɔ ɛlie duma kpalɛ wɔ Kano anu la anye anlie yɛ edwɛkɛhanlɛ gyima ne anwo, ɔti ɛnee ɔwɔ kɛ yɛmaa yɛ nye da ɛkɛ ne kpalɛ. Kenle ko bie, nrenyia bie vale dadeɛ voanle medame nee adiema nrenyia ne mɔɔ me nee ye hɔle daselɛlilɛ la. Yɛ ti mɔɔ yɛle boɛ la a le kɛ, yɛnriandile ndɛndɛ yɛdɛlale ye, ɔti ɔ sa anga yɛ! Ɔnva nwo esiane mɔɔ ɛnee wɔ nu la, Gyihova maanle ‘yɛnyianle banebɔlɛ,’ na nolobɔlɛma ne dodo bɔle ɔ bo hɔle ɔ nyunlu. (Edw. 4:8) Ɛnɛ, nolobɔlɛma mɔɔ bo 500 la a wɔ Kano a, yɛɛ asafo 11 a wɔ ɛkɛ a.

Nzinlii wɔ August 1968, mɔɔ ɛnee medɛnla Kano siane ekyii la, bɛmaanle medame nee adekpakyelɛ titilima nwiɔ gyɛne hɔle Republic of Niger suakpole Niamey azo. Yeangyɛ yɛnwunle kɛ, Niger, mɔɔ wɔ Africa Adɔleɛ la, wɔ ewiade ɛleka mɔɔ dɔ kpalɛ la anu ko anu. Saa ɛye wuluwulu ne mɔɔ ɔwɔ kɛ yɛgyinla ɔ nloa la ɛsie ahane a, ɛnee eza ɔwɔ kɛ yɛsukoa Fenlanze, mɔɔ le aneɛ mɔɔ bɛka wɔ maanle ne anu la. Ɔnva nwo ngyegyelɛ ɛhye mɔ amuala, yɛvale yɛ nwo yɛdole Gyihova anwo zo na yɛ nee nolobɔlɛma ekyi mɔɔ wɔ ɛkɛ ne la bɔle ɔ bo kɛ yɛka edwɛkɛ ne wɔ suakpole ne azo. Wɔ mekɛ ezinraa bie ala anu, ɔbayɛ kɛ ɛnee awie biala mɔɔ wɔ Niamey mɔɔ kola kenga la ɛnyia The Truth That Leads to Eternal Life buluku ne mɔɔ yɛfa yɛsukoa Baebolo ne la bie. Menli bɔbɔ ba yɛ ɛkɛ ne kɛ bɛkpondɛ buluku ne bie!

Yeangyɛ yɛnwunle kɛ, arane mgbanyima ne mɔ anye ɛnlie Gyihova Alasevolɛ ne mɔ anwo. Wɔ July 1969, yɛyɛle maangyebakyi nyianu mɔɔ limoa wɔ maanle ne anu la, na menli 20 a rale a. Ɛnee bɛbazɔne nolobɔlɛma nwiɔ. Noko wɔ nyianu ne kenle mɔɔ limoa la anu, kpolisima rale ɛkɛ na bɛpɛle nyianu ne anu. Bɛvale yɛdayɛ adekpakyelɛ titilima ne nee maangyebakyi zo neavolɛ ne bɛhɔle kpolisitehyɛne. Mɔɔ bɛbizebizale yɛ edwɛkɛ bɛwiele la, akee bɛhanle bɛhilele yɛ kɛ aleɛ kye a, yɛzia yɛrɛla. Yɛnwunle kɛ bɛbava ngyegyelɛ bɛara, ɔti yɛyɛle ngyehyɛleɛ yɛmaanle ɛzɔnenlɛ ɛdendɛlɛ ne wɔ awie sua nu na yɛzɔnenle mediema nwiɔ ne fealeranu wɔ azule bie anu.

