1, 2. (a) Duzu ati a nrɛlɛbɛ wɔ nu kɛ yɛbagyinla Gyihova afoa a? (b) Duzu a yɛbazuzu nwo wɔ edwɛkɛ ɛhye anu a?

NRƐLƐBƐ wɔ nu kɛ yɛbava yɛ nwo yɛamaa Gyihova. Awie biala ɛnlɛ tumi, ɛnze nrɛlɛbɛ anzɛɛ ɛnlɛ ɛlɔlɛ ɛndɛla yɛ Nyamenle ne! Yɛ nuhua boni a ɔngulo kɛ ɔgyinla ye afoa a? (Edw. 96:4-6) Noko Nyamenle azonvolɛ bie mɔ angola anyɛ zɔ.

² Wɔ edwɛkɛ ɛhye anu, yɛbazuzu menli bie mɔ mɔɔ bɛhanle kɛ bɛwɔ Gyihova afoa, noko bɛyɛle ninyɛne mɔɔ Gyihova kyi la. Ɛzukoalɛdeɛ ngɛnlɛma mɔɔ bamaa yɛava nɔhalɛlilɛ yɛagyinla Gyihova afoa la wɔ edwɛkɛ ɛhye anu.

3. Duzu ati a Gyihova bɔle mɔdenle kɛ ɔboa Keen a? Na duzu a ɔhanle ɔhilele ye a?

³ Fa Keen edwɛkɛ ne kɛ neazo. Yeanga kɛ ɔsonle nyamenle gyɛne biala kɛ Gyihova ala. Noko, Nyamenle anlie Keen ɛzonlenlɛ ne ando nu. Ɛnee ɔlɛnyia amumuyɛyɛlɛ nwo adwenle wɔ ye ahonle nu. (1 Dwɔn 3:12) Gyihova nwunle Keen ahonle nu, na ɔzele ye kɛ: “Asoo saa ɛyɛle ye boɛ a, anrɛɛ ɛ  nyunlu ɛnrɛra anyia? Na wɔanyɛ ye boɛ la, ɛtane ɛhɔ ɛ nwo nzia; ɔkpondɛ kɛ ɔfo ɛ nwo zo, na wɔmɔ yɛɛ ɔwɔ kɛ ɛfo ɔ nwo zo a.” (Mɔl. 4:6, 7) Ɛnee Gyihova ɛlɛka ahile Keen kɛ, “Saa ɛnu ɛ nwo na ɛgyinla me nzi kpundii a, medame noko mebagyinla ɛ nzi.”

4. Keen nyianle adenle kɛ ɔbagyinla Gyihova afoa, noko duzu a ɔyɛle a?

⁴ Saa Keen hakyile ye adwenle a, anrɛɛ Gyihova bamaa ɔ nyunlu ara anyia. Noko, Keen andie folɛdulɛ ne. Adwenle nzuzulɛ nee ye atiakunluwɔzo ɛtane maanle ɔyɛle mɔɔ ɛnle kpalɛ la. (Gye. 1:14, 15) Mɔɔ Keen le kakula la, bie a yeandwenle nwolɛ ɛlɛ kɛ ɔbadwazo yeatia Gyihova. Noko, nzinlii ɔyɛle mɔɔ yeandwenle nwolɛ ɛlɛ la​—ɔdele Nyamenle anwo atua na ɔhunle ɔ diema ne!

5. Adwenle nzuzulɛ boni a ɔnrɛmaa yɛnrɛnyia Gyihova anyunlu ɛlolɛ a?

⁵ Le kɛ Keen la, ɛnɛ noko, Kilisienenli bie bahola ayɛ ninyɛndane wɔ mekɛ mɔɔ ɔse ɔlɛsonle Gyihova la. (Dwu. 11) Kɛ neazo la, awie bahola anyia nla nwo nzuzulɛ ɛtane, ayɛ anyebolo anzɛɛ akpɔ ɔ gɔnwo Kilisienenli. (1 Dwɔn 2:15-17; 3:15) Nzuzulɛ zɛhae kola maa bɛyɛ ɛtane. Noko mekɛ ko ne ala, sonla zɛhae bahola ahɔ daselɛlilɛ kpalɛ nee debiezukoalɛ dahuu. Bie a menli gyɛne ɛnrɛnwu yɛ adwenle nee yɛ nyɛleɛ, noko saa yɛ ahonle nu yɛngyi ye afoa a, Gyihova nwu debie biala yɛɛ ɔze.​—Kenga Gyɛlɛmaya 17:9, 10.

