1. Duzu ati a yɛkola yɛka kɛ debie biala le Gyihova ɛdeɛ a? (Nea mɔlebɛbo nvoninli ne.)

DEBIE biala le Gyihova ɛdeɛ! Ɔdaye a “anwuma nee anwuma anwuma lɔ, nee azɛlɛ ye nee debie biala mɔɔ wɔ zolɛ la le ye ɛdeɛ a.” (Mɛla 10:14; Yek. 4:11) Ɔluakɛ Gyihova a bɔle alesama la ati, yɛ muala yɛle ye ɛdeɛ. (Edw. 100:3) Wɔ alesama tetedwɛkɛ nu, Nyamenle ɛdu menli ekpunli bie ɛzie ɛkɛ kɛ bɛle ye ɛdeɛ wɔ adenle titili zo.

2. Nwane mɔ a Baebolo ne kile kɛ bɛle Gyihova ɛdeɛ wɔ adenle titili zo a?

² Kɛ neazo la, Edwɛndolɛ 135 ka Gyihova nɔhalɛ azonvolɛ mɔɔ ɛnee wɔ tete Yizilayɛ la anwo edwɛkɛ kɛ, “ye ɛdeɛ.” (Edw. 135:4) Bieko, Hozia buluku ne hanle dole ɛkɛ ne kɛ bɛdabɛ mɔɔ bɛnle Yizilayɛma la bayɛ Gyihova menli. (Hozia 2:23) Ngapezo ɛhye rale nu wɔ mekɛ mɔɔ Gyihova bɔle ɔ bo kɛ ɔkpa menli mɔɔ bɛnle Yizilayɛma kɛ bɛ nee Kelaese bali tumi wɔ anwuma la. (Gyi. 10:45; Wlo. 9:23-26) “Maanle nwuanzanwuanza” ɛhye le Gyihova “agyapadeɛ titili” wɔ adenle fofolɛ zo, nuhua menli ne mɔɔ bɛva sunsum nwuanzanwuanza ne bɛkpokpa bɛ la badɛnla anwuma. (1 Pita 2:9, 10) Na Kilisienema mɔɔ bɛdi nɔhalɛ mɔɔ bɛlɛ azɛlɛ ye azo anyelazo ɛnɛ la noko ɛ? Gyihova eza fɛlɛ bɛ ye “menli” yɛɛ  ye ‘menli ne mɔɔ yekpa nu yeye bɛ.’​—Aye. 65:22.

3. (a) Nwane mɔ a Gyihova nee bɛ lɛ agɔnwolɛvalɛ titili ɛnɛ a? (b) Duzu a yɛbazuzu nwo wɔ edwɛkɛ ɛhye anu a?

³ Ɛnɛ, “mboane ekpunli ekyi” ne mɔɔ bɛlɛ anwuma anyelazo, nee “mboane gyɛne” ne mɔɔ bɛlɛ azɛlɛ ye azo anyelazo la ka bɔ nu yɛ “mboane ekpunli ko” mɔɔ Gyihova bu bɛ kɛ bɛle ye menli a. (Luku 12:32; Dwɔn 10:16) Yɛkulo kɛ yɛmaa Gyihova nwu ye kɛ ɔyɛ yɛ fɛ kɛ yɛ nee ye lɛ agɔnwolɛvalɛ titili la. Edwɛkɛ ɛhye bamaa yɛanwu kɛzi yɛbahola yɛahile kɛ yɛ nye sɔ kɛzi Gyihova ɛli yɛ eni kpole zɛhae la.

4. Adenle titili ko boni a yɛbalua zo yɛayɛ Gyihova mo kɛ yemaa yɛva ye agɔnwolɛvalɛ a, na kɛzi Gyisɛse yɛle deɛ ko ne ala bie ɛ?

⁴ Saa yɛfi ahonle kɔsɔɔti anu yɛyila yɛ nwo zo yɛmaa Gyihova na bɛsɔne yɛ a, ɔkile kɛ yɛ nye sɔ ye. Akee awie biala bahola anwu ye kɛ yɛle Gyihova ɛdeɛ na yɛkulo kɛ yɛtie ye. (Hib. 12:9) Gyisɛse yɛle debie zɔhane ala wɔ mekɛ mɔɔ bɛzɔnenle ye bɛwiele la, ɔhanle ɔhilele Gyihova kɛ: “O me Nyamenle, mekulo kɛ meyɛ wɔ ɛhulolɛdeɛ.” (Edw. 40:7, 8.) Gyisɛse rale kɛ ɔbayɛ Gyihova ɛhulolɛdeɛ, ɔnva nwo kɛ bɛwole ye wɔ maanle mɔɔ ɛnee bɛyila bɛ nwo zo bɛmaa Nyamenle anu la.