Dapɛne ekyii anzi, arane ne hanle kɛ me nee adekpakyelɛ titilima gyɛne nnu ɛvi maanle ne anu. Bɛmaanle yɛ dɔnehwele 48 kɛ yɛva yɛvi ɛkɛ, na ɛnee ɔwɔ kɛ yɛdayɛ a yɛkpondɛ adenle mɔɔ yɛbalua zo yɛavi ɛkɛ ne a. Yɛyɛle ye zɔ na yɛpɛle yɛdɔle Nigeria Bɛtɛle, na bɛmaanle yɛ gyimalilɛ fofolɛ.

Bɛmaanle mengɔle Nigeria namule bie mɔɔ bɛfɛlɛ ye Orisunbare la azo; me nee nolobɔlɛma ekyi bie mɔɔ wɔ ɛkɛ ne la bɔle nu yɛle ɛzonlenlɛ gyima ne na me nye liele kpalɛ. Noko wɔ siane nsia anzi, Bɛtɛle vɛlɛle me kɛ me ngomekye menzia mengɔ Niger. Mɔlebɛbo ne ɔzinle me nwo yɛɛ me ahonle dule ekyi, noko ɛnee me nye la kɛ mebanwu mediema mɔɔ wɔ Niger la bieko!

Menziale mengɔle Niamey. Mendwule nehane la ye alehyenlɛ nu, gualilɛnli bie mɔɔ vi Nigeria la nwunle kɛ mele Dasevolɛ na ɔbɔle ɔ bo kɛ ɔbiza me Baebolo ne anwo kpuya. Me nee ye zukoale debie, na ɔgyakyile sigalɛte nee nza dɔɔnwo ɛnlonlɛ, akee bɛzɔnenle. Yemɔ anzi, me nye liele kɛ me nee mediema bɔle nu yɛle ɛzonlenlɛ gyima ne wɔ Niger ɛleka ngakyile la. Mekɛ guale nu ɛdeɛ noko menli rale nɔhalɛ ne anu. Mɔɔ mengɔle la ɛnee Alasevolɛ 31 a wɔ maanle ne anu, noko mefi ɛkɛ ne la ɛnee bɛle 69.

Wɔ December 1977, menziale membale Nigeria membanliele ndetelɛ bie. Mɔɔ dapɛne nsa ndetelɛ ɛhye rale awieleɛ la, Ɔfese Kɔmatii ne avinli ngitanwodivolɛ  ne, Malcolm Vigo, maanle mengengale kɛlata bie mɔɔ vi Sierra Leone Bɛtɛle ne la. Ɛnee mediema ne mɔ ɛlɛkpondɛ adiema nrenyia adekpakyelɛnli mɔɔ ɛtɛgyale mɔɔ ɔte kpɔkɛ na ɔkola ɔka Nrelenza nee Fenlanze la bɛamaa yeahɔyɛ maangyebakyi zo neavolɛ wɔ Guinea. Adiema Vigo hanle hilele me kɛ ɛhye ati a bɛtetele me a. Ɔhilehilele nu wienyi ɔhilele me kɛ ɔle gyima ɛsesebɛ. Ɔhanle ɔhilele me kɛ: “Dwenle nwolɛ kpalɛ kolaa na wɔalie wɔado nu.” Membuale ye ɛkɛ ne ala kɛ, “Kɛmɔ Gyihova a ɛlɛsoa me la ati, mebahɔ.”

Menvale alopile mengɔle Sierra Leone na me nee mediema mɔɔ wɔ Bɛtɛle ɛkɛ ne la yiale. Ɔfese Kɔmatii ne anu sonla ko hanle hilele me kɛ, “Yɛnze kɛzi Belemgbunlililɛ gyima ne ɛlɛkɔ ye wɔ Guinea la anwo edwɛkɛ dɔɔnwo.” Ɛnee Sierra Leone Bɛtɛle ne a nea edwɛkɛhanlɛ gyima mɔɔ bɛyɛ wɔ Guinea la azo a, noko ɔlua maanyɛlɛ nu ngyegyelɛ mɔɔ ɛlɛkɔ zo wɔ Guinea la ati, ɛnee bɛngola bɛ nee nolobɔlɛma ne ɛnli adwelie. Na Bɛtɛle bɔle mɔdenle biala, noko yeangola yeanzoa awie wɔ Guinea. Ɔti bɛhanle kɛ mengɔ Guinea suakpole Conakry azo na membɔ mɔdenle kɛ saa arane ne bamaa me adenle yeamaa meadɛnla maanle ne anu a.