6. Kɛzi Gyihova boa yɛ maa yɛkpo atiakunluwɔzo ɛtane ɛ?

⁶ Yemɔ bɔbɔ, Gyihova ɛmkpo yɛ ɛkɛ ne ala. Saa awie fo Nyamenle adenle ne a, Gyihova tu ye folɛ kɛ: “Bɛzia bɛrɛla me ɛkɛ ne, na medame noko menwɔra bɛ nwo ɛkɛ.” (Mal. 3:7) Gyihova ze kɛ yɛlɛ sinlidɔlɛ mɔɔ yɛlɛbɔ mɔdenle kɛ yɛko yɛatia a. Noko ɔkulo kɛ yɛkyi ɛtane. (Aye. 55:7) Saa yɛyɛ zɔ a, yebɔ ɛwɔkɛ kɛ ɔbaboa yɛ na yɛamaa yɛ anwosesebɛ mɔɔ yɛhyia amaa yɛahola yɛakpo atiakunluwɔzo ɛtane la.​—Mɔl. 4:7.

7. Kɛzi Sɔlɔmɔn zɛkyele ɔ nee Gyihova agɔnwolɛvalɛ ne ɛ?

⁷ Yɛbahola yɛazukoa ninyɛne dɔɔnwo yɛavi Belemgbunli Sɔlɔmɔn edwɛkɛ ne anu. Mɔɔ Sɔlɔmɔn le kakula la, ɔmaanle Gyihova hilele ye adenle. Nyamenle maanle ye nrɛlɛbɛ kpole na ɔmaanle ye gyima kɛ ɔzi Gyɛlusalɛm ɛzonlenlɛ sua kɛnlɛma ne. Noko Sɔlɔmɔn zɛkyele ɔ nee Gyihova agɔnwolɛvalɛ ne. (1 Arl. 3:12; 11:1, 2) Nyamenle Mɛla ne tua Hibulu belemgbunli kɛ, ɔmmagya “mraalɛ dɔɔnwo, ɔboalekɛ ɛhye bamaa ɔ rɛle avi [Gyihova] ye Nyamenle ne.” (Mɛla 17:17) Sɔlɔmɔn andie, awieleɛ bɔkɔɔ ne ɔgyale mraalɛ 700. Yɛɛ ɔvale mgbɔnla 300 noko ɔrale ye sua nu. (1 Arl. 11:3) Ɔ ye mɔ dɔɔnwo ɛnle Yizilayɛma, na bɛsonle awozonle. Ɔti, Sɔlɔmɔn andie Nyamenle mɛla mɔɔ tua nyɛvolɛ mraalɛ agyalɛ la.​—Mɛla 7:3, 4.

8. Kɛzi Sɔlɔmɔn yɛle ɛtane tiale Gyihova ɛ?

⁸ Gyihova mɛla mɔɔ ngyikyi ngyikyi Sɔlɔmɔn hwenle ɔ nwo vile nwo la maanle ɔyɛle ɛtane mgbole dɔɔnwo. Sɔlɔmɔn zile afɔlemokyea maanle bozonle raalɛ Asetate yɛɛ yeanyɛ boɛ fee la, ɔzile ko noko ɔmaanle bozonle Kimɔhye. Ɔ nee ɔ ye mɔ zonlenle awozonle wɔ ɛkɛ. Sɔlɔmɔn sisile afɔlemokyea ɛhye mɔ bɔbɔ wɔ boka bie mɔɔ wɔ Gyɛlusalɛm anyunlu, ɛleka mɔɔ ɔzile Gyihova ɛzonlenlɛ sua ne la! (1 Arl. 11:5-8; 2 Arl. 23:13) Bie a Sɔlɔmɔn bɛlɛbɛlale ɔ nwo dwenlenle kɛ suzuamgba la mɔɔ ɔtɛkɔ  zo ɔtɛbɔ afɔle wɔ ɛzonlenlɛ sua ne anu la, Gyihova babu ɔ nye agua ye ɛtane ne mɔ azo.