5, 6. (a) Mɔɔ bɛzɔnenle Gyisɛse la, duzu a Gyihova hanle a? (b) Maa neazo mɔɔ maa yɛte kɛzi Gyihova te nganeɛ wɔ yɛ nwo zo ɛyilalɛ ne anwo abo la.

⁵ Kɛzi Gyihova dele nganeɛ wɔ mekɛ mɔɔ bɛzɔnenle Gyisɛse la ɛ? Baebolo ne ka kɛ: “Mɔɔ bɛzɔnenle Gyisɛse bɛwiele ala la, ɔvi nzule ne anu ɔvindele; na nea! anwuma bukele, na Dwɔn nwunle kɛ Nyamenle sunsum ne ɛlɛdwu kɛ mɔlɔnoma la ara ɔ nwo zo. Akee nea! Ɛnelɛ bie vi anwuma hanle kɛ: ‘Ɛhye a le me Ra mɔɔ mekulo ye, na melie ye medo nu a.’” (Mat. 3:16, 17) Ɛnee Gyisɛse nee ɔ Ze a wɔ anwuma a, noko Gyihova anye liele kɛ ɔnwunle kɛ ɔ Ra ne lɛ ɛhulolɛ kɛ ɔbazonle ɔ ngomekye la. Gyihova die yɛ nwo zo ɛyilalɛ ne noko to nu na ɔbayila yɛ wɔ nwolɛ.​—Edw. 149:4.

⁶ Kɛ neazo la, fa ye kɛ nrenyia bie ɛlua felawɔse ngɛnlɛma dɔɔnwo wɔ ye tola nu. Kenle ko, ɔ ra raalɛ ekyi bie dele felawɔse zɔhane mɔ ko maanle ye papa kɛ ahyɛlɛdeɛ. Asoo felawɔse ne ɛnle nrenyia ne ɛdeɛ dɛba ɔ? Kɛzi ɔkola ɔfa debie mɔɔ ɔle ye ɛdeɛ dɛba la ɔkyɛ ye ɛ? Selɛ mɔɔ lɛ ɛlɔlɛ la ɛnrɛdwenle kpuya ɛhye mɔ anwo bɔbɔ. Emomu, ɔbava anyelielɛ yealie ahyɛlɛdeɛ ɛhye yeavi ɔ ra ne ɛkɛ, ɔluakɛ ɔkile kɛ ɔkulo ye. Ɔ nye balie felawɔse ko ɛhye mɔɔ ɔ ra ne ɛva ɛmaa ye la anwo yeadɛla felawɔse gyɛne biala mɔɔ wɔ ye tola ne anu la. Zɔhane ala a saa yɛyila yɛ nwo zo bɔkɔɔ yɛmaa Gyihova a, ɔ nye die a.​—Ade. 34:14.

7. Kɛzi Malakae zile kɛzi Gyihova te nganeɛ wɔ menli mɔɔ fi ahonle nu sonle ye la azo ɛ?

⁷ Kenga Malakae 3:16. Duzu ati a nwolɛ hyia kɛ ɛbayila ɛ nwo zo wɔamaa Gyihova na bɛazɔne wɔ ɛ? Ɔle nɔhalɛ kɛ ɔvi mekɛ mɔɔ bɛbɔle wɔ la ɛnee ɛle Gyihova wɔ Bɔvolɛ ne ɛdeɛ. Nea kɛzi Gyihova anye balie wɔ mekɛ mɔɔ ɛbalie ye wɔado nu kɛ wɔ Tumivolɛ na wɔayila ɛ nwo zo wɔamaa ye la. (Mrɛ. 23:15) Gyihova noko, nwu menli mɔɔ fi bɛ ɛhulolɛ nu bɛsonle ye la, na ɔkɛlɛ bɛ aluma wɔ “ngakyelɛ buluku” nu.

8, 9. Duzu a Gyihova kpondɛ avi bɛdabɛ mɔɔ bɛ aluma wɔ “ngakyelɛ buluku” ne anu la ɛkɛ a?

⁸ Yɛ duma mɔɔ bɛbahɛlɛ ye wɔ  Gyihova “ngakyelɛ buluku” ne anu kɛ ye menli la fa ɛzonlelilɛ bie mɔ to yɛ nwo zo. Malakae hilele nuhua wienyi kɛ, ɔwɔ kɛ ahenle ‘sulo Gyihova na ɔdwenle ɔ nwo.’ Saa yɛsonle debie gyɛne a ɔbamaa bɛaye yɛ duma bɛavi Gyihova sɛkɛlɛneɛ adenle zo ngoane buluku ne anu.​—Ade. 32:33; Edw. 69:28.