Mɔɔ mendwule Conakry la, mengɔnwunle Nigeria arane ne agyakɛnugyinlavolɛ ne mɔɔ wɔ ɛkɛ ne la. Menganle kɛzi mekulo kɛ meka edwɛkɛ ne wɔ Guinea la mengilele ye. Ɔhanle ɔhilele me kɛ memmatɛnla ɛkɛ anrɛɛ bɛbahye me anzɛɛ bɛbayɛ me ɛtane. Ɔhanle kɛ, “Sia kɔ Nigeria na kɔha edwɛkɛ ne wɔ lɔ,” na menganle kɛ, “Mezi kpɔkɛ kɛ metɛnla ɛke.” Ɔti ɔhɛlɛle kɛlata ɔhɔmaanle Guinea arane nu kpanyinli bie kɛ ɔboa me, na arane nu kpanyinli ne boale me.

Yeangyɛ biala, menziale mengɔle Sierra Leone Bɛtɛle na menganle arane nu kpanyinli ne kpɔkɛzilɛ ne mengilele bɛ. Mɔɔ mediema ne mɔ dele kɛ Gyihova ɛyila me adendulɛ ne azo la, bɛvale anyelielɛ bɛdeɛdeanle nu. Arane ne maanle me adenle kɛ mendɛnla Guinea!

Ɔvi 1978 kɔdwu 1989, menyɛle maangyebakyi zo neavolɛ wɔ Guinea, Sierra Leone, yɛɛ mengyinlanle maangyebakyi zo neavolɛ ne agyakɛ anu wɔ Liberia. Mɔlebɛbo ne, ɛnee me nwo ta toto me. Ɛnee mekɔ namunamu ne mɔ anu a yɛɛ me nwo ta toto me a. Noko mediema ne mɔ bɔ mɔdenle biala mɔɔ bɛbahola la fa me kɔ asopiti.

Mekɛ bie, ebunlu hyele me kpole bie yɛɛ azone rale me kunlu. Nzinlii mɔɔ mendele kpɔkɛ la, mendele kɛ amuanrɛɛ ɛnee mediema ne mɔ ɛlɛsuzu ɛleka mɔɔ bɛbazie me la anwo! Ɔnva nwo ngyegyelɛ ɛhye mɔ amuala, meannyia adwenle ɛlɛ kɛ mekulo kɛ megyakyi me gyimalilɛ ne mesie ɛkɛ. Na menliele menlile dahuu kɛ, Nyamenle ne mɔɔ kola dwazo yɛ fi ewule nu la a maa yɛnyia banebɔlɛ kpalɛ mɔɔ wɔ ɛkɛ ne dahuu a.

Wɔ 1988, menyiale Dorcas, adiema raalɛ adekpakyelɛnli bie mɔɔ le bɛlɛvo na ɔ nye die sunsum nu ninyɛne nwo la. Yɛgyale, na ɔrabokale me nwo wɔ maangyebakyi gyimalilɛ ne anu. Dorcas ɛhile kɛ ɔle yelɛ mɔɔ lɛ ɛlɔlɛ na ɔlɛ ɛhulolɛ kɛ ɔbava ninyɛne yeabɔ afɔle a. Saa yɛlɛkpɔlɔkpɔla asafo  ne mɔ a, yɛ mu nwiɔ yɛsoa yɛ baage ne mɔ na yɛtia adenle kɛyɛ kilomita 25 (mayɛlɛ 15). Saa yɛlɛkɔ asafo mɔɔ bɛwɔ moa kpalɛ la anu a, yɛfa kale, moto anzɛɛ debie biala mɔɔ yɛbanyia la yɛpɛ adenle mɔɔ ɔle ndɛtɛlɛ na ahuma dɔɔnwo wɔ nu la too yɛkɔdwu.