9. Duzu a vile Nyamenle kɔkɔbɔlɛ mɔɔ Sɔlɔmɔn andie la anu rale a?

⁹ Noko Gyihova ɛmbu ɔ nye ɛngua ɛtaneyɛlɛ zo. Baebolo ne ka kɛ: “Zɔhane ati [Gyihova] vale Sɔlɔmɔn anwo ɛya. Ɔboalekɛ Sɔlɔmɔn ɛhakyi ɔ nzi ɛzi [Gyihova], . . . . mɔɔ ɛye ɔ nwo ɛhile ye fane nwiɔ, ɛha ɛhile ye kɛ ɔmmasonle Nyamenle gyɛne bie ɔboka ɔ nwo la. Sɔlɔmɔn anli [Gyihova] mɛla zo.” Ɔti, Nyamenle anlie ye ando nu bieko yɛɛ yeamboa ye. Menli mɔɔ lile Sɔlɔmɔn agya la belemgbunlililɛ ne anu hyehyɛle na ɔmaanle bɛyiale ngyegyelɛ dɔɔnwo wɔ awolɛndoazo mɔɔ rale la anu.​—1 Arl. 11:9-13.

10. Duzu a bahola azɛkye agɔnwolɛvalɛ kpalɛ mɔɔ yɛ nee Gyihova lɛ la ɛ?

¹⁰ Sɔlɔmɔn edwɛkɛ ne maa yɛnwu kɛ, saa awie fa menli mɔɔ bɛnde Gyihova ngyinlazo ne mɔ abo anzɛɛ bɛmbu bɛ la agɔnwolɛ a, ɔkola ɔsɛkye ye sunsum nu gyinlabelɛ. Bie mɔ wɔ asafo ne anu, noko bɛ nee Gyihova ɛnlɛ agɔnwolɛvalɛ kpalɛ. Bie a bɛle yɛ mbusuafoɔ, yɛ kpalɛzoamra, yɛ gɔnwo mɔ gyimayɛvoma anzɛɛ sukuluma mɔɔ bɛnzonle Gyihova. Saa menli mɔɔ yɛ nee bɛ tu la ɛnva Gyihova ngyinlazo ne mɔ ɛmbɔ bɛ ɛbɛla a, bɛbahola bɛazɛkye yɛ nee Gyihova agɔnwolɛvalɛ ne.

11. Duzu a bahola aboa yɛ amaa yɛakpa agɔnwolɛma ɛ?

¹¹ Kenga 1 Kɔlentema 15:33. Menli dɔɔnwo lɛ subane mgbalɛ bie mɔ. Yɛɛ tɛ mekɛ ne amuala a menli mɔɔ ɛnzonle Gyihova la yɛ ninyɛndane a. Bie a ɛze menli mɔɔ le zɔhane la bie mɔ. Asoo ɛhye kile kɛ bɛle agɔnwolɛma kpalɛ ɔ? Kɛzi bɛka ɛ nee Gyihova agɔnwolɛvalɛ ne ɛ? Bɛboa wɔ bɛmaa ɛbikye Nyamenle ɔ? Duzu a nwolɛ hyia bɛ a? Kɛ neazo la, asoo adɛladeɛ fofolɛ, ezukoa, milahyinli, anyelielɛ ninyɛne anzɛɛ nwonane afoa nu ninyɛne ɛkpondɛlɛ ala a bɛta bɛka nwolɛ edwɛkɛ ɔ? Asoo ɔyɛ a bɛta bɛka awie mɔ anwo edwɛkɛ ɛtane anzɛɛ bɛbɔ ngoayɛ mgbane mgbane ɔ? Gyisɛse bɔle kɔkɔ kɛ: “Mɔɔ ɛyi ahonle nu la a finde bɛ nloa a.” (Mat. 12:34) Saa ɛnwu kɛ menli mɔɔ ɛ nee bɛ tu la ɛlɛmaa ɛ nee Gyihova agɔnwolɛvalɛ ne azɛkye a, yɛ nwolɛ debie! Te mekɛ mɔɔ ɛfa ɛ nee bɛ tu la azo, saa ɔbayɛ boɛ a pɛ agɔnwolɛvalɛ ne azo.​—Mrɛ. 13:20.