⁹ Ɔti saa yɛbɔ Gyihova ɛwɔkɛ kɛ yɛbayɛ ye ɛhulolɛdeɛ na bɛsɔne yɛ a, ɛnee yɛtɛwiele. Ɛhye le ninyɛne mɔɔ yɛyɛ ye kokye ala, na Gyihova ɛzonlenlɛ le ɛbɛlabɔlɛ adenle. Mekɛ tendenle ala mɔɔ yɛde aze la, ɔwɔ kɛ dahuu yɛfa yɛ nyɛleɛ yɛkile kɛ yɛtie Gyihova.​—1 Pita 4:1, 2.

10. Ngakyile boni a wɔ bɛdabɛ mɔɔ bɛsonle Gyihova nee bɛdabɛ mɔɔ bɛnzonle ye la avinli a?

¹⁰ Edwɛkɛ mɔɔ li ɛhye anyunlu la hanle Keen, Sɔlɔmɔn nee Yizilayɛma anwo edwɛkɛ mɔɔ wɔ Baebolo ne anu la. Bɛ muala bɛhanle kɛ bɛsonle Gyihova, noko bɛangola bɛanzonle ɔ ngomekye. Neazo ɛhye mɔ maa yɛnwu kɛ, saa yɛka kɛ yɛsonle Gyihova a, ɛnee ɔtɛwiele. Ɔwɔ kɛ yɛkyi ɛtane na yɛkulo mɔɔ le kpalɛ la. (Wlo. 12:9) Nzinlii mɔɔ Malakae hanle “ngakyelɛ buluku” ne anwo edwɛkɛ wiele la, Gyihova hanle “ngakyile mɔɔ wɔ sonla mɔɔ di pɛlepɛle nee mɔɔ yɛ amumuyɛ la avinli la, nee ngakyile mɔɔ wɔ sonla mɔɔ sonle Nyamenle nee mɔɔ ɛnzonle Nyamenle la avinli la” anwo edwɛkɛ.​—Mal. 3:18.

11. Duzu ati a ɔwɔ kɛ yɛmaa awie mɔ nwu kɛ yɛdu yɛ nwo yɛmaa Gyihova bɔkɔɔ ɛ?

¹¹ Yɛ nye die kɛ Gyihova ɛkpa yɛ kɛ ye menli la. Ɔwɔ kɛ ‘menli kɔsɔɔti nwu yɛ sunsum nu anyuhɔlɛ ne wienyi.’ (1 Tim. 4:15; Mat. 5:16) Biza ɛ nwo kɛ: ‘Asoo awie mɔ nwu ye kɛ medi nɔhalɛ memaa Gyihova? Asoo ɔyɛ me fɛ kɛ mebamaa awie mɔ anwu kɛ, mele Gyihova Dasevolɛ ɔ?’ Nea kɛzi ɔbayɛ Gyihova nyane kɛ yɛse nyiane kɛ yɛbamaa menli anwu kɛ yɛle ye ɛdeɛ a.​—Edw. 119:46; kenga Maake 8:38.

12, 13. Kɛzi bie mɔ ɛmaa yeyɛ se kɛ bɛbamaa bɛanwu kɛ bɛle Gyihova Alasevolɛ ɛ?

 ¹² Ɔyɛ alɔbolɛ kɛ, Alasevolɛ bie mɔ ɛlɛsukoa “ewiade sunsum” ne la. Ɔti, ɔmmaa bɛnyɛ ngakyile kolaa bɛnvi bɛdabɛ mɔɔ bɛnzonle Gyihova la anwo. “Ewiade sunsum ne” maa menli fa bɛ adwenle sie bɛ nwonane nu atiakunluwɔzo zo. (1 Kɔl. 2:12) Ewiade sunsum ne maa menli di bɛ “nwonane nu atiakunluwɔzo” nzi. (Ɛfɛ. 2:3) Kɛ neazo la, ɔnva nwo folɛdulɛ mɔɔ bɛva bɛmaa yɛ la kɔsɔɔti anzi, bie mɔ kpa kɛ bɛnrɛziezie bɛ nwo kpalɛ. Bɛwula adɛladeɛ mɔɔ kyekye bɛ na ɔmaa bɛ nwo gua ɛkɛ la bɛkɔ Kilisienema ayia bo bɔbɔ. Anzɛɛ bie mɔ pepɛ anzɛɛ yɛ bɛ enrinli wɔ adenle mɔɔ ɛnle kpalɛ la azo. (1 Tim. 2:9, 10) Zɔhane ati, saa bɛwɔ menli nu a, ɔyɛ se kɛ ɛbanwu mɔɔ le Gyihova ɛdeɛ yɛɛ mɔɔ le “ewiade ne agɔnwo” la.​—Gye. 4:4.