Dorcas lɛ akɛnrasesebɛ kpalɛ. Kɛ neazo la, ɔyɛ a yɛpɛ azule mɔɔ ɛlɛnrɛne dɔɔnwo wɔ nu la. Wɔ yɛ kenle nnu adendulɛ bie anu, ɛnee ɔwɔ kɛ yɛfa ɛlɛne yɛpɛ azule bie ɔluakɛ belegye ne mɔɔ la azule ne azo la ɛbubu. Mɔɔ Dorcas dwazole kɛ ɔdwu yeavi ɛlɛne ne anu la, ɔdɔle azule ne ɛleka mɔɔ le kuma la anu. Ɛnee yɛ nuhua biala ɛnze azule weɛ, yɛɛ ɛlɛnrɛne wɔ azule zɔhane anu. Yɛ ti mɔɔ yɛle boɛ la a le kɛ, mgbavolɛ bie dɔle azule ne anu na bɛyele ye. Yɛ mu nwiɔ yɛhanle edwɛkɛ ɛhye anwo ɛlalɛ mekɛ ekyii, noko yɛdoale yɛ gyimalilɛ ne azo.

Wɔ 1992 mɔlebɛbo, yɛnwunle kɛ Dorcas ɛlɛnrenzɛ, na ɔzinle yɛ nwo. Asoo yɛ dahuu ɛzonlenlɛ gyima ne awieleɛ ɛne? Yɛzuzule nwo na yɛhanle kɛ, “Gyihova ɛhyɛ yɛ debie!” Ɔti yɛzile kpɔkɛ kɛ yɛbado yɛ ra raalɛ ne Jahgift. Mɔɔ Jahgift lile ɛvolɛ nna la, yɛwole ɔ nzi ralɛ nrenyia, Eric. Amgba yela ali kɛ, yɛ mra ne mɔ le ahyɛlɛdeɛ mɔɔ vi Gyihova ɛkɛ a. Jahgift yɛle gyima mekɛ ekyii wɔ edwɛkɛbohilelɛ ɔfese ne mɔɔ wɔ Conakry la anu yɛɛ Eric le asafo nu sonvolɛ.

Ɛnee ɔwɔ kɛ Dorcas gyakyi adekpakyelɛ titili gyima ne ɛdeɛ, noko ɔhɔle zo ɔyɛle dahuu adekpakyelɛnli wɔ mekɛ bɔbɔ mɔɔ ɔlɛtete yɛ mra ne mɔ la. Ɔlua Gyihova moalɛ zo, mengɔle zo menyɛle dahuu ɛzonlenlɛ gyima titili ne bie. Mɔɔ yɛ mra ne mɔ yɛle mgbanyinli la, Dorcas holale yɛle adekpakyelɛ titili gyima ne bieko. Kɛkala yɛ mu nwiɔ yɛle edwɛkpatɛlɛvolɛma wɔ Conakry.

Mengɔle ɛleka biala mɔɔ Gyihova vale me hɔle la dahuu. Me nee me ye nwunle kɛ ɔbɔle yɛ nwo bane na ɔyilale yɛ dahuu. Kɛmɔ yɛvale yɛ nwo yɛdole Gyihova anwo zo la ati, yeammaa yɛannwu amaneɛ dɔɔnwo mɔɔ bɛdabɛ mɔɔ bɛfa bɛ nwo bɛto anwonyia zo la nwu la bie. Anwubielɛ mɔɔ me nee Dorcas ɛnyia la ɛmaa yɛnwu kɛ, Awie mɔɔ maa yɛnyia banebɔlɛ kpalɛ la a le “yɛ ngoanedievolɛ Nyamenle” Gyihova. (1 Ek. 16:35) Melɛ anwodozo bɔkɔɔ kɛ, bɛdabɛ mɔɔ bɛfa bɛ nwo bɛto Gyihova anwo zo la, ‘ɔbakyekye bɛ ngoane gyɛlɛɛnye wɔ ngoane baage ne anu.’—1 Sa. 25:29.