12. (a) Yizilayɛma vile Yigyibiti la anzi mekɛ ekyi la, duzu a Gyihova hanle hilele bɛ a? (b) Mɔɔ Gyihova hanle kɛ bɛzonle ɔ ngomekye la, duzu a Yizilayɛma hanle a?

¹² Yɛbahola yɛanyia ɛzukoalɛdeɛ  ngɛnlɛma yɛavi mɔɔ zile mekɛ ekyi ɔvi mekɛ mɔɔ bɛliele Yizilayɛma bɛvile Yigyibiti la anzi. Menli ne boɔboale bɛ nloa wɔ Boka Saenae anyunlu. Gyihova yele ɔ nwo hilele bɛ wɔ nwanwane adenle zo. Amungu kumɔɔnwo hedale boka ne azo. Gyihova maanle ezule hulule na maanle nu vedevedele, esike vindele yɛɛ ɛnee ɔzɔho kɛ bɛlɛwu aweɛne tendenle nu. (Ade. 19:16-19) Gyihova maanle Yizilayɛma nwunle kɛ ɔle “nungule Nyamenle.” Ɔbɔle bɛ ɛwɔkɛ kɛ ɔbali nɔhalɛ yeamaa bɛdabɛ mɔɔ bɛkulo ye na bɛdi ye mɛla zo la. (Kenga Adendulɛ 20:1-6.) Ɛnee Gyihova ɛlɛka ahile ye menli ne kɛ, ‘Saa bɛsia bɛba me ɛkɛ ne a, medame noko menwɔra bɛ nwo ɛkɛ.’ Saa ɛnee ɛboka ɛlɔnema ne anwo a anrɛɛ kɛzi ɛbade nganeɛ wɔ mekɛ mɔɔ ɛdele Gyihova ane la ɛ? Bie a anrɛɛ ɛbabua kɛ Yizilayɛma mɔɔ hanle kɛ: “Edwɛkɛ biala mɔɔ [Gyihova] ɛha la, yɛbali zolɛ.”’ (Ade. 24:3) Noko yeangyɛ, debie bie zile mɔɔ zɔle Yizilayɛma nɔhalɛlilɛ ne nleanle a.

13. Duzu a zɔle Yizilayɛma nɔhalɛlilɛ ne nleanle a?

¹³ Amungu kumɔɔnwo ne, maanle nu mɔɔ vedevedele nee nwanwane sɛkɛlɛneɛ gyɛne mɔɔ Nyamenle maanle Yizilayɛma nwunle ye la dule bɛ ahonle. Bɛzele Mosisi kɛ ɔgyinla bɛ gyakɛ anu ɔ nee Gyihova ɛdendɛ wɔ Boka Saenae azo. (Ade. 20:18-21) Mosisi hyɛle wɔ boka ne azo. Ɔzɔho kɛ mɔɔ ɛnee Yizilayɛma adekilevolɛ ne ɛnle bɛ avinli la, bɛ nye zo danle bɛ wɔ fienemgbole ne anu. Duzu a bɛbayɛ a? Bie a Yizilayɛma vale bɛ nwo dole Mosisi mɔɔ ɛnee li bɛ nyunlu la anwo zo somaa. Ɔyɛle bɛ adwenleadwenle na bɛzele Aalɔn kɛ: “Yɛ nyamenle maa ɔli yɛ nyunlu, ɔluakɛ Mosisi ɛhye, mɔɔ yemɔ a le sonla mɔɔ yele yɛ vile Yigyibiti azɛlɛ zo la, yɛnze mɔɔ kɛkala ɛzi ɔ nwo zo a.”​—Ade. 32:1, 2.