¹³ Alasevolɛ bie mɔ ɛtɛyɛle ngakyile kolaa wɔ ewiade ne anwo wɔ ndenle bie mɔ azo. Bɛ agolezilɛ nee bɛ nyɛleɛ wɔ ɛkponledolɛ bo ɛnfɛta Kilisienema. Bɛfa bɛ nvoninli nee bɛ nwo edwɛkɛ bɛgua social media zo bɛfa bɛkile kɛ bɛle nwonane nu menli. Bie a bɛtɛteanle bɛ wɔ Kilisiene asafo ne anu kɛ bɛyɛ ɛtane kpole, noko bɛbahola bɛanyia bɛ mediema mɔɔ ɛlɛbɔ mɔdenle kɛ bɛbayɛ ngakyile bɛavi ewiade ne anwo la anwo zo tumi ɛtane.​—Kenga 1 Pita 2:11, 12.

14. Amaa yɛabɔ yɛ nee Gyihova agɔnwolɛvalɛ ne anwo bane la, duzu a ɔwɔ kɛ yɛyɛ a?

¹⁴ Ewiade ne kanvo “nwonane nu atiakunluwɔzo nee ɛnyelɛzo atiakunluwɔzo nee ɛbɛlabɔlɛ nu ninyɛne mɔɔ awie fa tu ɔ nwo” la kile. (1 Dwɔn 2:16) Noko, kɛmɔ yɛle Gyihova ɛdeɛ la ati, bɛdu yɛ folɛ kɛ “yɛkpo ɛbɛlatane nee ewiade atiakunluwɔzo na [yɛva] adwenle mɔɔ anu la ɛkɛ, tenleneyɛlɛ nee nyamenlezonlenlɛ kpalɛ [yɛdɛnla] kɛkala ewiade ye anu.” (Tae. 2:12) Yɛ ɛbɛlabɔlɛ kɔsɔɔti mɔɔ yɛ ɛdendɛlɛ, aleɛlilɛ, nzanlonlɛ, tɛladeɛ ɛwulalɛ nee gyima mɔɔ yɛyɛ la ɔwɔ kɛ maa awie biala nwu ye wienyi kɛ yɛle Gyihova ɛdeɛ.​—Kenga 1 Kɔlentema 10:31, 32.

15. Duzu ati a ɔwɔ kɛ yɛ nee yɛ gɔnwo mɔ azonvolɛ di ye wɔ atiakunlukɛnlɛma nee ɛlɔlɛ nu ɛ?

¹⁵ Kɛzi yɛ nee yɛ mediema di la kile kɛ yɛ nee Gyihova agɔnwolɛvalɛ ne sonle bolɛ maa yɛ. Bɛdabɛ noko bɛle Gyihova ɛdeɛ. Saa yɛkakye nɔhalɛ edwɛkɛ ɛhye a, ɔbamaa yɛala atiakunlukɛnlɛma nee ɛlɔlɛ ali yɛahile bɛ. (1 Tɛs. 5:15) Gyisɛse zele ye ɛdoavolɛma kɛ: “Saa bɛkulo bɛ nwo a​—menli kɔsɔɔti banwu kɛ bɛle me ɛdoavolɛma.”​—Dwɔn 13:35.

16. Ɛlɔlɛ mɔɔ Gyihova lɛ maa ye menli la anwo debie boni a yɛsukoa yɛfi Mosisi Mɛla ne anu a?

¹⁶ Amaa yɛanwu kɛzi ɔwɔ kɛ yɛ nee awie mɔ di wɔ asafo ne anu la bɛmaa yɛzuzu ɛhye anwo. Bɛyilale ahyɛnze mɔɔ ɛnee wɔ Gyihova ɛzonlenlɛ sua ne anu la azo, anzɛɛ bɛdule bɛziele ɛkɛ bɛmaanle nɔhalɛ ɛzonlenlɛ ala. Mɛla ne hilele kɛzi ɔwɔ kɛ Livaema nea ahyɛnze ne mɔ boɛ la, na awie biala mɔɔ yeanli adehilelɛ ɛhye mɔ azo la bɛku ye. (Ɛdi. 1:50, 51) Saa Gyihova bɔle ninyɛne mɔɔ ngoane ɛnle nu mɔɔ bɛvale bɛlile gyima wɔ ye ɛzonlenlɛ nu anwo bane a, fane nyɛ yɛɛ ɔnrɛbɔ ye nɔhalɛ azonvolɛ mɔɔ bɛyila bɛ nwo zo mɔɔ yekpa bɛ kɛ ye menli la anwo bane a! Gyihova zele ye menli ne kɛ: “Awie mɔɔ kɛva ɔ sa kɛha bɛ la ɛva ɔ nye kuduarizi ne ɛwɔ baka zo.”​—Zɛk. 2:8.

17. Duzu a Gyihova ‘tie na ɔte bie’ a?

¹⁷ Mɔɔ yɛ anyelielɛ la a le kɛ, Malakae hanle kɛ, mekɛ mɔɔ Ye menli ne ɛlɛtu bɛ nwo azukue la, Gyihova “diele bie, yɛɛ ɔdele ɔ muala.” (Mal. 3:16) Nɔhalɛ nu, Gyihova “ze bɛdabɛ mɔɔ bɛle ye ɛdeɛ la.” (2 Tim. 2:19) Ɔze debie biala mɔɔ yɛyɛ nee mɔɔ yɛka la. (Hib. 4:13) Saa yɛanla atiakunlukɛnlɛma ali yɛangile yɛ mediema a, Gyihova nwu ye anzɛɛ ‘ɔtie na ɔte bie.’ Saa yɛdie nyɛvolɛ, yɛyɛ nyele, yɛfa ɛtane yɛkyɛ na yɛda atiakunlukɛnlɛma ali yɛkile yɛ nwo a, yɛdie yɛdi kɛ Gyihova nwu ɔdaye noko.​—Hib. 13:16; 1 Pita 4:8, 9.

18. Kɛzi yɛbahile kɛ yɛ nye die kɛ Gyihova ɛli yɛ eni kɛ ye menli ɛ?

¹⁸ Yɛkulo kɛ yɛmaa Gyihova nwu kɛ yɛ nye die kɛ yɛle ye ɛdeɛ la. Yɛze kɛ, ɔle kpalɛ kɛ yɛzile kpɔkɛ na yɛyilale yɛ nwo zo yɛmaanle ye la. Saa yɛde “awolɛndoazo ɛhye mɔɔ yɛ ɛtane na ɔnyɛ mɔɔ le kpalɛ la” avinli bɔbɔ a, yɛkulo kɛ menli nwu ye kɛ nvonleɛ biala ɛnle [yɛ] nwo, . . . na [yɛta] wɔ bɛ avinli kɛ ahɛnlaneɛ wɔ ewiade.” (Fel. 2:15) Ɔti, yɛbɔ kpɔkɛ kɛ yɛnrɛyɛ debie biala mɔɔ Gyihova kyi la. (Gye. 4:7) Eza yɛkulo yɛ mediema na yɛbu bɛ ɔluakɛ bɛdabɛ noko bɛle Gyihova ɛdeɛ.​—Wlo. 12:10.

19. Kɛzi Gyihova yila bɛdabɛ mɔɔ bɛle ye ɛdeɛ la ɛ?

¹⁹ Baebolo ne bɔ ɛwɔkɛ kɛ: “[Gyihova] arɛle ɛnrɛvi ye menli.” (Edw. 94:14) Ɛhye le ɛwɔkɛ. Ɔnva nwo mɔɔ bazi biala la, Gyihova ɛnrɛgyakyi yɛ. Ewule bɔbɔ ɛnrɛhola ɛnrɛhwe yɛ ɛnrɛvi ɛlɔlɛ mɔɔ Gyihova lɛ maa yɛ la anwo. (Wlo. 8:38, 39) “Saa yɛde aze a, yɛde yɛmaa Gyihova, yɛɛ saa yɛwu a, yɛwu yɛmaa Gyihova. Yemɔti saa yɛde aze o, yɛwu o, yɛle Gyihova ɛdeɛ.” (Wlo. 14:8) Yɛ nye la mekɛ mɔɔ Gyihova badwazo ɔ gɔnwo mɔ nɔhavoma mɔɔ bɛwu amuala la ade ɛsesebɛ. (Mat. 22:32) Kɛkala bɔbɔ, yɛlɛnyia nyilalɛ dɔɔnwo. Kɛ mɔɔ Baebolo ne ka la, “Nyilalɛ ɛha maanle ne mɔɔ [Gyihova le ye Nyamenle la, nyilalɛ ɛha menli ne mɔɔ yeye bɛ yeyɛ bɛ ye menli la.”​—Edw. 33:12.