14. Adwenle boni a Yizilayɛma nyianle a, na duzu a Gyihova yɛle a?

¹⁴ Ɛnee Yizilayɛma ze kɛ Gyihova kyi awozonlezonlenlɛ. (Ade. 20:3-5) Noko yeangyɛ, bɛbɔle ɔ bo kɛ bɛsonle ezukoa nvutuke ɛnlankɛ ralɛ! Ɔnva nwo kɛ bɛyɛle anzosesebɛ la, Yizilayɛma ne bɛlɛbɛlale bɛ nwo dwenlenle kɛ bɛtɛbɔ Gyihova afoa. Aalɔn bɔbɔ hanle kɛ ɛnlankɛ ralɛ ɛzonlenlɛ ne le, ‘ɛvoyia kpole mɔɔ bɛdi bɛawula Gyihova anyunlunyia.’ Duzu a Gyihova yɛle a? Gyihova zele Mosisi kɛ, menli ne “ɛyɛ ɛtane” na “adenle ne mɔɔ [Ɔhilele] bɛ kɛ bɛlua nu la, bɛanlua nuhua.” Gyihova vale “ɛya” kpole, ɔti, ɔdwenlenle nwolɛ kɛ ɔsɛkye maanle ne amuala.​—Ade. 32:5-10.

15, 16. Kɛzi Mosisi nee Aalɔn hilele kɛ ɛnee bɛgyi Gyihova afoa kpundii ɛ? (Nea mɔlebɛbo nvoninli ne.)

¹⁵ Noko Gyihova le anwunvɔnezelɛ Nyamenle. Ɔzile kpɔkɛ kɛ ɔnrɛzɛkye maanle ne. Emomu, ɔmaanle Yizilayɛma adenle kɛ bɛhile kɛ bɛwɔ ye afoa. (Ade. 32:14) Mɔɔ Mosisi nwunle kɛ menli ne anye ɛlie kpalɛ​—bɛlɛteɛdea nu, bɛlɛto edwɛne na bɛazi agole wɔ abaaba ne anyunlu la​—ɔdinle ɛnlankɛ ananze ne ɔmaanle ɔyɛle motomoto kɛ munlutu. Akee ɔhanle kɛ: “Awie biala mɔɔ wɔ [Gyihova] afoa la ɛrɛla.” Ɛhye ati, “Livaema ne kɔsɔɔti pianle bɛ nwo hɔle [Mosisi] afoa.”​—Ade. 32:17-20, 26.

¹⁶ Ɔnva nwo kɛ Aalɔn a yɛle ananze ne la, ɔnlunle ɔ nwo na ɔhɔbokale Livaema ne anwo bɛgyinlanle Gyihova  afoa. Nɔhavoma ɛhye mɔ hilele kɛ bɛnle ɛtanevolɛma ne afoa. Bɛyɛle bɛ debie nrɛlɛbɛ nu; kenle zɔhane menli apenle dɔɔnwo wule ɔluakɛ bɛzonlenle awozonle. Noko, bɛdabɛ mɔɔ ɛnee bɛwɔ Gyihova afoa la nyianle nyilalɛ.​—Ade. 32:27-29.

17. Duzu a yɛsukoa yɛfi ɛnlankɛ ananze nwo edwɛkɛ ne mɔɔ Pɔɔlo hanle la anu a?

¹⁷ Ɛzoanvolɛ Pɔɔlo hwenle adwenle hɔle ɛnlankɛ ralɛ nvutuke edwɛkɛ ne azo na ɔbɔle kɔkɔ kɛ: “Ninyɛne ɛhye mɔ yɛle neazo maanle yɛ, amaa yɛ ti akunlu amba ninyɛndane ɛyɛlɛ zo, . . . Bɛmmasonle awozonle kɛ mɔɔ bɛ nuhua bie mɔ yɛle la. Neazo [ɛhye mɔ], bɛhɛlɛ kɛ bɛfa bɛabɔ yɛdayɛ mɔɔ yɛwɔ ewiade ɛhye awieleɛ mekɛ ne anu la kɔkɔ. Ɔti, mɔɔ dwenle kɛ ɔgyi ɛkɛ la ɛnlea boɛ na yeandɔ aze.” (1 Kɔl. 10:6, 7, 11, 12) Pɔɔlo hanle kɛ nɔhalɛ azonvolɛ bɔbɔ bahola ayɛ ninyɛndane. Bie a bɛdabɛ mɔɔ bɛyɛ ɛtane la banyia adwenle kɛ bɛtɛdɛ gyinlabelɛ kpalɛ wɔ Gyihova anyunlu. Noko saa awie kulo kɛ ɔyɛ Gyihova agɔnwo anzɛɛ ɔka kɛ ɔdi nɔhalɛ ɔmaa ye a, ɔngile kɛ Gyihova die ye to nu dahuu.​—1 Kɔl. 10:1-5.

18. Duzu a bahola amaa yɛahwe yɛ nwo yɛavi Gyihova anwo a? Na duzu a bavi nu ara a?

¹⁸ Mɔɔ Mosisi hyɛle Saenae azo la, adwenleadwenle dɔle Yizilayɛma anwo. Saa ewiade ɛhye ɛzɛkyelɛ ne amba ndɛ kɛ mɔɔ yɛ nye la a, bie a yɛdayɛ noko yɛbadwenle nwo. Bie a yɛbabɔ ɔ bo yɛanyia adwenle kɛ kenle bie ɛwɔkɛ kɛnlɛma mɔɔ Gyihova ɛbɔ yɛ la bahyɛ na yeara nu anzɛɛ bie a ɔnle nɔhalɛ, na yɛabɔ ɔ bo kɛ yɛfa yɛ adwenle yɛazie mɔɔ yɛkulo na tɛ mɔɔ Gyihova kulo la azo. Saa yɛanlea boɛ a, yɛbahwe yɛ nwo yɛavi Gyihova anwo na yɛayɛ ninyɛne mɔɔ yɛtɛdwenlenle nwolɛ ɛlɛ kɛ yɛbayɛ la.

19. Duzu a ɔwɔ kɛ yɛkakye ye dahuu a, na duzu ati ɔ?

¹⁹ Gyihova kulo kɛ yɛtie ye bɔkɔɔ na yɛsonle ɔ ngomekye ala. (Ade. 20:5) Saa yɛtwe yɛ nwo yɛfi Gyihova ɛzonlenlɛ nwo a, ɔkile kɛ yɛlɛyɛ Seetan ɛhulolɛdeɛ na ɛhye bayɛ esiane amaa yɛ. Ɛhye ati, Pɔɔlo hakyele yɛ kɛ: “Bɛnrɛhola bɛnrɛnlo Gyihova kanrɛlɛ nu na bɛanlo sunsum ɛtane kanrɛlɛ nu; bɛnrɛhola bɛnrɛli aleɛ wɔ ‘Gyihova ɛkponle zo’ na eza bɛali aleɛ wɔ sunsum ɛtane ɛkponle zo.”​—1 Kɔl. 10:21.

20. Saa yɛyɛ ɛtane bɔbɔ a, kɛzi Gyihova boa yɛ ɛ?

²⁰ Anrɛɛ Keen, Sɔlɔmɔn nee Yizilayɛma amuala bahola anlu bɛ nwo na bɛahakyi bɛ subane. (Gyi. 3:19) Ɔda ali kɛ Gyihova ɛmkpo bɛdabɛ mɔɔ bɛyɛ ɛtane la ndɛndɛ. Gyihova vale Aalɔn ɛtane hyɛle ye. Ɛnɛ noko, Gyihova dua Baebolo ne nee yɛ mbuluku ne mɔ azo bɔ yɛ kɔkɔ anzɛɛ yɛ gɔnwo Kilisienenli bie anwo zo tu yɛ folɛ. Saa yɛtie kɔkɔbɔlɛ ɛhye mɔ a, Gyihova baze yɛ anwunvɔne.

21. Saa bɛsɔ nɔhalɛ mɔɔ yɛdi yɛmaa Gyihova la bɛnea a, duzu a ɔwɔ kɛ yɛbɔ kpɔkɛ kɛ yɛbayɛ a?

²¹ Gyihova ɛlolɛ ne lɛ ye bodane. (2 Kɔl. 6:1) Ɔmaa “yɛkpo ɛbɛlatane nee ewiade atiakunluwɔzo.” (Kenga Taetɛse 2:11-14.) Mekɛ tendenle ala mɔɔ yɛde “kɛkala ewiade ye anu” la, yɛbayia tɛnlabelɛ mɔɔ bazɔ ɛzonlenlɛ mɔɔ yɛlɛfa yɛamaa Gyihova angomekye la anlea. Ɔwɔ kɛ dahuu yɛsiezie yɛ nwo kɛ yɛbagyinla ye afoa, ɔluakɛ ɔwɔ kɛ ‘yɛsulo Gyihova yɛ Nyamenle ne, yɛsonle ye na yɛfa yɛ nwo yɛmaa ye’!​—Mɛla 10:20.